ასეთ მძიმე მომენტებში მნიშვნელოვანია სოლიდარობა და გვერდში დგომა. გვერდში უნდა დავუდგეთ დაღუპულთა ოჯახებს, უნდა ვუგულშემატკივროთ ჩვენს მაშველებს, რომ სამაშველო ღონისძიებები იმ პროფესიონალიზმით განახორციელონ, რომელიც მათ აქვთ, – ამის შესახებ საქართველოს პარლამენტის თავმჯდომარე, შალვა პაპუაშვილმა ჟურნალისტებს განუცხადა.

მისივე თქმით, ასეთი დიდი კატასტროფის შემდეგ მაშველებმა 210 ადამიანი უვნებლად გამოიყვანეს.

„გამოჩნდებიან ახალ-ახალი ექსპერტები, როგორ უნდა იყოს წარმოებული სამაშველო საქმიანობა და ა.შ. ვაცალოთ პროფესიონალებს. ისინი მუშაობენ და ხედავთ, როგორ წარმატებულადაც. ასეთი დიდი კატასტროფის შემდეგ 210 ადამიანი უვნებლად გამოიყვანეს. მნიშვნელოვანია, ჩვენს მაშველებს ვენდოთ. ადამიანები, რომლებიც გადმოიყვანეს სტიქიის ზონიდან, დაბინავებული არიან და უზრუნველყოფილი შესაბამისი საშუალებებით. მათთან კომუნიკაციაში არიან ჩვენი სამაშველო სამსახურები. ყველანაირად უნდა ვუგულშემატკივროთ ჩვენს მაშველებს, რომ რაც შეიძლება სწრაფად წაიწიონ წინ“, – განაცხადა შალვა პაპუაშვილმა.

მინდა, გამოვხატო ჩემი ღრმა მწუხარება იმ ტრაგედიის წინაშე, რაც დატრიალდა გუშინ ღამე და დღეს. მინდა, მივუსამძიმრო დაღუპულთა ოჯახებს და მინდა, იმ ოჯახებთან ერთად ვილოცო, ვინც ჯერ კიდევ ელოდება, რომ დაკარგული ადამიანები აღმოჩნდნენ ცოცხლები, – ამის შესახებ საქართველოს პრეზიდენტმა, სალომე ზურაბიშვილმა განაცხადა.

როგორც სალომე ზურაბიშვილმა აღნიშნა, ეს ტრაგედია არის ქვეყნისთვის, სრულიად საქართველოსთვის დიდი ტრაგედია, რომელსაც იზიარებს ყოველი ჩვენი მოქალაქე.

„ჩვენ ვიცით ტრაგედიის წინაშე გაერთიანება და დღეს სწორედ ეს არის ყველაზე მნიშვნელოვანი, რომ ჩვენ გავერთიანდეთ, რათა ყველა ჩვენი შესაძლებლობით დავეხმაროთ იმ ადამიანებს, რომ გადალახონ ეს გაუსაძლისი პერიოდი მათი ცხოვრების. მინდა, მადლობა გადავუხადო ყველა იმ მაშველს, ყველა იმ მოქალაქეს, რომლებმაც ადგილზე ყველაფერი გააკეთეს რაც შეეძლოთ, რათა გადარჩენილიყვნენ სტიქიის ზონაში ჩარჩენილი ადამიანები. მინდა, ასევე ვთქვა, რომ ჩემი ადმინისტრაცია და მე, პირადად ვუცხადებთ სოლიდარობას ადგილობრივ ხელმძღვანელობას, ხელისუფლებას, ყველა უწყებას, რომელიც იქ არის ჩართული, მთავრობას, დღეს არის დრო ერთიანობის და ერთად ამ ტრაგედიის გადალახვის. მინდა ისიც ვთქვა, რომ ჩემი ადმინისტრაცია და მე, პირადად ყველაფერში ჩავერთვებით, სადაც ჩვენი აქტიურობა საჭირო იქნება. ჩვენ თვითონაც ვნახავთ მომავალ დღეებში, რა კუთხით შეიძლება, ჩვენი როლი და წვლილი შევიტანოთ ამ ტრაგედიის გადალახვაში“, – განაცხადა სალომე ზურაბიშვილმა.

საქართველოს პრეზიდენტმა მაშველებს გაწეული მუშაობისთვის მადლობა გადაუხადა.

„მათი როლი არ დასრულებულა და ძალიან რთული ამ პირობებში მუშაობა. ვიცით, რამდენად შეუძლიათ მათ ამ რთულ პირობებში ყველაფერი გააკეთონ, რათა ადამიანების სიცოცხლე გადაარჩინონ. ასევე, მინდა, მადლობა მოვახსენო ყველა ჩვენ პარტნიორ ქვეყანას, რომელმაც დღეს უკვე გამოაცხადა სოლიდარობა ჩვენს საზოგადოებასთან ერთად და ეს არის ასევე ძალიან მნიშვნელოვანი. მოვისმინე პრემიერისგან, რომ სხვა ქვეყნებისგან დახმარება ჯერ არ არის საჭირო. თუ ეს საჭიროება გამოჩნდა, ასევე მზად ვარ, თუ ჩემი როლი სხვადასხვა ქვეყნის ლიდერებთან დაკავშირებაში საჭირო გახდა, ამაშიც მივიღო მონაწილეობა. ჩვენ ამ ძალიან დიდი ტრაგედიის წინაშე ვართ ერთად და ვიქნებით ერთად“, – განაცხადა სალომე ზურაბიშვილმა.

ევროკავშირის დელეგაცია უსამძიმრებს შოვში გამანადგურებელი მეწყრის შედეგად ტრაგიკულად დაღუპულთა ოჯახებსა და მეგობრებს. ამის შესახებ ნათქვამია საქართველოში ევროკავშირის წარმომადგენლობის მიერ სოციალურ ქსელში გავრცელებულ განცხადებაში.

„საქართველოში ევროკავშირის დელეგაცია სამძიმარს უცხადებს შოვში გამანადგურებელი მეწყრის შედეგად ტრაგიკულად დაღუპულთა ოჯახებსა და მეგობრებს. ჩვენ ყურადღებით ვადევნებთ თვალს მიმდინარე სამაშველო და საევაკუაციო ოპერაციას, ვიმედოვნებთ, სტიქიის ზონაში დაკარგული და ჩარჩენილი ადამიანები უვნებლად დაბრუნდებიან სახლებში“, – ნათქვამია ევროკავშირის დელეგაციის განცხადებაში.

საქართველოს პრემიერ-მინისტრი ირაკლი ღარიბაშვილი და პარლამენტის თავმჯდომარე შალვა პაპუაშვილი ონიდან შოვისკენ მიემართებიან.

ირაკლი ღარიბაშვილმა და შალვა პაპუაშვილმა საგანგებო სიტუაციების მართვის სამსახურის შტაბში თათბირი გამართეს. მათ შტაბის წევრებისგან მიმდინარე სამაშველო სამუშაოებისა და მოქალაქეების საჭიროებების შესახებ ინფორმაცია მოისმინეს.

ისინი შოვში სასაზღვრო ვერტმფრენით გაფრინდებიან და ადგილზე არსებულ ვითარებას გაეცნობიან.