ერევანში ძალოსანთა ევროპის ჩემპიონატზე ლაშა ტალახაძე ატაცში ევროპის ჩემპიონი გახდა.
ლაშა ტალახაძემ 210,217, 222 კილოგრამის დაძლევით ოქროს მედალი მოიპოვა.
“ის სკანდალი და კრიმინალი რაც გახმაურდა BBC-ის დოკუმენტური ფილმით, ძალიან ძნელი იქნება, რომ რამით გადაფარონ”-ლევან ნიკოლეიშვილი
ის სკანდალი და კრიმინალი რაც გახმაურდა BBC-ის დოკუმენტური ფილმის შედეგად კეზერაშვილის შესახებ, ძალიან ძნელი იქნება, რომ რამით გადაფარონ, – ამის შესახებ ექსპერტმა ლევან ნიკოლეიშვილმა „ქრონიკას“ განუცხადა.
„ცხადია, ცდილობენ მისი მსახურები, რომ რამით შეფუთონ და გადაიტანონ ისრები მმართველი პარტიისკენ, ან კონკრეტული ადამიანებისკენ, თითქოს ისინიც არიან გახვეულები, მაგრამ რაც არ უნდა მოხდეს, ის მთავარი დანაშაული არსად ქრება და პასუხისმგებლობა აკისრია მას [კეზერაშვილს]“, – აღნიშნავს ნიკოლეიშვილი.
ე.წ. ქოლცენტრების გახმაურებულ საქმეზე, BBC-ის მიერ მომზადებული სკანდალური ფილმის შემდეგ დავით კეზერაშვილის ფრთამ საქმეში „ქართული ოცნების“ კვალის ძებნა დაიწყო. ეს მას შემდეგ, რაც კეზერაშვილის ტელეკომპანიის ინფორმაციით, ე.წ. ქოლცენტრების საქმეზე ინტერპოლმა, ევროპაში საქართველოს ეროვნული ნაკრების ყოფილი ფეხბურთელი, რატი ალექსიძე დააკავა.
წყაროს ინფორმაციით, საქმე შესაძლოა ფულის თაღლითურად მითვისების საქმეს უკავშირდებოდეს. ალექსიძე თავდაცვის მინისტრის ჯუანშერ ბურჭულაძის ყოფილი ქვისლი და „ფორმულას“ წყაროს ინფორმაციით, თბილისის მერის, კახა კალაძის ახლო მეგობარია
“ვოსორიტიდი“ სიმაღლეში ზრდას უწყობს ხელს – ის გავლენას არ ახდენს აქონდროპლაზიის თანმდევი დაავადებების მკურნალობაზე”-რამაზ ყურაშვილი
ენდოკრინოლოგი, მედიცინის დოქტორი რამაზ ყურაშვილი ამბობს, რომ „ვოსორიტიდი“ სიმაღლეში ზრდას უწყობს ხელს, თუმცა, გავლენას არ ახდენს აქონდროპლაზიის თანმდევი დაავადებების მკურნალობაზე. მისი განცხადებით, გასათვალისწინებელია ისიც, თუ რა გართულებები შეიძლება გამოიწვიოს წამალმა, გრძელვადიან პერსპექტივაში.
„ეს გენეტიკური დაავადებაა და ახასიათებს ზრდაში ჩამორჩენა, კიდურები არ იზრდება. ინტელექტუალურად მათ არავითარი ჩამორჩენა არ აქვთ. ამ ყველაფრის მოვლას ძალიან დიდი ცოდნა უნდა და არც ერთი ნაბიჯი არ უნდა გადავდგათ სწრაფად. მითუმეტეს, ეს დაავადება ადამიანებს არ კლავს. ამიტომ, ფორსირება იმისა, რომ მაინც და მაინც ხვალ დავიწყოთ, არ იქნება სწორი. ამ წამალს დაახლოებით 11 სხვადასხვა სიმპტომი აქვს. კლინიკური სიმპტომი იწყება თავბრუსხვევით. გაუზომავენ წნევას, წნევა დავარდნილია. სამი მარეგულირებელი ფიზიოლოგიურად ნორმალური ორგანო ზიანდება ამ წამლისგან რაღაც მომენტებში, შეიძლება, ძვლები არაპროპორციულად გაიზარდოს, შეიძლება, ორგანოებმა არაპროპორციულად დაიწყონ გაზრდა ან ფუნქციონირება. ყველაფერი ეს უნდა გავითვალისწინოთ, არ უნდა ვიჩქაროთ“, – განაცხადა რამაზ ყურაშვილმა, რომლის კომენტარიც ჯანდაცვის სამინისტრომ გაავრცელა.
ჯანდაცვის სამინისტროს განცხადებით, თუ მიმდინარე წლის სექტემბრისთვის, ევროკავშირის წევრი რამდენიმე ქვეყანა მაინც აიღებს პასუხისმგებლობას და სახელმწიფო ბიუჯეტიდან დააფინანსებს აქონდროპლაზიის ახალშექმნილ სამკურნალო მედიკამენტ „ვოსორიტიდს“, საქართველო იქნება მსოფლიოში ერთ-ერთი მოწინავე, რომელიც ამ პასუხისმგებლობას გაიზიარებს და წამლის შესყიდვისთვის საჭირო პროცედურებს დაიწყებს.
მათვე ცნობით, ძალაშია ჯანდაცვის სამინისტროს კიდევ ერთი დაპირება – აქონდროპლაზიის დიაგნოზის მქონე ბავშვებისთვის, სხვა თანმდევი დაავადებების დიაგნოსტიკასა და მკურნალობას, როგორც საქართველოში, ისე საზღვარგარეთ, სახელმწიფო დააფინანსებს
“ქოლცენტრები ნამდვილად არის თაღლითური სქემა, თუმცა ეჭვქვეშ ვაყენებ ხელისუფლების პოლიტიკურ ინტერესს”-პაატა მანჯგალაძე
„სტრატეგია აღმაშენებლის“ წევრის პაატა მანჯგალაძის განცხადებით, დავით კეზერაშვილი თუ დამნაშავეა, ბრიტანული სამართალდამცავი ორგანოები ამას გაარკვევენ. მისივე თქმით, ქოლცენტრები ნამდვილად არის თაღლითური სქემა, თუმცა დამაჯარებელი არ არის, რომ ხელისუფლებას ქოლცენტრების მუშაობის შესახებ არ სცოდნოდა.
აქედან გამომდინარე, პაატა მანჯგალაძე აღნიშნავს, რომ ეჭვქვეშ აყენებს არა „ბიბისის“ ჟურნალისტურ გამოძიებას, არამედ საქართველოს ხელისუფლების პოლიტიკურ ინტერესს.
„კეზერაშვილთან პირდაპირი სამხილი არავის დაუდია. საუბარია, რომ საქართველოში არსებულ იმ ოთხ ადამიანს (მათ უდანაშაულობის პრეზუმფციასაც არ ვარღვევ, არ ვიცი, ის ხალხი ვინ არის, არც ვიცნობ) რაღაც ეტაპზე შეიძლება, კეზერაშვილი იცნობდა კიდეც და ურთიერთობაც ჰქონდა ამ ხალხთან, მაგრამ ეს ადამიანები, როგორც მაქვს ინფორმაცია, შემდეგ უფრო დაუახლოვდნენ „ქართული ოცნების“ მაღალჩინოსნებს, საუბარია ფარცხალაძეზე, მამაცაშვილზე, ეჭვების დონეზე გეუბნებით. კეზერაშვილი თუ არის დამნაშავე, ბრიტანული სამართალდამცავი ორგანოები არ დააკლებენ ამას ხელს, ჩვენ მაგაზე არ ვინერვიულოთ. ჩვენ ვინერვიულოთ იმაზე, საქართველოში რომ არსებობდა ქოლცენტრები, ვინ მფარველობს და ვინ იყო ამ ყველაფრის უკან. ჩემს ვერსიას გეუბნებით. ეჭვქვეშ არ ვაყენებ „ბიბისის“, ეჭვქვეშ ვაყენებ ხელისუფლების პოლიტიკურ ინტერესს – კეზერაშვილის გარემოცვა იყო და საქართველოში ისე მუშაობდა ქოლცენტრები, რომ ვერაფერი გავიგეთ. შეიძლება ქვეყანაში ამუშაო ქოლცენტრი ისე, რომ ხელისუფლებამ არაფერი იცოდეს?
სასწაული ამბავია, კეზერაშვილი წირავს თავის მეგობარს, რომელიც არის ბურჭულაძის, თავდაცვის მინისტრის ყოფილი ქვისლი, დაახლოებულია „ქართულ ოცნებასთან“. როგორ იმუშავებს ქოლცენტრი ქვეყანაში ხელისუფლების ჩართულობის გარეშე? – ქოლცენტრს კი არა, ზარს რომ ვაკეთებდით საერთო ჩათში, იქ ჩაგვინერგა სუს-მა აგენტი და ყოველდღე რასაც ვამბობდით, დანოსები აქვთ დაწერილი ამაზე. 1 000 კაცში ტრეფიკი 24-საათიანი თაღლითური სქემით ირეკებოდა უცხოეთში და არ იცოდა ხელისუფლებამ?“, – განაცხადა პაატა მანჯგალაძემ.
მთავრობის ადმინისტრაციასთან აქციას დიაბეტის მქონე ბავშვების მშობლები შეუერთდნენ
აქონდროპლაზიის დიაგნოზის მქონე ბავშვების მშობლების პროტესტს მთავრობის ადმინისტრაციასთან დიაბეტის მქონე ბავშვების მშობლები შეუერთდნენ, რომლებიც აცხადებენ, რომ სრულ მხარდაჭერას უცხადებენ მათ მოთხოვნებს.
შეგახსენებთ, აქონდროპლაზიის მქონე ბავშვების მშობლები პრემიერ-მინისტრ ირაკლი ღარიბაშვილთან შეხვედრას ითხოვენ. მშობლების განცხადებით, წამალი ვოსორიტიდი, რომლის ერთწლიანი დოზა დაახლოებით 200 000 დოლარი ჯდება, საქართველოში სულ 16 ბავშვს სჭირდება. წელიწად-ნახევარია, აქონდროპლაზიის სამკურნალო მედიკამენტის დაფინანსებას მოითხოვენ.
„ჩვენ, დიაბეტიანი ბავშვების მშობლები სრულ მხარდაჭერას ვუცხადებთ აქონდროპლაზიის მქონე ბავშვების მშობლებს, რომლებიც ითხოვენ პრეპარატ ვოზორიდიტს, რომელიც სასიცოცხლოდ მნიშვნელოვანია მათი შვილებისთვის. ჩვენ მათი ძალიან კარგად გვესმის იმიტომ, რომ ჩვენც და ჩვენი შვილებიც უგულებელყოფილები ვართ ჯანდაცვის სისტემის მხრიდან, ჩვენც იგივეს გავდივართ, რასაც ეს მშობლები, რადგან პროგრამულად ვერაფერს ვერ ვიღებთ, რაც ჩვენს შვილებს ეკუთვნით“, – განუცხადა ჟურნალისტებს დიაბეტის მქონე ერთ-ერთი ბავშვის მშობელმა.
რა არის აქონდროპლაზია
აქონდროპლაზია არის იშვიათი გენეტიკური დაავადება, რომელიც შესაძლოა, განუვითარდეთ ამ გენის მქონე ბავშვების 80%-ს. დაბადებისას სიმაღლე ნორმალურია. დროთა განმავლობაში ჩნდება ჩონჩხის სისტემაში დარღვევები, ბავშვი იწყებს თავის თანატოლებთან შედარებით სიმაღლეში ჩამორჩენას. მათ ტანი ნორმალური აქვთ, ხოლო ხელები და ფეხები მოკლე.
აქონდროპლაზია დაავადებაა, რომელიც ავტოსომურ დომინატური გზით გადადის.
ავტოსომური დომინანტური ნიშნავს: დაავადება გადადის არასასქესო ქრომოსომით და თუ დაავადება აქვს ერთ-ერთ მშობელს მაინც, არსებობს 50%-იანი გარანტია, იმისა რომ მათი შვილიც დაავადდეს.
,,პატრიარქის ჯანმრთელობის მდგომარეობა დამაკმაყოფილებელია”- ცისანა შარტავა
სრულიად საქართველოს კათოლიკოს-პატრიარქის პირადი ექიმი, ცისანა შარტავა აცხადებს, რომ ილია მეორის ჯანმრთელობის მდგომარეობა დამაკმაყოფილებელია.
როგორც ექიმმა საქართველოს პირველ არხს განუცხადა, პატრიარქის ჯანმრთელობის მდგომარეობა სტაბილურია.
„სავსებით დამაკმაყოფილებელი მდგომარეობაა, არანაირი სასწრაფო არასდროს არ ყოფილა გამოძახებული, ასეთი ფაქტი არ ყოფილა არცერთხელ. არასდროს დაგვჭირვებია სასწრაფოს გამოძახება, რაც მე ვიცი, 23 წლის მანძილზე. სტაბილურად გრძნობს თავს, მუდმივად არის კვალიფიციური ექიმების მეთვალყურეობის ქვეშ“, – განაცხადა შარტავამ.
კაცს, რომელმაც თუშეთში მეზობელი მოკლა, ბრალი წარუდგინეს
საქართველოს პროკურატურის ცნობით, ახმეტის მუნიციპალიტეტში მომხდარი განზრახ მკვლელობის ფაქტზე ერთ პირს ბრალდება წარუდგინეს.
უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ 20 აპრილს, ახმეტის მუნიციპალიტეტის სოფელ ჭეშოში, ურთიერთშელაპარაკების ნიადაგზე ბრალდებულმა სანადირო თოფიდან გასროლით თანასოფლელს დაზიანებები მიაყენა. მიყენებული დაზიანებების შედეგად დაზარალებული ადგილზე გარდაიცვალა.
სამართალდამცველებმა დანაშაულის ჩამდენი პირი იმავე დღეს დააკავეს. მას ბრალდება საქართველოს სისხლის სამართლის კოდექსის 108-ე მუხლით (განზრახ მკვლელობა,) წარედგინა, რაც სასჯელის სახედ და ზომად 10-დან 15 წლამდე თავისუფლების აღკვეთას ითვალისწინებს.
პროკურატურამ ბრალდებულისთვის აღკვეთის ღონისძიების სახით, პატიმრობის გამოყენების მოთხოვნით, თელავის რაიონულ სასამართლოს უკვდ მიმართა.
შეგახსენებთ, მკვლელობა სოფელ ჭეშოში 19 აპრილს მოხდა. მოკლულია 40 წლის ნოდარ ნეკერაული. დანაშაულში ბრალდებულია მისივე თანასოფლელი ჯაბა ქააძე.
ძლიერი წვიმა, სეტყვა და ელჭექი – ამინდი იცვლება
23 აპრილს დღის ბოლოდან აღმოსავლეთ საქართველოს მთიან და მაღალმთიან რეგიონებში, ხოლო 24 აპრილს დღის ბოლოდან დასავლეთ საქართველოშიც 25 აპრილის დილამდე მოსალოდნელია წვიმა, ზოგან ძლიერი, შესაძლებელია ელჭექი და სეტყვა, – . ამის შესახებ გარემოს ეროვნული სააგენტოს მიერ გავრცელებულ ინფორმაციაშია ნათქვამი.
„მოსალოდნელმა ძლიერმა ნალექებმა შესაძლებელია საქართველოს მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, მთიან ზონებში მეწყრული პროცესების ჩასახვა-გააქტიურება, ხოლო მაღალმთიან რეგიონებში ზოგან ზვავების ფორმირება გამოიწვიოს”, – აღნიშნულია ინფორმაციაში.
ოთხი ქართველი მოსამართლე აშშ-ში გაემგზავრა
რამდენიმე ქართველი მოსამართლე ამერიკის შეერთებულ შტატებში გაემგზავრა. ამის შესახებ მოსამართლე ეკა არეშიძის Facebook „პოსტიდან“ გახდა ცნობილი. არსებული ინფორმაციით, მასთან ერთად შეერთებულ შტატებში გაემგზავრნენ მოსამართლეები: ლევან დარბაიძე, თამარ ჩიხლაძე და ნინო ელიეშვილი.
აღსანიშნავია, რომ ნინო ელიეშვილი იმ ხუთი მოსამართლის თავდაპირველ შემადგენლობაში იყო, რომლებიც აშშ-ში სასწავლო ვიზიტით უნდა გამგზავრებულიყვნენ, თუმცა, მას შემდეგ, რაც ამერიკის სახელმწიფო დეპარტამენტმა კორუფციაში მონაწილეობის ბრალდებით ლევან მურუსიძეს, მიხეილ ჩინჩალაძეს, ირაკლი შენგელიას და ვალერიან ცერცვაძეს სანქციები დაუწესა და ქვეყნის ტერიტორიაზე შესვლა აუკრძალა, ოთხმა მოსამართლემ აშშ-ში დაგეგმილ ვიზიტზე უარი თქვა. არსებული ცნობით, სწორედ ლევან დარბაიძემ, თამარ ჩიხლაძემ და ნინო ელიეშვილმა ჩაანაცვლეს ისინი.
შტატებში ქართველი მოსამართლეების გამგზავრებას სოციალური ქსელის საშუალებით გამოეხმაურა იუსტიციის უმაღლესი საბჭოს ყოფილი წევრი ნაზი ჯანეზაშვილი. მისი თქმით, პატივისცემას იმსახურებენ ის მოსამართლეები, რომლებიც ოთხი მოსამართლის უარის შემდეგ დათანხმდნენ ვიზიტს.
„არ შემიძლია, არ გამოვეხმაურო მოსამართლეების მიმდინარე სასწავლო ვიზიტს აშშ-ში. მოსამართლის ნებისმიერი საჯარო ნაბიჯი თუ გადაწყვეტილება მის მიმართ ნდობაზე აისახება და მიუთითებს, არის თუ არა მედეგი. როგორც იცით, რამდენიმე ხნის წინ მოსამართლეების ნაწილმა უარი თქვა სასწავლო ვიზიტში მონაწილეობაზე (5-დან 4-მა), შესაბამისად აღნიშნულმა აქტმა, ამ კონტექსტში, დატოვა განცდა, რომ ეს იყო არა დამოუკიდებელი გადაწყვეტილება, არამედ ზემოქმედების შედეგი.
ასეთ დროს ჩნდება კითხვა: მოსამართლეს, რომელსაც არ შეუძლია დამოუკიდებლად გადაწყვიტოს, მიიღებს თუ არა სასწავლო პროგრამაში მონაწილეობას; ის როგორ შეძლებს განაჩენის გამოტანას დამოუკიდებლად იმ შემთხვევაში, თუ მასზე პოლიტიკურ, შიდა ან სხვა სახის ზეგავლენას ექნება ადგილი?
ამჟამად სასწავლო ვიზიტით აშშ-ში იმყოფება რამდენიმე მოსამართლე. მათ შორისაა ქალბატონი ნინო ელიეშვილი. როგორც ჩანს, ის არ დაემორჩილა კლანურ წესებს და ფსევდო სოლიდარობის აქტში არ მიიღო მონაწილეობა. გარდა ამისა, პატივისცემას იმსახურებენ ის მოსამართლეები, რომლებმაც 4 მოსამართლის უარის შემდეგ დათანხმდნენ ვიზიტს.
მოსამართლეების ეს გადაწყვეტილება მათ მედეგობაზე მიუთითებს.
განსაკუთრებით ახლა, მოსამართლეების მიმართ ამ ინტენსიური ხელისუფლების განცხადებებისა და საპარლამენტო უმრავლესობის ე.წ. პოლიტიკური სოლიდარობის ფონზე“, – წერს ნაზი ჯანეზაშვილი Facebook-ზე.
23 აპრილი წიგნის საერთაშორისო დღეა – საინტერესო ფაქტები
დღესასწაულს საფუძველი 1923 წლის 23 აპრილს კატალონიაში ჩაეყარა. ძველისძველი კატალონიური ტრადიციის მიხედვით, ერის მფარველი წმინდანის, წმინდა გიორგის სახელობის დღეს ბარსელონელები და ქალაქის ირგვლივ მცხოვრებნი ერთმანეთს ვარდებს ჩუქნიდნენ.
იმ დღეს მებაღეებსა და ვარდების გამყიდველებს უამრავი მყიდველი ჰყავდათ. წიგნით მოვაჭრეთა გილდიას ეს ფაქტი ძალიან მოეწონათ და 1923 წლის 23 აპრილს, წმინდა გიორგისა და ვარდების სახალხო დღესასწაულზე, მათ კატალონიაში მცხოვრებლებს ვარდებთან ერთად წიგნებიც აჩუქეს.
მართალია, დღესასწაულის დაარსებას წიგნების გაყიდვის იდეა უძღოდა წინ, მაგრამ ამ ფაქტს რომ ხალხი არ გაეღიზიანებინა გილდიის წარმომადგენლებმა გაიხსენეს, რომ 1616 წლის 23 აპრილი მიგელ სერვანტესის და უილიამ შექსპირის გარდაცვალების დღეცაა…
23 აპრილს კატალონიელები დაახლოებით 4 მილიონ ვარდს ყიდულობდნენ და ამავე დროს, ყოველწლიურად გაყიდული წიგნების 10 პროცენტი 23 აპრილზე მოდიოდა.
1995 წელს კატალონიამ იუნესკოს ამ დღესასწაულის შესახებ მოახსენა, მის ინიციატივას გამომცემელთა საერთაშორისო ასოციაციაც შეუერთდა და გენერალური კონფერენციის გადაწყვეტილებით, 23 აპრილი მსოფლიო წიგნის დღედ გამოცხადდა.
იუნესკოს გადაწყვეტილება მსოფლიომ დიდი ენთუზიაზმით მიიღო. განსაკუთრებით აქტიური ორი ქვეყანა გამოდგა: ნიდერლანდები, სადაც ამ დღესასწაულს “თეთრი წიგნის კვირეულით” აღნიშნავენ და დიდი ბრიტანეთი, სადაც “წიგნის მსოფლიო დღე” დიდ დღესასწაულად იქცა.
წიგნის დღეს ზეიმობენ ავსტრალიაში, კანადაში, ესპანეთში, საბერძნეთში, შვედეთში, იტალიაში, საფრანგეთში, შვეიცარიაში, სპილოს ძვლის სანაპიროზე, მოზამბიკში, პუერტო რიკოში, კუბაზე, საქართველოში…
2003 წლიდან „წიგნის დღე“ ჩვენს ქვეყანაშიც აღინიშნება.
ინდონეზიაში ორი ძლიერი მიწისძვრა მოხდა
ევროპის ხმელთაშუა ზღვის სეისმოლოგიური ცენტრის ცნობით, ინდონეზიაში ერთმანეთის მიყოლებით ორი ძლიერი მიწისძვრა მოხდა. არსებული ინფორმაციით, ქვეყანაში თავდაპირველად 6.1 მაგნიტუდის სიმძლავრის მიწისძვრა მოხდა, რასაც კიდევ ერთი, 5.8 მაგნიტუდის სიმძლავრის ბიძგები მოჰყვა.
აღსანიშნავია, რომ ორი დღით ადრე, 6-ბალიანი მიწისძვრა მოხდა ინდონეზიის სიახლოვეს, მოლუკის ზღვის რეგიონში.
მიწისძვრის შედეგად ნგრევისა და მსხვერპლის შესახებ პირველადი ინფორმაცია არ გავრცელებულა და მნიშვნელოვანი ზარალი ნაკლებად სავარაუდოა. შეიძლება რამდენიმე საათი დასჭირდეს, სანამ ხელისუფლება შეძლებს ზიანის ყოვლისმომცველი შეფასებას, განსაკუთრებით შორეულ რაიონებში. უახლოეს დღეებში მოსალოდნელია მსუბუქი და ზომიერი ბიძგები. მოვლენას არ მოჰყოლია ცუნამის გაფრთხილება.
ოფიციალურმა პირებმა შეიძლება დროებით დახურონ სატრანსპორტო ინფრასტრუქტურა მიწისძვრის ზონაში ზიანის შესამოწმებლად. მცირე შეფერხებები შეიძლება მოხდეს გამორთვის დროს, მაგრამ სერვისი, სავარაუდოდ, სწრაფად განახლდება, თუ დაზიანება არ არის ნაპოვნი. შესაძლებელია კომუნალური გათიშვა, განსაკუთრებით მიწისძვრის ეპიცენტრთან ახლოს.
თბილისის რამდენიმე ქუჩას წყალმომარაგება შეეზღუდა
თბილისის ზოგიერთ ქუჩას წყალმომარაგება შეეზღუდა. ინფორმაციას ამის შესახებ კომპანია gwp ავრცელებს.
განცხადების მიხედვით:
გლდანის რაიონში, გმირ კურსანტთა ქ. 3 შეს. N 16 თან, წყალსადენის ქსელზე დაზიანების აღდგენითი სამუშაოების ჩატარების მიზნით 04:00-დან 12:00-მდე. წყალმომარაგება შეუწყდება:
გმირ კურსანტთა ქ.საბურთალოს რაიონში, ჟიული შარტავას ქ. N 18ა თან, წყალსადენის ქსელზე დაზიანების აღდგენითი სამუშაოების ჩატარების მიზნით 03:40-დან 12:00-მდე. წყალმომარაგება შეუწყდება:
ჟიული შარტავას ქ. N16 N18.ჩუღურეთის რაიონში, გოგი დოლიძის ქ. N 5 თან, წყალსადენის ქსელზე დაზიანების აღდგენითი სამუშაოების ჩატარების მიზნით 03:10-დან 12:00-მდე. წყალმომარაგება შეუწყდება:
გოგი დოლიძის, ფიროსმანის და გოგოლის ქუჩებს.