საქართველოს პრემიერ-მინისტრი ირაკლი ღარიბაშვილი პეკინიდან ყაზახეთის რესპუბლიკაში გაემგზავრა.

ალმატის საერთაშორისო აეროპორტში პრემიერ-მინისტრის დახვედრის ცერემონია გაიმართა.

ირაკლი ღარიბაშვილს აეროპორტში ყაზახეთის რესპუბლიკის საგარეო საქმეთა მინისტრის მოადგილე ერმუხამბეტ კონუსპაევი,
ალმატის მერის მოვალეობის შემსრულებელი ალიშერ აბდიკადიროვი, ყაზახეთის რესპუბლიკის ელჩი საქართველოში მალიკ მურზალინი და ყაზახეთის რესპუბლიკაში საქართველოს საგანგებო და სრულუფლებიანი ელჩი ნიკოლოზ ლალიაშვილი დახვდნენ.

ვიზიტის ფარგლებში მთავრობის მეთაური ყაზახეთის რესპუბლიკის პრემიერ-მინისტრს ალიხან სმაილოვს შეხვდება.

ყაზახეთის რესპუბლიკაში ირაკლი ღარიბაშვილი დელეგაციასთან ერთად იმყოფება

ბოროტება, რაც „ნაცმოძრაობაში“ ბუდობდა, არსად წასულა. უბრალოდ, დღეს მას ძალაუფლება არ აქვს. შესაბამისად, პირდაპირ არ შეუძლიათ, მოქალაქეებსა და ქვეყანაზე იძალადონ, – ამის შესახებ „ქართული ოცნების“ წევრმა, რატი იონათამიშვილმა განაცხადა.

მისი თქმით, „ნაციონალურ მოძრაობას“ ზნე არ შეუცვლია.

„მათი ზნე არ შეცვლილა და ეს ყველაფერი კარგად ჩანს. რაც შეეხება პოლიტიკურ ვერდიქტს, 2024 წლის საპარლამენტო არჩევნები „ნაცმოძრაობისთვის“ პოლიტიკური ვერდიქტი იქნება, რაც ამ პარტიას დაასრულებს და ამ გადაწყვეტილებას ქართველი ამომრჩეველი მიიღებს“, – განაცხადა იონათამიშვილმა.

„ხალხის ძალის“ ერთ-ერთი ლიდერი სოზარ სუბარი გამოდის ინიციატივით, საქართველოს პარლამენტში დაიწყოს „ნაციონალური მოძრაობის“ დანაშაულებრივი საქმიანობის შესწავლის და მისი გასამართლების პროცესი.

კობახიძის, ღარიბაშვილის, კალაძისა და „რუსული ოცნების“ წარმომადგენლების სახით, ლაპარაკობს და უჩვენებს კრემლი, – ასე შეაფასა „ერთიანი ნაციონალური მოძრაობის“ წევრმა, გიორგი კაპანაძემ საქართველოში აშშ-ის ელჩ, კელი დეგნანთან დაკავშირებით „ქართული ოცნების“ თავმჯდომარის, ირაკლი კობახიძის დღევანდელი განცხადება.

როგორც მან აღნიშნა, „რუსული ოცნება“ მხარს უჭერს არა საქართველოსა და უკრაინას, არამედ, კრემლს და პუტინთან თანამშრომლობს.

„კობახიძის, ღარიბაშვილის, კალაძისა და „რუსული ოცნების“ წარმომადგენლების სახით, ლაპარაკობს და უჩვენებს კრემლი. „რუსული ოცნება“ პუტინთან თანამშრომლობს. ეს ძალა მხარს უჭერს არა ქართველ ხალხს, საქართველოსა და უკრაინას, არამედ, კრემლს. მისი მიზანია, ჩვენი ქვეყანა აღმოჩნდეს დამარცხებულის მხარეს და რუსეთის იმპერია გახდეს. სწორედ ამას ემსახურება რუსული საკრუიზო ლაინერის ბათუმის პორტში შემოსვლა და ხელისუფლების წარმომადგენლების მოღალატეობრივი განცხადებები.

ერთ მხარეს არის „რუსული ოცნება“ და ის რუსი ტურისტი, რომლისთვისაც აფხაზეთი საქართველო არაა, მეორე მხარეს კი არის ჩვენი ქვეყანა. ან ისინი, ან საქართველო, ან ქართველი ხალხი ან ივანიშვილის რეჟიმი, ან რუსული ჭაობი ან ევროპა, კეთილდღეობა, თავისუფლება და ღირსება, ეს არის არჩევანი და ასეთია რეალობა დღეს. ესენი არ არიან მხოლოდ პრორუსები, ესენი არიან ბერბიჭაშვილები, რომლებიც ილიას საქართველოს იდეას კლავენ“,-განაცხადა გიორგი კაპანაძემ.

შეგახსენებთ, ირაკლი კობახიძის განცხადებით, ბათუმში საკრუიზო ლაინერის შემოსვლასთან დაკავშირებით საქართველოში აშშ-ის ელჩის, კელი დეგნანის განცხადება გაუგებარი იყო.

„ქართველი ხალხის სახელით საუბარი არ არის არც ერთი ელჩის საქმე, მითუმეტეს, როცა აფასებ 150 „ნაციონალის“ აქციას და არქმევ ქართველი ხალხის პროტესტს, ეს ხომ გაუგებარია?! იგივე თქვა სალომე ზურაბიშვილმა, იგივე თქვა ერთ-ერთმა ელჩმა. საზოგადოება შეაფასებს ამ ყველაფერს, უბრალოდ არასწორია“,-განაცხადა კობახიძემ.

ცნობისთვის, საქართველოში აშშ-ის ელჩმა, კელი დეგნანმა ბათუმის პორტში გამართულ აქციასთან დაკავშირებით განაცხადა, რომ „ქართველმა ხალხმა ცხადყო, არავინ უნდა ელოდოს ქართველებისგან, რომ მიესალმებიან ხალხს იმ ქვეყნიდან, რომელსაც ოკუპირებული აქვს საქართველოს ტერიტორიის 20 პროცენტი“.

ბათუმში აქციაზე პრიგოჟინის პარტიის აქტიური წევრები და მათი უშუალო მხარდამჭერები იყვნენ, – ამის შესახებ ჟურნალისტებთან “ხალხის ძალის” წევრმა, უმრავლესობის დეპუტატმა გურამ მაჭარაშვილმა ბათუმში გამართული საპროტესტო აქციის შეფასებისას განაცხადა, სადაც სოჭიდან ლაინერის შემოსვლას აპროტესტებდნენ.

მაჭარაშვილი გამოეხმაურა საია- ს განცხადებას, რომელიც შსს- ს „ანტიკონსტიტუციური ქმედებების“ შეწყვეტისაკენ მოუწოდებს და საგანგაშოს უწოდებს იმას, რომ პოლიცია ყველა სხვა შემთხვევისგან განსხვავებით, განსაკუთრებით ზრუნავს რუსეთის მოქალაქეების უსაფრთხოებაზე და აღნიშნა, რომ საია-მ ობიექტურობა დაკარგა.

“შევახსენებ საია-ს, რომ ადამიანის უფლებების კონვენცია არსებობს, მარტო საია-ს წევრების უფლებების დაცვა კი არ არსებობს მსოფლიოში, ადამიანის უფლებების დაცვა არსებობს. როცა საია რუსეთის მოქალაქეების შემოსვლაზე საუბრობს, მათ შორის, ეთნიკურად ქართველების, კარგად გადახედოს ინფორმაციებს რუსეთის მოქალაქეები მილიონობით, მათ შორის, ტურისტულად თუ სხვა მიზნით ჩადიან სხვადასხვა ქვეყანაში, მათ შორის, აშშ- ში და იქ მშვენივრად გრძნობენ თავს. ეს არის ორმაგი სტანდარტი, რასაც საია იჩენს, რაც ადრე ჰქონდა ის ობიექტურობა დაკარგა. ჩვენ ვნახეთ იქ ვინ იყვნენ, მშვენივრად ჩანდა – პრიგოჟინის პარტიის აქტიური წევრები და მათი უშუალო მხარდამჭერი წევრები. დაუძველდათ მეთოდები, ეს პრიგოჟინის პარტიას ვეღარ უშველის,”- განაცხადა მაჭარაშვილმა.

პატარ-პატარა, მაგრამ შედეგის მომცემი ქმედებები, საბოლოო ჯამში, შლის რუსეთის ჰიბრიდული ომის გეგმებს – რუსული მოღალატური ინტერესების დამცველია დღეს საქართველოს ხელისუფლება, – ამის შესახებ ოპოზიციონერმა დეპუტატმა რომან გოცირიძემ ბათუმში სოჭიდან შემოსული გემის გამო გამართული აქციის კომენტირებისას განაცხადა.

მისივე თქმით, მოქალაქეთა უდიდესი ნაწილი მხარს უჭერდა ბათუმში გამართულ აქციას, თუ ვინმე ყვავილებით შეხვდა და ამართლებდა რუსი ოკუპანტების და პროპაგანდისტების საქართველოში შემოსვლას, ერთადერთი ეს იყო “ქართული ოცნების” პოლიტიკური ელიტა.

“ბათუმში გამართულ აქციას, რომელსაც მოჰყვა რუსული გემის გაძევება და ვერ გაბედავენ მეორედ აქ შემოსვლას, მხარს უჭედა ჩვენი ქვეყნის მოქალაქეების უდიდესი ნაწილი და თუ ვინმე ყვავილებით შეხვდა და ამართლებდა რუსი ოკუპანტების და პროპაგანდისტების საქართველოში შემოსვლას, ერთადერთი იყო “ქართული ოცნების” პოლიტიკური ელიტა. “ქართული ოცნების” 99.9 პროცენტი დარწმუნებული ვარ, სოლიდარული იქნებოდა იმ მოვლენებისადმი, რაც გუშინ ბათუმში განვითარდა. მოწყვეტილია რეალობას “ქართული ოცნება”, პირდაპირ დგანან რუსეთის ინტერესების სადარაჯოზე.

ლავროვის შვილის ქორწილი რომ არ ჩაეშალა საზოგადოებას, ხვალ შოიგუს შვილის ქორწილი გაიმართებოდა და ზეგ კიდევ პრიგოჟინის. ასე რომ, ასეთი პატარ-პატარა, მაგრამ შედეგის მომცემი ქმედებები, საბოლოო ჯამში, შლის რუსეთის ჰიბრიდული ომის გეგმებს. ასე რომ ეს იყო სწორი, საერთო, სახალხო გულისწყრომა და თუკი პოლიტიკური პარტიები მონაწილეობდნენ მასში, გასაკვირი არ არის პოლიტიკური პარტია უნდა იყოს იქ, სადაც არის ხალხი,” – განაცხადა გოცირიძემ.

გოცირიძე ასევე გამოეხმაურა საია-ს განცხადებას, რომელიც შინაგან საქმეთა სამინისტროს „ანტიკონსტიტუციური ქმედებების“ შეწყვეტისაკენ მოუწოდებს და საგანგაშოს უწოდებს იმას, რომ პოლიცია ყველა სხვა შემთხვევისგან განსხვავებით, განსაკუთრებით ზრუნავს რუსეთის მოქალაქეების უსაფრთხოებაზე. გოცირიძე მიიჩნევს, რომ დაკავებები უკანონო იყო და ხელისუფლება რუსეთის ინტერესებს იცავს.

“ის დაკავებები, რაც მოხდა, არის უკანონო და არის ძალის გადამეტება, როგორც ეს ხდება სხვა შემთხვევაში. მსგავსი ქმედებებისთვის, მათ შორის, ბევრჯერ პარლამენტიდან ჩადენილი დანაშაულისთვის დაისჯება ყველა. ნუ ჰგონიათ დაუსჯელი დარჩებიან, არაფერი იმალება, ყველაფერს თავის დრო და ადგილი ექნება. რუსული მოღალატური ინტერესების დამცველია დღეს საქართველოს ხელისუფლება,” – განაცხადა გოცირიძემ.

„სასამართლოს გუშაგის“ ხელმძღვანელის, ნაზი ჯანეზაშვილის განცხადებით, სასამართლოს ე.წ.კლანი და მისი კავშირები ხელისუფლებასთან მთავარ გამოწვევად რჩება, განსაკუთრებით იმ პირობებში, როდესაც იუსტიციის უმაღლეს საბჭოში პარლამენტის მიერ უკვე არჩეულია სამი არამოსამართლე წევრი, თუმცა მათი არჩევის შემდგომ საბჭოს საქმიანობაში არაფერი შეცვლილა. ამასთან, ჯანეზაშვილის თქმით, საბჭოში გადაწყვეტილება კვლავ ერთხმად მიიღება, რაც გამოიხატება იმაში, რომ იუსტიციის უმაღლესი საბჭოს დამოუკიდებელი ინსპექტორის თანამდებობაზე შოთა ქადაგიძე ერთხმად დანიშნა. როგორც ნაზი ჯანეზაშვილმა აღნიშნა, ის პრინციპები, რითაც აქამდე იმართებოდა სასამართლო იგივე კორპორატივიზმით, ნეპოტიზმით, ე.წ. კლანური წესებით, გრძელდება და ბოლო რამდენიმე კვირაში კიდევ უფრო თვალსაჩინო გახდა.

აღნიშნულის შესახებ ნაზი ჯანეზაშვილმა ჟურნალისტებს “ფონდი ღია საზოგადოება საქართველოს” ოფისში განუცხადა, სადაც “ფონდი ღია საზოგადოება საქართველოს” ლიდერობით 9 საზოგადოებრივმა ორგანიზაციამ წარმოადგინა მათ მიერ შემუშავებული მეხუთე შეფასების დოკუმენტი საკითხზე, როგორ ასრულებს საქართველოს ხელისუფლება ევროკავშირის 12 პრიორიტეტს.

მისი თქმით, დაახლოებით ერთი თვის წინ წარმოადგინეს ანგარიში, თუმცა ანგარიშის გამოქვეყნებიდან დღემდე, ფაქტობრივად, არაფერი შეცვლილა.

„შეიძლება ითქვას, რომ გარკვეული კუთხით სიტუაცია გაუარესებულიც კი, არის. პირველ რიგში, უნდა აღვნიშნო, რომ გამოქვეყნდა ეუთო/ოდირის მოსაზრება და ძალიან ბევრ პრობლემაზეა საუბარი, მათ შორის სასამართლოს თავმჯდომარეებზე, იუსტიციის უმაღლეს საბჭოში გადაწყვეტილების მიღებაზე, მოსამართლის როლზე, რომლებსაც მაგალითად, სისტემაში აქვთ მაღალი თანამდებობები და სხვა მნიშვნელოვანი საკითხები, რაც ვენეციის კომისიის დასკვნაშიც არის მითითებული. გარდა ამისა, მნიშვნელოვანი ის მოხდა, რომ ევროპის საბჭოს მონიტორინგის კომიტეტმა ვენეციის კომისიაში გაგზავნა უკვე მიღებულ კანონში ცვლილებები მოსაზრებებისთვის და ცხადია, ველოდებით იმას, თუ როგორი იქნება მათი რეკომენდაცია და შემდეგ უკვე ხელისუფლება როგორ მოახდენს რეაგირებას. თუმცა, ერთ-ერთი პრობლემური საკითხი, რაც პრაქტიკაში გამოიკვეთა, ეს არის იუსტიციის უმაღლეს საბჭოში მიღებული გადაწყვეტილება. საბჭომ მიიღო არაორდინალური გადაწყვეტილება და საბჭოს ყოფილი არამოსამართლე წევრი აირჩია იუსტიციის საბჭოს დამოუკიდებელი ინსპექტორის თანამდებობაზე. ეს ადამიანი არის შოთა ქადაგიძე, რომელსაც ძალიან მჭიდრო კავშირი ჰქონდა საბჭოს ე.წ.გავლენიან ჯგუფებთან და ცხადია, მისი დანიშვნა ამ მაღალ თანამდებობაზე, რომელიც მისმა წინამორბედმა ზურაბ აზარაშვილმა ვადაზე ადრე დატოვა, კითხვებს აჩენს და სისტემაში კორპორატივიზმს კიდევ უფრო აძლიერებს”. განაცხადა ნაზი ჯანეზაშვილმა.

მისი თქმით, ვენეციის კომისიის და ევროკომისიის მთავარი რეკომენდაცია და მოთხოვნაა, რომ უზრუნველყოფილი იყოს სასამართლოს დამოუკიდებლობა.