Home Blog Page 1729

“შოვის ტრაგედიასთან დაკავშირებით, თუ ვინმე იყო პასუხისმგებელი, პირველ რიგში, გომელაური – მან უნდა გასცეს პასუხი კითხვებს”

შოვის ტრაგედიასთან დაკავშირებით, თუ ვინმე იყო პასუხისმგებელი, პირველ რიგში, ეს იყო გომელაური, რომელიც 11 დღის შემდეგ ჩავიდა ადგილზე, ამიტომ, მან აუცილებლად უნდა გასცეს პასუხი იმ კითხვებს, რომელიც საზოგადოებას აქვს და „ნაციონალური მოძრაობა“ ამისათვის ყველა ბერკეტს გამოიყენებს, – ამის შესახებ „ერთიანი ნაციონალური მოძრაობის“ გენერალური მდივნის მოადგილე ირაკლი ფავლენიშვილმა განაცხადა, რითაც შინაგან საქმეთა მინისტრის, ვახტანგ გომელაურის პარლამენტში ინტერპელაციის წესით დაბარებას გამოეხმაურა.

მისივე თქმით, ზედაპირზე არის ის დანაშაულებრივი უმოქმედობა, რომელშიც ყველა სახელისუფლებო სტრუქტურა ერთად იყო ჩართული.

„ძალიან მაღალი საჯარო ინტერესი არსებობს შოვში დატრიალებულ ტრაგედიასთან დაკავშირებით. ზედაპირზე არის ის დანაშაულებრივი უმოქმედობა, რომელშიც ყველა სახელისუფლებო სტრუქტურა ერთად იყო ჩართული. სახელმწიფო სტრუქტურების ის სრული არაეფექტურობა და არაკომპეტენტურობა, რომლებიც პასუხისმგებლები იყვნენ კონკრეტული ღონისძიებების გატარებაზე და თუ ვინმე იყო, პირველ რიგში, პასუხისმგებელი პოლიტიკური თანამდებობის პირებიდან, ეს არის შინაგან საქმეთა მინისტრი, რომელიც თერთმეტი დღის მანძილზე არ ჩასულა შემთხვევის ადგილას. ეს არის ნამდვილად გაუგონარი, მათ შორის, არამხოლოდ პოლიტიკურად, არამედ მორალურადაც გაუგონარი და გაუმართლებელი საქციელი და მათ შორის, სამართლებრივადაც იმიტომ, რომ კონკრეტულად ეს პირი იყო პასუხისმგებელი. ამიტომაც, რა თქმა უნდა, მასთან დაკავშირებით არსებობს ძალიან ბევრი კითხვა და მან აუცილებლად უნდა გასცეს პასუხი ამ კითხვებს. „ნაციონალური მოძრაობა“ ყველაფერს იზამს, ყველა ინსტრუმენტს და ყველა მექანიზმს გამოიყენებს იმისთვის, რომ გომელაურის პასუხები მალე იხილოს საზოგადოებამ,“ – განაცხადა ირაკლი ფავლენიშვილმა.

შეგახსენებთ, შოვში მეწყერი 3 აგვისტოს ჩამოწვა. სტიქიის ზონაში 33 ადამიანს ეძებდნენ, აქედან 26 გარდაცვლილი იპოვეს, 7 დაკარგული მოქალაქის სამძებრო სამუშაოები ამ დრომდე მიმდინარეობს.

“აშშ უკრაინიდან მარცვლეულის ექსპორტისთვის ალტერნატიული მარშრუტების მოძიებას გეგმავს” – “უოლ სთრით ჯორნალი”

„უოლ სთრით ჯორნალის“ ინფორმაციით, აშშ უკრაინიდან მარცვლეულის ექსპორტისთვის ალტერნატიული მარშრუტების მოძიებას გეგმავს და ამისთვის მოლაპარაკებებს აწარმოებს თურქეთთან, უკრაინასთან და მის მეზობლებთან.

როგორც გამოცემა მაღალჩინოსნებზე დაყრდნობით იუწყება, შემუშავებულია გეგმა, რომლის მიხედვითაც, ოქტომბრისთვის დუნაიზე შესაძლებელი იქნება ყოველთვიურად ოთხი მილიონი ტონა მარცვლეულის ტრანსპორტირება. ამ მოცულობის უდიდესი ნაწილი შავ ზღვაში რუმინეთის პორტებისკენ გადამისამართდება, რის შემდეგაც ტვირთი უკვე სხვადასხვა ქვეყანაში გაიგზავნება.

გამოცემის ცნობით, ვაშინგტონი ასევე განიხილავს ალტერნატიულ ვარიანტებსაც, მათ შორის უკრაინის პორტებიდან მოძრავი სატვირთო გემების დასაცავად სამხედრო გადაწყვეტილებებს.

“საგამოძიებო კომისიის ინიციატივა უფრო მეტად მიანიშნებდა, რომ ახალი პოლიტიკური დებატებისთვის ხელოვნურად შეექმნათ ასპარეზი”

პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის შეფასებით, შოვის სტიქიასთან დაკავშირებით საგამოძიებო კომისიის შექმნა მართებული არ არის და ეს ინიციატივა უფრო ოპოზიციის მხრიდან ახალი პოლიტიკური დებატებისთვის ხელოვნურად ასპარეზის შექმნის მცდელობაა.

სარჯველაძის თქმით, პარლამენტში არსებობს სხვა ეფექტიანი ინსტრუმენტები გარკვეული კითხვების დასასმელად.

„ნებისმიერ კითხვასთან დაკავშირებით, რომელიც შეიძლება გაჩნდეს, ყველას თავისი სურვილისამებრ შეუძლია იმუშაოს. უბრალოდ, იმ ფონზე, როდესაც აშკარად ჩანს ამ ტრაგედიაზე ქულების დაწერის მოტივაცია, რომ რაღაცა ფორმით ოპოზიციაში მთავარ ამოცანად საკუთარი ვიწროპარტიული ინტერესების დაკმაყოფილების სურვილია, ასეთ ფონზე მთლად დამაჯერებლად არ გამოიყურებოდა საგამოძიებო კომისიის შექმნასთან დაკავშირებით ინიციატივა, რადგან ეს ყველაფერი უფრო მეტად მიანიშნებდა იმაზე, რომ ახალი პოლიტიკური დებატებისთვის ხელოვნურად შეექმნათ ახალი ასპარეზები.

შეისმინეს, რომ სხვა არანაკლებ მნიშვნელოვანი, ეფექტიანი საზედამხევდელო ინსტრუმენტები არსებობს, მათ შორის, ეს შეიძლება იყოს ინტერპელაცია ან  სადეპუტატო კითხვა და სხვადასხვა. ყოველ შემთხვევაში, პარლამენტის რეგლამენტი იძლევა შესაძლებლობას, რომ თუ ვინმეს ჭეშმარიტება აინტერესებს, ეს არ დარჩეს ფარდის ქვეშ, ყველაფერი შეიძლება გაირკვეს და ყველა კითხვა დაისვას.

უმჯობესია, ჯერ ვთქვათ, რა კითხვებია, შემდეგ უნდა ვიმსჯელოთ, რომელი საპარლამენტო ზედამხედველობის მექანიზმი იქნება ყველაზე მეტად რელევანტური. პირადად მგონია, რომ ამ შემთხვევაში საგამოძიებო კომისიის შექმნა არ უნდა იყოს მართებული. ჯერ ვთქვათ კონკრეტულო საკითხი, კონკრეტულად ინტერესის საგანი და ამის მიხედვით ვიმსჯელოთ, რა მასშტაბი სჭირდება აღნიშნულ კითხვებთან დაკავშირებით პასუხების მიღებას. ერთ-ერთი დაშვება, რომელსაც აყენებს ოპოზიცია, არის, რომ თვითონაც ვერ შეძლებენ ხმების მობილიზებას, ხელისუფლებას დააბრალებენ, თითქოს რამე დასამალი აქვს. არავის არაფერი დასამალი არ აქვს, უბრალოდ, საუბარია, საგამოძიებო თუ საზედამხედველო ინსტრუმენტების გამოყენებაა რელევანტური“, – განაცხადა მიხეილ სარჯველაძემ.

ჰავაის კუნძულ მაუიზე ხანძრის შედეგად დაღუპულთა რაოდენობა 101-მდე გაიზარდა

ჰავაიზე, კუნძულ მაუიზე ტყის ხანძრების შედეგად დაღუპულთა რაოდენობა 101-მდე გაიზარდა. ინფორმაციას შტატის გუბერნატორი ჯოშ გრინი ავრცელებს.

მისი განცხადებით, სტიქიის ზონის მეოთხედზე მეტი გამოკვლეულია.

გუბერნატორის თქმით, მსხვერპლის რიცხვი, შესაძლოა, გაიზარდოს, რადგან ადგილზე სამძებრო სამუშაოები მიმდინარეობს.

კუნძულ მაუიზე ხანძარი ერთი კვირის წინ გაჩნდა. სპეციალისტების შეფასებით, ეს ამერიკის შეერთებულ შტატებში ბოლო 100 წლის განმავლობაში მომხდარ ხანძრებს შორის ყველაზე მასშტაბური ხანძარია.

სტიქიამ თითქმის მთლიანად გაანადგურა ზღვისპირა ქალაქი ლაჰაინა. დამწვარია 2 200 შენობა, რომელთა უმეტესობა საცხოვრებელი სახლია. ექსპერტების შეფასებით, ქალაქში ზარალი 5,5 მილიარდ დოლარს აღწევს.

“ველოდებით ბატონ გომელაურს პარლამენტში” – თინა ბოკუჩავა

საპარლამენტო ფრაქცია „ნაციონალური მოძრაობის“ თავმჯდომარე თინა ბოკუჩავა ასახელებს კითხვებს, რომლითაც ფრაქციამ შინაგან საქმეთა მინისტრ ვახტანგ გომელაურს ინტერპელაციის ფორმატში მიმართა.

როგორც ბოკუჩავა აღნიშნავს, ინტერპელაციასთან დაკავშირებით უკვე მიმართეს პარლამენტს, რომელმაც კითხვები გომელაურს უნდა გადასცეს.

ფრაქციის კითხვები ეხება ადრეული გაფრთხილების სისტემის დანერგვას, შოვში მომხდარი სტიქიის შემდეგ სამძებრო-სამაშველო ოპერაციის დაგვიანების მიზეზებს, მეზობელი ქვეყნებისთვის დახმარების ართხოვნას და ასევე, სამაშველო აღჭურვილობის მდგომარეობას.

„საზოგადოებისთვის ცნობილია, რომ ფრაქცია „ერთიანმა ნაციონალურმა მოძრაობამ“ მოითხოვა საპარლამენტო საგამოძიებო კომისიის შექმნა პარლამენტში შოვში მომხდარი ტრაგედიის შესწავლის მიზნით მაშინ, როდესაც ნულოვანია საზოგადოებრივი ნდობა საგამოძიებო უწყებების მიმართ; მაშინ, როცა ხელისუფლება მრავალი წლის განმავლობაში სხვადასხვა საქმეზე მუდმივად აცხადებდა, რომ მიმდინარეობს გამოძიება და ჩვენ ამ გამოძიების შედეგებს უნდა დაველოდოთ, მაგრამ სიმართლე უნდა დადგინდეს მალე და სიმართლე აუცილებელია საზოგადოებისთვის და მათ შორის გადარჩენილი ადამიანებისთვის, რომლებიც თავდასხმის სამიზნედ ირჩევს დღეს ხელისუფლება. საგამოძიებო კომისიასთან ერთად ჩვენ განვაცხადეთ, რომ გამოვიყენებდით აბსოლუტურად ყველა ზედამხედველობით საპარლამენტო ინსტრუმენტს იმისთვის, რომ ანგარიშვალდებულების მექანიზმი, რომელიც მორღვეულია ბიძინა ივანიშვილის რეჟიმის პირობებში ჩვენ, პარლამენტარებმა მაქსიმალურად გამოვიყენოთ და საზოგადოებამ გაიგოს სიმართლე. სწორედ ამ დაპირების ფარგლებში ჩვენ ავამოქმედეთ კიდევ ერთი საპარლამენტო ინსტრუმენტი, რომელიც რეგლამენტით და კონსტიტუციით გვაქვს განსაზღვრული, ეს არის ინტერპელაციის წესი და ინტერპელაციის წესით ვითხოვთ შს მინისტრის, ვახტანგ გომელაურის მოსვლას საქართველოს პარლამენტში.

ჩვენ ოფიციალურად მივმართეთ უკვე პარლამენტს, რომელიც შესაბამისად ვალდებულია გადასცეს აღნიშნული კითხვები უწყებას, კონკრეტული კითხვებით, რომელიც შემდეგია: – რატომ არ მოხდა ადრეული გაფრთხილების სისტემის დანერგვა მაშინ, როდესაც ხელისუფლების უმაღლესი თანამდებობის პირები გასცემდნენ აღნიშნულზე დაპირებას მრავალი წლის განმავლობაში, მათ შორის თავად შს მინისტრი ვახტანგ გომელაური? რა გახდა სამძებრო-სამაშველო ოპერაციის დაგვიანების მიზეზი. ვიცით, რომ შსს-ში შედის ის კონკრეტული სამსახური, რომელსაც ევალება სამძებრო-სამუშაოების განხორციელება, რატომ არ ითხოვა საქართველოს ხელისუფლებამ მეზობელი ქვეყნების დახმარება, როდესაც არსებობს ასეთი გამოცდილება ჩვენი ქვეყნისთვის და რატომ განაცხადა პრემიერმა ღარიბაშვილმა, რომ ამის საჭიროება არ არსებობდა, მონაწილეობა თუ არა ამ გადაწყვეტილების მიღებაში თავად შს მინისტრი და მისი უწყება და რა გახდა საფუძველი, რატომ ჩათვალეს, რომ წარმატებით მიმდინარეობდა სამძებრო-სამაშველო სამუშაოები და არ იყო მეზობელი ქვეყნების დახმარება საჭირო.

ასევე ბატონმა გომელაურმა საზოგადოების წინაშე უნდა უპასუხოს კითხვას იმასთან დაკავშირებით, თუ რა მდგომარეობაშია სამაშველო აღჭურვილობა, რადგან თვითმხილველების განცხადებებით, დასტურდება ის, რომ მაშველები, რომლებიც თავდაუზოგავად შრომობდნენ მრავალი საათის და მრავალი დღის განმავლობაში, არ აქვთ საერთაშორისო სტანდარტებით გათვალისწინებული შესაბამისი აღჭურვილობა, რაც დაუშვებელია და გვაინტერესებს, რა გახდა ამის მიზეზი მაშინ, როდესაც კორუფციაშია ჩაფლული სახელმწიფოს ყველა უწყება და უამრავი საბიუჯეტო სახსრები იხარჯება ისეთ პროგრამებზე, რომელსაც არანაირი სიკეთე ჩვენი მოქალაქეებისთვის არ მოაქვს.

და ბოლო კითხვა, რომელსაც ასევე ბატონმა გომელაურმა უნდა უპასუხოს არის ის, თუ რა გარემოებებზე დაყრდნობით თქვა უარი სახელმწიფომ აშშ-გან ორი სამძებრო-სამაშველო ვერტმფრენის გრანტის წესით შესყიდვაზე. იცით, რომ არის კონკრეტულად აღნიშნული გაწერილი საქართველოს ბიუჯეტში, რითაც დასტურდება, რომ საქართველოს სახელმწიფოს ეს შემოთავაზება ჰქონდა, რომ გრანტის წესით მიეღო სამაშველო ვერტმფრენები, მაგრამ ხელისუფლება თქვა უარი აღნიშნულ ვერტმფრენებზე და რაჭაში მომხდარი ტრაგედიის შემდეგ, არაერთი განცხადება გაკეთდა იმასთან დაკავშირებით, რომ ამ ვერტმფრენების არსებობა -არ არსებობას არანაირი გადამწყვეტი მნიშვნელობა არ ექნებოდა მიუხედავად იმისა, რომ გადარჩენილი ადამიანები ჰყვებიან, თუ რამდენად მნიშვნელოვანი იქნებოდა იმ მომენტში დროულად და არა რამდენიმე საათის დაგვიანებით, როგორც ეს მოხდა, ვერტმფრენების ჩასვლა ადამიანების სიცოცხლის გადარჩენის მიზნით. ასე რომ, ველოდებით ბატონ გომელაურს პარლამენტში და როგორც დავთქვით, ჩვენ ყველაფერს გავაკეთებთ იმისათვის, რომ საზოგადოებამ მოისმინოს სიმართლე, ეს არის ახლა ყველაზე მნიშვნელოვანი ამ ტრაგედიის შემდეგ მთელი საზოგადოებისთვის, ისევე როგორც იმ ადამიანებისთვის, რომლებიც გადარჩნენ“, – განაცხადა თინა ბოკუჩავამ.

რუსეთის არმიამ ხერსონის ოლქი კვლავ დაბომბა

რუსეთის არმიამ ხერსონის ოლქი კვლავ დაბომბა, დარტყმები საოლქო ცენტრში მდებარე საგანმანათლებლო დაწესებულისა და საავადმყოფოს ტერიტორიაზე განხორციელდა.

განცხადებას „ტელეგრამზე” ხერსონის საოლქო სამხედრო ადმინისტრაციის ხელმძღვანელი, ალექსანდრ პროკუდინი ავრცელებს.

„მტერმა საგანმანათლებლო დაწესებულებას და საავადმყოფოს დაარტყა. დაჭრილია 3 ადამიანი, მათ შორის 55 წლის მამაკაცი, რომელიც საავადმყოფოში იშემიური ინსულტის მკურნალობის კურსს გადიოდა“, – განაცხადა პროკუდინმა.

შოვში, ტრაგიკულად დაღუპულთაგან კიდევ სამი პირია იდენტიფიცირებული – დეტალები

ოფიციალური ინფორმაციით, შოვში ტრაგიკულად დაღუპულთაგან იდენტიფიცირებულია კიდევ სამი პირი. ესენი არიან ადამიანები, რომლებიც შოვის კოტეჯებში სარემონტო სამუშაოებს ახორციელებდნენ. სულ 26 ადამიანია იდენტიფიცირებული.

ამ დროისთვის სტიქიის ეპიცენტრი ფაქტობრივად უკვე შესწავლილია. გადასამოწმებელია დამეწყრილი ტერიტორიის დაახლოებით ხუთი პროცენტი. განუწყვეტლივ გრძელდება სამძებრო – სალიკვიდაციო სამუშაოები.

სტიქიიდან მეთოთხმეტე დღეს ეპიცენტრში არსებული ვითარება ასეთია – აღდგენილია ხიდები, გაწმენდილია გზები, მდინარე ჭანაჭახი ძველ კალაპოტს დაუბრუნდა. ახლა მთავარ გამოწვევად რჩება შვიდი დაკარგულის პოვნა.

“ვიდრე საქართველოს ტერიტორიების 20% რუსეთის ფედერაციას აქვს ოკუპირებული, ძმობაზე საუბარი შეუძლებელია”

ვიდრე საქართველო იმყოფება მდგომარეობაში, როცა მისი ტერიტორიების 20% რუსეთის ფედერაციას აქვს ოკუპირებული, რასაკვირველია, ძმობაზე საუბარი შეუძლებელია, – ასე უპასუხა “ქართული ოცნების” დეპუტატმა მიხეილ სარჯველაძემ Black Sea Arena-ს დარბაზში, The Killers-ის კონცერტზე სოლისტის მიერ სცენაზე რუსი დრამერის აყვანასთან და ამით გამოწვეულ პროტესტთან დაკავშირებით დასმულ კითხვას.

რაც შეეხება კონცერტზე მისულ მსმენელთა რეაქციას, როგორც სარჯველაძემ აღნიშნა, ეს ცალკე საკითხია და არ ჰგონია, რომ “ცალკეული რეაქციები გადაჭარბებულად უნდა შეფასდეს”.

“თუ ვინმეს სურს, ქართველები და რუსები ძმები იყვნენ, ასეთ შემთხვევაში უალტერნატივოდ დღის წესრიგში მთავარი პრიორიტეტი დგას – უნდა მოხდეს საქართველოს დეოკუპაცია – ყველა საკითხი ამით იწყება და მთავრდება!

მნიშვნელოვანია, რაციონალურად, პრაგმატულად გვესმოდეს და ყველას კარგად გვქონდეს გათავისებული, რომ დეოკუპაცია ამ ქვეყნისთვის არის ხელშეუხებელი და ნომერ პირველი პრიორიტეტი. არავის უნდა დაავიწყდეს – იქნება ქართველი თუ უცხოელი, რომ ეს საქართველოსთვის არის მთავარი რამ. ეს არის ის, რასაც ვერასდროს შევურიგდებით!” – განაცხადა დეპუტატმა მიხეილ სარჯველაძემ.

გუშინ, Black Sea Arena-ზე კონცერტის დროს, The Killers-ის სოლისტმა აუდიტორიიდან სცენაზე რუსი დრამერი აიყვანა. აღნიშნულს მსმენელთა პროტესტი მოჰყვა. კონცერტზე მისულთა ნაწილმა კონცერტი პროტესტის ნიშნად დატოვა.

“ქეთევან დუმბაძე ურთულეს წლებში, დიდი რისკის ფასად ამზადებდა აქტუალურ და მნიშვნელოვან გადაცემებს, რომლითაც ავტორიტარულ რეჟიმს უპირისპირდებოდა”

ნოდარ დუმბაძის საერთაშორისო თეატრალური ფესტივალი ქეთი დუმბაძისადმი მილოცვას აქვეყნებს, სადაც კულტურის სფეროს წარმომადგენლები აცხადებენ, რომ როგორც ავტორი და პროდიუსერი, ქეთევან დუმბაძე ურთულეს წლებში, დიდი რისკის ფასად ამზადებდა აქტუალურ და პრინციპულად მნიშვნელოვან გადაცემებს, რომლითაც ავტორიტარულ რეჟიმს უპირისპირდებოდა.

„კულტურის სფეროს წარმომადგენლები ქეთევან დუმბაძეს წარმატებას ვუსურვებთ. ქეთევან დუმბაძე ლიტერატორებისა და მწერლების დიდი ოჯახის წევრია. სტუდენტობის წლებიდან მოყოლებული, მონდომებითა და პასუხისმგებლობით ეკიდებოდა მინდობილ საქმეს მთარგმნელობით კოლეგიასა თუ სატელევიზიო ჟურნალისტიკის სფეროში. როგორც ავტორი და პროდიუსერი, ურთულეს წლებში, დიდი რისკის ფასად ამზადებდა აქტუალურ და პრინციპულად მნიშვნელოვან გადაცემებს, რომლითაც ავტორიტარულ რეჟიმს უპირისპირდებოდა.

ქეთევან დუმბაძე მუშაობდა კულტურის სამინისტროში, ლიტერატურული სფეროს მრჩევლად და არაერთი სასიკეთო საქმე გააკეთა თანამედროვე ლიტერატურის, წიგნისა და ავტორთა პოპულარიზაციისთვის. პროექტით „ცოცხალი წიგნები“, უკვე აღიარებულ თუ ახალბედა ავტორებთან ერთად, მან საქართველოს თითქმის ყველა მუნიციპალიტეტი მოიარა. თანამედროვე ავტორები უკვე მერვე წელია ხვდებიან საზოგადოებას, მკითხველებს, ახალგაზრდებს საქართველოს ყველა კუთხეში, უნივერსიტეტებში, სახლ-მუზეუმებში, სკოლებში. ამავე პროექტის წიაღში შეიქმნა „მწერლის თეატრიც“, რომელიც თავდაპირველად მარჯანიშვილის თეატრში იმართებოდა, ახლა კი თუმანიშვილის თეატრში იმართება. ამავე პროექტით ქართველი ავტორები მონაწილეობენ ლიტერატურულ ფესტივალებში იტალიაში, გერმანიაში, შვედეთში, ისრაელში, თურქეთში, ხვდებიან ქართულ სათვისტომოებს, საკვირაო სკოლებს, მონაწილეობენ მთარგმნელობით ვორკშოპებში. ქართველი ავტორების არაერთი კრებული გამოიცა უცხოეთში, რომელთა თარგმანის ხელშეწყობაც სწორედ „ცოცხალი წიგნების“ მეშვეობით ხორციელდება.

ქეთევან დუმბაძის ინიციატივით შეიქმნა 120-ზე მეტი თანამედროვე ქართველი მწერლის ვიდეო პორტრეტი და უნიკალური ვიდეო ფონდი. ასევე შეიქმნა დოკუმენტური ფილმი ჭაბუა ამირეჯიბზე, მწერლის დაბადებიდან 100 წლისთავის აღსანიშნავად. სახელმწიფო ლიტერატურული კონკურსები („ლიტერა“, იაკობ გოგებაშვილის სახელობის კონკურსი საბავშვო და საყმაწვილო ლიტერატურის დარგში, „მუზა“) მისი უშუალო ინიციატივით ან აქტიური მონაწილეობით დაფუძნდა. და, რაც ხაზგასმით აღსანიშნავია: ნებისმიერ პროექტში, კონკურსში, ფესტივალსა თუ შეხვედრაში მონაწილეობისთვის, ქეთევან დუმბაძეს არასოდეს შეურჩევია ხელოვანები მათი პოლიტიკური შეხედულებების გათვალისწინებით.
ზემოთქმული მხოლოდ ნაწილობრივი აღნუსხვაა იმ საქმეებისა, რაც ქართული მწერლობის წინსვლისთვის ქეთევან დუმბაძეს დღემდე გაუკეთებია.
საყოველთაოდ ცნობილია ქეთევან დუმბაძის საუკეთესო პიროვნული თვისებები – სიკეთე, გულისხმიერება, ურთიერთობის იშვიათი უნარი… სხვადასხვა თაობის უამრავ ქართველ მწერალს პირადად უგრძნია მისი გამორჩეული ყურადღება და გულისხმიერება.

ვულოცავთ ქეთევან დუმბაძეს მწერალთა სახლის ხელმძღვანელად დანიშვნას და ვუსურვებთ წარმატებას ქართული კულტურის სასიკეთოდ.

1. ნოდარ დუმბაძის სახელობის საერთაშორისო თეატრალური ფესტივალი
2. ვასილ ჩიგოგიძე, საქართველოს ხელოვნების დამსახურებული მოღვაწე, ნოდარ დუმბაძის სახელობის საერთაშორისო თეატრალური ფესტივალის პრეზიდენტი, ოზურგეთის ალექსანდრე წუწუნავას სახელობის დრამატული თეატრის სამხატვრო ხელმძღვანელი
3. დიმიტრი ხვთისიაშვილი, ნოდარ დუმბაძის სახელობის მოზარდ მაყურებელთა თეატრის სამხატვრო ხელმძღვანელი, შოთა რუსთაველის თეატრისა და კინოს სახელმწიფო უნივერსიტეტის ასოცირებული პროფესორი
4. რობერტ სტურუა, საქართველოს სახალხო არტისტი, რუსთაველის ეროვნული თეატრის სამხატვრო ხელმძღვანელი
5. ბადრი მაისურაძე, ოპერის მომღერალი, თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრის სამხატვრო ხელმძღვანელი
6. გიორგი დონაძე, ანზორ ერქომაიშვილის სახელობის ფოლკლორის სახელმწიფო ცენტრის დირექტორი, მუსიკოსი, ანსამბლ „ბასიანის“ დამაარსებელი და სამხატვრო ხელმძღვანელი
7. ლევან ბრეგაძე, ლიტერატურათმცოდნე, კრიტიკოსი
8. ნინია სადღობელაშვილი, მწერალი, დრამატურგი, ნოდარ დუმბაძის სახელობის საერთაშორისო თეატრალური ფესტივალის ჟიურის თავმჯდომარე (2023)
9. ლომგულ მურუსიძე, საქართველოს დამსახურებული მხატვარი
10. მირიანე (გურამ) ოდიშარია, მწერალი, საქართველოს კულტურის ყოფილი მინისტრი
11. ირაკლი სამსონაძე, დრამატურგი, მწერალი
12. მაყვალა გონაშვილი, პოეტი, საქართველოს მწერალთა კავშირის თავმჯდომარე
13. ბაღათერ არაბული, პოეტი, საქართველოს მწერალთა კავშირის თანათავმჯდომარე
14. გურამ ბათიაშვილი, დრამატურგი, სახელმწიფო პრემიის ლაურეატი
15. სვიმონ ჯანგულაშვილი, მუსიკოსი, დირიჟორი, თბილისის ყოვლადწმინდა სამების საკათედრო ტაძრის საპატრიარქო გუნდის ხელმძღვანელი, საქართველოს კამერული გუნდის სამხატვრო ხელმძღვანელი
16. ლალი სეთურიძე, ანზორ ერქომაიშვილის მეუღლე
17. ალექსანდრე ქანთარია, საქართველოს ხელოვნების დამსახურებული მოღვაწე, ბათუმის ილია ჭავჭავაძის სახელობის დრამატული თეატრის სამხატვრო ხელმძღვანელი, შოთა რუსთაველის სახელობის თეატრისა და კინოს სახელმწიფო უნივერსიტეტის პროფესორი
18. გიორგი გეგეჭკორი, მხატვარი, საქართველოს თეატრალური საზოგადოების თავმჯდომარე, აპოლონ ქუთათელაძის სახელობის სამხატვრო აკადემიის პროფესორი
19. ბელა შალვაშვილი, მწერალი, „შაჰნამეს“ მთარგმნელი ქართულ ენაზე
20. გიორგი კალანდია, ისტორიკოსი, საქართველოს ხელოვნების სასახლის – კულტურის ისტორიის მუზეუმის დირექტორი
21. ყარამან ქუთათელაძე, მხატვარი, აპოლონ ქუთათელაძის სახელობის სამხატვრო აკადემიის რექტორი, პროფესორი
22. გიორგი ხარებავა, კინორეჟისორი, შოთა რუსთაველის სახელობის თეატრისა და კინოს სახელმწიფო უნივერსიტეტის კანცლერი
23. გიორგი სიხარულიძე, დმანისის ზინაიდა კვერენჩხილაძის სახელობის დრამატული თეატრის სამხატვრო ხელმძღვანელი, შოთა რუსთაველის სახელობის თეატრისა და კინოს სახელმწიფო უნივერსიტეტის ასოცირებული პროფესორი
24. ნანა ფაჩუაშვილი, საქართველოს სახალხო არტისტი, რუსთაველის ეროვნული თეატრის მსახიობი
25. რამაზ იოსელიანი, მიხეილ თუმანიშვილის სახელობის კინომსახიობთა თეატრის მსახიობი
26. ირინე ლომინაძე, ქუთაისის მელიტონ ბალანჩივაძის სახელობის საოპერო თეატრის სამხატვრო ხელმძღვანელი
27. შერმანდი ჭკუასელი, ანსამბლ „ერისიონის“ სამხატვრო ხელმძღვანელი
28. ლერი ალიმონაკი, კრიტიკოსი, მწერალი, მთარგმნელი
29. რაულ ჩილაჩავა, მწერალი, მთარგმნელი, მეცნიერი
30. მიშო ჯავახიშვილი, მომღერალი, ანსამბლ „მართვეს“ სამხატვრო ხელმძღვანელი
31. მანანა კვაჭანტირაძე, ლიტერატურათმცოდნე, თბილისის სახელმწიფო უნივერსიტეტის შოთა რუსთაველის სახელობის ქართული ლიტერატურის ინსტიტუტის მეცნიერი, პროფესორი
32. რამინ მიქაბერიძე, მომღერალი, საქართველოს დამსახურებული არტისტი, „ხელოვნების ქურუმი“
33. ამირან არაბული, ფოლკლორისტი, თბილისის სახელმწიფო უნივერსიტეტის შოთა რუსთაველის სახელობის ქართული ლიტერატურის ინსტიტუტის პროფესორი
34. მანანა პაიჭაძე, გერმანისტი, ფილოლოგი
35. მარიამ ხუცურაული, მწერალი, პრემია „საბას“ ლაურეატი
36. ლევან თაქთაქიშვილი, საქართველოს პარლამენტის ეროვნული ბიბლიოთეკის საბიბლიოთეკო რესურსების დეპარტამენტის დირექტორი
37. გიორგი თავაძე, რეჟისორი, ქუთაისის ლადო მესხიშვილის სახელობის სახელმწიფო დრამატული თეატრის სამხატვრო ხელმძღვანელი
38. გოჩა კაპანაძე, რეჟისორი, ცხინვალის ივანე მაჩაბლის სახელობის სახელმწიფო დრამატული თეატრის სამხატვრო ხელმძღვანელი
39. პაატა გულიაშვილი, თელავის ვაჟა-ფშაველას სახელობის სახელმწიფო დრამატული თეატრის სამხატვრო ხელმძღვანელი, რუსთაველის ეროვნული თეატრის მსახიობი
40. ნიკოლოზ საბაშვილი, რეჟისორი, თოჯინების სახელმწიფო თეატრების გაერთიანების სამხატვრო ხელმძღვანელი, ორგზის პრემია „დურუჯის“ ლაურეატი
41. ირაკლი კიკვაძე, რეჟისორი, ბათუმის მოზარდ მაყურებელთა და თოჯინების თეატრის სამხატვრო ხელმძღვანელი
42. იოანე ხუციშვილი, რეჟისორი, მიხეილ თუმანიშვილის სახელობის კინომსახიობთა თეატრის სამხატვრო ხელმძღვანელი
43. ნიკოლოზ ჰაინე-შველიძე, რეჟისორი, გორის გიორგი ერისთავის სახელობის სახელმწიფო დრამატული თეატრის სამხატვრო ხელმძღვანელი
44. ნინო ხოფერია, მკვლევარი, დოკუმენტალისტი
45. ლევან ლორია, მწერალი
46. გიორგი ლობჟანიძე, პოეტი, მთარგმნელი, თბილისის სახელმწიფო უნივერსიტეტის ასოცირებული პროფესორი
47. მარიამ წიკლაური, პოეტი, საბავშვო მწერალი, მთარგმნელი, ლიტერატურული პრემია „გალას“, პრემია „ანას“, იაკობ გოგებაშვილის პრემიების ლაურეატი.
48. ფარნაოზ რაინაული, ჟურნალ „ოლეს“ რედაქტორი
49. ნორა სიხარულიძე, მწერალი, პრემია „ანას“ ლაურეატი
50. ნოდარ არდოტელი, მწერალი, ფილოლოგი
51. მანანა კარტოზია, გამომცემელი, გამომცემლობა „სეზანის“ დირექტორი
52. ლია მეტრეველი, გამომცემელი, გამომცემლობა „საქწიგნის“ ხელმძღვანელი
53. სალომე კაპანაძე, მწერალი, ფილოლოგი
54. გივი ჩიღვინაძე, მწერალი, ფილოლოგი
55. ნინო მშვიდობაძე, მწერალი
56. გიორგი სოსიაშვილი, მწერალი, გორის სახელმწიფო უნივერსიტეტის რექტორი
57. ვახტანგ ნიკოლავა, რეჟისორი, სენაკის აკაკი ხორავას სახელობის სახელმწიფო დრამატული თეატრის სამხატვრო ხელმძღვანელი
58. დავით ნიკოლაძე, რეჟისორი, ჭიათურის აკაკი წერეთლის სახელობის სახელმწიფო დრამატული თეატრის სამხატვრო ხელმძღვანელი
59. ვახტანგ ჯუღელი, რეჟისორი, ზესტაფონის უშანგი ჩხეიძის სახელობის სახელმწიფო დრამატული თეატრის სამხატვრო ხელმძღვანელი
60. ნაირა მარშანია, აფხაზეთის მწერალთა სახლის ხელმძღვანელი
61. მარინე ცხვედიაშვილი, მწერალი, ქვემო ქართლის მწერალთა ორგანიზაციის თავმჯდომარე
62. საბა ასლამაზიშვილი, რეჟისორი, ფოთის ვალერიან გუნიას სახელობის სახელმწიფო დრამატული თეატრის სამხატვრო ხელმძღვანელი, სიღნაღის თეატრალური ფესტივალის სამხატვრო ხელმძღვანელი
63. მანანა ბერიკაშვილი, რეჟისორი, ხელოვნებათმცოდნეობის დოქტორი, შოთა რუსთაველის სახელობის თეატრისა და კინოს სახელმწიფო უნივერსიტეტის სრული პროფესორი
64. დავით ანდრიაძე, ფილოსოფიურ მეცნიერებათა დოქტორი, ჟურნალ „თეატრის“ მთავარი რედაქტორი
65. გელა ფოცხიშვილი, საქართველოს სამეფო ნაციონალური ბალეტის დირექტორი და სამხატვრო ხელმძღვანელი
66. ბადრი ქუთათელაძე, მწერალი, სახელმწიფო პრემიის ლაურეატი
67. ჯემალ კუხალაშვილი, მხატვარი, მწერალი, სახელმწიფო პრემიის ლაურეატი
68. ეკა ჭკუასელი, ანსამბლ „ერისიონის“ მთავარი ქორეოგრაფი
69. ირაკლი გოგია, რეჟისორი, თბილისის ალექსანდრე ახმეტელის სახელობის მუნიციპალური თეატრის სამხატვრო ხელმძღვანელი
70. გურამ ცერცვაძე, საქართველოს მხატვართა კავშირის თავმჯდომარე
71. გიორგი შავერზაშვილი, საქართველოს კომპოზიტორთა კავშირის თავმჯდომარე
72. ლაშა ჩხარტიშვილი, ნოდარ დუმბაძის სახელობის საერთაშორისო თეატრალური ფესტივალის პროგრამების დირექტორი, შოთა რუსთაველის თეატრისა და კინოს სახელმწიფო უნივერსიტეტის ასოცირებული პროფესორი
73. გიორგი ყაჯრიშვილი, ხელოვნებათმცოდნეობის დოქტორი
74. ლევან როხვაძე, საქართველოს თეატრალური საზოგადოების იმერეთის განყოფილების ხელმძღვანელი, თოჯინების სახელმწიფო თეატრების გაერთიანების ხელმძღვანელის მოადგილე
75. მიხეილ მრევლიშვილი, თეატრისა და კინოს რეჟისორი, თბილისის სანდრო მრევლიშვილის სახელობის მუნიციპალური თეატრის სამხატვრო ხელმძღვანელი
76. ელენე მაცხონაშვილი, რეჟისორი, პრემია „დურუჯის“ მფლობელი
77. ვახტანგ ფილფანი, ლოტბარი, ანსამბლ „რიჰოს“ სამხატვრო ხელმძღვანელი
78. ვანო იანტბელიძე, საქართველოს დამსახურებული არტისტი, თელავის ვაჟა-ფშაველას სახელობის სახელმწიფო დრამატული თეატრის მსახიობი, თეატრალური საზოგადოების ქართლ-კახეთის რეგიონული განყოფილების ხელმძღვანელი
79. ლელა რაზიკაშვილი, ვაჟა-ფშაველას ფონდის ხელმძღვანელი
80. დავით შემოქმედელი, პოეტი, სრულიად საქართველოს რუსთაველის საზოგადოების პრეზიდენტი
81. გეგი ფალიანი, მსახიობი, მესტიის ლეო ფილფანის სახელობის ხელოვნების ცენტრის ხელმძღვანელი, თეატრალური საზოგადოების სვანეთის რეგიონული განყოფილების ხელმძღვანელი
82. თამაზ დაუშვილი, ამბროლაურის მუნიციპალური თეატრის ხელმძღვანელი, თეატრალური საზოგადოების რაჭა-ლეჩხუმის რეგიონული განყოფილების ხელმძღვანელი
83. ივანე ჩხაიძე, ანსამბლ „ერისიონის“ პროექტებისა და ღონისძიებების მენეჯერი
84. გიორგი გურგულია, კინომსახიობი, საქართველოს კინემატოგრაფისტთა კავშირის თავმჯდომარის მოადგილე
85. ხალხური სიმღერის ანსამბლი „დიდგორი“
86. ზაზა ჯინჭარაძე, ნოდარ დუმბაძის სახელობის საერთაშორისო თეატრალური ფესტივალის დირექტორი, ოზურგეთის ალექსანდრე წუწუნავას სახელობის დრამატული თეატრის დირექტორი
87. ნინო (დოდო) ხურცილავა, თეატროლოგი, ვახტანგ ჭაბუკიანის სახელობის ქორეოგრაფიული სასწავლებლის პედაგოგი
88. მაია მიქაბერიძე, მუსიკოსი, შოთა რუსთაველის თეატრისა და კინოს სახელმწიფო უნივერსიტეტის ასოცირებული პროფესორი, გუნდის „საგალობელი“ ხელმძღვანელი
89. გაბრიელ მდინარაძე, საქართველოს სახალხო არტისტი, ოზურგეთის ალექსანდრე წუწუნავას სახელობის დრამატული თეატრის მსახიობი
90. პავლე ნოზაძე, საქართველოს დამსახურებული არტისტი, ნოდარ დუმბაძის სახელობის მოზარდ მაყურებელთა თეატრის მსახიობი
91. ნუგზარ ყურაშვილი, ნოდარ დუმბაძის სახელობის მოზარდ მაყურებელთა თეატრის მსახიობი, თბილისის ალექსანდრე ახმეტელის სახელობის მუნიციპალური თეატრის მსახიობი
92. ხათუნა კიკვაძე, ხელოვნებათმცოდნე, საქართველოს ეროვნული მუზეუმის სერვისებისა და ახალი ტექნოლოგიების დეპარტამენტის უფროსი, აპოლონ ქუთათელაძის სახელობის სამხატვრო აკადემიის პედაგოგი, ხელოვნებათმცოდნეობის დოქტორი
93. ლალი თაბაგარი, რეჟისორი, რუსთაველის ეროვნული თეატრის დირექტორის მოადგილე
94. ნიკოლოზ ფაიქრიძე, მსახიობი, პოეტი, ნოდარ დუმბაძის სახელობის მოზარდ მაყურებელთა თეატრის მსახიობი
95. რეზო იუკურიძე, ჟურნალ „კულტურა პლუსის“ რედაქტორი“, – აღნიშნულია მილოცვის ტექსტში.

“ივლისში ფულადი გზავნილების ნაკადების მოცულობა 1.6 პროცენტით შემცირდა” – ეროვნული ბანკი

ეროვნული ბანკის ინფორმაციით, 2023 წლის ივლისში ქვეყანაში შემოსული ფულადი გზავნილების ნაკადების მოცულობამ 301.1 მლნ აშშ დოლარი, ანუ 782.0 მლნ ლარი შეადგინა, რაც 1.6%-ით, ანუ 5.0 მლნ აშშ დოლარით ნაკლებია 2022 წლის ივლისის ანალოგიურ მაჩვენებელზე.

ცენტრალური ბანკის ცნობით, უცხოეთიდან საქართველოში ფულადი გზავნილების 96.6% იმ 25 უმსხვილეს პარტნიორ ქვეყანაზე მოდის, საიდანაც გზავნილების მოცულობა ივლისში თითოეულზე 1 მლნ აშშ დოლარს აღემატებოდა. იმავე 25 ქვეყანაზე გასული წლის ივლისში მთელი ფულადი გზავნილების 93.7% მოდიოდა.

გზავნილების სტატისტიკის მიხედვით, ყველაზე მეტი თანხა – 73.82 მილიონი აშშ დოლარი რუსეთის ფედერაციიდან გადმოირიცხა. მეორე ადგილზეა იტალია 45.34 მილიონი აშშ დოლარით. მესამე ადგილს 40.03 მილიონი აშშ დოლარით აშშ იკავებს, ხოლო მეოთხე ადგილზეა საბერძნეთი 21.64 მილიონი აშშ დოლარით, მეხუთე ადგილზე კი – გერმანია 20.54 მილიონი აშშ დოლარით.

2023 წლის ივლისში საქართველოდან საზღვარგარეთ 28.4 მლნ აშშ დოლარი, ანუ 73.7 მლნ ლარი გადაიგზავნა, რაც 2022 წლის ივლისის ანალოგიურ მაჩვენებელთან შედარებით 2.5%-ით მეტია.

“სამწუხაროდ, საწვავზე ფასების ზრდა ნეგატიურად აისახება სასურსათო ფასებზე და ინფლაციაზე” – გიორგი ცუცქირიძე

“ჯორჯიან თაიმსის” ბლოგი

ავტორი: გიორგი ცუცქირიძე

საქართველოში საწვავის გაძვირება მოსალოდნელი იყო, როდესაც საერთაშორისო ბაზრებზე რეგულარის ტიპის საწვავზე პლაცი ტონაზე 1000 დოლარიან ნიშნულს ასცდა, და დღეს უკვე ფასი 1050 დოლარის ნიშნულზეა, იანვრის 950 დოლართან შედარებით. საერთაშორისო ბაზრებზე ფასების ზრდა უკრაინის კრიზისთან ერთად აშშ ში ნედლი ნავთობის მარაგების შემცირებამ გამოიწვია, რასაც მაღალი გაურკვევლობის და ნეგატიური მოლოდინების გამო, საერთაშორისო ბირჟებზე საბაზრო სპეკულაციამაც შეუწყო ხელი.

შესაბამისად, საერთაშორისო ფასების მატებამ განაპირობა ის, რომ საქართველოში ყველა ტიპის საწვავი 5 თეთრით გაძვირდა. ქვეყანაში მოქმედ ბენზინგასამართ სადგურებზე 1 ლიტრი ბენზინის ფასი 2.50-დან 2. 72 ლარამდე მერყეობს, დიზელის ფასი კი 2.80-დან 3.07 ლარამდე აღწევს.

დაიწყო რა გაძვირება ლონდონში ერთი ბარელი ნავთობის ფასმა, მიუხედავად ბოლო დღეებში გარკვეული შემცირებისა 84 აშშ დოლარს გადააჭარბა, ხოლო ნიუ-იორკში – 80 აშშ დოლარს.

ადგილობრივ ბაზარზე საწვავის ფასი კომპანიებმა ერთდროულად გაზარდეს, რაც ხშირად ყოფილა კრიტიკის საგანი, მიუხედავად იმისა, რომ ჩვენ თითქმის მთლიანად იმპორტირებულ საწვავზე ვართ დამოკიდებული. მოგეხსენებათ, წლის დასაწყისიდან ფასები მნიშვნელოვნად 30-40 თეთრით იყო შემცირებული, რაც გარდა დადებითი საერთაშორისო საბაზრო კონიუნქტურისა, მთავრობის ჩარევამაც უზრუნველყო, კონკურენციის ეროვნული სააგენტოს აქტიური ჩართულობით!

თუმცა ამჯერად, ობიექტურობისათვის უნდა ითქვას, რომ იმ ქვეყნებში, სადაც საწვავის იმპორტი ხდება, ფასი გაზრდილია. მაგალითისათვის საფრანგეთში, ბოლო 6 თვეში საწვავზე ყველაზე მაღალი ფასები ფიქსირდება. იგივე შეიძლება ითქვას, იტალიაზე, ესპანეთსა და საბერძნეთზე. ნავთობზე ფასი გაიზარდა, რადგან საწვავის იმპორტიორთან დადებული ოფიციალური ხელშეკრულებები მიბმულია საერთაშორისო პლაცზე. ეს თანაბრად ეხება არა მხოლოდ ევროკავშირის ქვეყნებიდან, არამედ აზერბაიჯანიდან და თუნდაც ვენენსუელიდან შემოტანილ საწვავსაც, რომლებიც თავადაც არიან ნავთობის ექსპორტიორი ქვეყანა, რადგან ნავთობის მსოფლიო ბაზარზე ფასწარმოქმნაზე გავლენას ვერ ახდენს.

სამწუხაროდ, საწვავზე ფასების ზრდა ნეგატიურად აისახება სასურსათო ფასებზე და ინფლაციაზე, და ეროვნული ბანკის გადაწყვეტილებაც მიუხედავად ინფლაციისა დაბალი 3 %-იანი წლიური ბაზისური მაჩვენებლისა, მხოლოდ 0.25 პროცენტული პუნქტით შეემცირებინა რეფინანსირების განაკვეთი, სავსებით ლოგიკური იყო.

“2023 წლის მეორე კვარტალში საქართველოში ყველაზე მეტი ვიზიტორი თურქეთიდან შემოვიდა” – საქსტატი

სტატისტიკის ეროვნული სამსახურის მონაცემებით, 2023 წლის მეორე კვარტალში საქართველოს ტერიტორიაზე დაფიქსირდა საერთაშორისო არარეზიდენტი მოგზაურების 1.7 მილიონი შემოსვლა, რაც 57.4 პროცენტით მეტია წინა წლის ანალოგიური პერიოდის მაჩვენებელზე. შემოსვლების უდიდესი ნაწილი, 46.4 პროცენტი, განხორციელდა 31-50 წლის მოგზაურების მიერ.

საქსტატის ცნობით, აღნიშნული რაოდენობიდან საერთაშორისო ვიზიტორების მიერ განხორციელებული ვიზიტების რაოდენობამ 1.5 მილიონი შეადგინა, რაც ასევე 58.7 პროცენტით მეტია 2022 წლის ანალოგიური პერიოდის მაჩვენებელზე.

ამასთან, 2023 წლის მეორე კვარტალში საერთაშორისო ვიზიტორების რაოდენობამ 1.2 მილიონს მიაღწია, რაც 58.1 პროცენტით აღემატება წინა წლის ანალოგიური პერიოდის მაჩვენებელს. საანგარიშო პერიოდში, საერთაშორისო ვიზიტორების მიერ განხორციელდა 1.1 მილიონი ტურისტული ტიპის ვიზიტი, რაც 44.8 პროცენტით მეტია წინა წლის ანალოგიური პერიოდის მაჩვენებელზე.

უწყების ინფორმაციით, საერთაშორისო ვიზიტორების 73.5 პროცენტი მხოლოდ ტურისტები იყვნენ. მხოლოდ ექსკურსანტების წილმა 22.6 პროცენტი შეადგინა, ხოლო ვიზიტორების 3.9 პროცენტი იყო როგორც ტურისტი, ასევე ექსკურსანტი.

მიმდინარე წლის მეორე კვარტალში ვიზიტორების ყველაზე დიდი რაოდენობა, 290.8 ათასი, დაფიქსირდა თურქეთიდან, რაც ვიზიტორების ჯამური რაოდენობის 24.0 პროცენტს შეადგენს. მეორე ადგილზეა რუსეთის ფედერაცია 22.1%-იანი წილით, ხოლო მესამეზე – სომხეთი 12.4%-იანი წილით. საანგარიშო პერიოდში ყველაზე მეტი ვიზიტი, 51.5 პროცენტი განხორციელდა დასვენების, გართობისა და რეკრეაციის მიზნით. ხოლო ვიზიტების უმრავლესობა განხორციელდა თბილისსა და აჭარის ა/რ-ში, შესაბამისად, 709.3 ათასი და 661.8 ათასი ვიზიტი.

საქსტატის ანგარიშის მიხედვით, 2023 წლის მეორე კვარტალში განხორციელებული ვიზიტებისას გათეული ღამეების საშუალო რაოდენობამ 4.8 ღამე შეადგინა, რაც 2022 წლის მეორე კვარტალში დაფიქსირებულ მაჩვენებელზე (6.2 ღამე) 22.3 პროცენტით ნაკლებია. განხორციელებული ვიზიტების 73.9 პროცენტი წარმოადგენდა განმეორებითი ხასიათის ვიზიტს.

რაც შეეხება 2023 წლის მეორე კვარტალში განხორციელებული ვიზიტებისას გაწეული ხარჯებს, ის 3.4 მილიარდ ლარს გაუტოლდა, რაც 49.1 პროცენტით მეტია წინა წლის ანალოგიური პერიოდის მაჩვენებელზე. ვიზიტზე საშუალო ხარჯი 2022 წლის მეორე კვარტალთან შედარებით 6.1 პროცენტით შემცირდა და 2 292.0 ლარი შეადგინა.

1...1,7281,7291,730...2,307Page 1,729 of 2,307
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი