კოლხეთის ეროვნულ პარკში 50-მდე ხოხობი გაუშვეს. ფრინველები ლანჩხუთის მუნიციპალიტეტს ფონდმა „ქართუმ“ გადასცა. პროექტი მომავალშიც გაგრძელდება და მისი მიზანია გადაშენების პირას მყოფი ფრინველების მომრავლება და ბუნებაში გაშვება.

სახელმწიფო რწმუნებული გურიის მხარეში, გიორგი ურუშაძე ფონდ „ქართუს“ და ბიზნესმენ ბიძინა ივანიშვილს გურიის ფაუნის გამრავალფეროვნებისთვის მადლობას უხდის.

„ფონდი „ქართუს“ მხარდაჭერით დღეს ლანჩხუთის მუნიციპალიტეტში, ველურ ბუნებაში გავუშვით ხოხბები, რომლებიც გურიის რეგიონს საჩუქრად გადმოეცა. მოგეხსენებათ, აღნიშნული ფრინველის რაოდენობა მკვეთრად არის შემცირებული ბოლო პერიოდში და მისი მოშენების და გამრავლების ხელშეწყობა ძალიან მნიშვნელოვანია. ფრინველის მოშენების ინიციატივა ეკუთვნის ბატონ ბიძინა ივანიშვილს და მინდა პირადად მას და ფონდ „ქართუს“ გადავუხადო მადლობა. აღნიშნული აქცია მომავალშიც გაგრძელდება, რაც ხელს შეუწყობს გურიის რეგიონში, ფაუნის გამრავალფეროვნებას“, – აღნიშნა სახელმწიფო რწმუნებულმა.

ირაკლი კობახიძის ნაბიჯი ღირსეული ადამიანის ნაბიჯი იყო – მან როგორც პოლიტიკოსმა გვაჩვენა, რომ ის არის ლიდერი! – ასე ეხმაურება პარტია “ქართული ოცნების” თავმჯდომარის განცხადებას უმრავლესობის დეპუტატი ირაკლი ქადაგიშვილი.

ქადაგიშვილის თქმით, ადვილად გასაგებია, რომ ოპოზიცია კობახიძის სინანულს ვერ აღიქვამს, რადგან “რაც ამ ოპოზიციამ მისი ქმედებებითა და ხელდასმით ტრაგედიები დაატრიალა, არც ერთზე ბოდიში არ მოუხდია და არც სინანული გამოუთქვამს”.

ქადაგიშვილის შეფასებით, სწორედ ამიტომ მათთვის პოლიტიკოსის მხრიდან გულწრფელი ნაბიჯის გადადგმა და ლიდერის თვისებების ქონა წარმოუდგენელი და გაუგებარია.

„შოვის სტიქია არის ნამდვილად ტრაგედია. ხელისუფლებამ ეს სწორედ ასე აღიქვა და იმ მიმართულებით იმოქმედა, რომ სტიქიის შედეგები შეძლებისდაგვარად სწრაფად ყოფილიყო ლიკვიდირებული.

ამავდროულად, თუ ვინმეს რაიმე წყენა ან სულიერი ტკივილი მიადგა ამა თუ იმ უნებლიე განცხადების გამო, ხელისუფლების წარმომადგენელმა ამაზე თქვა – ბოდიში, რადგან ამას ხელისუფლება საკუთარი ხალხის ტრაგედიად აღიქვამს.

ოპოზიცია ავითარებს აზრს, რომ თითქოს ხელისუფლებას მიზანმიმართულად სურს, ამ ტრაგედიის შემდეგ კიდევ ვიღაცები დაჩაგროს. ამას ლოგიკური ახსნაც კი არ შეიძლება მოუძებნო. როცა ადამიანს აზრად მოგდის, რომ ხელისუფლების სურვილია ტრაგედიაში მოხვედრილი ადამიანების დაბულინგება, დაჩაგვრა, მაშინ გამაგებინეთ რა არის არის მიზანი?!“ – განაცხადა ირაკლი ქადაგიშვილმა.

24 100 კილოგრამი ცხოველთა საკვები ექსპორტიორ ქვეყანაში გაბრუნებას დაექვემდებარა, – ამის შესახებ ინფორმაციას ფინანსთა სამინისტროს შემოსავლების სამსახური ავრცელებს.

„ფინანსთა სამინისტროს შემოსავლების სამსახურის საბაჟო გამშვებ პუნქტში „სარფი“, ფინანსთა სამინისტროს შემოსავლების სამსახურის საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლების მიერ, თურქეთის რესპუბლიკიდან შემოტანილი 24 100 კილოგრამი ცხოველთა საკვების იდენტურობის შემოწმების შედეგად, სიჯანსაღის მოთხოვნებთან შეუსაბამობა გამოვლინდა.

საქართველოს მთავრობის 2019 წლის 20 სექტემბრის N463 დადგენილების შესაბამისად, აღნიშნული საქონელი ექსპორტიორ ქვეყანაში გაბრუნებას დაექვემდებარა“, – აღნიშნულია უწყების მიერ გავრცელებულ ინფორმაციაში

გურჯაანის მუნიციპალიტეტში ავარიას ერთი ოჯახის სამი წევრი ემსხვერპლა. შემთხვევა სოფელ ახაშენში გვიან ღამით მოხდა.

გარდაცვლილია დედა მამა და მათი 4 წლის ბავშვი. ადგილობრივების თქმით, ახალგაზრდა მამაკაცი მსუბუქი ავტომობილით მეუღლესთან და ორ მცირეწლოვან შვილთან ერთად სახლის მიმართულებით გადაადგილდებოდა, რა დროსაც ტრაქტორს დაეჯახა და ამობრუნდა.

შეჯახება იმდენად ძლიერი აღმოჩნდა, რომ ცოლ-ქმარი და მათი 4 წლის ბიჭი ადგილზე დაიღუპნენ, მეორე მოზარდი კი საავადმყოფოშია მოთავსებული.

მომხდარზე მიმდინარეობს გამოძიება.

ჩვენ გვჭირდება სიმართლე შოვთან დაკავშირებით – კობახიძის სინანული, ამათი „ნიანგის ცრემლები“ ჩვენ უნდა მივიღოთ როგორც სიგნალი, მათ ძალიან კარგად იციან თუ სად არის სიმართლე, – ამის შესახებ პარტია „ხალხისთვის“ ლიდერმა, ანა დოლიძემ შოვში მომხდარ ტრაგედიასთან დაკავშირებით განაცხადა.

მისივე თქმით, რაჭაში მომხდარი შემთხვევა სისტემურად უნდა იყოს შესწავლილი, რათა მომავალში მსგავსი ტრაგედია ქვეყანამ თავიდან აიცილოს.

„ჩვენ გვჭირდება სიმართლე რაჭის მოვლენებთან დაკავშირებით. საგამოძიებო კომისია, გამოძიება, ამ პარლამენტის მიერ შექმნილი საგამოძიებო კომისია თუ შემდეგის, ეს ყველაფერი არის საშუალება. შედეგი არის ის, რომ ჩვენ გავიგოთ სიმართლე. მივიღოთ ზომები, რათა შემდეგში მსგავსი რამ აღარ განმეორდეს. კობახიძის სინანული, ამათი „ნიანგის ცრემლები“ ჩვენ უნდა მივიღოთ როგორც სიგნალი, მათ ძალიან კარგად იციან თუ სად არის სიმართლე. გული გაუსკდათ, როდესაც დაინახეს ხალხის მრისხანება, ეს არის ჩვენი გამარჯვება, თუმცა ეს არ არის საკმარისი. ჩვენ უნდა მოვითხოვთ სიმართლე რაჭაზე.

სიმართლე რაჭასთან დაკავშირებით, ჩვენ შეგვიძლია გავყოთ ორ ეტაპად. პირველი ეტაპი – რატომ არ დადგა გაფრთხილების და ადრეული შეტყობინების სისტემები, რომელსაც არსებული ხელისუფლება ათასჯერ დაჰპირდა ხალხს. ჩვენ სახელმწიფოს ევროკავშირის დირექტივის საფუძველზე აქვს ვალდებულები, კერძოდ, მოახდინოს ზონირება იმ ტერიტორიების, რომელიც არის მეწყერსაშიში და საფრთხის შემცველი. 2020 წელს, პრემიერ-მინისტრი გიორგი გახარია ჩავიდა რაჭაში და მან საჯაროდ თქვა, რომ როგორც კი გზა გაიხსნებოდა გეოლოგები ამოვიდოდნენ და არსებულ ტერიტორიას შეისწავლიდნენ. ამასთანავე, ის ადგილობრივ მოსახლეობას დაჰპირდა, რომ იქნებოდნენ უსაფრთხოდ. კითხვა არ უნდა დავსვათ?! რა ნაბიჯებს დგამდა ხელისუფლება იმისთვის, რომ თავიდან აეცილებინა ეს ტრაგედია. საგამოძიებო კომისიის შექმნის საკითხი პარლამენტში პირველად დავაყენეთ ჩვენ. თუმცა, ჩვენ ვართ არასაპარლამენტო ოპოზიცია და ამისთვის გვჭირდება საპარლამენტო ოპოზიცია. თუ ვინმე ამ კომისიას არ შექმნის და ხელს შეუშლის, ბუნებრივია კითხვები გაჩნდება მათ მიმართ. მაშინ გამოვიდეს და სხვა ფორმით უპასუხოს კითხვებს. მეორე ეტაპი ეხება ღვარცოფის პერიოდს, თუ რა გაკეთდა ამ მიმართულებით. ვერტმფრენის საკითხი კვლავ გაურკვეველია, ბოლო-ბოლო გვაქვს თუ არა ვერ გავიგეთ. ასევე ძალიან მნიშვნელოვანია თუ რა ხდება მაშველებთან მიმართებაში, მათ აქვთ ძალიან დაბალი ხელფასები. დავინახეთ რომ შესაბამისი მოწყობილობებიც არ აქვთ. არ არის ეს საკითხი დასასმელი?! ვინ ხელმძღვანელობდა ამ ოპერაციას, როდესაც შინაგან საქმეთა მინისტრი ოჯახური პრობლემების გამო თურქეთში იმყოფებოდა? თუ ტელეფონით ხელმძღვანელობდა და ეს დასაჯერებელია, მაშინ სასწრაფოდ უნდა გაქუსლონ აქედან. ეს საკითხი უნდა შევისწავლოთ სისტემურად, რათა მომავალში მსგავსი ტრაგედია თავიდან ავიცილოთ. ერთი მინისტრის მოსვლა პარლამენტში არ კმარა, გვჭირდება პროცესი და სიმართლე შოვთან დაკავშირებით”, – განაცხადა ანა დოლიძემ, რომლის კომენტარსაც პარტია „ხალხისთვის“ ავრცელებს.