თინა ხიდაშელის „ენჯეო“ ფინანსდება ტაივანიდან და ცდილობს, საქართველოში ანტიჩინური განწყობები გააღვივოს, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე თქმით, თავდაცვის ყოფილ მინისტრს, თინა ხიდაშელს საიდუმლო ინფორმაციაზე ჰქონდა წვდომა, რაც ცალკე პრობლემაა ჩვენი უსაფრთხოებისთვის.

„რაც შეეხება ჩინეთში ვიზიტს, მიკვირს, აქაც რამდენად აცდენილია ოპოზიცია ეროვნულ ინტერესებს. არათუ დღეს, ჩვენი მთელი არსის, დამოუკიდებლობის პერიოდში და მანამდეც, ყოველთვის ვსაუბრობდით საქართველოს გეოპოლიტიკურ მნიშვნელობაზე, რომ საქართველო არის ხიდი ევროპასა და აზიას შორის. როცა ვსაუბრობთ აბრეშუმის გზაზე, ეს აბრეშუმის გზა სად იწყებოდა, თუ გაიხსენებს ვინმე? იწყებოდა ჩინეთში და მთავრდებოდა ევროპაში. ამაზე გვაქვს საუბარი და დღეს ატეხილი აქვთ აბსოლუტური ისტერია, მათ შორის, რაღაც ანტიჩინური განწყობების შექმნის მცდელობაა. განსაკუთრებით გამორჩეულია თინა ხიდაშელი, „სამოქალაქო იდეის“ ხელმძღვანელი. ცალკე საკითხია, აქაც იმ პრობლემას რომ ვუბრუნდებით, პოლიტიკოსები, რომლებიც ჩაბუდებული არიან „ენჯეოს“ სექტორში და სინამდვილეში პოლიტიკურ პროპაგანდას ეწევიან. ამავე დროს, ფაქტია, ის ფინანსდება ტაივანის მხრიდან, არის ოფიციალური ფონდები და გასაგებია, რომ სწორედ ამ დაკვეთიდან გამომდინარე, ის ცდილობს, საქართველოში ანტიჩინური განწყობები გააღვივოს. ჰკითხეთ მას საჯაროდ, მაინტერესებს, ჩინეთის ტერიტორიულ მთლიანობას აღიარებს თუ არა? რა დამოკიდებულება აქვს ტაივანის მიმართ, რომლისგანაც ის ფულს იღებს? საინტერესოა, რადგან საქმე გვაქვს თავდაცვის ყოფილ მინისტრთან, რომელსაც, მათ შორის, საიდუმლო ინფორმაციაზე ჰქონდა წვდომა, ახლა რომ არის ლობიზმით დაკავებული არაღიარებული სახელმწიფოს დაფინანსებით, მგონი, ეს კიდევ ცალკე პრობლემაა ჩვენი უსაფრთხოებისთვის“, – განაცხადა პაპუაშვილმა.

ჩვენ სასამართლო დავის მეშვეობით დავადასტურეთ, რომ რუსეთი არის სახელმწიფო, რომელსაც ოკუპირებული აქვს საქართველოს ტერიტორია, შესაბამისად, იქ მისი ყველა ქმედება არის არალეგიტიმური და არალეგალური, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

შალვა პაპუაშვილმა კომენტარი გააკეთა რუსეთს პრეზიდენტის, ვლადიმერ პუტინის გუშინდელ განკარგულებაზე, რომელიც საზღვარგარეთ რუსეთის უძრავი ქონების მოძიებისა და სამართლებრივი დაცვისთვის თანხების გამოყოფას ითვალისწინებს.

როგორც შალვა პაპუაშვილმა აღნიშნა, ნებისმიერი სამართლებრივი თუ სხვა სახის ტრანზაქცია, რომელიც, შეიძლება, ოკუპირებულ ტერიტორიაზე ხორციელდებოდეს, არის ბათილი და არანაირი იურიდიული დატვირთვა არ აქვს.

„ბრძანებას დეტალებში არ ვიცნობ, არ ვარ ამ საკითხში ჩახედული. რუსეთი დღეს აფხაზეთისა და ცხინვალის რეგიონში არის სრული ბატონ-პატრონი. ის განკარგავს იქ პოლიტიკასაც, ფინანსებსაც, ეკონომიკასაც, ქონებასაც – ყველაფერს განკარგავს რუსეთი. ამას ჰქვია სწორედ ეფექტური კონტროლი, რაზეც საუბრობდა სტრასბურგის სასამართლო. მათ შორის, ეს ოკუპირებული ტერიტორიები არის სრულად რუსეთის ბიუჯეტზე და, თავისთავად, ეფეტური კონტროლია, არათუ საბჭოზე ან რომელიმე ადამიანზეა საუბარი, მთლიანად ეს ტერიტორიები განიკარგება პოლიტიკურად და ეკონომიკურად რუსეთის მხრიდან.

რეაგირება არის ის, რომ ოკუპაცია უნდა დასრულდეს. ვიდრე მიმდინარეობს ოკუპაცია, ეს თავის თავში გულისხმობს როგორც ქონებრივი უფლებების შებღალვას იმ მოსახლეობისა, რომელიც იქიდან არის დევნილი და იცით, რომ მათი ქონებებიც არის მითვისებული; ეს გულისხმობს ასევე ადამიანის უფლებების შებღალვას იმ ტერიტორიებზე, ვინაიდან ეს არის ტერიტორიები, რომლებზეც, ფაქტობრივად, რუსეთის ეფექტური კონტროლიდან გამომდინარე, არ ხორციელდება ადამიანის უფლებების დაცვა იმ მასშტაბით, როგორითაც უნდა იყოს და, შესაბამისად, ნაბიჯები გულისხმობს დეოკუპაციას. დეოკუპაციისთვის მნიშვნელოვანია, რომ საერთაშორისო ზეწოლა გაძლიერდეს და, მათ შორის, აღიარებული იყოს ტერმინოლოგიურადაც ოკუპაციის საკითხები. იცით, რომ ევროკავშირი დიდი ხნის განმავლობაში ტერმინ „ოკუპაციას“ არ იყენებდა. დღესაც, სამწუხაროდ, ოფიციალურ დოკუმენტებში ეს ტერმინი არ გამოიყენება, თუმცა ბოლო პერიოდში ვნახეთ, მაგალითად, ბორელის განცხადება, რომელმაც ტერმინი „ოკუპაცია“ გამოიყენა, მნიშვნელოვანია, ამას მივაქციოთ ყურადღება.

ჩვენ სასამართლო დავით დავადასტურეთ, რომ რუსეთს ოკუპირებული აქვს საქართველოს ტერიტორია. შესაბამისად, მისი ყველა ქმედება იქ არის არალეგიტიმური და არალეგალური. საერთაშორისო ორგანიზაციებში რაც კი ინსტრუმენტები არსებობს, წლებია, საქართველოს ხელისუფლება ამას იყენებს. გარდა ამისა, გვაქვს არაღიარების პოლიტიკა, რომელმაც უნდა შეაჩეროს ამ პროცესის შესაძლო ლეგიტიმაცია სხვა ქვეყნების მხრიდან და აქაც წარმატებები გვაქვს და არ ფართოვდება იმ ქვეყნების წრე, რომლებსაც აღიარებული აქვთ ე.წ. დამოუკიდებლობა“, – განაცხადა პაპაუშვილმა.

ყველა, ვინც ახლა აღვივებს ანტიჩინურ განწყობებს საქართველოში, მომართულია, რომ ჩაშალოს საქართველოს სტრატეგიული მნიშვნელობის პროექტები და საქართველო აქციოს ჩიხად და არა – დერეფნად, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც შალვა პაპუაშვილმა აღნიშნა, სტრატეგიული პარტნიორობა ჩინეთთან აქვს ევროკავშირსაც და ბევრ ქვეყანას.

„ახლა ამის წარმოჩენა რაღაც განსაკუთრებულად, არის აბსოლუტური მანიპულაცია და ანტიქართული პროპაგანდა, ვინაიდან ეს ეწინააღმდეგება საქართველოს ინტერესებს. საქართველოს ინტერესი არის შუა დერეფანი, აბრეშუმის გზა, რაზეც დღეს არის გადმორთული უკვე ბევრი ტვირთის გადაზიდვა, მას შემდეგ, რაც ე.წ. ჩრდილოეთის დერეფანი, რომელიც რუსეთზე გადის, ჩაიკეტა და, როგორც ჩანს, დიდი ხანი კიდევ ჩაკეტილი იქნება. ჩვენ სწორედ გვაქვს ახლა შესაძლებლობა, რომ ეს დერეფანი გამოვიყენოთ, ეს ტვირთები, რომლებიც იმოძრავებენ ჩინეთსა და ევროკავშირს შორის, გავიდეს საქართველოზე. იმაზე უნდა დაფიქრდეთ, რომ ხალხი, ვინც ამას ეწინააღმდეგება, რა ინტერესები, რა დაფინანსება დგას ამ ხალხის უკან, რადგან ფაქტია, რომ ყველა, ვინც ახლა აღვივებს ანტიჩინურ განწყობებს საქართველოში, მომართულია, რომ ჩაშალოს საქართველოს სტრატეგიული მნიშვნელობის პროექტები და საქართველო აქციოს ჩიხად და არა – დერეფნად“, – განაცხადა პაპუაშვილმა.

კითხვაზე, ჩინეთში ვიზიტის შემდეგ ამ მიმართულებით რაიმე სიახლე თუ არა, პარლამენტის თავმჯდომარემ აღნიშნა, პროექტში იგულისხმება შუა დერეფნის განვითარება და შუა დერეფანი, თავის მხრივ, არ წარმოშობს რაიმე ტვირთებს და საქონლებს.

„დერეფნის იდეა არის, რომ მან უნდა გაატაროს რაღაც ტვირთები, რომელიც სხვა ქვეყნიდან მოედინება და გადის ჩვენი დერეფნის მეშვეობით. როდესაც ვსაუბრობთ, რომ ეს არის ხიდი ევროპასა და აზიას შორის, აზიაში რა იგულისხმება, გადაშალონ რუკა, უნდათ – პოლიტიკური, უნდათ – ეკონომიკური, მათ შორის ფიზიკური რუკა, და დახედონ ზედ, სად გადის დერეფნები, საიდან მოდის ტვირთები და რა ინტერესები დგას, რომელი პოლიტიკური ჯგუფების ან ფინანსური ჯგუფების ინტერესები დგას იმ ხალხის უკან, ვინც ცდილობს დღეს, რომ საქართველო აქციოს ჩიხად და არა – სტრატეგიული დანიშნულების დერეფნად“, – განაცხადა პაპუაშვილმა.

ოპოზიცია კონცენტრირებულია ტერმინებზე და მათ გაფეტიშებაზე, აქ ჩანს, რომ მათ შინაარსის მიმართ ინტერესი არ აქვთ. შარშან აძაგებდნენ სამუშაო ჯგუფს, როგორც ტერმინს და დღეს აფეტიშებენ, – ამის შესახებ საქართველოს პარლამენტის თავმჯდომარემ, შალვა პაპუაშვილმა ცხრა დათქმასთან დაკავშირებით საუბრისას განაცხადა.

მისივე თქმით, ტერმინებზე ჩაჭიდება აჩვენებს, რომ ოპოზიციას არ აინტერესებს შინაარსი და შედეგი.

„ვადები არის სამოქმედო გეგმაში და ჩვენ მივყვებით ამას. ნაახალწლევს ისტერია რომ დაიწყო ოპოზიციამ, სამუშაო ჯგუფები შეიქმნას და დავიწყოთ გეგმის განხორციელებაო, გამორჩათ, მგონი, რომ ჩვენ ამ გეგმის განხორციელება დეკემბერში დავიწყეთ. მაშინ, როდესაც მივიღეთ ცვლილებები საარჩევნო კოდექსში, რომელიც ეხებოდა იურიდიული პირების მიერ პარტიების დაფინანსების სრულ აკრძალვას. მაშინ ამას ოპოზიციამ მხარი არ დაუჭირა. ასე რომ, ოპოზიცია უკვე იმ კალაპოტშია, სადაც ისინი აქამდე იყვნენ. ისინი მხარს არ უჭერენ საქართველოს მიერ ამ გეგმის განხორციელებას, რომელიც ემსახურება ევროკავშირთან ურთიერთობის შემდეგ ნაბიჯზე გადასვლას.

რაც შეეხება ფორმატებს, ჩვენ გვექნება შეთავაზება სხვადასხვა ფორმატის, შეხვედრების შესახებ. უახლოეს მომავალში გვექნება, მათ შორის, სამოქალაქო საზოგადოებისთვისაც და ასევე საპარლამენტო ოპოზიციისთვის შეთავაზებული ფორმატები, რომ განვიხილოთ საკითხები, რომლებიც არის. იცით, რომ ამასობაში ჩვენ მივიღეთ უკვე ვენეციის კომისიის დასკვნები სხვადასხვა საკითხზე. ასე რომ, მოემზადონ. ისე ნუ იზამენ, როდესაც ჩავნიშნავთ შეხვედრას, თქვან, რომ დრო არ ჰქონდათ მოსამზადებლად. დრო აქვთ უამრავი. გუშინ თუ არ ჰქონდათ წაკითხული, დღეს დაიწყონ კითხვა, მოემზადონ და ამ შეხვედრებზე თავიანთი მოსაზრებები წარმოადგინონ“, – განაცხადა პაპუაშვილმა.

მისივე თქმით, ოპოზიცია უნდა შეეშვას კერპთაყვანისმცემლობას და არც სამუშაო ჯგუფიდან, არც კომიტეტის შეხვედრიდან და არც მრგვალი მაგიდიდან კერპები არ უნდა შექმნას.

„იდეა არის, რომ უნდა იყოს სათანამშრომლო გარემო, სადაც როგორც ოპოზიცია, ისე უმრავლესობა შეძლებს ერთმანეთთან საუბარს ამ საკითხებზე. ამას დაერქმევა სამუშაო ჯგუფი, სამუშაო შეხვედრა, დახურულ კარს მიღმა შეხვედრა, მრგვალი მაგიდა, კონფერენცია თუ ოლიმპიადა, ეს სხვა საკითხია, მთავარი არის არსი. როდესაც ვხედავთ, რომ ოპოზიცია კონცენტრირებულია ტერმინებზე და მის გაფეტიშებაზე, აქ ჩანს, რომ მათ ინტერესი შინაარსის მიმართ არ აქვთ. შარშან აძაგებდნენ სამუშაო ჯგუფს, როგორც ტერმინს და დღეს აფეტიშებენ. ტერმინებზე ჩაჭიდება აჩვენებს, რომ მათ არ აინტერესებთ შინაარსი და შედეგი“, – განაცხადა შალვა პაპუაშვილმა.

ჩემი პოზიციაა, რომ უნდა დავივიწყოთ მიხეილ სააკაშვილი, ვაცადოთ მას, რომ მოიხადოს თავისი სასჯელი, ის კლინიკაში იქნება, თუ სასჯელაღსრულების დაწესებულებაში, ამას გადაწყვეტენ ექიმები და თავად პენიტენციური სისტემა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისი თქმით, პრობლემაა, რომ მიხეილ სააკაშვილს მფარველობენ ძლიერი ჯგუფები როგორც ქვეყნის შიგნით, ისე ქვეყნის გარეთ.

„„ნაციონალური მოძრაობის“ ტელევიზია და მათ შორის „ლელოს“ ტელევიზია, რაც უფრო მეტად დაავიწყებს მის თავს საზოგადოებას, მით უფრო კარგი თავად მიხეილ სააკაშვილისთვის, მისი ჯანმრთელობისთვისაც და საზოგადოებისთვის. პრობლემაც ეს არის, სამწუხაროდ, მიხეილ სააკაშვილს მფარველობენ, როგორც ჩანს, ძლიერი ჯგუფები როგორც ქვეყნის შიგნით, ისე ქვეყნის გარეთ. ეს იმდენად ძლიერი ჯგუფები არიან, რომ მათ შეძლეს, ეყიდათ სტატიები უცხოურ მედიაში, სიუჟეტები, პოლიტიკოსების განცხადებები. იქამდეც კი მივიდნენ, რომ ევროპარლამენტის რეზოლუციებში ტექსტები ჩაწერეს ლობისტებმა. ჩვენ გავარკვიეთ შემდეგ ამერიკული რეესტრიდან ამონაწერით, რომ ამერიკელი ლობისტები წერდნენ რეზოლუციებს, რომლებსაც შემდეგ ევროპარლამენტი იღებდა საქართველოსთან და მიხეილ სააკაშვილთან დაკავშირებით, რომელიც სავსე იყო ტყუილით და დეზინფორმაციით. კიდევ ერთხელ გავნმეორდები, უკვე ორ წელზე მეტი გავიდა მას შემდეგ, რაც მიხეილ სააკაშვილი შემოაპარეს საქართველოში, სამწუხაროდ, ბევრმა შეირცხვინა თავი ქართველი ხალხის წინაშე იმით, რომ მხარს უჭერდნენ ერთი მხრივ, ტირანიის და ადამიანის ჩაგვრის სისტემის შემქმნელს, მეორე მხრივ, მოქმედებდნენ აბსოლუტურად ფარული, ანტიქართული გეგმებით. თავის დროზე იმით, რომ აფარებდნენ მას ევროპაში, სხვადასხვა ქვეყანაში და სხვადახხვა სტრუქტურების დერეფნებში თავისუფლად დადიოდა და ხვდებოდნენ. შერცხვნენ, რადგან ის ჩუმად შემოაპარეს საქართველოში, რა გგონიათ ახლა, მარტომ დაგეგმა ეს ყველაფერი?! ვიცით ოფიციალურად, რომ მთლიანად უკრაინის კონტრდაზვერვამ დაუგეგმა შემოპარვა. ვინ დგას უკრაინის კონტრდაზვერვის უკან, ეს კიდევ ცალკე საკითხია. ფაქტია, რომ შემოაპარეს, რათა საქართველოში მომხდარიყო არეულობა, ქართველები ერთმანეთს დავრეულიყავით. აქ ვისი ტყვია გავარდებოდა და ვისი სისხლი დაიღვრებოდა, როგორც ჩანს, არ აინტერესებთ მათ, ვინც მიხეილ სააკაშვილის მფარველია, რომლებიც საჯაროდაც ჩანან და ექომაგებიან მას ყოველ ჯერზე. ქართველმა ხალხმა ეს უნდა გააცნობიერო, თუ რა ბოროტ ძალასთან გვაქვს საქმე, როდესაც მიხეილ სააკაშვილის მფარველებზე ვსაუბრობთ. მეორე, საქართველოს ხელისუფლებას როგორი წინააღმდეგობის გაწევა უწევდა, რათა ის გეგმები, რომლებიც ამ ძალებს ჰქონდათ დასახული ქართველი ხალხის წინააღმდეგ, არ შესრულებულიყო“, – განაცხადა პაპუაშვილმა.