ეკლესიის მიმართ ჩვეულებრივი ტერორიზმი მიმდინარეობს – ეკლესიის მიმართ გაკეთებულ განცხადებებს, ხისტ დამოკიდებულებას, ფიზიკურ შეხებას, თავდასხმებს შეიძლება ტერორიზმის გამოვლინება ვუწოდოთ, – ასეთია პარლამენტის პირველი ვიცე-სპიკერის გია ვოლსკის პოზიცია.

ვოლსკის თქმით, მართლმადიდებლური ეკლესიის მიმართ გაკეთებული განცხადებები პოლიტიკური შინაარსის მატარებელია და პოლიტიკური ჯგუფების სტრატეგიას ემთხვევა.

მისივე აზრით, „ხვალ სხვა კონფესიებსაც გადასწვდებიან”.

„ნებისმიერი ადამიანი, თუნდაც ათეისტი, რომელიც საღად მსჯელობს, კონკრეტულ განცხადებებსა და ქმედებებში აუცილებლად ამოიკითხავს ტერორიზმისთვის დამახასიათებელ ნიშნებს – გინდ სიტყვიერს, გინდ იდეოლოგიურს და გინდ ფიზიკურ ტერორიზმს, რაც ეკლესიის წინააღმდეგ ხორციელდება.

ნებისმიერი თავდასხმა სახელმწიფოს ისეთ მნიშვნელოვან ინსტიტუციაზე, როგორიცაა ეკლესია, დამაზიანებელია ქვეყნისთვის და დესტაბილიზაციის გარკვეულ წინაპირობას ქმნის.

იცით რა ისტორია, სხვა ქვეყნის მაგალითები და საზოგადოებაში დაპირისპირების კერების გაჩენის მეთოდოლოგია, ეს ყველაფერი საფრთხის შემცველია. ეს მხოლოდ მართლმადიდებლურ კონფესიას არ ეხება – ეს ყველა ადამიანს ეხება, ეხება თუნდაც ათეისტს, ვისაც სახელმწიფოს მიმართ გარკვეული პასუხისმგებლობა აქვს”, – განაცხადა გია ვოლსკიმ.

ვფიქრობ, საზოგადოება ძალიან კარგად ხვდება არსებულ რეალობას და კარგ ანალიზსაც აკეთებს ვინ ვინ არის, – ამის შესახებ ჟურნალისტებს თბილისის მერმა, კახა კალაძემ განუცხადა.

„არის კონკრეტული ფაქტები და ქმედებები, რომ ეს ადამიანები ებრძვიან ეკლესიას, სარწმუნოებას, ებრძვიან ყველაფერ ძვირფასს და მნიშვნელოვანს, რაც ჩვენს ქვეყანას გააჩნია. ჩვენი კულტურა, წარსული, ჩვენი ადათ-წესები. რომელი ერთი მაგალითი მოვიყვანო მათი ქმედებებიდან. ასეთი უმსგავსო ფაქტი მოხდა და ხმა არ ამოუღია არავის. არცერთ არასამთავრობო ორგანიზაციას განცხადება არ გაუკეთებია ამასთან დაკავშირებით. ვფიქრობ, საზოგადოება ძალიან კარგად ხვდება არსებულ რეალობას და კარგ ანალიზსაც აკეთებს ვინ ვინ არის“, – განაცხადა კახა კალაძემ.

მისი თქმით, ყველაფერი მიზანმიმართულად ხდება და ვისი ხელით იმართება, ამას საზოგადოება ხვდება.

„გადავხედოთ წლების წინ მათ ქმედებებს. აშკარად ჩანს, რომ მიზანმიმართული ბრძოლაა სარწმუნოების, ეკლესიის წინააღმდეგ. მგონია, რომ ეს ყველაფერი მიზანმიმართულად ხდება და ვინ არიან ეს ადამიანები, ვისი ხელით იმართება, ამას საზოგადოება ხვდება და ანალიზსაც აკეთებს. ამიტომ ჩვენ ყურადღება არ უნდა მივაქციოთ და რა თქმა უნდა, ჩვენი ქვეყანა, ჩვენი ქვეყნის მომავალი, მშვიდობა შევინარჩუნოთ და ქვეყნის ეკონომიკური განვითარება მოვახდინოთ“, – აღნიშნა კახა კალაძემ.

თბილისის მერი კახა კალაძე მიიჩნევს, რომ ოპოზიციური პარტიების წარმომადგენლები იბრძვიან, რომ მომავალ საპარლამენტო არჩევნებში როგორმე 5%-იანი ბარიერი გადალახონ, ქვეყნის განვითარების რეალური გეგმა კი მხოლოდ მმართველ პოლიტიკურ გუნდს გააჩნია.

დედაქალაქის მერი ოპოზიციური პარტიების წარმომადგენლების მიერ გაკეთებულ იმ განცხადებას გამოეხმაურა, რომლის თანახმადაც, პარტია „ქართული ოცნება – დემოკრატიული საქართველოს“ დამფუძნებელი, ყოფილი პრემიერ-მინისტრი, ბიძინა ივანიშვილი პოლიტიკაში იმიტომ დაბრუნდა, რომ მმართველი პარტია 2024 წლის საპარლამენტო არჩევნებს აგებს.

„ძალიან ბევრჯერ გვისაუბრია ამ თემაზე და კარგად ვიცით, რა ხდება, რა მდგომარეობაა ქართულ პოლიტიკაში – რომელ პოლიტიკოსს და პოლიტიკურ პარტიას რა მხარდაჭერა აქვს. ოპოზიციის ძალიან დიდი ნაწილი დღეს იბრძვის იმაზე, რომ როგორმე 5%-იანი ბარიერის გადალახვა შეძლოს. რეალურად, ჩვენ ვართ ის გუნდი, ვისაც შესწევს ძალა, გაატაროს ქართული პოლიტიკა, ჩვენი ქვეყნისა და ხალხის ინტერესები; დაიცვას ჩვენი ქვეყანა; შეინარჩუნოს მშვიდობა და მოხდეს ქვეყნის ეკონომიკური განვითარება. ბიძინა ივანიშვილის როლი ქართულ პოლიტიკაში ძალიან მნიშვნელოვანია და აქ მხოლოდ პარტიული ინტერესებიდან გამომდინარე არ ვსაუბრობ. კიდევ უფრო მაღლა დავაყენებდი მის როლს – ჩვენი ქვეყნისთვის, სამშობლოსთვის და ხვალინდელი დღისთვის ამ ადამიანის როლი განსაკუთრებული და მნიშვნელოვანია“, – განაცხადა კახა კალაძემ.

კითხვაზე – რა პოტენციალი აქვთ ოპოზიციურ პარტიებს მომავალ საპარლამენტო არჩევნებში, კახა კალაძე პასუხობს, რომ პარტია „ქართული ოცნება – დემოკრატიული საქართველო“ უალტერნატივოა.

„ქართულ ოცნებას“ დღეს აქვს იმხელა მხარდაჭერა საზოგადოებაში, როგორიც 2012 წლის შემდეგ არ ჰქონია. ოპოზიცია იბრძვის, რომ როგორმე მოახერხოს საარჩევნო ბარიერის გადალახვა. ესაა რეალობა და მოცემულობა, რაც დღეს ქართულ პოლიტიკაში გვაქვს. „ქართულ ოცნებას“ აქვს უდიდესი შესაძლებლობა, რომ 2024 წლის არჩევნებში გაიმარჯვოს და მომავალ პარლამენტში კონსტიტუციური უმრავლესობა მოიპოვოს“, – აღნიშნა თბილისის მერმა.

არ მგონია, გამოხატვის ის ფორმები, რასაც ცალკეული პირები იყენებენ, დასაშვები იყოს, რადგან ეს შეურაცხყოფს სასულიერო პირების ღირსებას, – ამის შესახებ საქართველოს პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

„ოპოზიციის მხრიდან ეკლესიისა და პატრიარქის მიმართ აღვირახსნილი და ნეგატიური კამპანია ისევ ისმის. ბუნებრივია, ამ საკითხებზე პასუხების გაცემა არის საჭირო. ასეთი ავტორიტეტული ორგანიზაციისგან და პატრიარქისგან ხელები შორს წაიღონ და დაანებონ თავი. არ მგონია, რომ გამოხატვის ის ფორმები, რასაც ცალკეული პირები იყენებენ, რაღაცნაირად დასაშვები იყოს, რადგან ეს შეურაცხყოფს სასულიერო პირების ღირსებას და ეს ყველამ უნდა გაითვალისწინოს. ისე უნდათ სიტუაციის წარმოჩენა, რომ თითქოს, ეს არის გამოხატვის რაღაც შეზღუდვა. კრიტიკული მოსაზრებების გამოთქმის საშუალება ყველას აქვს, აქ საუბარია დამახინჯებული ფორმებით მსჯელობაზე“, – აღნიშნა მიხეილ სარჯველაძემ.

მისი თქმით, გამოხატვის ნიღბის ქვეშ კი არის ძალიან მავნებლური პოლიტიკა.

„ყველა კარგად ხვდება, რომ უზარმაზარი ავტორიტეტული ორგანიზაციის იმიჯის შელახვის მცდელობა აქვს ბევრს. მართლმადიდებელი ეკლესია ისტორიულად დიდი ავტორიტეტის მქონე დაწესებულებაა, რომელსაც მათ შორის ქვეყნის კონსტიტუცია აღიარებს. ამ ყველაფერს მხოლოდ ის არ გვალაპარაკებს, რომ მართლმადიდებელი ვარ. ზოგადად საუბარია ნებისმიერი აღმსარებლობის თავისუფლებაზე და რა თქმა უნდა, უზარმაზარ პატივისცემაზე, რომლითაც განმსჭვალული უნდა იყოს ნებისმიერი ადამიანი, ვინც ცდილობს, კრიტიკული მოსაზრება გამოხატოს. კრიტიკის უფლება აქვს, მაგრამ ზღვარს არ უნდა გასცდეს, როცა გამოხატვის ფორმებს შეარჩევს“, – განაცხადა მიხეილ სარჯველაძემ.

პაპუაშვილი ეკლესიის თემაზე სპეკულაციას თუ გააგრძელებს, მას „წმინდა იოსებ სტალინის“ ხატს ვაჩუქებ, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მანჯგალაძის თქმით, ეკლესიას არავინ ებრძვის.

„ჩვენ ვართ ეკლესიის მთავარი პატივისმცემელი ხალხი. შალვა პაპუაშვილი ეკლესიის თემაზე სპეკულაციას თუ გააგრძელებს, მას „წმინდა იოსებ სტალინის“ ხატს ვაჩუქებ. ეკლესიას ყველა ის ადამიანი ებრძვის, ვინც ცდილობს, ეკლესია გამოიყენოს თავისი პოლიტიკური ვიწრო მიწიერი მიზნებისთვის. ეკლესია არის ზეციერი და პაპუაშვილს უნდა, ქრისტე საარჩევნო კამპანიაში ჩართოს, რაც არ გამოუვა“, – განაცხადა პაატა მანჯგალაძემ.

საქართველოს პარლამენტის თავმჯდომარე შალვა პაპუაშვილმა განაცხადა, რომ „დეზინფორმაციის, მანიპულაციისა და ისტერიის ნაზავი, რომელიც საზოგადოებამ ეკლესიასა და მრევლზე თავდასხმისას იხილა, გასცდა აქამდე ნანახი შეტევების მასშტაბს და საშიშ ზღვარს მიუახლოვდა“.

მოვუწოდებთ „ოცნებას“, პარლამენტში მოიწვიოს გენერალური პროკურორი და მისი მონაწილეობით განიხილოს ელიტური კორუფციის ფაქტების გამოძიებაზე, კორუფციონერთა დაკავებასა და ბრალდებაზე პასუხისმგებელი მთავარი უწყების – პროკურატურის საქმიანობის ანგარიში, – ამის შესახებ პარტია „საქართველოსთვის“ თავმჯდომარის მოადგილე ნათია მეზვრიშვილმა ბრიფინგზე განაცხადა.

მეზვრიშვილის განცხადებით, იმ პირობებში, როდესაც საქართველოს მმართველ პარტიასთან დაახლოებული ელიტური ოჯახები სულ უფრო მეტად მდიდრდებიან, საქართველოს პარლამენტი არღვევს კანონს და არ ახორციელებს პროკურატურაზე ზედამხედველობას. მეზვრიშვილის ინფორმაციით, პარლამენტს წლებია არ განუხილავს პროკურატურის საქმიანობის ანგარიში.

„პოლიტიკური კორუფციის ფაქტებზე ჩვენი გუნდის მიერ თვეების განმავლობაში პროკურატურაში არაერთი განცხადების შეტანამ შედეგი არ მოიტანა. „ოცნების“ კორუმპირებულები და „ოცნებასთან“ დაახლოებული 25 ელიტური ოჯახი აგრძელებს ბიუჯეტიდან ხალხის ფულის მოპარვას – ნაწილი სახლში მიაქვთ, ნაწილი – პარტიის სალაროში. ხალხი ღარიბდება, ცხოვრების პირობები უარესდება, ელიტები კი კიდევ უფრო მდიდრდებიან.

ამ ფონზე, პარლამენტი არღვევს კანონს და არ ახორციელებს პროკურატურაზე ზედამხედველობას – პარლამენტს წლებია არ განუხილავს პროკურატურის საქმიანობის ანგარიში და არ დაინტერესებულა როგორ ებრძვის კორუფციას პროკურატურა.

ფორმალურია საპროკურორო საბჭოს სხდომებიც და ფიქტიურია პარლამენტის წარმომადგენლობა საბჭოში – საბჭოზე არ ისმის კრიტიკული ხმა პროკურატურის იმ გამოწვევებზე, რასაც პირდაპირ გავლენა აქვს მოქალაქეთა უფლებებზე. ხელისუფლების და ოპოზიციის წარმომადგენლები საბჭოს სხდომას ან არ ესწრებიან, ან კითხვებს არ სვამენ. საბჭოსადმი პარლამენტის არასერიოზული დამოკიდებულება კარგად გამოვლინდა „ოცნების“ მხარდაჭერით ოპოზიციის წარმომადგენლის არჩევისას.

პროკურატურის ფუნქციაა ხალხის დაცვა კრიმინალისგან და არა კორუმპირებული ელიტებისთვის ხალხის ფულის მოსაპარად კომფორტული პირობების შექმნა და მათი დაცვა სასჯელისგან. მოქმედი გენერალური პროკურორის არჩევიდან 4 წელი გავიდა. 4 -წლიანი დუმილის შემდეგ მაინც, ხალხს უფლება აქვს, მის მიერ არჩეული პარლამენტის მეშვეობით, გენერალურ პროკურორს დაუსვას კითხვები და გაიგოს, რატომ არის დღეს პროკურატურა უმოქმედო სისტემური ელიტური კორუფციის ფაქტებზე? რატომ უწყობს პროკურატურა ხელს ხალხის ხარჯზე 25 ელიტური კორუმპირებული ოჯახის კიდევ უფრო მეტად გამდიდრებას?

პროკურატურის დამოუკიდებლობისადმი არსებული ლეგიტიმური კითხვების ფონზე (რაც დეტალურად აისახა ევროკავშირის გაფართოების ანგარიშში), გენერალური პროკურორის მიერ საზოგადოებისთვის ხედვის წარდგენა, მათ შორის რეფორმებზე, კრიტიკულად მნიშვნელოვანია საზოგადოებისადმი პროკურატურის ანგარიშვალდებულების, ქვეყანაში წესრიგისა და მოქალაქეთა დაცულობის უზრუნველყოფისთვის.

მოვუწოდებთ „ოცნებას“, საგაზაფხულო სესიის გახსნისთანავე, დაუყოვნებლივ დანიშნოს პროკურატურის საქმიანობის ანგარიშის მოსმენა გენერალური პროკურორის მონაწილეობით. ეს მათთვის მითუმეტეს არ უნდა იყოს პრობლემა, როცა „ოცნების“ საპატიო თავმჯდომარემ აღიარა კორუფციული რისკების მატება.

მოვუწოდებთ გენერალურ პროკურორს, შეასრულოს საზოგადოების წინაშე ანგარიშვალდებულების და გამჭვირვალობის ფუნქცია – მოითხოვოს და პირადად წარსდგეს ანგარიშით პარლამენტის წინაშე. იმედს გამოვთქვამთ, რომ კორუფციის ფაქტების გამოძიებაზე პასუხისმგებელი მთავარი სახელმწიფო უწყება კითხვებს არ გაექცევა“,- განაცხადა ნათია მეზვრიშვილმა.