მიკვირს პარლამენტარებისა და პოლიტიკოსების უვიცობა და უსინდისობა, რასაც ვხედავ პოლონელი ექიმების სკანდალის შეფასებებში. კანონმდებლებს წარმოდგენა არ აქვთ იმ კანონებზე, რომელიც საქართველოში მოქმედებს. სააკაშვილის დედა რასაც ამბობს გასაგებია, ყველაფერს გაამართლებს, მაგრამ კანონმდებელი რომ გქვია და ამ ამბავზე ამბობ – „რა მოხდა, რა არის განსაკუთრებული?!“, – ამის შესახებ დამოუკიდებელმა ექსპერტმა, მაია ნიკოლეიშვილმა „იმედინიუსთან“ განაცხადა.

„როდესაც პატიმარი მოჰყავთ კლინიკაში კონკრეტული კვლევის ჩასატარებლად და ჯანმრთელობის მდგომარეობის დასადგენად, მე მას ხელს არ ვართმევ, ახლოს არ ვეკარები, მივესალმები და ვზივარ იქ, სადაც ბადრაგია და გამორიცხულია თუნდაც ცალკე დაველაპარაკო. ეს წესია ასეთი. ციხეში როცა შედიხარ გჩხრეკენ, გამოდიხარ და გჩხრეკენ. იქიდან თუნდაც ერთი ნაგლეჯი ფურცელი გამოიტანო, ერთი სიტყვაც რომ ეწეროს, ეს უკვე არის დანაშაული. ეს დაუშვებელია. მითუმეტეს ფრჩხილის ან თმის გამოტანა დაუშვებელია. ჩვენ ხომ ვიცით ეს რისთვის გამოიტანეს?! მოწამვლაზე ჰქონდათ პირდაპირ აქცენტი. მათ დაარღვიეს სისხლის სამართლის საპროცესო კოდექსის ნორმები.

ექსპერტის თქმით, ნიმუშის აღებასა და ტრანსპორტირებას თავისი წესი აქვს.

„პატიმრის ოთახიდან თუ რამე გამოგაქვს, ეს არის სერიოზული კანონდარღვევა, რაც ისჯება. ნებისმიერ ქართველ ადვოკატს, ექსპერტს ან ექიმს რომ ეს გაეკეთებინა დღეს უკვე ციხეში იჯდებოდა და სამართლიანად იქნებოდა დასჯილი. პოლონეთში ნებისმიერ ქართველ ან პოლონელ ექიმს, ადვოკატს თუ ექსპერტს ეს რომ გამოეტანა ჩუმად და არაოფიციალურად, რა თქმა უნდა, ციხეში იჯდებოდა. ეს ყველგან დასჯადია. წინდაში შენახვის ჩვევა მაქვსო, პატარა ბავშვები და იდიოტები ხომ არ ვართ?! შენ შეხვედი პატიმართან, იცი პასუხისმგებლობა და იცი, რომ იქიდან არაფერი უნდა გამოიტანო უნებართვოდ. როდესაც ამას არღვევ ეს არის დანაშაული. რა მიზნით მიგქონდა ამას მნიშვნელობა არ აქვს. უსირცხვილო ტოქსიკოლოგები ამტკიცებდნენ, რომ სააკაშვილი მოწამლულია. თან ჩააგდეს რადიოაქტიური ნივთიერებების თემა. პოლიტიკურ საკითხებში ძალიან უყვართ პოლონიუმი, მოდაშია და უკავშირებენ რატომღაც რუსებს. პოლონიუმზე ყველას აქვს წვდომა და რუსების ხელწერა რატომ ჰგონიათ არ ვიცი. სააკაშვილი არ არის წმინდანი, რომ მისი წმინდა ნაწილები აეღოთ სალოცავად. რა თქმა უნდა, ერთხელ ჩაშლილი მოწამვლის გეგმა მეორდებოდა ახლაც“, – აღნიშნა ნიკოლეიშვილმა.

მისი განცხადებით, აღებული ნიმუშების მალულად გამოტანა იმ გეგმის გაგრძელებაა, რომელიც ამერიკელებს არ გამოუვიდათ.

„ოფიციალურად იყო აღებული ნიმუშები და არაოფიციალურად გაჰქონდათ. როდესაც გაქვს თმისა და ფრჩხილის ნიმუში, ძალიან მარტივია მასზე მანიპულაციის ჩატარება, ანუ დატანა ნებისმიერი ნივთიერების. ეს არის იმ გეგმის გაგრძელება, რომელიც ამერიკელებს არ გამოუვიდათ“, – განმარტა მაია ნიკოლეიშვილმა.

პოლონელი ექიმის ქცევა იყო როგორც ეთიკურ, ასევე სამედიცინო-სამართლებრივ ნორმებთან სრულიად შეუსაბამო და გაუგებარი, – ამის შესახებ საქართველოს იუსტიციის მინისტრმა, რატი ბრეგაძემ ჟურნალისტებს განუცხადა.

ჟურნალისტებმა რატი ბრეგაძეს კითხვა დაუსვეს: „კადრები ნანახი გაქვთ, ხედავდა თუ არა სააკაშვილი, რომ მისი ნიმუშების მოპარვა ხდებოდა, თუ ეს ყველაფერი მისგან მალულად მოხდა?“ რაზეც იუსტიციის მინისტრმა აღნიშნა, რომ გარკვეულ დეტალებზე საუბარი შეგნებულად არ სურს.

„მე რა დავინახე, ამას არ აქვს თქვენთვის არსებითი მნიშვნელობა. მე რომ მდომოდა ამის შესახებ საუბარი და მდომოდა, ეს ინფორმაცია გამხდარიყო საჯარო, მაშინ ჩვენ ვაჩვენებდით კადრებს, ამის არავითარი პრობლემა არ არის. აქ იყო ნიმუშის აღების პროცესი და ხედავდა თუ არა მსჯავრდებული სააკაშვილი კონკრეტულად ამ ნიმუშის აღებას, რა თქმა უნდა, ხედავდა, მაგრამ გატანის მცდელობის ფაქტზე ამ ეტაპზე ჯერჯერობით ვერ გეტყვით“, – განაცხადა ბრეგაძემ.

მისივე თქმით, პოლონელმა ექიმმა ნამდვილად დაადასტურა, რომ წინდის მეშვეობით ცდილობდა მსჯავრდებულ სააკაშვილისგან აღებული ნიმუშის გატანას.

„არ მინდა დეტალებზე საუბარი, რა სახის ნიმუში იყო. ეს იყო სამედიცინო პროცედურა და დეტალებში არ შევალ. თუმცა, რა შეიძლებოდა, განთავსებულიყო ხელსახოცში და ჩატეულიყო წინდაში, ალბათ უჩემოდაც მიხვდებით. ჩვენ დავრჩით ჩვენ მიერ გაცემული პირობის ერთგული, თუმცა მეორე მხრიდან, სამწუხაროდ, ვიხილეთ სრულიად გაუგონარი ქმედება, რაც არ ჯდება არცერთ ეთიკურ და სამართლებრივ ნორმაში. შესაბამისად, ნებისმიერი გადაწყვეტილება, რომელიც შეიძლება, დაკავშირებული იყოს სხვა ექიმების შესვლასთან, რა თქმა უნდა, ჩვენ მიერ ბევრად უფრო დეტალურად იქნება ამიერიდან განხილული.

ამასთან, კონკრეტულ ექიმს რაც შეეხება, თქვენთვის ცნობილია, რომ ჩვენ მივმართეთ საგარეო საქმეთა სამინიტროს, რომ მოესმინათ პოლონეთის საელჩოდან მიეღოთ ინფორმაცია. როგორც იცით, დღეს იმყოფებოდა საელჩოს წარმომადგენელი საქართველოს საგარეო სამინისტროში და შემდგომში როგორც საზოგადოებისთვის არის ცნობილი, პოლონელი დიპლომატი არ არის ინფორმირებული ექიმის ამგვარი ქცევის მიზეზების შესახებ, რაც კიდევ უფრო მეტად გაუგებარს და ბუნდოვანს ხდის პოლონელი ექიმის მსგავს ქცევას“, – აღნიშნა რატი ბრეგაძემ.

რატი ბრეგაძის თქმით, გამოძიების დაწყებაზე გადაწყვეტილებას მიიღებს შესაბამისი ორგანო, იმ შემთხვევაში, თუ საჭირო იქნება.

ნიმუშების ჩანაცვლების ეჭვი როცა ჩნდება, უნდა ვიფიქროთ იმაზეც, რომ ოფიციალურ ნიმუშებსაც გარკვეული საფრთხე ემუქრება, მივმართავ პოლონეთს, საგანგებო კონტროლი დააწესოს დალუქული ნიმუშების გახსნის და ლაბორატორიაში ჩაბარების პროცესზე, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკი კლინიკა „ვივამედში“ 14 ივლისს მომხდარ ინციდენტს გამოეხმაურა.

„ერთადერთი, რაზეც შეიძლება ვიფიქროთ, არის ის, რომ პოლონელ ექიმს ე.წ. მარცხენა ეგზემპლიარები ჰქონოდა, რათა ჩაენაცვლებინა ის, რაც ოფიციალურად აიღეს და გადაეცათ ლაბორატორიისთვის. რასაკვირველია, ნიმუშების ოფიციალური გადაცემა საკმაოდ სერიოზულ კონტროლს ექვემდებარება. როცა მისი ჩანაცვლების ეჭვი ჩნდება, უნდა ვიფიქროთ იმაზეც, რომ ოფიციალურ ნიმუშებსაც გარკვეული საფრთხე ემუქრება. მივმართავ პოლონეთს, რომ საგანგებო კონტროლი დააწესოს დალუქული ნიმუშების გახსნის და ლაბორატორიაში კანონიერად ჩაბარებულ პროცესზე. როცა პარტიზანულად აღებული ნიმუშის თემა შემოდის, რასაკვირველია, ეს იძლევა საფუძველს, რომ ამ ნიმუშების გაყალბების წინაპირობა იქმნებოდა. პოლონელმა ექიმმა წარმოუდგენელი აქცია ჩაატარა, რაც მიუთითებს საშიშროებაზე, რომ შეიძლება, ოფიციალურად აღებული ნიმუშიც საფრთხის ქვეშ დადგეს“, – აღნიშნა გია ვოლსკიმ.

სპეციალურმა პენიტენციურმა სამსახურმა 14 ივლისს მიხეილ სააკაშვილთან პოლონელი ექიმების ვიზიტის შესახებ განცხადება გაავრცელა, სადაც აღნიშნულია, რომ მსჯავრდებულ სააკაშვილისგან აღებული ნიმუში ერთ-ერთმა პოლონელმა ექიმმა ქაღალდში გადაახვია და ფეხსაცმლის მეშვეობით ცდილობდა მის მალულად გატანას. პენიტენციურმა სამსახურმა ინციდენტის ამსახველი კადრებიც გაავრცელა. ამასთან, გუშინ საქართველოს იუსტიციის მინისტრმა, რატი ბრეგაძემ სოციალურ ქსელში დაწერა, რომ პოლონელმა ექიმმა ჩამორთმეულ ახსნა-განმარტებაში თავად დაადასტურა მიხეილ სააკაშვილისგან აღებული ნიმუშის წინდაში განთავსებისა და გატანის მცდელობის ფაქტი. პოლონელ მედიკოსთან დაკავშირებული ინციდენტის გამო დღეს საქართველოს საგარეო საქმეთა სამინისტროში იმყოფებოდა პოლონეთის ელჩის მოვალეობის შემსრულებელი.