უკრაინის ხელისუფლების ზოგიერთი წარმომადგენლის მხრიდან საქართველოს მოქალაქის, თამაზ გაიაშვილის წინააღმდეგ მიღებული დღევანდელი გადაწყვეტილება არ იყო პირველი მძიმე და უსამართლო გადაწყვეტილება ქართველი ხალხის წინაშე, იმ სოლიდარობის ფონზე, რომელსაც ჩვენ ვიჩენთ უკრაინის მიმართ, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა. პაპუაშვილის თქმით, ეს არის ძალიან ცუდი ნაბიჯი ქართველი ხალხის წინააღმდეგ. „სამწუხაროდ, ეს არ არის პირველი გადაწყვეტილება, რომელიც ქართველი ხალხის წინააღმდეგ იქნა მიღებული. ამაზე ბევრი საუბარი ალბათ არ ღირს. რაც შეეხება ზოგადად საქართველოს და სანქციებს, მგონი, ეს საკითხი ერთწლიანი დეზინფორმაციების შემდეგ, მათ შორის ზოგიერთი უკრაინელი მაღალჩინოსნის მხრიდან, რომელიც ქართველ ხალხს აბრალებდა, თითქოს აქ ხდებოდა სანქციების გვერდის ავლა, დახურეს ევროკავშირის, აშშ-ისა და დიდი ბრიტანეთის სანქციების კოორდინატორებმა. მათ მადლობები უხადეს საქართველოს ხელისუფლებას, რომელმაც, არა მხოლოდ უზრუნველყო ის, რომ არცერთი ფაქტი არ არსებობს, რომელიც ადასტურებს ან ეჭვს წარმოშობს საქართველოს მეშვეობით სანქციების გვერდის ავლაზე, არამედ პირიქით, იქით ეხმარება, რომ ევროკავშირიდან, თუ სხვა ქვეყნებიდან გამოპარული ტვირთები ჩერდება საქართველოს საზღვარზე. 1 300 ასეთი ტრანზაქცია გაჩერდა ჩვენს საზღვარზე. კითხვა არავის უჩნდება, საერთოდ როგორ აღმოჩნდა ჩვენს საზღვართან სანქცირებული ტვირთები თუ კომპანიები. ამიტომ, საქართველო არა მხოლოდ იცავს პირველივე დღეს ნათქვამ სიტყვას, რომ არავის მივცემთ შესაძლებლობას, გამოიყენოს საქართველოს ტერიტორია სანქციების გვერდის ავლისთვის, არამედ აქეთ ეხმარება სხვა ქვეყნებს, რომ რასაც ყურადღება ვერ მიაქციეს, დაცვის მექანიზმებს გამოპარული ტვირთებიც კი გააჩეროს. ამიტომ, საქართველოს კიდევ ერთი მოქალაქის წინააღმდეგ მიღებული დღევანდელი გადაწყვეტილება უკრაინის ხელისუფლების ზოგიერთი წარმომადგენლის მხრიდან არის ძალიან ცუდი ნაბიჯი ქართველი ხალხის წინააღმდეგ. თავისთავად ეს და მეორე მხრივ, ის შეფასებები, რომელიც მოვისმინეთ სანქციების საერთაშორისო კოორდინატორების მხრიდან, აჩვენებს, რომ საფუძველი არ აქვს“, – აღნიშნა პაპუაშვილმა.

ყველას, ევროპელ პარტნიორებს და ჩვენც გვსურს, ეს გადაწყვეტილება იყოს პოზიტიური, როდესაც მისი დრო მოვა და რა თქმა უნდა, მნიშვნელოვანია, იმ რეკომენდაციების შესრულება, რაც არის განსაზღვრული, – ამის შესახებ საქართველოში აშშ-ის ელჩმა, კელი დეგნანმა ევრორეკომენდაციების შესრულების საკითხზე კომენტირებისას განაცხადა.

როგორც კელი დეგნანმა აღნიშნა, მნიშვნელოვანია რეკომენდაციების შესრულების პროცესი, რომელიც უნდა იყოს ინკლუზიური და მასში უნდა იყოს ჩართული ყველა დაინტერესებული მხარე.

„როგორც ევროკომისიამ განაცხადა, სამი რეკომენდაცია არის სრულად შესრულებული და ეს ნიშნავს, რომ რჩება ცხრა რეკომენდაცია, რომელიც არის ძალიან სერიოზული და სასწრაფოდ შესასრულებელი, რათა ქვეყანამ მიიღოს კანდიდატის სტატუსი.

ყველას, ევროპელ პარტნიორებს და ჩვენც გვსურს, ეს გადაწყვეტილება იყოს პოზიტიური, როდესაც მისი დრო მოვა და რა თქმა უნდა, მნიშვნელოვანია, იმ რეკომენდაციების შესრულება, რაც არის განსაზღვრული. ასევე მნიშვნელოვანია რეკომენდაციების შესრულების პროცესი, რომელიც უნდა იყოს ინკლუზიური და მასში უნდა იყოს ჩართული ყველა დაინტერესებული მხარე, ყველა მონაწილე პირი, როგორც შემუშავებაში, ასევე შემდგომ ამ რეკომენდაციების განხორციელებაში. კარგი დასაწყისია, პირველი ნაბიჯები გადადგმულია, თუმცა უფრო მეტი სამუშაო არის შესასრულებელი და ყველა ურჩევს საქართველოს ხელისუფლებას, რომ ამ საკითხს დიდი მნიშვნელობა მიანიჭონ“, – განაცხადა კელი დეგნანმა.

„გადაწყვეტილება ქვეყნის ინტერესებით მივიღე“, – ამის შესახებ საქართველოს პრეზიდენტმა სალომე ზურაბიშვილმა „მთავარი არხის“დამფუძნებლის ნიკა გვარამიას შეწყალებასთან დაკავშირებით ჟურნალისტის მიერ დასმული შეკითხვის პასუხად განაცხადა.

მისი თქმით, გადაწყვეტილება შეწყალებაზე არის ძალიან რთული და მტკივნეული.

„არავის წინაშე არ ვარ ანგარიშვალდებული და ეს გაიგო თავის დროზე სააკაშვილმა, ახლა დღევანდელმა მთავრობამაც. ეს არის ის გადაწყვეტილება, რომელიც ჩვენი ქვეყნის ინტერესებშია და ამიტომ მივიღე. არ მივიღე იმიტომ, რომ მსიამოვნებდა.

ყველა გადაწყვეტილება შეწყალებაზე არის ძალიან რთული, ძალიან მტკივნეული. არ არის საჭირო, ვიღაცებმა ყოველდღიურად გამომიგზავნონ ნიკა გვარამიას ნათქვამები ჩემზე. კარგად მახსოვს და მე თუ შევიწყალე, შევიწყალე ამ მეხსიერებითაც, მახსოვს, მაგრამ ეს არ არის მთავარი. სტრატეგიული მოთმინება არის პრეზიდენტისთვის ყველაზე საჭირო“, – აცხადებს სალომე ზურაბიშვილი.

შეგახსენებთ, საქართველოს პრეზიდენტმა სალომე ზურაბიშვილმა ნიკა გვარამია 22 ივნისს შეიწყალა.

ოკუპირებული აფხაზეთის ე.წ. პრეზიდენტმა ასლან ბჟანიამ, რუსეთის პრეზიდენტი ვლადიმერ პუტინი აფხაზეთში მიიწვია, – ამის შესახებ ინფორმაციას რუსული სამთავრობო მედია РИА Новости ავრცელებს.

არსებული ინფორმაციით, პუტინსა და ბჟანიას შორის სატელეფონო საუბარი აფხაზური მხარის ინიციატივით შედგა და საუბარი აფხაზეთის სოციალურ-ეკონომიკური განვითარების დასახული გეგმების რეალიზებას შეეხო. გარდა ამისა, ბჟანიამ რუსეთში განვითარებულ ბოლო მოვლენებთან დაკავშირებით რუსეთის ხელისუფლებას სრული მხარდაჭერა გამოუცხადა.

“საუბრის დროს აფხაზეთისთვის ფინანსური დახმარების საკითხები განიხილეს. თავის მხრივ, ასლან ბჟანიამ მხარი დაუჭირა რუსეთის ხელმძღვანელობის მოქმედებებს, რომლებიც ქვეყანაში კანონიერებასა და საკონსტიტუციო წესრიგის, მოქალაქეთა უსაფრთხოების და სტაბილურობის უზრუნველყოფაზე იყო მიმართული” – წერია განცხადებაში.

„პრაიდის კვირეული” ძალადობისგან თავისუფალ გარემოში უნდა ჩატარდეს და დაცული იყოს ლგბტ+ თემისა და მათი მხარდამჭერების უფლებები.” – ამის შესახებ განცხადება სახალხო დამცველის ოფიციალურ გვერდზე გამოქვეყნდა.

“საქართველოს სახალხო დამცველი „პრაიდის კვირეულს“ ეხმიანება და აღნიშნავს, რომ უმნიშვნელოვანესია, დაგეგმილი ღონისძიებები ძალადობისგან თავისუფალ გარემოში ჩატარდეს და დაცული იყოს ლგბტ+ თემისა და მათი მხარდამჭერების უფლებები.

 ჩვენს ქვეყანაში გამოხატვისა და შეკრების თავისუფლება დაცულია საქართველოს კონსტიტუციით. რამდენად მიუღებელიც არ უნდა იყოს საზოგადოების რომელიმე ნაწილისთვის კონკრეტული ღირებულებები და შეხედულებები, ნებისმიერ ჯგუფს უნდა შეეძლოს გამოხატვისა და შეკრების თავისუფლების უზრუნველყოფა, უსაფრთხო გარემოში.

ასევე, სახალხო დამცველი გმობს ყველა იმ საჯარო განცხადებასა და მუქარას, რომელმაც შეიძლება საფრთხე შეუქმნას ჩვენი ქვეყნის მოქალაქეებისთვის კანონით მინიჭებული უფლებების დაცვას და რეალიზებას.

მნიშვნელოვანია, რომ ყველა პასუხისმგებელმა ორგანომ საჯაროდ გავრცელებულ ძალადობის შემცველ ყველა მოწოდებასა და მუქარაზე მოახდინოს სათანადო რეაგირება და უზრუნველყოს პრევენციული ღონისძიებების გატარება მოახლოებული კვირეულის უსაფრთხოდ ჩატარების მიზნით.

 სახალხო დამცველი მოუწოდებს შინაგან საქმეთა სამინისტროს, დროულად მოახდინოს რეაგირება ყველა შესაძლო კანონდარღვევაზე და მაქსიმალურად ეფექტურად უზრუნველყოს თითოეული მოქალაქის უსაფრთხოება და გამოხატვის თავისუფლების რეალიზება.”– ნათქვამია სახალხო დამცველის განცხადებაში.