წარმოიდგინეთ მუსიკაში ერკვეოდეთ და უსმენდეთ „კაკაფონიას” დაახლოებით 7-8 საათის განმავლობაში, ასეთი მძიმე შეგრძნებაა. უბრალოდ გაუგონარი რამეა, რასაც ვისმენთ ჩვენ პრეზიდენტის წარმომადგენლების მხრიდან , – ამის შესახებ „ქართული ოცნების” თავმჯდომარე ირაკლი კობახიძემ საკონსტიტუციო სასამართლოს სხდომის შემდეგ განაცხადა, სადაც სადაც პრეზიდენტის იმპიჩმენტის წარდგინების განხილვა მიმდინარეობდა.

ირაკლი კობახიძის თქმით, პრეზიდენტის წარმომადგენლები ისეთ არაკომპეტენტურობას ავლენენ, რომ ეს მათი მიკერძოებითაც კი ვერ გამართლდება.

„ძალიან მძიმე მოსასმენია. აქ სისუსტეზეც კი არ არის საუბარი. ასეთი რამ შეიძლება დააბრალო პოლიტიკურ მიკერძოებას, რაღაც ინტერესებს, მაგრამ რაღაც ელემენტარული კომპეტენცია თუ გაქვს, ასეთ რაღაცებს უბრალოდ ვერ ილაპარაკებ. უბრალოდ გაუგონარია, რასაც ისინი ლაპარაკობენ.

სრული ნონსენსია, სტუდენტები უყურებდნენ ამ ყველაფერს და უბრალოდ თავის მოჭრაა, როდესაც სტუდენტები ხედავენ, რომ ასეთი ზრდასრული ადამიანები, იურისტები ასეთ რაღაცებს ლაპარაკობენ ასეთ მარტივ თემასთან დაკავშირებით საკონსტიტუციო სასამართლოში. ეს არის შემაშფოთებელი და გამაოგნებელი. მაგალითად, სხვადასხვა რამე რომ გგონია „წარმოადგენს“ და „ახორციელებს წარმომადგენლობით უფლებამოსილებებს“ ეს არის სირცხვილი. როცა ვერ არჩევენ ერთმანეთისგან სტატუსს და უფლებამოსილებას, ეს არის სირცხვილი. იურიდიული თემაც არაა, ეს არის უნარების უმარტივესი ტესტის თემა. არაკეთილსინდისიერებაა მაინც მთავარი პრობლემა და არა არაკომპეტენტურობა იმიტომ, რომ ასეთი არაკომპეტენტურობა უბრალოდ წარმოუდგენელია და გაუგებარი. გვესმის მათი პოლიტიკური მიკერძოება, ორივე მათგანი არის პოლიტიკურად მიკერძოებული, ისინი არიან მხარის წარმომადგენელი, თუმცა მაინც ვერ გამართლდება გაუგონარი არაკომპეტენტურობა, რასაც ისინი ავლენენ მთელი პროცესის განმავლობაში“, – განაცხადა ირაკლი კობახიძემ.

ეს არ არის ადეიშვილის, არც გვარამიას სასამართლო, ვისი მოადგილეც იყავით წლების განმავლობაში, ეს არის საკონსტიტუციო სასამართლო და პატივი ეცით, – ასე მიმართა პარტია „ქართული ოცნების“ თავმჯდომარე ირაკლი კობახიძემ საკონსტიტუციო სასამართლოში პრეზიდენტის იმპიჩმენტის საკითხზე მიმდინარე პროცესზე საქართველოს პრეზიდენტის წარმომადგენელს, მაია კოპალეიშვილს.

საპასუხოდ, მაია კოპალეიშვილმა ირაკლი კობახიძეს მიმართა, საკუთარი წარსულისთვის მიეხედა.

„წესიერად ილაპარაკეთ, თორემ მეც გეტყვით, ვის სასამართლოში ხართ. მერე რა, მე ვამაყობ მაგით, რომ ვიყავი მოადგილე. სხვათაშორის, თქვენ იყავით, გავრილოვი რომ ჩამოიყვანეთ საქართველოში. თქვენ რაც უნდა თქვათ, ვერანაირად იმოქმედებთ ჩემზე“, – მიმართა მაია კოპალეიშვილმა ირაკლი კობახიძეს.

„რომ ამაყობთ, ეგაა თქვენი პრობლემა“, – უპასუხა პრეზიდენტის წარმომადგენელს ირაკლი კობახიძემ.

მანამდე, ირაკლი კობახიძემ სხდომაზე განაცხადა, რომ „მნიშვნელოვანი იყო, პრეზიდენტი ყოფილიყო სასამართლოში, რადგან რეალურად პრეზიდენტი სხვა რამეს ამბობს და მისი წარმომადგენლები სხვა რამეს ამბობენ“. ამის შემდეგ მაია კოპალეიშვილმა განაცხადა, რომ არასოწორი იყო, რასაც ირაკლი კობახიძე აკეთებდა და სასამართლოს თავმჯდომარეს მიმართა, იყო თუ არა ეს გაპროტესტების საფუძველი.

საკონსტიტუციო სასამართლოში პრეზიდენტის იმპიჩმენტის საკითხზე სხდომა ხვალ, 11:00 საათზე განახლდება.

საქართველოს პარლამენტის ვიცე სპიკერმა არჩილ თალაკვაძემ პარლამენტის პლენარულ სხდომაზე, „შეკრებისა და მანიფესტაციების შესახებ“ კანონში შესატანი ცვლილებების განხილვისას, პარლამენტის წევრს თამარ ჩარკვიანს უპასუხა, რომ „კარვების კანონში” ლეიბებთან დაკავშირებით შეზღუდვები არ იგეგმება. „მინდა თამარ ჩარკვიანი დავამშვიდო. ქალბატონო თამარ, თქვენ რაც დააანონსეთ, ეს იყო ლეიბების რევოლუცია და მინდა დაგამშვიდოთ, რომ ამ კანონში ლეიბებთან დაკავშირებით არავითარი შეზღუდვები არ არის დაგეგმილი”. – უთხრა თალაკვაძემ ჩარკვიანს. მანამდე ამავე პლენარულ სხდომაზე თამარ ჩარკვიანმა თქვა, რომ სწორი იყო, როდესაც რუსთაველის გამზირზე კარვებსა და ლეიბებს ითხოვდა. „როგორი სწორი ვყოფილვარ, რუსთაველზე რომ კარვებსა და ლეიბებს ვითხოვდი, არა? თურმე, ხელისუფლებას როგორ ეშინია კარვებისა და ლეიბების, არა?“, – თქვა ჩარკვიანმა და ამ კანონს „რუსული კანონი 2“ უწოდა. ცნობისთვის, საქართველოს პარლამენტმა 4 ოქტომბერს შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონში შესატან ცვლილებებს, ე.წ. „კარვების კანონს” პირველი მოსმენით მხარი დაუჭირა.

საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი), მღვდელმთავრებთან და სამღვდელოებასთან ერთად, საქართველოში ევროკავშირის ელჩს, პაველ ჰერჩინსკის შეხვდა. ინფორმაციას საქართველოს საპატრიარქო ავრცელებს.

საპატრიარქოს ცნობით, პაველ ჰერჩინსკიმ განაცხადა, რომ საქართველო დიდი კულტურისა და ისტორიის მქონე ქვეყანაა, რომლის ცხოვრებაშიც მართლმადიდებელ ეკლესიას დღესაც განსაკუთრებული როლი და მნიშვნელობა აქვს, რისი დადასტურებაც არის თუნდაც ის ფაქტი, რომ, კვლევების თანახმად, საქართველოში ყველაზე მაღალი რეიტინგი სწორედ მართლმადიდებელ ეკლესიას აქვს და ეკლესია მოსახლეობისთვის დიდი ავტორიტეტს წარმოადგენს.

„მიტროპოლიტმა შიომ (მუჯირი) და მღვდელმთავრებმა სტუმარს ვიზიტისთვის მადლობა გადაუხადეს და აღნიშნეს, რომ ევროპასთან დაახლოების პროცესში აუცილებლად გასათვალისწინებელია ქართული ტრადიციები და ფასეულობები. მღვდელმთავრებმა ხაზი გაუსვეს ტრადიციული ოჯახის მნიშვნელობას და ქრისტიანული ღირებულებების დაცვის საჭიროებას, რის შესახებაც ჩვენს პოზიციას მუდამ ვაფიქსირებდით.

ევროკავშირის ელჩმა განაცხადა, რომ ევროპა არ ნიშნავს ეროვნულობის და სულიერ-კულტურული ფასეულობების დაკარგვას, პირიქით, ევროპა ხელს უწყობს განსხვავებული ერების დაახლოებას, მშვიდობიან თანაცხოვრებას და დასძინა, რომ ევროკავშირის წევრობით არამხოლოდ საქართველო მიიღებს სარგებელს, არამედ თავად ევროკავშირიც, რადგან საქართველო თავისი კულტურითა და ღირებულებებით მნიშვნელოვანი წევრი და შენაძენი გახდება ევროკავშირისთვის.

შეხვედრაზე ასევე განხილულ იქნა ოკუპირებული ტერიტორიების სიახლოვეს მცხოვრებთა პრობლემები. გულისტკივილით აღინიშნა, რომ ქართველებს არ ეძლევათ ოკუპირებულ ტერიტორიებზე გადაადგილებისა და მათი გარდაცვლილი ახლობლების საფლავების მონახულებისა და მოვლის საშუალებაც კი.

მეუფე შიომ და მღვდელმთავრებმა ევროკავშირის ელჩს ვიზიტისთვის და საინტერესო საუბრისთვის მადლობა გადაუხადეს და წარმატებული მოღვაწეობა უსურვეს“, – აღნიშნულია საქართველოს საპატრიარქოს ინფორმაციაში.

მაინტერესებს, გრძნობთ თუ არა პასუხისმგებლობას, რომ თქვენი სამინისტრო იყო პირველი, ვინც „ეფესბეს“ აგენტ ოთარ ფარცხალაძეს პირველი მილიონი აშოვნინა? , – ამ კითხვით მიმართა „ნაციონალური მოძრაობის“ თავმჯდომარემ, ლევან ხაბეიშვილმა საქართველოს ვიცე-პრემიერს, ეკონომიკისა და მდგრადი განვითარების მინისტრს, ლევან დავითაშვილს პარლამენტში, სადაც „მინისტრის საათის“ ფორმატში უსმენენ.

ლევან ხაბეიშვილის ინფორმაციით, ეკონომიკის სამინისტრომ ოთარ ფარცხალაძეს 200 000 ლარად ქონება მისცა, ხოლო შემდეგ 1 200 000 ლარად გამოისყიდეს.

„პირველი მილიონი ფარცხალაძემ იშოვა ეკონომიკის ყოფილი მინისტრის დახმარებით. ვგულისხმობ იმას, 200 000 ლარად რომ მისცეს ქონება ფარცხალაძეს და მერე 1 200 000-ად გამოისყიდეს და ამასობაში ეკონომიკის სამინისტროში ისევ ის მოადგილეები არიან დასაქმებულები, ვინც თურნავას დროს იყვნენ“, – განაცხადა ლევან ხაბეიშვილმა.

ლევან ხაბეიშვილმა პარლამენტში ეკონომიკის მინისტრის მოადგილის, რომეო მიქაუტაძის შესახებაც ისაუბრა და აღნიშნა, რომ იგი კორუფციაშია „ყელამდე ჩაფლული“.

„ასევე მინდა ვისაუბრო თქვენ მოადგილეებთან დაკავშირებით. გავიგე, რომ ვინც ქურდულ-კრიმინალურია და ზოგადად კორუფციასთანაა დაკავშირებული, ყველა თანამდებობაზე გინდათ იყოს, მაგრამ 2023 წელს აუდიტის დასკვნა თუ წაიკითხეთ მიქაუტაძეზე? – წერენ, რომ საწვავს იპარავდა „თბილსერვისში”, როცა კალაძესთან მუშაობდა. ტენდერებს რომ აფორმებდა, კორუფციაში იყო ყელამდეო. თუ მის დეკლარაციაში ჩავიხედავთ, 4-5 მილიონის ქონება აქვს დაგროვებული. მდიდრდება ეს ადამიანი იმ ფონზე, როცა 400 ლარამდე ხელფასი საქართველოში აქვს 99 875 ადამიანს“, – განაცხადა ლევან ხაბეიშვილმა.

ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა პარლამენტში „მინისტრის საათის” ფორმატში გამოსვლისას, ენერგეტიკის სექტორში მნიშვნელოვან პროგრესსა და პოზიტიურ ტენდენციებზე გაამახვილა ყურადღება.

ვიცე-პრემიერმა განსაკუთრებული აქცენტი გააკეთა იმ გარემოებაზე, რომ 2023 წლის 9 თვეში საქართველოში ენერგოგენერაციის მიერ გამომუშავებულმა ელექტროენერგიამ რეკორდულ მაჩვენებელს და ისტორიულ მაქსიმუმს – 11.1 მლრდ. კვტ/სთ-ს მიაღწია. მისი თქმით, ასევე, რეკორდულია ელექტროენერგიის ექსპორტის მაჩვენებელიც – 1.5 მლრდ  კვტ/სთ.

ვიცე-პრემიერმა დადებითად შეაფასა განახლებადი ენერგიების მხარდაჭერის ახალი სქემა, რომლის ფარგლებში 300 მგვტ. დადგმული სიმძლავრის პირველი აუქციონი ჩატარდა. მისი თქმით, მთავრობის ამ ინიციატივის მიმართ კერძო სექტორმა ძალიან მაღალი ინტერესი დააფიქსირა. პირველი აუქციონის შედეგად 15 ჰიდროელექტროსადგურის,  2 ქარის ელექტროსადგურისა და 10 მზის ელექტროსადგურის მშენებლობის პროექტი განხორციელდება.

„ამ პროექტების განხორციელების შედეგად, შესაძლებელი იქნება დაახლოებით 1,1 მლრდ. კვტ სთ. ენერგიის გამომუშავება ყოველწლიურად, ხოლო ამ პროექტებში განხორციელებული ინვესტიციის მოცულობა ჯამურად 400 მლნ აშშ დოლარს გადააჭარბებს. უახლოეს პერიოდში დაგეგმილია სიმძლავრის მეორე  აუქციონის გამოცხადება,” – განაცხადა ლევან დავითაშვილმა.

ვიცე-პრემიერის ინფორმაციით, მთავრობა მუშაობს დიდი სიმძლავრის ოთხი ჰიდროელექტროსადგურის პროექტის განვითარებაზე. მათ შორისაა „ხუდონჰესის” პროექტიც. ლევან დავითაშვილის თქმით, პროექტის შემდგომი განვითარების მიზნით, უახლოეს პერიოდში დასრულდება ალტერნატიული ვერსიების ტექნიკურ-ეკონომიკური კვლევები და ენერგეტიკული, სოციალური და სხვა ფაქტორების გათვალისწინებით შეირჩევა პროექტის საუკეთესო  კონფიგურაცია, რის შემდეგაც  ინვესტორის შერჩევის პროცედურების დაწყებაა დაგეგმილი.

ვიცე-პრემიერმა ასევე გაამახვილა ყურადღება ქვეყნის ენერგოსტაბილურობისთვის მნიშვნელოვან პროექტებზე, მათ შორის, შავი ზღვის წყალქვეშა ელექტროგადამცემი კაბელის პროექტზე, აგრეთვე გარდაბნის მუნიციპალიტეტში 350-430 მგვტ დადგმული სიმძლავრის კომბინირებული ციკლის მაღალეფექტური თბოელექტროსადგურის მშენებლობასა და ამ მიზნით კერძო ინვესტორის გამოვლენის პროცესზე.

„გაზიფიცირება არის ჩვენი ერთ-ერთი პრიორიტეტი, რომელსაც ქვეყნის მასშტაბით ვახორციელებთ არაერთი წელია და მნიშვნელოვანია რეგიონების ეკონომიკურ-სოციალური განვითარების თვალსაზრისით. რეგიონებში აქტიურად მიმდინარეობს სამუშაოები –  მიმდინარე წლის 9 თვის განმავლობაში,  გაზიფიცირების სამშენებლო სამუშაოები დასრულდა 37 დასახლებულ პუნქტში – ქსელში ჩართვის შესაძლებლობა 7800-ზე მეტ ოჯახს მიეცა. გეგმით გათვალისწინებული სამუშაოების დასრულების შემდგომ ბუნებრივი გაზი ხელმისაწვდომი გახდება საქართველოს მოსახლეობის დაახლოებით 93 პროცენტისთვის,” – განაცხადა ვიცე-პრემიერმა.

ლევან დავითაშვილის ინფორმაციით, შემუშავდა საქართველოს ენერგეტიკული პოლიტიკის დოკუმენტი და მისი ერთ-ერთი უმნიშვნელოვანესი დანართი – ენერგეტიკის და კლიმატის ეროვნული ინტეგრირებული გეგმა.