საქართველომ შეძლო არამხოლოდ ეკონომიკური მდგრადობის შენარჩუნება, არამედ ზედიზედ, ორი წლის განმავლობაში ორნიშნა ეკონომიკური ზრდის უზრუნველყოფა – 2022 და მიმდინარე 2023 წელი ეკონომიკის თითქმის ყველა მიმართულებით იყო მნიშვნელოვანი გაჯანსაღებისა და გაუმჯობესებების წელი. 2022 წელს დაფიქსირდა ექსპორტის, ტურიზმიდან მიღებული შემოსავლებისა და პირდაპირი უცხოური ინვესტიციების რეკორდული მოცულობა. ეკონომიკური ზრდის დინამიკა 2023 წელსაც გრძელდება – იანვარ-აგვისტოს საშუალო ეკონომიკური ზრდა 7%-ს შეადგენს, – ამის შესახებ ეკონომიკის მინისტრმა ლევან დავითაშვილმა საქართველოს პარლამენტში განაცხადა.

მინისტრის თქმით, ისტორიულ მინიმუმამდე შემცირდა გასულ წელს ქვეყანაში სიღარიბისა და უმუშევრობის დონე, ამასთან, გაძლიერდა პოზიტიური ტენდენციები შრომის ბაზარზე. მისივე განცხადებით, შედეგად, 2023 წლის პირველ და მეორე კვარტალში 1.4 პროცენტული პუნქტით შემცირდა უმუშევრობის დონე წლიურად, პარალელურად, გაიზარდა სამუშაო ძალისა და დასაქმების მაჩვენებლები.

„შეგვიძლია ვთქვათ, რომ ბოლო ათი წლის განმავლობაში სიღარიბე ფაქტობრივად, განახევრდა, თუმცა, უმუშევრობა და სიღარიბის კიდევ უფრო შემცირება ჩვენი ერთ-ერთი მთავარი ამოცანაა – სწორედ აქეთაა მიმართული ჩვენი ეკონომიკური პოლიტიკა, რომელიც გულისხმობს კერძო სექტორის კონკურენტუნარიანობის გაძლიერებას, სტრუქტურული რეფორმების გატარებას, საექსპორტო პოტენციალის გაფართოებასა და ვაჭრობის ხარისხობრივ გაუმჯობესებას. ის ასევე მოიცავს ენერგოუსაფრთხოების ხელშეწყობას, ქვეყნის ეკონომიკური ფუნქციების დივერსიფიკაციას, ახალი შესაძლებლობების ეფექტიან გამოყენებას და, რაც მთავარია, ევროკავშირთან დაკავშირებადობის გაუმჯობესებას“, – განაცხადა მინისტრმა.

ვიცე-პრემიერმა ხაზი გაუსვა რამდენიმე მნიშვნელოვან საერთაშორისო შეფასებასა და კვლევას, რომლებიც, მისი თქმით, საქართველოს პროგრესს ადასტურებენ, განსაკუთრებით მცირე და საშუალო ბიზნესის კონკურენტუნარიანობის გაუმჯობესების მიმართულებით. მისი თქმით, OECD-ის „მცირე და საშუალო ბიზნესის პოლიტიკის ინდექსში“ საქართველო კვლავ ლიდერია აღმოსავლეთ პარტნიორობის ქვეყნებს შორის ისეთ კომპონენტებში, როგორიცაა ინსტიტუციური და მარეგულირებელი ჩარჩო, ოპერაციული გარემო, მცირე და საშუალო მეწარმეობის უნარები, სამეწარმეო სწავლება და ქალთა მეწარმეობა, ფინანსებზე ხელმისაწვდომობა, ბიზნესის ხელშემწყობი სერვისები, სტანდარტები და ტექნიკური რეგულაციები, ინოვაციური პოლიტიკა და ა.შ.

„მიმდინარე გამოწვევების მიუხედავად, საქართველომ შეძლო სუვერენული საკრედიტო რეიტინგის შენარჩუნება იმ ფონზე, როცა არაერთი ქვეყნის საკრედიტო რეიტინგი გაუარესდა. სარეიტინგო კომპანიების – Fitch, S&P, Moodys’ შეფასებით, საქართველომ უზრუნველყო რეიტინგის შენარჩუნება პანდემიამდე მაჩვენებლის დონეზე და კრიზისების დაძლევა რეიტინგის გაუარესების გარეშე. ამასთან, წლის დასაწყისში Fitch-მა საქართველოს სუვერენული საკრედიტო რეიტინგის პერსპექტივა გააუმჯობესა სტაბილურიდან პოზიტიურისკენ. სარეიტინგო სააგენტოების შეფასებით, რეიტინგის განმსაზღვრელ ფაქტორებს სანდო და ეფექტური ეკონომიკური პოლიტიკა და ძლიერი მმართველობის ინდიკატორები წარმოადგენენ“, – განაცხადა ლევან დავითაშვილმა.

შეიძლება კარგი საქმე ვაკეთოთ კონსტიტუციის დარღვევით? ჰიპოტეტურად, ზოგადად. მაშინ, რა მიმართება აქვს იმას, რომ საქართველოს პრეზიდენტი, საქართველოს სასიკეთოდ საქმიანობდა?- ამ შეკითხვით მიმართა საკონსტიტუციო სასამართლო სხდომაზე, მოსამართლე ევა გოცირიძემ პრეზიდენტის წარმომადგენელ თამარ ჩუგოშვილს.

მოსამართლე დაინტერესდა, რა კეთილი განზრახვა ჰქონდა სალომე ზურაბიშვილს მის მიერ განხორციელებული ვიზიტებისას.

„ამბობთ, რომ ქალბატონმა პრეზიდენტმა ეს შეხვედრები განახორციელა, მხოლოდ და მხოლოდ, საქართველოს ინტერესების სასიკეთოდ. იმაზე მეტს რას გვეუბნება, რომ მას ჰქონდა კეთილი განზრახვა? ეს თავისთავად ნიშნავს იმას, რომ მას კონსტიტუცია არ დაურღვევია? ტოლობის ნიშანი უნდა დავსვათ ამ ორ ფაქტს შორის? რადგან მან 12 პუნქტზე არ ისაუბრა, რადგან ზოგადად ისაუბრა იმაზე, რომ საქართველო იმსახურებს კანდიდატის სტატუსს და ა.შ. ეს თავისთავად, რაზე მეტყველებს, რომ მას მონაწილეობა არ მიუღია საგარეო ურთიერთობებში და პოლიტიკის საკითხებზე არ გამოუთქვამს აზრი, თუ წარმომადგენლობითი უფლებამოსილება არ განუხორციელებია? ღმერთმა დაიფაროს, ჩვენ ვიფიქროთ, რომ ქალბატონი სალომე საქართველოს საზიანოდ განზრახ მოქმედებს. ძალიან რთულია ამის დაჯერება, მაგრამ ამ ორ გარემოებას შორის ტოლობის ნიშანი უნდა დაისვას? შეიძლება კარგი საქმე ვაკეთოთ კონსტიტუციის დარღვევით? ჰიპოტეტურად, ზოგადად. მაშინ, რა მიმართება აქვს იმას, რომ საქართველოს სასიკეთოდ საქმიანობდა?. ჩვენ ვართ საკონსტიტუციო სასამართლო და უნდა დაგვეხმაროთ, დავადგინოთ – არის თუ არა დარღვევა“, – მიმართა პრეზიდენტის წარმომადგენელს თამარ ჩუგოშვილს შეკითხვით ევა გოცირიძემ.

მოსამართლეს თამარ ჩუგოშვილმა შემდეგნაირად უპასუხა:

„კონკრეტულად ამ ვიზიტებში, საქართველოს პრეზიდენტი, 49-ე მუხლიდან გამომდინარე, რა თქმა უნდა, წარმოადგენდა საქართველოს. ის არ წარმოადგენდა მოქალაქე სალომე ზურაბიშვილს. ის წარმოადგენდა საქართველოს სამივე მნიშვნელოვან პირებთან შეხვედრაში. საფრანგეთი და გერმანია, ფაქტობრივად, გადამწყვეტი ქვეყნები არიან ევროკავშირის წევრ ქვეყნებს შორის, რომელთა აზრსაც უდიდესი გავლენა აქვს [სტატუსის მინიჭების] გადაწყვეტილებაზე“, – განაცხადა ჩუგოშვილმა.

ცნობისთვის, საკონსტიტუციო სასამართლოში, პრეზიდენტ სალომე ზურაბიშვილის იმპიჩმენტის თაობაზე კონსტიტუციური წარდგინების ზეპირი მოსმენით განხილვა მიმდინარეობს.თავად პრეზიდენტი დღევანდელ სხდომას არ ესწრება. მის ინტერესებს სასამართლოში იურისტები თამარ ჩუგოშვილი და მაია კოპალეიშვილი იცავენ.

წარდგინების ავტორების სახით სხდომას ესწრებიან „ქართული ოცნების“ თავმჯდომარე ირაკლი კობახიძე და მმართველი პარტიის სხვა წევრები: ანრი ოხანაშვილი, გიორგი კახიანი და თენგიზ შარმანაშვილი.

მმართველი გუნდის მიერ ზურაბიშვილის წინააღმდეგ იმპიჩმენტის პროცესის დაწყების საფუძველი პრეზიდენტის მიერ განხორციელებული ის საგარეო ვიზიტები გახდა, რაზეც მთავრობამ სალომე ზურაბიშვილს თანხმობა არ მისცა. პრეზიდენტის თანამდებობიდან იმპიჩმენტის წესით გადაყენების საკითხი 1-ელ სექტემბერს, პარტია „ქართული ოცნების“ პოლიტსაბჭოს სხდომაზე გადაწყდა. საკონსტიტუციო სასამართლოს დასკვნის მოსამზადებლად ერთთვიანი ვადა აქვს. სასამართლოს მიერ დადებითი დასკვნის შემთხვევაში, პრეზიდენტის გადასაყენებლად 100 დეპუტატის ხმა არის საჭირო, რაც „ქართული ოცნების“ უმრავლესობას არ გააჩნია.