პარტია „ხალხისთვის“ ლიდერმა ანა დოლიძემ საქართველოს პარლამენტს შოვში მომხდარ ტრაგედიასთან დაკავშირებით საგამოძიებო კომისიის შექმნის მიზნით წერილობით მიმართა.

როგორც ანა დოლიძემ აღნიშნა, 3 აგვისტოს შოვში განვითარებულ მოვლენებთან დაკავშირებით როგორც სამართლებრივი, ისე პოლიტიკური პასუხისმგებლობა უნდა დადგეს.

როგორც ანა დოლიძემ განაცხადა, პარტია „ხალხისთვის“ ამოცანაა, ხალხმა დაინახოს, რომ „ოცნებას“ პროგრესული ალტერნატივა ჰყავს და ის იზრუნებს იმისთვის, რომ „საქართველოს სიკეთეები ყველასთვის გადანაწილდეს“.

„შოვის ტრაგედია ორ ნაწილად იყოფა. ერთი მხრივ, აუცილებლად უნდა დადგეს სამართლებრივი პასუხისმგებლობა განაშენიანებასთან, კოტეჯების ადგილმდებარეობასთან, სამშენებლო ნებართვების გაცემასთან დაკავშირებით, მაგრამ ამავე დროს, უნდა დადგეს პოლიტიკური პასუხისმგებლობაც.

ჩვენი პარტიის ამოცანაა, ხალხს ვაჩვენოთ, რომ „ოცნებას“ პროგრესული ალტერნატივა ჰყავს და ის იზრუნებს იმისთვის, რომ საქართველოს სიკეთეები ყველასთვის გადანაწილდეს.

ჩვენ დანამდვილებით უნდა გავიგოთ, თუ რამ გამოიწვია, რომ ის ადრეული შეტყობინების სისტემები არ იყო, ჩვენ მოახლოებული სტიქიის შესახებ დროულად ვერ გავიგეთ, რამ გამოიწვია ის, რომ ხელისუფლება კლიმატური ცვლილებების ზეგავლენის შეფასებასთან დაკავშირებით ნაბიჯებს არ დგამდა. პოლიტიკური პასუხისმგებლობა უნდა გაიზიაროს ყველამ, ვინც ბოლო პერიოდის განმავლობაში „ქართული ოცნების“ სათავეში იყო.

ჩვენ პარლამენტში საგამოძიებო კომისიის შექმნა მოვითხოვეთ, რისი საშუალებაც ოპოზიციას აქვს. მას აქვს საკმარისი რაოდენობა ხელმოწერების შესაგროვებლად. საგამოძიებო კომისიას შეუძლია სურათი დადოს, თუ რამ გამოიწვია სტიქია – ნეპოტიზმმა, კორუფციამ, გულგრილობამ და შესაბამისად, შემოგვთავაზოს სისტემური ნაბიჯები სიტუაციის გამოსასწორებლად“, – აღნიშნა ანა დოლიძემ.

მისივე თქმით, სამაშველო სამუშაოების დროს საზოგადოებამ არაერთი ჩავარდნა იხილა და არსებობს შეკითხვები იმასთან დაკავშირებითაც, თუ რატომ არ ჩავიდა პრემიერი ირაკლი ღარიბაშვილი სტიქიის ადგილას დროულად. ანა დოლიძის განცხადებით, კრიზისულ მომენტში ხალხმა საკუთარი პრემიერი „სანთლით არ უნდა ეძებოს“.

გარდა ამისა, როგორც ანა დოლიძემ აღნიშნა, „ქართულ ოცნების“ ერთ-ერთი მთავარი პასუხისმგებლობაა, ტერიტორია გეოლოგიური მიმართულებით ზონალურად დაყოს, რაც მმართველმა პარტიამ 2026 წლამდე გადადო და საჭიროა ხალხმა ამის შესრულება მოითხოვოს.

„ეკოლოგია, გარემო და მდგრადი განვითარება ამ ხელისუფლებას არ აინტერესებს. შოვში რაც მოხდა, ეს ამტკიცებს იმას, რომ ხელისუფლებისთვის მნიშვნელობა არ აქვს აშენებულ კოტეჯში ვინმე დაზიანდება თუ არა. მათთვის მთავარია, რომ ვიღაცამ მშენებლობის ნებართვა გასცა და ამით შემდეგ სხვამ ფული გააკეთოს.

გარდა ამისა, უნდა ვახსენოთ სამაშველო სამუშაოები, რომლის დროსაც არაერთი ჩავარდნა ვიხილეთ. რა თქმა უნდა, უდიდესი მადლობა ეკუთვნით მაშველებსა და პოლიციელებს, რომლებიც ძალიან თავდადებულები არიან. მაგრამ საპატრულო პოლიციაც და მაშველებიც თავად ძალიან ცუდ შრომით პირობებში არიან. ასევე, საინტერესოა, რატომ არ ჩავიდა ირაკლი ღარიბაშვილი სტიქიის ადგილას თავის დროზე. კრიზისულ მომენტში ხალხმა საკუთარი პრემიერი სანთლით უნდა ეძებოს?

იმ შემთხვევაში, თუ საგამოძიებო კომისია შეიქმნებოდა, ის ყველა თანამდებობის პირს გამოიძახებდა. ასეთია გარემოს დაცვის სამინისტროს, გარემოსდაცვითი სააგენტოების, ადგილობრივი მუნიციპალიტეტების მმართველები. ასევე, მოუხმობდნენ მოსახლეობას, რომელიც წლების განმავლობაში ითხოვდა იქ გეოლოგების ჩასვლას. 2020 წელს გიორგი გახარია სწორედ იმიტომ ჩავიდა შოვში, რომ მოსახლეობა გეოლოგების ჩასვლას ითხოვდა.

ეს ყველაფერი სასამართლოებზე და სამართლებრივ პასუხისმგებლობაზე არანაკლებ მნიშვნელოვანია იმიტომ., რომ საქართველოს ტერიტორიის დიდი ნაწილი მეწყერსაშიშია. აქ თუ არ გადაიდგა ნაბიჯები, დასვენება ყველგან საშიში იქნება. მთავარი პასუხისმგებლობა, რაც „ქართულ ოცნებას“ აქვს, რომ ტერიტორია გეოლოგიური მიმართულებით ზონალურად დაყოს, ეს მას არ შეუსრულებია და 2026 წლამდე გადადო. ოდესმე ამის შესრულებაც ხომ უნდა დავაძალოთ?!“ – განაცხადა ანა დოლიძემ.

„ერთიანი საქართველოს“ ლიდერი ნინო ბურჯანაძე აგვისტოს ომს განცხადებით ეხმაურება.

„ჩვენი ქვეყნის ისტორიაში ძალიან მძიმე დღეა. მძიმეა, პირველ რიგში, ადამიანურად, პოლიტიკურად, სახელმწიფოებრივად. მინდა, მოვიგონო ყველა დაღუპული გმირი, მივუსამძიმრო მათი ოჯახის წევრებს, ახლობლებს და სრულიად საქართველოს, რადგან ეს არ არის მხოლოდ ერთი ან ათეული ოჯახის ტრაგედია, ეს არის მთელი ქვეყნის ტრაგედია“, – აცხადებს ნინო ბურჯანაძე აგვისტოს ომის 15 წლისთავთან დაკავშირებით.

2008 წლის 7-8 აგვისტოს ღამეს მიხეილ სააკაშვილის რეჟიმმა ცინიკურად დაარღვია ყველა საერთაშორისო შეთანხმება ქართულ-სამხრეთ ოსეთის კონფლიქტის მშვიდობიანი მოგვარების შესახებ და სამხრეთ ოსეთზე ვერაგული თავდასხმა განახორციელა, – ამის შესახებ რუსეთის საგარეო საქმეთა სამინისტროს პრესსპიკერის, მარია ზახაროვას განცხადებაშია აღნიშნული.

„დღეს ჩვენ ვიხსენებთ 15 წლის წინ სამხრეთ კავკასიაში მომხდარ ტრაგიკულ მოვლენებს. 2008 წლის 7-8 აგვისტოს ღამეს მიხეილ სააკაშვილის რეჟიმმა ცინიკურად დაარღვია ყველა საერთაშორისო შეთანხმება ქართულ-სამხრეთ ოსეთის კონფლიქტის მშვიდობიანი მოგვარების შესახებ და სამხრეთ ოსეთზე მოღალატური თავდასხმა განახორციელა. პარალელურად განხორციელდა თავდასხმა რუსი სამშვიდობოების განლაგების ადგილებზე. ამ კრიმინალურ ავანტიურას უამრავი მსხვერპლი მოჰყვა სამხრეთ ოსეთის მცხოვრებლებსა და რუს სამხედროებს შორის“, – აღნიშნულია განცხადებაში.

მისი მტკიცებით, რუსეთი „იძულებული გახდა” მშვიდობის იძულების ოპერაცია ჩაეტარებინა.

„იმ დღეების მოვლენები სასწრაფო გადაწყვეტილებებს მოითხოვდა. შექმნილ ვითარებაში რუსეთი იძულებული გახდა აგრესორის წინააღმდეგ მშვიდობის იძულების ოპერაცია ჩაეტარებინა. 26 აგვისტოს ჩვენმა ქვეყანამ აფხაზეთი და სამხრეთ ოსეთი სუვერენულ დამოუკიდებელ სახელმწიფოებად ცნო”, – აღნიშნულია განცხადებაში.

მისი მტკიცებით, რუსეთი დარწმუნებულია, რომ რეგიონში მდგრადი უსაფრთხოების მიღწევა შესაძლებელია მხოლოდ იმ შემთხვევაში, თუ გაფორმდება იურიდიულად სავალდებულო შეთანხმება ძალის გამოუყენებლობის შესახებ საქართველოს, აფხაზეთსა და სამხრეთ ოსეთს შორის.

„ასევე მათ შორის სახელმწიფო საზღვრების დელიმიტაციით და შემდგომი დემარკაციით“, – წერს ზახაროვა.

რუსეთსა და საქართველოს შორის ომის მე-15 წლისთავთან დაკავშირებით ევროკავშირის სადამკვირვებლო მისია საქართველოში პატივისცემას გამოხატავს ომის შედეგად დაზარალებულთა მიმართ, ჩვენ გვახსოვს დაკარგული სიცოცხლეები და სირთულეები, რომლებიც წილად ერგო მშვიდობიან მოსახლეობას, ჩვენი ფიქრები მიმართულია იმ ოჯახებისკენ, რომლებიც დღესაც განიცდიან მათი დანაკარგის ტკივილს, – ამის შესახებ ევროკავშირის სადამკვირვებლო მისიის ხელმძღვანელის განცხადებაშია ნათქვამი.

როგორც განცხადებაშია ნათქვამი, ევროკავშირის სადამკვირვებლო მისია მტკიცედ განაგრძობას ძალისხმევას, შექმნას ხელსაყრელი გარემო კონფლიქტის მშვიდობიანი მოგვარებისთვის.

„მნიშვნელოვანია გვახსოვდეს, რომ შეიარაღებული კონფლიქტების შედეგები გრძელვადიანია და შერიგებისა და აღდგენის გზა შეიძლება იყოს რთული. განსაკუთრებით, როგორც ცხელი ხაზის მექანიზმის მართვის განმახორციელებლები და ერგნეთის ინციდენტების პრევენციისა და მათზე რეაგირების მექანიზმის (IPRM) დისკუსიების თანათავმჯდომარეები, ჩვენ ურყევად ვუჭერთ მხარს გრძელვადიანი გადაწყვეტილებების მოსაძიებლად კონფლიქტის შედეგად დაზარალებული თემებისთვის სარგებლისმომტან ყველა ძალისხმევას, ამ წლისთავის აღვნიშვნისას, ჩვენი მისია კიდევ ერთხელ ადასტურებს თავის ერთგულებას რეგიონში სტაბილურობის, მშვიდობისა და უსაფრთხოების ხელშეწყობისადმი. როგორც მიუკერძოებელი სადამკვირვებლო მისია, ჩვენ უზრუნველვყოფთ ადმინისტრაციული სასაზღვრო ხაზების გასწვრივ ადგილზე მუდმივ ყოფნას და გავაგრძელებთ ჩვენს საქმიანობას ნდობის აღდგენის მიმართულებით. ჩვენ მტკიცედ განვაგრძობთ ჩვენს ძალისხმევას, შევქმნათ ხელსაყრელი გარემო კონფლიქტის მშვიდობიანი მოგვარებისთვის“, – ნათქვამია განცხადებაში.

რუსეთის ფედერაციის საბჭოს საერთაშორისო საქმეთა კომიტეტის ხელმძღვანელმა გრიგორი კარასინმა, რომელიც 2008 წელს, როგორც რუსეთის ფედერაციის საგარეო საქმეთა მინისტრის მოადგილე, დსთ-ს ქვეყნებთან ურთიერთობის საკითხებს კურირებდა, TASS-თან საუბარში განაცხადა, რომ „2008 წლის აგვისტოს მოვლენები სამხრეთ კავკასიაში არის ნათელი მაგალითი იმისა, თუ დასავლეთის მიერ ე.წ. ახალგაზრდა სახელმწიფოებში პოლიტიკურ წრეებში ე.წ. ფოკუსირებული ჯგუფების მეთოდური დამუშავება, ამ სახელმწიფოების და ზოგიერთი ლიდერის როგორ აგრესიულობას იწვევს არსებული პრობლემების გადაჭრის საკითხში და სხვისი წინადადებით მიღებული გადაწყვეტილებების ცდომილების გაცნობიერების პერიოდს როგორ ახანგრძლივებს“.

მისი თქმით, საქართველოს მაშინდელი პრეზიდენტი მიხეილ სააკაშვილი ცდილობდა „დაერღვია მშვიდობიანი რეგულირების ლოგიკა, დაემხო საერთაშორისო სამართალი და საკუთარი პოლიტიკური სიძლიერე გამოეჩინა“, მაგრამ „დამარცხდა ამ ავანტიურისტულ ომში“.

ფედერაციის საბჭოს კომიტეტის თავმჯდომარის თქმით, გასული პერიოდის განმავლობაში საქართველომ გაიარა „დასკვნების საკმაოდ მკაცრი სკოლა“.

„საქართველო ახლა შედარებით მშვიდი ცხოვრებით ცხოვრობს, ამყარებს კონსტრუქციულ ურთიერთობებს ყველა მეზობელთან, მისი კურსი პრაგმატულია საკუთარი ეკონომიკის განვითარებისკენ. თბილისში ხელისუფლება დაინტერესებულია რეგიონის სტაბილურობით, მონაწილეობს ე.წ. ჟენევის დისკუსიებში. ეს არის ძალიან კარგი, მომწიფებულია და კარგი შედეგების მომტანი. ეს არის აშკარა გაკვეთილი არა მხოლოდ საქართველოსთვის, არამედ მრავალი სხვა ქვეყნისთვისაც, რომლებიც ცდილობენ გააუმჯობესონ საკუთარი იმიჯი ნაციონალიზმზე დაყრდნობით და წარმოჩნდნენ დიდ ძალად“, – განაცხადა კარასინმა.

შოვში ვერტმფრენი 3 საათის დაგვიანებით კი არ მივიდა, 3 საათში მივიდა. 1 საათი ფრენას უნდა, შეტყობინების შემდეგ გადამოწმება სჭირდება, რა ტექნიკაა საჭირო, ამის შემდეგ, ტექნიკის მოსამზადებელი პერიოდია, მანქანა ხომ არ არის, დაქოქო და წახვიდე, მას სჭირდება მომზადების პერიოდი, ზუსტად ამ პერიოდით, სულ რაღაც, 3 საათში იყო ვერტმფრენი იქ, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მან ასევე ისაუბრა ადრეული გაფრთხილების სისტემებთან დაკავშირებით. უფრო კონკრეტულად კი, ჟურნალისტის კითხვაზე, თუ რატომ არ იყო აღნიშნული მოწყობილობა შოვში დარიალის ხეობის მსგავსად დამონტაჟებული, პაპუაშვილმა ასე უპასუხა: „რამდენადაც ვიცი, დარიალში არ ყოფილა შემთხვევა, რომ მისი ამუშავება საჭირო ყოფილიყო“.

„მას შემდეგ, რაც დევდორაკის მყინვარზე იყო ბუნებრივი კატასტროფა, გადაწყვეტილება იქნა მიღებული, რომ ამ სისტემით დაიფაროს მთლიანად საქართველო. 200-მდე სხვადასხვა ასეთი სახის მოწყობილობა იქნა შეძენილი და ის მონტაჟდება საჭიროების განსაზღვრის მიხედვით, დღეს, ეს დარიალის ხეობაში, თბილისში – ვერეს ხეობაშია დამონტაჟებული და ეტაპობრივად მიდის, შეიძლება, 3 წელი არ ეყოს მთლიანად დაფარვას, მაგრამ საქმე იმაშია, რომ ეს არის ნაწილი პოლიტიკისა, რომელიც ჩვენს მთავრობას აქვს. 200 ასეთი მოწყობილობა უკვე შეძენილია და მისი დამონტაჟება მიდის, რასაც გარკვეული დრო სჭირდება, გარდა ამისა, სარადარო სისტემა, რომელიც მთლიანად მოშლილი იყო, აღდგენილია, 2 რადარია დაყენებული, რომელიც ფარავს საქართველოს და იძლევა ინფორმაციას ამინდთან და სხვადასხვა ბუნებრივ მოვლენებთან დაკავშირებით. გასაგებია, რომ სურვილი იყო, 2-3 წელიწადში ყოფილიყო ეს ყველაფერი, მაგრამ დრო სჭირდება, ვინაიდან ეს ტექნიკურად რთული საკითხებია. ამას გარდა, მნიშვნელოვანია არა სპონტანურად მონტაჟი სხვადასხვა ადგილას, არამედ, საჭიროებს მიხედვით მონტაჟი და პრიორიტეტების განსაზღვრა.

ვინ თქვა, რომ ეს წინასწარ შეტყობინების მოწყობილობები მწყობრიდან არის გამოსული? სამწუხაროდ, ამ კრიტიკულ, კრიზისულ მომენტში, როცა მნიშვნელოვანია მობილიზება, თანადგომა, გადამოწმებული ინფორმაციის გაშვება, სამწუხაროდ, ფაქტობრივად, საინფორმაციო შეტევის ქვეშ იყო საქართველო და დღეს, ბოდიშების მოხდა უწევთ ხან, კახა კალაძესთან დაკავშირებულ საკითხებზე, ხან დღვიორასთან დაკავშირებულ საკითხზე, თითქოს, გარემოს სააგენტოს ანალიზი იყო, რომელიც აჩვენებდა, რომ იმ ხეობაში მოსალოდნელი იყო ღვარცოფი, სინამდვილეში ტყუილი იყო…რამდენჯერმე მივმართე „მწვანე ალტერნატივას“, რომ ტყუილის უარყოფა გაეკეთებინათ, სამწუხაროდ, თითი თითზე არ დააკარეს და ეს ტყუილი შეინარჩუნეს… გასაგებია, რომ ხალხმა გეოლოგია არ იცის, მაგრამ გეოგრაფია მაინც ხომ უნდა ისწავლოს ადამიანმა, არა?“, – განაცხადა პაპუაშვილმა.

კითხვაზე, რისკების შესაფასებლად გაკეთდა თუ არა მაქსიმუმი, პაპუაშვილმა განაცხადა, რომ გეოლოგების და სხვადასხვა ექსპერტების დასკვნა, მათ შორის, დამოუკიდებელი ექსპერტების, ყველა თანხმდება ერთ შეფასებაში.

„საქართველოში გვყავს ერთი-ორი გეოლოგია, თუ ვინაა პროფესიით, არ ვიცი, ვინც იმ დღეებში ტელევიზორში ხშირად ჩანდა, განსაკუთრებით, ერთი ქალბატონი, გვყავს ერთი-ორი ასეთი ადამიანი, რომელიც კრიზისის დროს პანიკას ტეხს აბსოლუტური ტყუილით. აბსოლუტური ტყუილი იყო, რასაც ის ამბობდა, თითქოს, 2 დღის განმავლობაში დაგუბება იყო იქ, ამას ამბობდა, „მთის ამბებიც“, რომ თითქოს, 2 დღე წყალი არ მოდიოდა ბუბას ხეობაში, რაც ასევე ტყუილი იყო, მეცნიერულად დასტურდება, სენსორია ჭანჭახზე დაყენებული, რომლის შენაკადიც არის მდინარე ბუბა. თვის მონაცემები მეც ვნახე, არანაირი ცვლილება 3 აგვისტომდე წყალთან დაკავშირებით დაფიქსირებული არ არის. ამიტომ ეს იყო ტყუილი, რომელსაც მეორე ტყუილი დაემატა, თითქოს, ზემოთ რაღაც გუბდებოდა და ღია ტბა იყო, ეს აბსოლუტური ტყუილი ვრცელდებოდა კრიზისის დროს, ეს არის ჩვეულებრივი საბოტაჟი და ქვეყნისთვის ზურგში დანის ჩარტყმა“, – განაცხადა პაპუაშვილმა.

მისივე თქმით, „ყველა ამოცანა, რომელიც დასახული იყო სამაშველო სამსახურების მხრიდან, შესრულდა.

„ვერტმფრენი იყო იქ, 3 საათის დაგვიანებით კი არ მივიდა, 3 საათში მივიდა ვერტმფრენი, 1 საათი უნდა ფრენას, შეტყობინების შემდეგ სჭირდება გადამოწმება, რა ტექნიკაა საჭირო, ამის შემდეგ, ტექნიკის მოსამზადებელი პერიოდია, მანქანა ხომ არ არის, დაქოქო და წახვიდე, მას სჭირდება მომზადების პერიოდი, ზუსტად ამ პერიოდით, სულ რაღაც, 3 საათში იყო ვერტმფრენი იქ“, – განაცხადა პაპუაშვილმა.