ეტყობა, სააკაშვილს პარტიულმა ადამიანებმა იმედები ვერ გაუმართლეს და ახლა სოფო ჯაფარიძეს დაავალა თავისი ინტერესების გახმოვანება ქალაქებსა თუ სოფლებში, თავიდან ბოლომდე კომიკური სიტუაციაა, – ამის შესახებ საპარლამენტო უმრავლესობის წევრმა, გია ცაგარეიშვილმა განაცხადა.

ცაგარეიშვილის თქმით, ამ საქმიდან არაფერი გამოვა, რადგან მიხეილ სააკაშვილს მოქალაქეობა დაკარგული აქვს თავისივე განცხადების საფუძველზე და მას არც აქტიურ და არც პასიურ პოლიტიკაში ჩართვის უფლება არ აქვს.

„ეტყობა, პატიმარი სააკაშვილის სულმა რეიკარნაცია განიცადა ქალბატონ სოფოში. ვერ გეტყვით, ეს რა პროცესია. ეტყობა, პარტიულმა ადამიანებმა ვერ გაუმართლეს იმედები ბატონ სააკაშვილს და ახლა კონკრეტულად ამ ადამიანს დაავალა თავისი ინტერესების გახმოვანება ქალაქებსა თუ სოფლებში. თავიდან ბოლომდე კომიკური სიტუაციაა და არავითარი შედეგის მომტანი ეს არ იქნება. დააკვირდით პატიმარი სააკაშვილის განცხადებების დინამიკას, შეიძლება, მომავალ კვირას გააკეთოს განცხადება, რომ ის არ აპირებს ქართულ პოლიტიკაში მონაწილეობას და უკრაინის მოქალაქეა, აუცილებლად დაეხსნება საპატიმროს, წავა უკრაინაში და გააგრძელებს პოლიტიკურ კარიერას. ერთი კვირა გაივლის და იტყვის, რომ მისი ადგილი აქ არის, ეს არის მისი ჯვარი და მისია. გავა ერთი თვე და იტყვის, არა, ისევ უკრაინაში ხედავს თავის თავს ოდესის გუბერნატორად ან რომელიმე სახლის სახურავზე მორბენალი. შემდეგ იტყვის, რომ არა, საქართველოში უნდა მას პოლიტიკური კარიერის გაგრძელება. ეს პოლიტიკური მეტეორიზმი მუდმივად ხდება მის თავს. ღმერთმა მშვიდობაში მოახმაროს, უნდა ქალბატონმა სოფომ იაროს კარდაკარ, უნდა ხაბეიშვილმა, უნდა რომელიმე სხვა ლიდერმა იაროს. ეს მათი გადასაწყვეტია, მაგრამ ჩვენ ხომ ვიცით, რომ პოლიტიკაში მონაწილეობის უფლება აქვს საქართველოს მოქალაქეს. ისიც თავიდან ბოლომდე მანიპულაცია და სიყალბეა, რასაც მისი მშობელიც ავრცელებს და თავად ეს ვაჟბატონიც ავრცელებს ხოლმე საპატიმროდან, როდესაც ამბობს, რომ მე წამართვეს საქართველოს მოქალაქეობა. სააკაშვილისთვის საქართველოს მოქალაქეობა არავის წაურთმევია. პრეზიდენტ მარგველაშვილის პრეზიდენტობის დროს მას უნდოდა ოდესის გუბერნატორობა და გამორიცხული იყო, უკრაინის კანონმდებლობით უცხო ქვეყნის მოქალაქეს დაეკავა ადმინისტრაციული თანამდებობა და პოლიტიკური თანამდებობა უკრაინაში. ამიტომ მან გამოაგზავნა განცხადება, უარყო საქართველოს მოქალაქეობა, მიიღო უკრაინის მოქალაქეობა და მყისიერად, ფაქტობრივად, მეორე დღეს დაინიშნა ოდესის გუბერნატორად. ახლა რატომ უნდა, შეთხზას რაღაც ლეგენდა, რომ თურმე ის არის დევნილი და მას მოქალაქეობა წაართვეს. არავის წაურთმევია მისთვის მოქალაქეობა. გამომდინარე აქედან, უნდა ქალბატონმა სოფომ იაროს, უნდა სხვამ იაროს ქალაქ-ქალაქ და სოფელ-სოფელ, ამ საქმიდან არაფერი გამოვა, რადგან ყოფილ პრეზიდენტს მოქალაქეობა დაკარგული აქვს თავისივე განცხადების საფუძველზე და მას არც აქტიურ და არც პასიურ პოლიტიკაში ჩართვის უფლება არ აქვს. ასეა ჩვენი კანონმდებლობით, ეს არის ევროპული სტანდარტით და ამას ყველა უნდა შეეგუოს“, – აღნიშნა გია ცაგარეიშვილმა.

სოფო ჯაფარიძემ დღეს განაცხადა, რომ მიხეილ სააკაშვილის სახელით საარჩევნო კამპანიას იწყებს.

არ მგონია, პარტიების დაფინანსებაზე მართლა ვიღაც წუხდეს. ეს კონკრეტულ პარტიებზე ზეწოლის მექანიზმი შეიძლება იყოს, – ასე გამოეხმაურა „გირჩის“ წევრი ალექსანდრე რაქვიაშვილი „რეგიონული განვითარების და ხელშეწყობის ცენტრის“ განცხადებას, რომელიც აუდიტის სამსახურს მიმართავს, დაიწყოს მოკვლევა პარტიების მიერ არასამთავრობო ორგანიზაციების შექმნის გზით უკანონო შემოწირულებების მიღებასთან დაკავშირებით.

ალექსანდრე რაქვიაშვილის თქმით, იმედი არ აქვს, რომ ფინანსების გაკონტროლება რამე კარგს მოიტანს.

„ჩვენს ქვეყანაში ისეთი კანონმდებლობა გვაქვს, რომ ყველა პარტია არღვევს მას. არცერთი პარტია – ჩვენით დაწყებული, „ქართული ოცნებით“ დამთავრებული – ლეგალურად არ მუშაობს. თუ საჭირო იქნება, შეიძლება, ყველა დააჯარიმო და დახურო კიდეც, იმხელა ძალაუფლება აქვს სახელმწიფო აუდიტს და შემდეგ ექნება ახალ სააგენტოს, ანტიკორუფციულ ბიუროს, სადაც ეს უფლებამოსილება გადადის. არ მგონია, სერიოზული იყოს და პარტიების დაფინანსებაზე მართლა ვიღაც წუხდეს. ეს კონკრეტულ პარტიებზე ზეწოლის მექანიზმი შეიძლება იყოს. ვიდრე არ გავაცნობიერებთ, რომ ნებისმიერი პარტიის გაუქმება შეიძლება – მთავრობას ისეთი ძალაუფლება აქვს – და არ ვიფიქრებთ, რომ კანონმდებლობა შევცვალოთ, ეს რისკი სულ იარსებებს. პრობლემა ისაა, რომ, ჩვენ გარდა, არცერთი ოპოზიციური პარტია არ ითხოვს ამ კანონმდებლობის შეცლას. ოპოზიციური პარტიების წარმომადგენლები მიიჩნევენ, რომ პარტიების ფინანსები ასე უნდა კონტროლირდებოდეს. საქართველოში როცა ვენეციის კომისია იყო და ვთხოვეთ, კანონმდებლობა შეგვეცვალა, ოპოზიციიდან მხარი არავინ დაგვიჭირა. უცნაური სიტუაციაა, ოპოზიცია მიიჩნევს, რომ პარტიების ფინანსები უნდა კონტროლირდებოდეს. არანაირი იმედი არ მაქვს, რომ ფინანსების გაკონტროლება რამე კარგს მოიტანს“, – განაცხადა ალექსანდრე რაქვიაშვილმა.

ვერ არიან კარგად, სოფო ჯაფარიძე დანიშნა წარმომადგენლად, აბა, ჩემი ხაბე ვინ არის, – ასე გამოეხმაურა  „ქართული ოცნების“ დეპუტატმა ირაკლი ზარქუა, “ნაციონალური მოძრაობის“ წევრის, სოფო ჯაფარიძის განცხადებას, სადაც ამბობს, რომ მიხეილ სააკაშვილის სახელით ხვალიდან საარჩევნო კამპანიას იწყებს.

„ვერ არიან კარგად, ამით შეიძლება შეფასდეს ეს რადიკალური ოპოზიცია და მათი ბელადი. პატივცემული სააკაშვილი საქართველოს მოქალაქე არ არის და კეთილი ინებოს, პატივი სცეს ამ ქვეყნის კონსტიტუციას. ახლა ხომ მაინც შეუძლოა, მოინანიოს და ერთხელ მაინც გადადგას ადეკვატური, საქართველოს ინტერესებისა და კანონმდებლობის შესაბამისი ნაბიჯი. სააკაშვილი უფლებამოსილი არ არის, საარჩევნო კამპანიაში იყოს ჩართული, რადგან თვითონ დახია საქართველოს მოქალაქეობა და უკრაინაში გაიქცა.

რაც შეეხება სოფო ჯაფარიძეს, ეს გოგო მეცოდება, მის მიმართ ძალიან პოზიტიურად ვარ განწყობილი და ახლა წარმომადგენლად დანიშნა. აბა, ჩემი ხაბე ვინ არის? რომელ პარტიას წარმოადგენს, ეს რომ დადის და წამდაუწუმ სააკაშვილს, ბელადს ახსენებენ? სამი ფრთაა, რომელიც სააკაშვილის სახელს იყენებს და ამბობენ, რომ  „ნაციონალური მოძრაობა“ და სააკაშვილი განუყოფელი ნაწილიაო. ამ დროს სააკაშვილი თავის წარმომადგენლად ნიშნავს ქალბატონ ჯაფარიძეს, რომელმაც უნდა მოიაროს მთელი საქართველო. არ ვიცი, რაზე უნდა ილაპარაკოს, მაგრამ მცდელობა აქვთ. მივმართავ ქართულ საზოგადოებას, ხედავთ, რასთან გვაქვს საქმე?

მთავარი ოპოზიციური პარტია ჰქვია და სამი წარმომადგენელი მოვა თქვენთან, მაგრამ დაუჯერეთ სოფო ჯაფარიძეს, რადგან სოფო ჯაფარიძე არის წარმომადგენელი სააკაშვილის, რომელიც, ქართული კანონმდებლობის შესაბამისად, არალეგიტიმურია, საარჩევნო პროცესში იყოს ჩართული. ასეთ დომხალთან გვაქვს საქმე და რა უნდა გამოვიდეს ამ ხელმოცარულებისგან? ამიტომაც არის, რომ ცდილობენ, ყველა პატარა თუ დიდ ტრაგედიაზე ხელი მოითბონ და პოპულისტური განცხადებები აკეთონ“, – განაცხადა ირაკლი ზარქუამ.

დაფინანსების ნებისმიერი წყარო გამჭვირვალეა, ძალიანაც რომ უნდოდეს რომელიმე პარტიას, ამას ვერ დამალავს, – ამის შესახებ „სტრატეგია აღმაშენებლის“ წევრმა, სერგო ჩიხლაძემ განაცხადა.

ჩიხლაძე გამოეხმაურა „რეგიონული განვითარების და ხელშეწყობის ცენტრის“ განცხადებას, რომელიც აუდიტის სამსახურს მიმართავს, დაიწყოს მოკვლევა პარტიების მიერ არასამთავრობო ორგანიზაციების შექმნის გზით უკანონო შემოწირულებების მიღებასთან დაკავშირებით.

„აუდიტის სამსახური ისედაც აკეთებს ამას, ეს მისი საქმიანობის სფეროა და ამიტომ ახლა ეს რაღაც ახალი შეკვეთილი კამპანიაა „ქართული ოცნების“ მხრიდან, რაღაც სიახლე და აურზაური თუ ქარიშხალი ჭიქაში რასაც ჰქვია. აუდიტის სამსახური აკეთებს ამას, გამჭვირვალეა ეს ყველაფერი და მათ შორის „ქართული ოცნების“ ე.წ. ჯიბის ორგანიზაციებს შეუძლიათ, მიიღონ ამაზე ინფორმაცია.

ესეც არის ტყუილი, რადგან გამჭვირვალეა დაფინანსების ნებისმიერი წყარო. ძალიანაც რომ უნდოდეს რომელიმე პარტიას, ამას ვერ დამალავს. ყველაფერი დევს გამჭვირვალედ. იმავე აუდიტის საიტზე შეუძლია შევიდეს ყველას და ნახოს. არ ვიცი, რას ემსახურება ეს ამდენი სისულელის ფრქვევა“,  – განაცხადა სერგო ჩიხლაძემ.

ეს არის ბიძგი, მითითება, რომ საარჩევნო პროცესი რევოლუციური სცენარით უნდა წარიმართოს, – ასე ეხმაურება საპარლამენტო უმრავლესობის წევრი, საპროცედურო საკითხთა კომიტეტის თავმჯდომარე ირაკლი ქადაგიშვილი. არჩევნების შესახებ, საქართველოში ამერიკის შეერთებული შტატების ელჩის, კელი დეგნანის განცხადებას

ქადაგიშვილის განცხადებით, კელი დეგნანის განცხადება  პოლიტიკური პარტიებისთვის დამახასიათებელ მოწოდებას შეიცავს. მისივე განცხადებით, ახლა ელექტრონულ სისტემაზე ორკესტრირებული შეტევა იწყება.

„ქალბატონი კელი დეგნანის განცხადება თავიდან ბოლომდე პოლიტიკითაა გაჟღენთილი. მოწოდებაა, რომელსაც, როგორც წესი, პოლიტიკური პარტია აკეთებს ხოლმე – „გამოდით არჩევნებზე, დაიცავით თქვენი ხმა!“ ანუ ვიღაც ვიღაცას ართმევს ხმას და წელიწადნახევრით ადრე მოუწოდებს, დაიცავით თქვენი ხმაო. ეს უკვე არის ბიძგი, მითითება, რომ საარჩევნო პროცესი რევოლუციური სცენარით უნდა წარიმართოს.

გვეუბნებიან, რომ არჩევნები ყალბდება არჩევნებამდეც, მაგრამ ფაქტები ვერ მოჰყავთ. 2020 წელს ვუყურეთ, როგორ ხდებოდა ცალყბად არჩევნების აღიარება და მეორე მხრივ, კრიზისის ხელის შეწყობა, მაგრამ ვერც ერთი დოკუმენტი, ჩვენება ვერ იქნა მოტანილი, რომ არჩევნები გაყალბდა. ახლა, როცა მართლაც რევოლუციური საარჩევნო კოდექსი მივიღეთ, რაზეც ყველა მიუთითებდა. ხომ გვახსოვს – ყველა მიუთითებდა, რომ თუ ელექტრონული ხმის დათვლის სისტემა იქნებოდა, მაშინ არჩევნების გაყალბების და შედეგის მყისიერი გამოცხადების პრობლემა არ იქნებოდა. ეს სისტემა მიღებულია, მაგრამ ჩვენ უკვე დავინახეთ, რომ ამ სისტემაზე ორკესტრირებული შეტევა დაიწყო. გააკეთა განცხადება ელჩმა, მერე ერთმა პოლიტიკურმა პარტიამ მოაყოლა, ახლა სხვები მოაყოლებენ და დაიწყება ხალხში იმ აზრის მუსირება, რომ ელექტრონული სისტემით ჩატარებული არჩევნებიც კი გაყალბებულია. „ბანკსაც კი ქურდავენ“ ამ დონის თეორიაზე დაჰყავთ უკვე საქმე, რომ საზოგადოებაში დღესვე დაიწყონ მზადება და წაგებული არჩევნები რევოლუციურ სცენარში გადაზარდონ,“ – განაცხადა ქადაგიშვილმა.

აშშ-ის ელჩის, კელი დეგნანის განცხადებით, აშშ-შიც ნახეს, რომ არჩევნების ელექტრონული სისტემით ჩატარებაც ვერ იძლევა გარანტიას, რომ „ყველაფერი სუფთა და სამართლიანი იქნება“.

როგორც დეგნანი რადიო „თავისუფლებასთან“ ინტერვიუში აცხადებს, მისით მანიპულაციაც შესაძლებელია, თუკი ადამიანები არ არიან გაწვრთნილები ამ სისტემის გამოყენებაზე და თუკი ამომრჩევლებს არ ესმით, ის როგორ მუშაობს. მისივე თქმით, მნიშვნელოვანია ასევე მონიტორინგის გრძელვადიანი მისია, რადგან ადამიანების დაშინება, ხმების მოსყიდვა, ადამიანების მიმართ მუქარა ხდება არჩევნების დღემდე და ეს ტაქტიკა საქართველოშიც სხვადასხვა ხელისუფლების დროს გამოიყენებოდა.