პრეზიდენტს ვურჩევდი, ქართველი ხალხის ინტერესებს დაჰყვეს, ნუ ჯიუტობს, იყოს გამაერთიანებელი საზოგადოების, რისთვისაც ავირჩიეთ და არა რომელიმე პარტიის წარმომადგენელი, – ამის შესახებ საპარლამენტო უმრავლესობის წევრმა, ირაკლი ზარქუამ აღნიშნა, რომელსაც კითხვა დაუსვეს პრეზიდენტის ადმინისტრაციის განცხადებაზე, რომ 3 ივლისის კენჭისყრასთან დაკავშირებით პარლამენტისგან დეტალურ ინფორმაციას ითხოვენ.

„პრობლემა არაა, მოგვმართავს და მიიღებს პასუხს. იყო ხოლმე შემთხვევა, როდესაც რამდენიმე დეპუტატი აგვიანებდა და ითხოვა, შემდეგ უკვე იყვნენ ადგილზე. ასე რომ, თუ ვიღაცას უნდა, ამისგან რაღაც სკანდალი გამოაცხოს, არ გამოვა და სხვა რამე ეძებოს. პრეზიდენტს ვურჩევდი, ქართველი ხალხის ინტერესებს დაჰყვეს, ნუ ჯიუტობს და იყოს გამაერთიანებელი საზოგადოების, რისთვისაც ჩვენ ავირჩიეთ და ვთქვით, რომ უნდა იყოს აპოლიტიკური, არა რომელიმე პარტიის წარმომადგენელი. ამისთვის ავირჩიეთ ქალბატონი სალომე, დავსვათ კითხვა, რა უნდა და ჩვენც გაგვაგებინეთ“, – აღნიშნა ირაკლი ზარქუამ.

პრეზიდენტის ადმინისტრაციაში 7 ივლისს განაცხადეს, რომ „საარჩევნო კოდექსზე“ პრეზიდენტის ვეტოს დაძლევასთან დაკავშირებით 3 ივლისის კენჭისყრის თაობაზე პარლამენტისგან დეტალურ ინფორმაციას ითხოვენ. პრეზიდენტის ადმინისტრაციას არ დაუკონკრეტებია, რის საფუძველზე ითხოვენ კენჭისყრაზე დეტალურ ინფორმაციას, თუმცა ცნობილია, რომ პარტია „გირჩის“ წარმომადგენელმა, ალექსანდრე რაქვიაშვილმა განაცხადა, რომ „ქართულმა ოცნებამ“ ვეტოს დაძლევის პროცედურა გააყალბა.

საპარლამენტო უმრავლესობის ერთ-ერთი ლიდერის, არჩილ თალაკვაძის განცხადებით, ელჩთან დაკავშირებით უკრაინის გადაწყვეტილება სამართლიანი არ არის. მისივე თქმით, ეს ნაბიჯი  უკრაინის მიმართ საქართველოს მხარდაჭერას ვერ შეასუსტებს.

„რა თქმა უნდა, ეს გადაწყვეტილება არ არის სამართლიანი, თანაც იმ ელჩის მიმართ, რომელიც ომის განმავლობაში ერთი დღეც არ გასულა უკრაინიდან და კიევიდან. ის რჩებოდა კიევში, მათ შორის მაშინაც, როცა კიევი იბომბებოდა. ის იყო იმ გამონაკლის დიპლომატებს შორის, საქართველო იყო გამონაკლის საელჩოებს შორის, რომელთა ევაკუაციაც არ მომხდარა და  ბოლომდე რჩებოდნენ უკრაინაში უკრაინელი ხალხის გვერდით. ეს ნაბიჯი უკრაინის მიმართ საქართველოს მხარდაჭერას ვერ შეასუსტებს, თუმცა ცალსახად არასამართლიანი და დაუმსახურებელია. საქართველოს ელჩი ნამდვილად არ იმსახურებდა ასეთ გადაწყვეტილებას“, – განაცხადა არჩილ თალკვაძემ.

ამასთან, როგორც თალაკვაძემ აღნიშნა, რადიკალურ ოპოზიციას არ აინტერესებს, დაიცვას საქართველოს ინტერესები და ელჩის პოზიცია.

„ოპოზიცია რომ სახელმწიფოს და ჩვენი ქვეყნის ინტერესების წინააღმდეგ მოქმედებს, ეს ჩანს ყველა მიმართულებით და ელჩთან დაკავშირებითაც ისინი იქნებიან გახარებული იმ გადაწყვეტილებით, რომელიც იყო მიღებული. ნამდვილი პოლიტიკოსი საქართველოს ინტერესებით უნდა იყოს და არის დაინტერესებული, დაიცვას საკუთარი ელჩის პოზიცია, მით უმეტეს, მაშინ, როცა სიმართლე და ყველა არგუმენტი არის ჩვენი ელჩის მხარეს, ვინც ომის მიმდინარეობისას რჩებოდა კიევში, მათ შორის როცა კიევი იბომბებოდა. რადიკალურ ოპოზიციას რომ არ აინტერესებს ეს, ახალი ნამდვილად არ არის. იმედი მაქვს, 2024 წელს ის ელექტორატი, რომელიც ოპოზიციას უჭერდა მხარს, ამას სათანადოდ შეაფასებს“, – განაცხადა არჩილ თალაკვაძემ.

უკრაინაში საქართველოს ელჩმა, გიორგი ზაქარაშვილმა უკრაინა დატოვა.

უკრაინის პრეზიდენტის, ვოლოდიმირ ზელენსკის მხრიდან მისთვის მიცემული 48 საათი 6 ივლისს ამოიწურა. კერძოდ, ვოლოდიმირ ზელენსკიმ 3 ივლისს განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა თბილისში კონსულტაციები გამართოს მიხეილ სააკაშვილის უკრაინისთვის გადაცემის საკითხზე.

უმჯობესი იქნება, რადიკალური ოპოზიციის წარმომადგენლებმა წაიკითხონ ნატო-ს ანგარიშები და გაეცნონ ინფორმაციას, რომელიც საქართველოში ჩატარებულ წვრთნებსა და ნატო-ს მისიებში საქართველოს მონაწილეობას უკავშირდება, – ამის შესახებ საპარლამენტო უმრავლესობის ერთ-ერთმა ლიდერმა, არჩილ თალაკვაძემ ჟურნალისტებს განუცხადა.

თალაკვაძეს ჟურნალისტებმა ჰკითხეს, რომ „ოპოზიციის წარმომადგენლების თქმით, ხელისუფლება არაფერს აკეთებს, ვერანაირი მესიჯით ვერ მიდის ვილნიუსის სამიტზე და არ აქვთ მოლოდინი, რომ სამიტი რამე შედეგით დასრულდება“.

თალაკვაძის თქმით, „ეს ოპოზიციის დაზეპირებული განცხადებაა, რომელსაც წლების განმავლობაში იმეორებენ“.

ამასთან, როგორც საპარლამენტო უმრავლესობის ერთ-ერთმა ლიდერმა აღნიშნა, რადიკალურ ოპოზიციას აქვს ერთი დღის წესრიგი, გააკრიტიკოს საკუთარი ქვეყანა, როგორმე დააზიანოს სახელმწიფო მხოლოდ იმისთვის, რომ რაღაც პოლიტიკური ქულები მოიპოვოს.

„საქართველო არის ნატო-ს ყველაზე საიმედო პარტნიორი და არაწევრ ქვეყნებს შორის ის სახელმწიფო, რომელსაც ერთ-ერთი ყველაზე დიდი წვლილი შეაქვს ნატო-ს საერთაშორისო მისიებში. ჩვენი ქვეყანა სტრატეგიულ მზადყოფნაშია გაწევრიანებისთვის და რა თქმა უნდა, ჩვენ საერთაშორისო პარტნიორებთან ერთად ვმუშაობთ, რათა მიღებული იყოს ის პოლიტიკური გადაწყვეტილება, რასაც საქართველო იმსახურებს. საქართველო ნამდვილად იმსახურებს, გახდეს ევროპული და ევროატლანტიკური ოჯახის წევრი.

რაც შეეხება კრიტიკას, გვესმის, რომ რადიკალურ ოპოზიციას აქვს ერთი დღის წესრიგი, გააკრიტიკოს საკუთარი ქვეყანა, როგორმე დააზიანოს სახელმწიფო მხოლოდ იმისთვის, რომ რაღაც პოლიტიკური ქულები მოიპოვოს, თუმცა საზოგადოება ყველაფერს ხედავს და არჩევნებზე ამას სათანადოდ აფასებს. რა თქმა უნდა, ჩვენი გუნდისა და ხელისუფლების თითოეული ლიდერის მოლოდინია, რომ ნატო ძალიან მკაფიო პოზიციას დააფიქსირებს საქართველოსთან მიმართებით და ის გზავნილი, რომელიც ბუქარესტის სამიტზე იყო გაკეთებული თავის დროზე, გაძლიერდება და სამომავლო განვითარების ტრაექტორიას ცხადად გამოაჩენს“, – განაცხადა არჩილ თალაკვაძემ.

ხელისუფლებამ ყველაფერი გააკეთა, რომ ჩვენ ნატო-სა და ევროკავშირს დავშორებულიყავით. ის ქვეყნები, რომლებიც ამ გზაზე გაცილებით უკან იყვნენ, მოლდოვა და უკრაინა, დღეს ევროკავშირის წევრობის კანდიდატები არიან, – ამის შესახებ ოპოზიციონერმა დეპუტატმა, რომან გოცირიძემ განაცხადა.

გოცირიძის თქმით, საქართველოს ხელისუფლებამ ანტიდასავლური კამპანიით დასავლელი პარტნიორების ნდობა დაკარგა.

„აშკარა პრორუსული დამოკიდებულებაა რუსეთ-უკრაინის აგრესიის ფონზე – კეთდება ანტიუკრაინული განცხადებები, მიმდინარეობს ოპოზიციის დევნა და დემოკრატიის ფეხქვეშ გათელვა. მთლიანობაში, ეს ყველაფერი ერთი სიტყვით შეიძლება აღიწეროს, რომ საქართველოში დემოკრატიის ხარისხი გაუარესდა და საქართველომ უკან გადადგა ნაბიჯები, რაც ჩვენი პარტნიორებისთვის შეუმჩნეველი არ არის.

„ქართული ოცნების“ მთელი პოლიტიკა აწყობილია პარტიულ ინტერესებზე, ასევე ოლიგარქის, ბიძინა ივანიშვილის მსახურებაზე. ახლა გაახსენდათ, თურმე პარტიულ ინტერესებზე წინ ქვეყნის ინტერესები უნდა იყოს. რომელი საქვეყნო ინტერესები დააყენეს კლანურ ინტერესებზე მაღლა? ოლიგარქიული მმართველობა შეუმჩნეველი არავის რჩება. საქართველოს არ მართავს „ქართული ოცნება“, მართავს არაფორმალური მმართველი. ასეთ ვითარებაში შეუძლებელია, რომ დასავლელი პარტნიორების მხრიდან პროცესები აღქმული იყოს, როგორც პროგრესის შემქმნელი“, – განაცხადა რომან გოცირიძემ.

პატიმარი სააკაშვილი ადეკვატურიაო როგორ გითხრათ?! -გამოჯანმრთელების შემდეგ როგორც სხვები იხდიან სასჯელს, ისე უნდა გადავიყვანოთ საპატიმროში, ეს ამდენი შოუ და მასკარადი დასრულდა, – ამის შესახებ საპარლამენტო უმრავლესობის წევრმა, ირაკლი ზარქუამ საქართველოს მესამე პრეზიდენტ, მიხეილ სააკაშვილზე საუბრისას განაცხადა.

როგორც ზარქუამ აღნიშნა, მისთვის მიხეილ სააკაშვილის განცხადებები გაუგებარია.

„პატიმარი სააკაშვილი ადეკვატურიაო როგორ გითხრათ?! ვერ არის კარგად, რა განცხადებებს აკეთებს?! დაწერს, წაშლის, განცხადებას გააკეთებს, ხან ქართულად გველაპარაკება, ხან რუსულად, ხან უკრაინულად. კაცი ვერ არის კარგად, გამოჯანმრთელებას ვუსურვებ, გამოჯანმრთელების შემდეგ როგორც სხვები იხდიან სასჯელს ისე უნდა გადავიყვანოთ საპატიმროში, ეს ამდენი შოუ და მასკარადი დასრულდა”, – აღნიშნა ზარქუამ.