ომის 698-ე დღე- უკრაინელებმა რუსების მიერ გაშვებული ყველა დრონი გაანადგურეს

25
spot_img

22 იანვრის ღამეს რუსეთის საოკუპაციო ძალებმა უკრაინის ტერიტორიას Shahed-136/131 ტიპის 8 უპილოტო საფრენი აპარატით შეუტიეს, – ინფორმაციას უკრაინული მედია უკრაინის შეიარაღებული ძალების საჰაერო ძალებზე დაყრდნობით ავრცელებს.

საჰაერო ძალების ცნობით, დრონები რუსეთის ფედერაციის ტერიტორიიდან, კერძოდ, პრიმორსკო-ახტარსკიდან გაუშვეს.

„რვავე „შაჰედი“ განადგურდა უკრაინის საჰაერო ძალებისა და თავდაცვის ძალების საზენიტო-სარაკეტო ქვედანაყოფებისა და მობილური საცეცხლე ჯგუფების მიერ“, – ნათქვამია საჰაერო ძალების განცხადებაში.

მათივე ინფორმაციით, უპილოტო საფრენი აპარატები ჩამოაგდეს მიკოლაივის, ხერსონის, დნეპროპეტროვსკისა და კიროვოგრადის ოლქებში.

 

დონეცკის გარეუბანში მდებარე ბაზარზე თავდასხმის შედეგად, 27 ადამიანი დაიღუპა, 25 კი დაშავდა.

რუსეთის მიერ კონტროლირებული ქალაქის მმართველობა ბაზრის ტერიტორიის დაბომბვაში უკრაინის მხარეს ადანაშაულებს. უკრაინის თავდაცვის ძალები დონეცკის დაბომბვაში მონაწილეობას უარყოფენ და აცხადებენ, რომ ამ ტერიტორიაზე საბრძოლო ოპერაცია არ ჩაუტარებიათ.

გასული 24 საათის განმავლობაში რუსულმა ძალებმა უკრაინის 9 რეგიონზე მიიტანეს იერიში. შეიარაღებული ძლების ცნობით, საოკუპაციო ძალები განსაკუთრებით გააქტიურდნენ ქვეყნის ჩრდილო-აღმოსავლეთ ნაწილში.

„მხოლოდ ერთი დღის განმავლობაში რუსმა არაადამიანებმა უკრაინის 9 რეგიონში ასობით ქალაქი, სოფელი და დასახლება დაბომბეს. ჩერნიჰივიდან სუმამდე, ასევე მიკოლაევის, კიროვოგრადის და განსაკუთრებით, დონეცკის ოლქები. სამწუხაროდ, არის მსხვერპლი. მხოლოდ ერთი დღის განმავლობაში 60-მდე საბრძოლო შეტაკება მოხდა. ინტენსიური ბრძოლა მიმდინარეობს ავდიივკის, ბახმუტის, მარიინკის, კუპიანსკის ოლქებში, ასევე ჩვენი ქვეყნის სამხრეთ ტერიტორიებზე“, – განაცხადა ტრადიციული ვიდეომიმართვისას უკრაინის პრეზიდენტმა ვოლოდიმირ ზელენსკიმ.