მშვენიერია! უნდოდათ შხამის შემოპარება ხელოვნების სახელით და ხელით და უარესი მიიღო ხელისუფლებამ – ქართველი ხალხის ხმა მსოფლიოს მისწვდა – რუსეთი ოკუპანტია, არავითარი ძმა!, – ამის შესახებ „ლელოს“ ერთ-ერთი ლიდერი, საქართველოს პარლამენტის დეპუტატი ანა ნაცვლიშვილი სოციალურ ქსელში წერს, რითაც ეხმაურება Black Sea Arena-ს დარბაზში, The Killers-ის კონცერტზე მომხდარს და მსოფლიო მედიის გამოხმაურებას.

ნაცვლიშვილის თქმით, მორიგი „რუსული პროვოკაციული გეგმა ჩაფლავდა“, რაც ძალიან მნიშვნელოვანია.

„ბევრი განსხვავებული აზრი მოვისმინე ამ კონცერტზე წასვლა-არწასვლასა და სხვა საკითხებზე და სრულად მესმის კრიტიკის პათოსი, თუმცა ფაქტია, რომ მორიგი რუსული პროვოკაციული გეგმა ჩაფლავდა, ესა ძალიან მნიშვნელოვანია!

მადლობა თითოეულს ვინც ყური არ დაიხშეთ და დუმილი არ აირჩიეთ!!!

ახლა დავუბრუნდეთ იმ რეალობას, რომ -რუსეთი გამალებულ ეკონომიკურ ექსპანსიას ახორციელებს ჩვენს ქვეყანაში და ტალახში ვეძებთ გარდაცვლილ თანამემამულეებს. გვაქვს სიკვდილიანობის კატასტროფული მაჩვენებელი ისეთ ვითარებებში, სადაც ნორმალურ ქვეყნებში ადამიანები არ იღუპებიან! ( სტიქიური უბედურების დროსაც კი გაცილებით ნაკლებია ან საერთოდ არ არის, აღარაფერს ვამბობ წყალში სიკვდილიანობაზე და ა.შ.)

ეს ქვეყანა ჩვენია და ჩვენი მისახედია!“, – წერს ნაცვლიშვილი “ფეისბუქზე”.

გუშინ, Black Sea Arena-ზე კონცერტის დროს, The Killers-ის სოლისტმა აუდიტორიიდან სცენაზე რუსი დრამერი აიყვანა. აღნიშნულს მსმენელთა პროტესტი მოჰყვა. კონცერტზე მისულთა ნაწილმა კონცერტი პროტესტის ნიშნად დატოვა.

სტუმრებისთვის კონცერტამდე უნდა აეხსნათ პოლიტიკური კონტექსტი, ამით შეიძლებოდა ეს უსიამოვნება თავიდან აგვეცილებინა,- ამის შესახებ „ევროპული საქართველოს“ პოლიტსაბჭოს თავმჯდომარე, გიგი წერეთელმა განაცხადა, რითაც შეკვეთილში, ჯგუფ The Killers-ის კონცერტზე მომხდარს გამოეხმაურა.

როგორც გიგი წერეთელმა აღნიშნა, შეკვეთილში, კონცერტზე მომხდარი ინციდენტი უსიამოვნოა, „მაგრამ ამან კიდევ ერთხელ დაგვანახა, რომ ჩვენი საზოგადოებისთვის რუსული სტრატეგია მიუღებელია და წითელ ხაზს წარმოადგენს“.

„რაც შეეხება კონცერტზე გამოცხადებულ „ძმობას და სიყვარულს“, ეს ასე არ ხდება და არ გვარდება. თვითონ მასპინძლებსაც გაუჩნდათ პასუხისმგებლობის გრძნობა და მოიბოდიშეს. ბუნებრივია, როცა ასეთი დონის სტუმრები არიან და დარწმუნებული ვარ, ასეთ რეზონანსულ კონცერტს წინ უძღვის სუფრის ტრადიციების ახსნა ან კულტურის ნიუანსებზე საუბარი. ამ დროს უნდა აუხსნა პოლიტიკური კონტექსტიც, თუ რა პირობებში მოუხდება კონცერტის ჩატარება. ასეთ მიდგომას შეიძლებოდა თავიდან აეცილებინა ეს ამბავი“,- განაცხადა გიგი წერეთელმა.

შეგახსენებთ, რომ გუშინ, Black Sea Arena-ზე კონცერტის დროს, The Killers-ის სოლისტმა აუდიტორიიდან სცენაზე რუსი დრამერი აიყვანა. აღნიშნულს საზოგადოების პროტესტი მოჰყვა. ხალხის ნაწილმა კონცერტი პროტესტის ნიშნად დატოვა. მომხდართან დაკავშირებით Black Sea Arena-მ განცხადება გაავრცელა, საზოგადოებას ბოდიში მოუხადა და აღნიშნა, რომ სცენაზე სოლისტის მოქმედება Black Sea Arena პოზიცია არაა. თავის მხრივ, საზოგადოებას მოუბოდიშა თავად ბენდმაც. მუსიკოსების განმარტებით, მათი განზრახვა ვინმეს შეურაცხყოფა არ ყოფილა.

რუსეთის ფედერაცია რაც უფრო მეტი მიმართულებით გადაისვრის ძალებს, ამ შემთხვევაში მით უკეთესი იქნება ნატოსთვის, რომელიც იარაღს აწვდის უკრაინას – ობიექტურად რომ ვთქვათ, იქნება აშშ-ი, ნატო თუ ნებისმიერი სხვა, ეს მათთვის შეიძლება სწორი მიმართულება იყოს, მაგრამ საქართველოსთან მიმართებაში ეს როგორი იქნება?! – აღნიშნული განცხადება პარლამენტში უმრავლესობის დეპუტატმა გურამ მაჭარაშვილმა გააკეთა.

მაჭარაშვილის თქმით, „საუბარია იმაზე, როცა სხვა ქვეყანას უნდა შენს ხარჯზე გაძლიერდეს და მოიპოვოს უპირატესობა რუსეთის ფედერაციასთან”.

„საქართველოს ტერიტორიული მთლიანობის აღდგენა ნომერ პირველი ამოცანაა ქართველი ხალხისთვის. საქართველოს ტერიტორიული მთლიანობის აღდგენაზე არც ერთი სახელმწიფო ისე არ იზრუნებს, როგორც საქართველოს სახელმწიფო და ქართველი ხალხი. დღეს როდესაც სხვა ქვეყნებს, მათ შორის ძლიერ ქვეყნებს სხვა პრიორიტეტი – რუსეთის ფედერაციასთან დაპირისპირება და მისი შესუსტება უდგათ წინ, როგორ გგონიათ წინ საკუთარი ქვეყნის ინტერესებს დააყენებენ თუ საქართველოს ინტერესებს? დღეს უკვე მსოფლიო ვითარება შეიცვალა და აშშ-ი იქნება თუ სხვა სახელმწიფო, საკუთარ ინტერესებზე წინ საქართველოს რატომ დააყენებს? არც უნდა დააყენოს, ისევე როგორც საქართველომ პირველ ადგილზე ჯერ სახელმწიფოსა და ქართველი ხალხის ინტერესები უნდა დააყენოს და შემდეგ სხვა ქვეყნის ინტერესები – ეს არის მთელი მოცემულობა”, – განაცხადა გურამ მაჭარაშვილმა.

მაჭარაშვილი იმასაც ამბობს, რომ ნატოს გენერალური მდივნის ოფისის დირექტორის სტიან იენსენის განცხადება იმის შესახებ, რომ უკრაინის ნატოში მიღება უკრაინის ტერიტორიების დათმობის ხარჯზე უნდა მოხდეს, მტკიცებულებაა იმისა, რომ მსოფლიოს გადანაწილება ხდება და ამ ომში სულ სხვა ქვეყნები და ძალები ითბობენ ხელს.

„ხომ იცით, ნატოს მაღალი თანამდებობის პირების მხრიდან ასეთი განცხადებები შემთხვევით არ კეთდება. ეს წამოცდენაც არ არის და გათვლილია შორს მიმავალ გეგმებზე, რაც ომის პარტიის ხელმძღვანელებს გააჩნიათ. მათ სურთ ომი უკრაინაში და სურთ, რომ მეორე ფრონტი საქართველოში იყოს.

მეგობრებო, რომ იცოდეთ, აი ეს ხდება – სამწუხაროდ, ნატოს ხელმძღვანელობაც არ მალავს იმას, რომ ქვეყნებმა არჩევანი ტერიტორიების დათმობის ხარჯზე უნდა გააკეთონ. ესეც გარანტირებული არ არის – არავინ ეუბნება უკრაინას, რომ თუ ტერიტორიებს დათმობს, ნატოში მიიღებენ. როგორც ნატოს ხელმძღვანელობაში მაღალჩინოსნები აცხადებენ, საუბარია იმაზე, რომ ტერიტორიების დათმობის ხარჯზე კონფლიქტის გაყინვა მოხდეს”, – განაცხადა გურამ მაჭარაშვილმა

შოვის ტრაგედიასთან დაკავშირებით, თუ ვინმე იყო პასუხისმგებელი, პირველ რიგში, ეს იყო გომელაური, რომელიც 11 დღის შემდეგ ჩავიდა ადგილზე, ამიტომ, მან აუცილებლად უნდა გასცეს პასუხი იმ კითხვებს, რომელიც საზოგადოებას აქვს და „ნაციონალური მოძრაობა“ ამისათვის ყველა ბერკეტს გამოიყენებს, – ამის შესახებ „ერთიანი ნაციონალური მოძრაობის“ გენერალური მდივნის მოადგილე ირაკლი ფავლენიშვილმა განაცხადა, რითაც შინაგან საქმეთა მინისტრის, ვახტანგ გომელაურის პარლამენტში ინტერპელაციის წესით დაბარებას გამოეხმაურა.

მისივე თქმით, ზედაპირზე არის ის დანაშაულებრივი უმოქმედობა, რომელშიც ყველა სახელისუფლებო სტრუქტურა ერთად იყო ჩართული.

„ძალიან მაღალი საჯარო ინტერესი არსებობს შოვში დატრიალებულ ტრაგედიასთან დაკავშირებით. ზედაპირზე არის ის დანაშაულებრივი უმოქმედობა, რომელშიც ყველა სახელისუფლებო სტრუქტურა ერთად იყო ჩართული. სახელმწიფო სტრუქტურების ის სრული არაეფექტურობა და არაკომპეტენტურობა, რომლებიც პასუხისმგებლები იყვნენ კონკრეტული ღონისძიებების გატარებაზე და თუ ვინმე იყო, პირველ რიგში, პასუხისმგებელი პოლიტიკური თანამდებობის პირებიდან, ეს არის შინაგან საქმეთა მინისტრი, რომელიც თერთმეტი დღის მანძილზე არ ჩასულა შემთხვევის ადგილას. ეს არის ნამდვილად გაუგონარი, მათ შორის, არამხოლოდ პოლიტიკურად, არამედ მორალურადაც გაუგონარი და გაუმართლებელი საქციელი და მათ შორის, სამართლებრივადაც იმიტომ, რომ კონკრეტულად ეს პირი იყო პასუხისმგებელი. ამიტომაც, რა თქმა უნდა, მასთან დაკავშირებით არსებობს ძალიან ბევრი კითხვა და მან აუცილებლად უნდა გასცეს პასუხი ამ კითხვებს. „ნაციონალური მოძრაობა“ ყველაფერს იზამს, ყველა ინსტრუმენტს და ყველა მექანიზმს გამოიყენებს იმისთვის, რომ გომელაურის პასუხები მალე იხილოს საზოგადოებამ,“ – განაცხადა ირაკლი ფავლენიშვილმა.

შეგახსენებთ, შოვში მეწყერი 3 აგვისტოს ჩამოწვა. სტიქიის ზონაში 33 ადამიანს ეძებდნენ, აქედან 26 გარდაცვლილი იპოვეს, 7 დაკარგული მოქალაქის სამძებრო სამუშაოები ამ დრომდე მიმდინარეობს.

პარლამენტის ადამიანის უფლებათა დაცვის კომიტეტის თავმჯდომარის, მიხეილ სარჯველაძის შეფასებით, შოვის სტიქიასთან დაკავშირებით საგამოძიებო კომისიის შექმნა მართებული არ არის და ეს ინიციატივა უფრო ოპოზიციის მხრიდან ახალი პოლიტიკური დებატებისთვის ხელოვნურად ასპარეზის შექმნის მცდელობაა.

სარჯველაძის თქმით, პარლამენტში არსებობს სხვა ეფექტიანი ინსტრუმენტები გარკვეული კითხვების დასასმელად.

„ნებისმიერ კითხვასთან დაკავშირებით, რომელიც შეიძლება გაჩნდეს, ყველას თავისი სურვილისამებრ შეუძლია იმუშაოს. უბრალოდ, იმ ფონზე, როდესაც აშკარად ჩანს ამ ტრაგედიაზე ქულების დაწერის მოტივაცია, რომ რაღაცა ფორმით ოპოზიციაში მთავარ ამოცანად საკუთარი ვიწროპარტიული ინტერესების დაკმაყოფილების სურვილია, ასეთ ფონზე მთლად დამაჯერებლად არ გამოიყურებოდა საგამოძიებო კომისიის შექმნასთან დაკავშირებით ინიციატივა, რადგან ეს ყველაფერი უფრო მეტად მიანიშნებდა იმაზე, რომ ახალი პოლიტიკური დებატებისთვის ხელოვნურად შეექმნათ ახალი ასპარეზები.

შეისმინეს, რომ სხვა არანაკლებ მნიშვნელოვანი, ეფექტიანი საზედამხევდელო ინსტრუმენტები არსებობს, მათ შორის, ეს შეიძლება იყოს ინტერპელაცია ან  სადეპუტატო კითხვა და სხვადასხვა. ყოველ შემთხვევაში, პარლამენტის რეგლამენტი იძლევა შესაძლებლობას, რომ თუ ვინმეს ჭეშმარიტება აინტერესებს, ეს არ დარჩეს ფარდის ქვეშ, ყველაფერი შეიძლება გაირკვეს და ყველა კითხვა დაისვას.

უმჯობესია, ჯერ ვთქვათ, რა კითხვებია, შემდეგ უნდა ვიმსჯელოთ, რომელი საპარლამენტო ზედამხედველობის მექანიზმი იქნება ყველაზე მეტად რელევანტური. პირადად მგონია, რომ ამ შემთხვევაში საგამოძიებო კომისიის შექმნა არ უნდა იყოს მართებული. ჯერ ვთქვათ კონკრეტულო საკითხი, კონკრეტულად ინტერესის საგანი და ამის მიხედვით ვიმსჯელოთ, რა მასშტაბი სჭირდება აღნიშნულ კითხვებთან დაკავშირებით პასუხების მიღებას. ერთ-ერთი დაშვება, რომელსაც აყენებს ოპოზიცია, არის, რომ თვითონაც ვერ შეძლებენ ხმების მობილიზებას, ხელისუფლებას დააბრალებენ, თითქოს რამე დასამალი აქვს. არავის არაფერი დასამალი არ აქვს, უბრალოდ, საუბარია, საგამოძიებო თუ საზედამხედველო ინსტრუმენტების გამოყენებაა რელევანტური“, – განაცხადა მიხეილ სარჯველაძემ.