,,ცალ-ცალი “კალოშით” მოსული ადამიანები დაეპატრონნენ დიდძალ ქონებას”- ვაშაძე

12:03 - 10/09/2023

მივმართავ ღარიბაშვილს – ინამუსე და წადი, გეყო რაც ძარცვე ეს ქვეყანა, წადი და შეეშვი ამ ქვეყანას, შეეშვი საქართველოს , – ამის შესახებ “სტრატეგია აღმაშენებლის” ლიდერმა გიორგი ვაშაძემ ბრიფინგზე განაცხადა.

მისივე თქმით, პრემიერ მინისტრი ირაკლი ღარიბაშვილი არის სახე იმ სისტემის, რომელიც ბიძინა ივანიშვილმა ჩამოაყალიბა.

“გუშინ, ნოდარ მელაძის გადაცემაში ჩვენ ვნახეთ, რა დონეზეა გახრწნილი სისტემა. გახრწნილობის პიკი შეიძლება ვუწოდოთ იმ ჩარტერების სკანდალს, რომელიც ჩვენ ვიხილეთ. პრემიერ მინისტრი, რომელსაც არ სცალია შოვისთვის, გურიაში სტიქიით დაზარალებული ადამიანებისთვის, პირდაპირ საბოტაჟშია ევროკავშირში ინტეგრაციის პროცესთან, თავისი პირადი მიზნებისთვის იყენებს სახელმწიფო ხარჯებს და იმ ხალხის გადასახადებს, რომლისთვისაც უნდა ეშველათ, როდესაც შოვის ტრაგედიაში მძიმე ვითარებაში იყვნენ.

ეს არ არის ის საქართველო, რომელიც ჩვენ გვინდა, რომ ავაშენოთ. ღარიბაშვილი არის სახე იმ სისტემის, რომელიც ჩამოაყალიბა ბიძინა ივანიშვილმა “ჭამეთ, ძარცვეთ ქვეყანა, ხალხი. მთავარია, იყავით ჩემი ერთგულები, მთავარია რუსული დავალებები შეასრულოთ” – ეს არის შინაარსი იმის, რაც ჩვენ ვნახეთ.

15 სექტემბერი მოდის, სკოლაში რამდენი ბავშვი მივა დახეული ფეხსაცმლით, რამდენ ბავშვს არ ექნება ტანსაცმელი, ან წიგნები. პრემიერ – მინისტრის შვილისთვის თურმე ჩარტერული რეისებია ხელმისაწვდომი, რომ გაფრინდეს ამერიკაში სასწავლებლად. ეს არის ის უსამართლობა, რაც ქვეყანაში ხდება. მათთვის ეკონომიკა ორნიშნადაც იზრდება და სამნიშნადაც. იმ დონეზე არიან უკვე, რომ უზარმაზარ წვეულებებს აწყობენ – აბა, პატარა დაბადების დღეს ხომ არ გადაიხდის პრემიერ – მინისტრის მეუღლე?! შვილი სპეც. რეისით უნდა წაიყვანო, აბა ჩვეულებრივ თვითმფრინავში ხომ არ ჩაჯდება, ხომ არ ეკადრება მას ეს ყველაფერი?! ეს არის სწორედ რუსული სტანდარტით ქვეყნის მართვა, როცა ხალხი არის უბედურებაში, ხოლო ელიტა არის ზემდიდარი.

ცალ-ცალი “კალოშით” მოსული ადამიანები დაეპატრონნენ დიდძალ ქონებას ხალხის ხარჯზე.

ევროკავშირი მათ შორის, ნიშნავს პასუხი ვაგებინოთ ასეთ ადამიანებს. ასეთი პრემიერ მინისტრით და ასეთი “ქართული ოცნებით” ჩვენ ევროკავშირის წევრი ვერ გავხდებით.

მივმართავ ღარიბაშვილს, ინამუსე და წადი, გეყო რაც ძარცვე ეს ქვეყანა, წადი და შეეშვი ამ ქვეყანას, შეეშვი საქართველოს”, – განაცხადა გიორგი ვაშაძემ.

ლელო“ პრემიერ-მინისტრის წინააღმდეგ იმპიჩმენტის პროცედურას იწყებს

11:56 - 10/09/2023

პარტია „ლელო“ პრემიერ-მინისტრ, ირაკლი ღარიბაშვილის წინააღმდეგ იმპიჩმენტის პროცედურას იწყებს და საპარლამენტო ოპოზიციას მოუწოდებს, ინიციატივას შეუერთდნენ.

საქმე ეხება მედიით გავრცელებულ ინფორმაციას, რომლის თანახმად პრემიერ-მინისტრმა სამთავრობო თვითმფრინავი პირადი ვიზიტებისთვის გამოიყენა.

„ლელოში“ აცხადებენ, რომ აღნიშნული არის სისხლის სამართლის დანაშაული და საქმე გვაქვს სამსახურებრივი უფლებამოსილების ბოროტად გამოყენებასთან, რაზეც შესაბამის ორგანოებს გამოძიება უკვე დაწყებული უნდა ჰქონდეთ.

„გუშინ ყველამ ნოდარ მელაძის საგამოძიებო, საავტორო გადაცემაში ვიხილეთ დადასტურებული ფაქტი იმ აღვირახსნილი ქმედებისა, რასაც ჰქვია საქართველოს მთავრობის, ამ შემთხვევაში, საქართველოს პრემიერ-მინისტრის პირდაპირ, სახელმწიფო ბიუჯეტის სახსრების საკუთარი სურვილისა და ინტერესებისამებრ გამოყენება. ეს არის პირდაპირ სისხლის სამართლის სავარაუდო დანაშაული. აქ საქმე ჩვენ გვაქვს სამსახურებრივი უფლებამოსილების ბოროტად გამოყენებასთან. გუშინ, როდესაც ეს გადაცემა ეთერში გადიოდა, რომელიც სავსეა პირდაპირი მტკიცებულებებით და აღიარებითი ჩვენებებით პირველ წყაროდან, რომელმაც მაგალითად ფრენა განახორციელა და ასე შემდეგ, ამასთან დაკავშირებით უნდა დაწყებულიყო გამოძიება, წესით საქართველოს გენერალურ პროკურატურაში უკვე დაწყებულიც უნდა იყოს გამოძიება, ასევე, ინფორმაცია გამოძიების დაწყების შესახებ უკვე გავრცელებულიც უნდა იყოს და შესაბამისი პროცედურები უნდა მიმდინარეობდეს, მაგრამ ჩვენ კარგად ვიცით, რომ პროკურატურა მსგავს შემთხვევაში, არა თუ გამოძიებას არ იწყებს, არამედ არანაირ წინასაგამოძიებო ქმედებებს არ ახორციელებს და პირდაპირ შეიძლება ითქვას, რომ კანონს არღვევს და არანაირ საგამოძიებო მოქმედებებს არ აწარმოებს. ამის მაგალითია შოვის ტრაგედია.

ყველა ზემოთ აღნიშნულიდან გამომდინარე, პარტია „ლელომ“ გადაწყვეტილება მიიღო დაიწყოს იმპიჩმენტის პროცედურები პრემიერ-მინისტრ, ირაკლი ღარიბაშვილის სავარაუდო დანაშაულის ჩადენასთან დაკავშირებით. აღნიშნულს ითვალისწინებს საქართველოს კონსტიტუციის 48-ე მუხლი, სადაც პირდაპირ წერია, რომ სავარაუდო დანაშაულის ჩადენის შემთხვევაში, თუ არსებობს დანაშაულის ნიშნები და ეს დანაშაულის ნიშნები სახეზეა. ყველამ კარგად ვიხილეთ, თუ რა ხდება, რა აღვირახსნილი სიტუაციაა და რა უკანონობა ხდება. აქედან გამომდინარე, ჩვენ ვიწყებთ იმპიჩმენტის პროცედურებს და მოვუწოდებთ ჩვენს ოპოზიციონერ კოლეგებს საქართველოს პარლამენტში, ასევე, საქართველოს პარლამენტის წევრებს, ოპოზიციური პარტიის წევრებს შემოგვიერთდნენ. ყველას ვისთვისაც სულერთი არ არის, რომ ამ ქვეყანაში კანონი არ არსებობს, ყველასთვის, ვისთვისაც სულერთი არ არის ქვეყანაში კორუფცია იქნება თუ არა, მოვუწოდებ მათ, რომ იმპიჩმენტის პროცედურებს შემოუერთდეს“, – განაცხადა სამუშიამ.

,,ვისაც სააკაშვილი არ გინდათ,არც მისი პარტია და მხარდამჭერთა ხმები უნდა გინდოდეთ!”- მაია ორჯონიკიძე

11:29 - 10/09/2023

“კიდევ ერთხელ დავრწმუნდი, რომ სააკაშვილის შემდეგ გიორგი ვაშაძე ყველაზე მასშტაბური მოქმედი პოლიტიკოსია ამ ქვეყანაში”– წერს მაია ორჯონიკიძე სოციალურ ქსელში:

“ამიტომაც ებრძოდნენ მელია-ბოკერიები ჯერ კიდევ 2014-15 წლებში. მიშასთან წარსული გაუგებრობაც მათი ინტრიგების ხლართვის შედეგი იყო-ეს ჯერ კიდევ მაშინ ვიცოდი. პოლიტიკოსი ის კი არ არის,ვინც ფორმალურადაა პოლიტიკოსი-ასეთები ჩვენში კონა ათი შაურია,პოლიტიკოსი ისაა-ვისაც ქვეყნის მომავალი განვითარების სტრატეგიული ხედვა გააჩნია.

სულ რომ არაფერი,მარტო იმას ვუფასებ ლევან ხაბეიშვილს,რომ ვაშაძე დააბრუნა და ზოგადად ხაბეიშვილის დროს მე რასაც ვხედავ-არავის ერჩიან,კარები არავისთვისაა დაკეტილი,ვისაც რაიმე სასიკეთოს გაკეთება შეუძლია ქვეყნისთვის.მელიას დროს დაკეტილ-გასხვისებული ენმ-ს რეგიონალური ოფისები სწორედ ლევან ხაბეიშვილის დაუღალავი მუშაობის შედეგად დღეს უკვე გახსნილია მთელი ქვეყნის მასშტაბით!

დავესესხები გიორგი ვაშაძის ძალიან ზუსტ ტერმინს,როდესაც ნინო ჟიჟილაშვილი ენმ-ზე ნიკანორ მელიას დაუსრულებელი თავდასხმების თემას შეეხო,მაგრამ ეს პარტიის შიგნით კონფლიქტად მოიხსენია,გიორგიმ უპასუხა,რომ ამ თემას მედია უფრო ტირაჟირებს და იმაზე დიდ მნიშვნელობას ანიჭებს,ვიდრე ნაცმოძრაობის მომხრეთა მრავალრიცხოვანი მხარდამჭერი და ლევან ხაბეიშვილზე ორკესტრირებულ შტურმს “ელიტისტური თავდასხმები” უწოდა ზუსტად და მოსწრებულად. დიახ,ეს არის პოლიტიზირებული “ელიტის” შეთანხმებული შტურმი,მაგრამ “ელიტისტური” სულაც არ ნიშნავს ელიტარულს-რადგან საქართველოში პოლიტიკური ელიტა სანთლით საძებარია.

აცალეთ ამ ხალხს მუშაობა მათ,ვისაც თავად არაფრის კეთება შეგიძლიათ და პოლიტიკოსობა კაბინეტიდან გაუსვლელად სავარძელში ჰალსტუხით ჯდომა გგონიათ! ვისაც არ მოგწონთ დღევანდელი ენმ-წადით და შექმენით თქვენი პარტია,ჩვენ ექვსი წელი ვიტანდით თქვენს უმსგავსობას,მიშას სახელის პარტიაში ლამის აკრძალვას და ყოველი არჩევნების შემდეგ სიმწრით აღებული ხმების რუსი ოლიგარქისთვის ჩუქებას! დიახ-ვისაც სააკაშვილი არ გინდათ,არც სააკაშვილის პარტია და სააკაშვილის მხარდამჭერთა ხმები უნდა გინდოდეთ! გეყოთ,რაც ექვსი წელი პარტია შიგნიდან ანგრიეთ,გეყოთ!”- წერს მაია ორჯონიკიძე.

გურიაში სტიქიის სალიკვიდაციო სამუშაოები მიმდინარეობს

11:15 - 10/09/2023

გურიაში სტიქიის სალიკვიდაციო სამუშაოები მესამეა დღეა მიმდინარეობს. იწმინდება ცენტრალური გზა. ადგილზე შესაბამისი სამსახურის წარმომადგენლები მუშაობენ. მთავრობის ადმინისტრაციის რეგიონებთან ურთიერთობის დეპარტამენტის უფროსის მოადგილის, მერაბ გამყრელიძის განცხადებით, რეგიონში ელექტროენერგიის გარეშე მხოლოდ 4 სოფელია დარჩენილი.

„მეწყერმა ძალიან ბევრი უბანი დააზიანა. დილიდან ელექტროენერგიის აღდგენითი სამუშაოები მიმდინარეობს. 100 ოჯახია გამოყვანილი და სასტუმროშია განთავსებულია. გეოლოგების ძალიან დიდი მუშაობს ოზურგეთშიც და ლანჩხუთშიც და სანამ ყველა ლოკაციას არ ნახავენ და არ შეისწავლიან და სანამ დასკვნა არ დაიდება, ის კრიტიკული წერტილები, სადაც მეწყრული პროცესებია, ცოტა ხანი ის სახლები მოქალაქეებმა უნდა დატოვონ. ამ ეტაპზე ცენტრალური გზების გაწმენდა მიმდინარეობს“, – განაცხადა მერაბ გამყრელიძემ.

გურიის რეგიონში, სტიქიის ზონაში შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები, საგანგებო რეჟიმში მუშაობას განაგრძობენ. საძიებო სამუშაოების შედეგად ნაპოვნია სამი ცხედარი.

,,დასაწყებია ღარიბაშვილის იმპიჩმენტის წესით გადაყენების პროცედურა” – ხაზარაძე

11:11 - 10/09/2023

დასაწყებია ღარიბაშვილის იმპიჩმენტის წესით გადაყენების პროცედურა!, – ამის შესახებ “ლელოს” ლიდერი, მამუკა ხაზარაძე facebook-ში, თავის გვერდზე წერს.

“დასაწყებია ღარიბაშვილის იმპიჩმენტის წესით გადაყენების პროცედურა!

საპარლამენტო ოპოზიციამ უნდა დაიწყოს ეს პროცესი…

თუ მსგავს აღვირახსნილ კანონდარღვევას შევეგუებით და შესაბამისად არ ვიმოქმედებთ ყველა ერთად, პარლამენტი და საზოგადოება, მაშინ ევროკავშირისკენ სწრაფვა ილუზიაა – იმპიჩმენტი ღარიბაშვილს”, – აცხადებს მამუკა ხაზარაძე.

შეგახსენებთ, გუშინ “ტვ პირველმა” გაავრცელა ინფორმაცია, რომლის თანახმად პრემიერ-მინისტრი გერმანიაში ჩარტერული რეისით გაფრინდა. სიუჟეტში „ჯორჯიან ეარვეისის“ დამფუძნებელი, თამაზ გაიაშვილი ადასტურებს, რომ მთავრობის მეთაური გერმანიაში საქართველოს მთავრობის კუთვნილი თვითმფრინავით წავიდა.

საქართველოს სახელმწიფო დაცვის სპეციალური სამსახურის უფროსმა ანზორ ჩუბინიძემ დღეს განაცხადა, რომ პრემიერ-მინისტრ ირაკლი ღარიბაშვილის აშშ-ში ვიზიტი კომერციული იყო და შესაბამისად, ხარჯები სახელმწიფო ბიუჯეტიდან არ გაწეულა.

მაროკოში მიწისძვრის შედეგად დაღუპულთა რიცხვი გაიზარდა

11:06 - 10/09/2023

მაროკოში მიწისძვრის შედეგად დაღუპულთა რიცხვმა 2 000-სს გადააჭარბა.

ქვეყნის შინაგან საქმეთა სამინისტროს ინფორმაციით, დაღუპულია სულ მცირე 2 012 ადამიანი და კრიტიკულად მძიმე დაზიანებებით, საავადმყოფოში მოთავსებულია 1 404 პირი.

ნანგრევებში მოყოლილთა გადასარჩენად სამძებრო-სამაშველო ოპერაციები უწყვეტ რეჟიმში მიმდინარეობს.

ქვეყანაში სამდღიანი გლოვაა გამოცხადებული.

შეტევა კიევზე – რუსულმა ძალებმა ღამის განმავლობაში 33 „შაჰიდის“ დრონი გაუშვეს

11:02 - 10/09/2023

10 სექტემბრის ღამეს რუსმა ოკუპანტებმა უკრაინას „შაჰიდის“ ტიპის უპილოტო საფრენი აპარატებით შეუტიეს. ამის შესახებ ინფორმაციას უკრაინის საჰაერო ძალები ავრცელებს. არსებული ცნობით, დრონები ჩრდილოეთის, კურსკის მიმართულებით გაუშვეს.

„კიევის რეგიონის მიმართულებით დაფიქსირდა 33 „შაჰიდის“ გაშვება“, – ნათქვამია ინფორმაციაში.

როგორც უკრაინული მხარე აცხადებს, განადგურებულია 26 დრონი.

როგორი ამინდი იქნება ხვალ საქართველოში

23:46 - 09/09/2023

გარემოს ეროვნული სააგენტოს ინფორმაციით, 9 სექტემბერს, საქართველოს ტერიტორიის უმეტეს ნაწილზე მოსალოდნელია დროგამოშვებით წვიმა ელჭექით, ზოგან ძლიერი. ასევე, ზოგან შესაძლებელია აღინიშნოს სეტყვა. ხოლო 10 სექტემბერს ხანმოკლე წვიმა ელჭექით შენარჩუნდება მხოლოდ ცალკეულ რაიონში.

რაც შეეხება ქალაქებს, თბილისში 9 სექტემბერს მოსალოდნელია წვიმა ელჭექით. ჰაერის ტემპერატურა დღის საათებში +24, +26 გრადუსი დაფიქსირდება, ხოლო 10 სექტემბერს უნალექო ამინდია მოსალოდნელი.

სანაპირო რაიონებში, ბათუმში, ქობულეთსა და ფოთში 9 სექტემბერს, 10 სექტემბრის დილამდე მოსალოდნელია დროგამოშვებით წვიმა ელჭექით, ხოლო 10 სექტემბერს დღისით გამოდარებით.

9-10 სექტემბერს ზღვაზე შესაძლებელია დაფიქსირდეს ძლიერი ქარი და შტორმი. ჰაერის ტემპერატურა დღისით +23, +25 გრადუსი იქნება.

დასავლეთ საქართველოს ქალაქებში – ქუთაისში, ზუგდიდში, მარტვილში, ოზურგეთსა და ლანჩხუთში 10 სექტემბრის დილამდე ნავარაუდებია დროგამოშვებით ხანმოკლე წვიმა ელჭექით. ჰაერის ტემპერატურა იქნება დღისით +23, +25 გრადუსი.

ხოლო დასავლეთ საქართველოს მთიან რეგიონებში – ამბროლაურში, ონში, ცაგერში, შოვში, ჭიათურაში, საჩხერესა და ხულოში 10 სექტემბრის დილამდე დროგამოშვებით წვიმა ელჭექით. ჰაერის ტემპერატურა დღისით +20, +22 გრადუსი.

რაც შეეხება დასავლეთ საქართველოს მაღალმთიან რეგიონებს – მესტიასა და ბახმაროში 10 სექტემბრის დილამდე ნავარაუდებია დროგამოშვებით წვიმა ელჭექით. ჰაერის ტემპერატურა იქნება დღისით +14, + 16 გრადუსი.
ქალაქებში – რუსთავში, მარნეულში, გარდაბანში, გორსა და ცხინვალში 9 სექტემბერს დროგამოშვებით წვიმა ელჭექით, ხოლო 10 სექტემბერს უნალექო ამინდია მოსალოდნელი. ტემპერატურა იქნება დღისით +23, +25 გრადუსი.

კახეთის რეგიონში, კერძოდ საგარეჯოში, თელავში, გურჯაანში, სიღნაღში, ლაგოდეხში, ყვარელში, ახმეტასა და დედოფლისწყაროში 8-9 სექტემბერს სინოპტიკოსები დროგამოშვებით ხანმოკლე წვიმას ელჭექით ვარაუდობენ, შესაძლებელია სეტყვა. 10 სექტემბერს უნალექო ამინდია მოსალოდნელი. ჰაერის ტემპერატურა დღისით +24, +26 გრადუსი იქნება.

ხოლო აღმოსავლეთ საქართველოს მთიან რეგიონებში – ახალციხეში, ბორჯომში, დუშეთში, თიანეთსა და ფასანაურში 10 სექტემბრის დილამდე მოსალოდნელია დროგამოშვებით ხანმოკლე წვიმა ელჭექით. ჰაერის ტემპერატურა იქნება დღისით +21, +23 გრადუსი.

რაც შეეხება აღმოსავლეთ საქართველოს მაღალმთიან რეგიონს – ახალქალაქში, წალკაში, ბაკურიანში, გუდაურსა და ომალოში მოსალოდნელია დროგამოშვებით ხანმოკლე წვიმა ელჭექით. ჰაერის ტემპერატურა დღისით +13 +15 გრადუსი იქნება.

ასევე, 10 სექტემბერს ღამისა და დილის საათებში საქართველოს მაღალმთიან რეგიონებში შესაძლებელია თოვლჭყაპი აღინიშნოს.

ძლიერმა წვიმამ ჩხოროწყუს მუნიციპალიტეტში პრობლემები შექმნა

23:38 - 09/09/2023

ძლიერმა წვიმამ ჩხოროწყუს მუნიციპალიტეტში პრობლემები შექმნა. მუნიციპალიტეტის მერიის ცნობით, ადიდდა მდინარეები და ღელეები, დატბორილია რამდენიმე საცხოვრებელი სახლის პირველი სართული, ქუჩები, ეზოები, ყანები, თხილნარი.
ჩამორეცხილია შიდა საუბნო გზები.

შემთხვევის ადგილზე მუნიციპალიტეტის მერი დათო გოგუა შესაბამის სამსახურებთან ერთად იმყოფებპდა. შესაბამისი კომისიის მიერ მიმდინარეობს ზარალის დათვლა.

გურიაში ეროვნული პარკი შეიქმნება

23:28 - 09/09/2023

მთავრობა „გურიის ეროვნული პარკის შექმნისა და მართვის შესახებ“ კანონპროექტს პარლამენტს საშემოდგომო სესიაზე წარუდგენს. აღნიშნულის შესახებ მთავრობის კანონშემოქმედებითი საქმიანობის მოკლევადიან გეგმაშია აღნიშნული.

„იქმნება გურიის ეროვნული პარკი. ეროვნული პარკის ფართობი შეადგენს დაახლოებით 20 ჰა-ს და მოიცავს ჩოხატაურისა და ოზურგეთის მუნიციპალიტეტების ტერიტორიებს.

გურიის ეროვნული პარკისთვის განკუთვნილი ტერიტორია წარმოადგენს მნიშვნელოვან ადგილს ბიომრავალფეროვნების კონსერვაციისათვის. ახასიათებს ფლორისა და ფაუნის სახეობების მრავალფეროვნება.

ამ ტერიტორიაზე გავრცელებულია საქართველოს და IUCN წითელი ნუსხის და CITES კონვენციით დაცული, საქართველოს და კავკასიის ენდემურ მცენარეთა 74 სახეობის პოპულაციები. შესაბამისად, მნიშვნელოვანია დაცული ტერიტორიის შექმნა მათი დაცვის და შენარჩუნების მიზნით,“- ვკითხულობთ დოკუმენტში.

,აშშ-ში ჯერ კიდევ ბევრი რუსი ჯაშუშია”- FBI-ს ხელმძღვანელი

23:21 - 09/09/2023

გამოძიების ფედერალური ბიუროს, (ეფბიაის) დირექტორის კრისტოფერ ვრეის განცხადებით, შეერთებულ შტატებში ჯერ კიდევ რჩება ბევრი რუსი ჯაშუში, მათი განეიტრალების მცდელობის მიუხედავად.

მისი თქმით, შეერთებულ შტატებში რუსული კონტრდაზვერვის მხრიდან საფრთხე კვლავ დიდია.

„ამერიკის შეერთებულ შტატებში ჯერ კიდევ არის ბევრი რუსი ჯაშუში. რუსული დაზვერვის კვალი კვლავ არის. ვცდილობთ ყველა გზით დავბლოკოთ რუსეთის ჯაშუშების გზა შტატებში. თუ ვინმეს სჭირდება შეხსენება, თუ რა არის რუსეთის ფედერაციის ინტერესები, მაშინ შეხედეთ რა ხდება უკრაინაში“, – აცხადებს FBI-ს დირექტორი.

10 სექტემბრის ასტროლოგიური პროგნოზი

23:04 - 09/09/2023

ვერძი

ამ დღეს მიზნის მისაღწევად დაბრკოლებების გადალახვა მოგიწევთ. ხელსაყრელი დროა მემკვიდრეობის, საოჯახო ბიზნესის, წარმოების რეორგანიზაციის და სახლის რემონტის საკითხების მოსაგვარებლად. შეიძლება საყვარელი ადამიანების გულისთვის თავისუფლების გაწირვა მოგიწიოთ.

კურო

შესანიშნავი დღეა ახლო ნათესავებთან და საქმიან პარტნიორებთან ურთიერთობისთვის. გახსოვდეთ, რომ თანამშრომლობა საუკეთესო შედეგს მაშინ მოიტანს, როდესაც მხარეებს საერთო პროექტი აერთიანებს. ამ დღეს პირად ურთიერთობებში სულიერი სიახლოვე და ჰარმონია განსაკუთრებით მნიშვნელოვანი იქნება. სტრესი და ფსიქოლოგიური გადაღლა შეიძლება კონფლიქტის მიზეზი გახდეს.

ტყუპები

ფინანსური სირთულეების დასაძლევად, საბინაო და ოჯახური საკითხების მოსაგვარებლად ხანგრძლივი მუშაობა მოგიწევთ. შემოსავლის დამატებით წყაროზე უარს ნუ იტყვით, მაგრამ სიფრთხილით მოეკიდეთ და ცხოვრების მთავარ მიზნად ნუ აქცევთ. არახელსაყრელი დღეა კულინარიული ექსპერიმენტებისა და სარისკო გადაწყვეტილებებისთვის.

კირჩხიბი

ამ დღეს უნდა იაქტიუროთ, წინააღმდეგ შემთხვევაში თქვენი სტრესის დონე გაიზრდება. უსაქმოდ ჯდომას და წუწუნს გამოსავლის ძიება სჯობს, რომელსაც აუცილებლად იპოვით. ყველაზე აქტიური და ენერგიული პირად უსაფრთხოებასთან და შვილების ინტერესებთან დაკავშირებულ სიტუაციებში იქნებით.

ლომი

ამ დღეს ფარული პირადი მოტივები გამოძრავებთ. სწორედ ისინი წარმართავენ თქვენს ქმედებებს. არ არის გამორიცხული ოჯახში არეულობა და ქაოსი. ეცადეთ, ემოციური ენერგია სამუშაოსკენ მიმართოთ და არა განცდებისკენ. უძრავ ქონებასთან ან სახლის რემონტთან დაკავშირებულ საკითხებში მეტი აქტიურობისა და ძალისხმევის გამოჩენა მოგიწევთ.

ქალწული

გირჩევთ, ლაპარაკიდან საქმეზე გადახვიდეთ და ბევრს მოასწრებთ. ამ დღეს შესაძლებლობა გაქვთ, რომ რამდენიმე მიმართულებით ერთდროულად იმოქმედოთ და სიტუაციიდან გამომდინარე სწორი გზა აირჩიოთ. მეგობრები ან ახლო ნათესავები თქვენი საუკეთესო დამხმარეები იქნებიან, თუმცა, შესაძლოა, ერთ-ერთ მათგანთან ურთიერთობა გაწყვიტოთ. სიახლეებისა და ექსპერიმენტებისთვის არახელსაყრელი დღეა.

სასწორი

მონდომებული და მიზანსწრაფული ხართ, მაგრამ შედეგის მისაღწევად მხოლოდ ეს საკმარისი არ იქნება. დაწყებული საქმის წარმატებით დასრულებისთვის ინიციატივის გამოჩენა და გამჭრიახობა დაგჭირდებათ.
გირჩევთ, სამსახურში უფროსის მიმართ თანაგრძნობა გამოიჩინოთ.
პირად ცხოვრებაში ეცადეთ, ემოციები შეიკავოთ. წინააღმდეგ შემთხვევაში შეიძლება, სერიოზული უთანხმოება წარმოიშვას.

მორიელი

შესანიშნავი დღეა ახალი ინიციატივის გამოჩენისთვის. მით უმეტეს, რომ მინიმალური ძალისხმევით ბევრის მიღწევა შეიძლება. თქვენთვის პირადი მოთხოვნების დაკმაყოფილება ან გავლენის სფეროს გაფართოება საუკეთესო სტიმული იქნება. შემდეგ საფეხურზე ასასვლელად პასიურობის დაძლევა მოგიწევთ.

მშვილდოსანი

დაღლილობა მთელი დღის განმავლობაში გაგყვებათ. ჩვეულ რიტმში დასაბრუნებლად, დრო უნდა გამოძებნოთ და საკუთარ თავს დასვენების უფლება მისცეთ. ცოტა ხნით მარტო დარჩენდა და ფსიქოლოგიური განტვირთვა დაგეხმარებათ, ყველაფერი თავის ადგილზე დააყენოთ.
ბიზნესში ნუ ჩაებმებით სარისკო საქმეში, თუ არ გაქვთ ძლიერი მხარდაჭერა.

თხის რქა

უსამართლობის მიმართ გამძაფრებული პროტესტი გაქვთ, ნებისმიერ წვრილმანზე ბრაზდებით და განწყობა დიდი ხნით გიფუჭდებათ. შეეგუეთ, რომ ასეთი მდგომარეობა რამდენიმე დღე გაგრძელდება. ეცადეთ, ცუდი ფიქრებისგან გათავისუფლდეთ და ემოციების მართვა მოახერხოთ.

მერწყული

ამ დღის მთავარ ამოცანასთან გამკლავება თქვენგან უზარმაზარ ფიზიკურ თუ გონებრივ ძალისხმევას მოითხოვს. ამასთან, გამორიცხული არ არის, რომ თქვენი კარიერა ან ოჯახური კეთილდღეობა პირდაპირ ამაზეა დამოკიდებული. ვიღაცების არაპროგნოზირებადმა ქცევებმა თქვენს საქმიანობას ხელი არ უნდა შეუშალოს. მომსახურებისა და კვების სფეროებში შეიძლება საუკეთესო შედეგებს მიაღწიოთ.

თევზები

ის, რაც სხვებისთვის დაბრკოლებას წარმოადგენს, შეიძლება თქვენთვის სასარგებლოდ გამოიყენოთ. თუმცა ახალი საქმის დაწყება რამდენიმე დღით უნდა გადადოთ, რადგან ამ დღეს წარმატებას ვერ მიაღწევთ. ეცადეთ პარტნიორს უფრო ხშირად მოუსმინოთ.

1...1,6571,6581,659...2,312 Page 1,658 of 2,312