რადიკალურ ოპოზიციას, როგორც ჩანს, სურს, იმპიჩმენტის საკითხით პრეზიდენტთან ივაჭროს, – ამის შესახებ საპარლამენტო უმრავლესობის წევრმა, არჩილ თალაკვაძემ განაცხადა.

თალაკვაძე იმედოვნებს, რომ პრეზიდენტი „ნაციონალური მოძრაობის“ მხრიდან ზეწოლას, შანტაჟს არ დაექვემდებარება.

„ბევრი ინფორმაცია არ გვაქვს, რაზე ისაუბრეს პრეზიდენტთან, თუმცა ნათელია, რაზე იყო საუბარი გარეთ, როდესაც „ნაციონალური მოძრაობის“ ერთ-ერთმა წარმომადგენელმა მედიის საშუალებით პირდაპირ შეუთვალა სალომე ზურაბიშვილს შეწყალება ან იმპიჩმენტიო. რეალურად, ეს იყო გზავნილი, რაც რადიკალურ ოპოზიციას ჰქონდა პრეზიდენტთან. როგორც ჩანს, ამ მიმართულებით მასზე ზეწოლაა და რადიკალურ ოპოზიციას სურს, საკითხით ივაჭროს. არაა გამორიცხული, რომ შეხვედრებზე ამ საკითხით ივაჭრეს და ეს თემა ირიბად თუ პირდაპირ დააყენეს. გარკვეული ცნობებია, ამ შეხვედრებიდან გაკეთდა განცხადებები, მაგალითად, „მოქალაქეებმა“ თქვეს, რომ იმპიჩმენტთან დაკავშირებით იყო საუბარი.

ოპოზიციას მეტი გამჭვირვალობა მართებს. ახლა დაიწყება საპარლამენტო სესია, სხდომები და დიდი იმედი მაქვს, ოპოზიციის ის წარმომადგნლები, რომლებსაც პრეტენზია აქვთ გამჭვირვალობასა და ანგარიშვალდებულებაზე, უფრო მეტს იტყვიან, რეალურად, რა საკითხებზე იყო მსჯელობა საქართველოს პრეზიდენტთან. ასევე, იმედი გვაქვს, პრეზიდენტი არ დაექვემდებარება ასეთი ტიპის ზეწოლას, შანტაჟს, მით უმეტეს, „ნაციონალური მოძრაობის“ მხრიდან, ვინც მას არაკანონიერად არჩეულად მიიჩნევდა, შეურაცხყოფას აყენებდა. მასთან დაკავშირებით ბევრი ასეთი შეფასება გვაქვს მოსმენილი. ვიცით პრეზიდენტის ის პოზიცია, რაც ერთხელ თქვა, რომ შეწყალების გადაწყვეტილებას არ მიიღებს, მაგრამ ამასთან დაკავშირებით კიდევ ერთხელ არის საჭირო მეტი სიცხადე, რადგან ოპოზიციის მხრიდან პირდაპირ მოვისმინეთ გზავნილები – შეწყალება ან იმპიჩმენტი“, – განაცხადა არჩილ თალაკვაძემ.

კითხვაზე, რა მოლოდინი აქვს საპარლამენტო უმრავლესობას, შეგროვდება თუ არა პრეზიდენტის იმპიჩმენტისთვის საჭირო 100 ხმა, თალაკვაძემ განაცხადა:

„იმპიჩმენტს სამართლებრივი და პოლიტიკური დატვირთვა, გზავნილი აქვს, რომ კონსტიტუციის დარღვევას არანაირი საფუძველი, გამართლება არ შეიძლება ჰქონდეს, ყველამ კონსტიტუციის პრინციპების დაცვით უნდა წარმართოს საქმე. კენჭისყრა მას შემდეგ მოხდება, რაც საკონსტიტუციო სასამართლო თავის შეფასებას დაუბრუნებს პარლამენტს და ყველანი ვნახავთ, რა დამოკიდებულება ექნება ოპოზიციას. უნდა ვთქვათ, რომ ოპოზიცია ამ მიმართულებით რთულ ვითარებაშია – იმპიჩმენტს თუ მხარს დაუჭერს, გამოდის, რომ კონკრეტული პოლიტიკური გეგმა აქვთ, თუ არ დაუჭერენ, გამოდის, რომ თვალს ხუჭავენ კონსტიტუციური პრინციპების დარღვევაზე. სხვათა შორის, ნიშანდობლივია იმათი განცხადებებიც, რომლებმაც თქვეს, რომ დარბაზში არ შევლენ. ეს დილემისგან ერთგვარი თავის არიდებაა“, – განაცხადა არჩილ თალაკვაძემ.

„ერთიანი ნაციონალური მოძრაობის“ პოლიტსაბჭოს გადაწყვეტილებით, ფრაქცია პარლამენტში მონაწილეობას არ მიიღებს იმპიჩმენტის პროცესში იმისათვის, რომ გამოირიცხოს ყოველგვარი ინსინუაციები, სპეკულაციები, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.

მისი თქმით, „ნაციონალური მოძრაობა- ძალა ერთობაშია“ სხდომას არ დაესწრება.

„ჩვენ მონაწილეობას არ მივიღებთ ივანიშვილის ბინძურ თამაშში, რომელიც უპირველეს ყოვლისა ემსახურება ჩვენი ქვეყნის ევროპული არჩევანის საბოტაჟირებას. სწორედ ამ მიზნით, ფრაქცია „ერთიანი ნაციონალური მოძრაობა – ძალა ერთობაშია“ არ იქნება დარბაზში მაშინ, როდესაც ივანიშვილი გაითამაშებს იმპიჩმენტად წოდებულ პროცესს, რომელიც რეალურად მიზნად ისახავს, რომ საქართველომ არ მიიღოს კანდიდატის სტატუსი და ჩვენი ევროპული არჩევანის რეალიზება არ მოხდეს. ეს არის ჩვენი მტკიცე გადაწყვეტილება, რომელიც დღეს კიდევ ერთხელ დამტკიცდა. „ერთიანი ნაციონალური მოძრაობის“ მთავარი გადაწყვეტილების მიმღები ორგანოს, პოლიტიკური საბჭოს მიერ“, – განაცხადა ბოკუჩავამ.

„ნაციონალური მოძრაობის“ წევრის, ლევან ბეჟაშვილის განცხადებით, სხვა ოპოზიციონერმა დეპუტატებმაც მსგავსი გადაწყვეტილება უნდა მიიღონ და სხდომათა დარბაზში არ შევიდნენ.

„ჩვენ ვაძლევთ რეკომენდაციას და მოვუწოდებთ სხვა პოლიტიკურ ჯგუფებს, რომ არ დავუტოვოთ „ქართულ ოცნებას“ მანიპულაციების და სპეკულაციების სივრცე, მიიღონ ანალოგიური გადაწყვეტილება და არ დაესწრონ იმპიჩმენტის პროცედურის განხილვას, ამით ყოველგვარი ინსინუაციები გამოვრიცხოთ. იმავდროულად, ერთხელ და სამუდამოდ დასრულდეს იმპიჩმენტის ხელოვნური თემის წამოწევა და პოლიტიკური დღის წესრიგის მთავარ საკითხად წარმოჩინება, ვინაიდან მიზანი ამ კამპანიის არის პრეზიდენტის როლის გამოკვეთა, თითქოს ის არის ერთადერთი სახელმწიფო ინსტიტუცია, რომელიც პროევროპულობისათვის იბრძვის და უნდა ჩაანაცვლოს სხვა ევროპული ოპოზიციური პარტიები, ეს ბუნებრივია, ივანიშვილის და „ქართული ოცნების“ თამაშებშია. „ერთიანი ნაციონალური მოძრაობა“ ამ ქოცურ თამაშებში მონაწილეობას არ მიიღებს.  მოვუწოდებთ ყველა პროდასავლელი ოპოზიციური პოლიტიკური პარტიების ჯგუფებს, არც მათ მიიღონ მონაწილეობა ამ თემების განხილვაშიც კი. ვინაიდან, ამ თემების განხილვა და გაცოცხლება ნიშნავს მთავარი პოლიტიკური საკითხებიდან ყურადღების გადატანას. ჩვენ პასუხისმგებლობას ვიღებთ „ერთიანი ნაციონალური მოძრაობის“ ფრაქციაზე და ფრაქციის წევრებზე, სხვა წევრები, რომლებიც ადრე გასულები იყვნენ „ერთიანი ნაციონალური მოძრაობის“ საარჩევნო ბლოკის სიის, ბუნებრივია, მათზე პასუხისმგებლობას ვერ ავიღებთ და არც ავიღებთ. ამიტომ, მოვუწოდებთ ყველა ოპოზიციონერ დეპუტატს, რომ გამოირიცხოს ინსინუაციები და არ დავიტოვოთ სივრცე კითხვის ნიშნებისათვის, ყველა გამოვიდეთ დარბაზიდან და არ მივიღოთ მონაწილეობა ამ პროცესში“, – განაცხადა ბეჟაშვილმა.

დააკვირდით ოპოზიციის განცხადებებსა და ზოგიერთი ევროპარლამენტარის მხრიდან გაკეთებული განცხადებებს ჩვენი ქვეყნის ევროპულ მომავალთან დაკავშირებით. მიზანმიმართულად, ახალი მესიჯი მოიგონეს, რომ ხალხი იმსახურებს და ხელისუფლება არ იმსახურებს ევროპასა და ევროპულ მომავალს, – ამის შესახებ „ქართული ოცნების“ გენერალურმა მდივანმა, თბილისის მერმა კახა კალაძემ განაცხადა.

„აქვთ მცდელობა, რომ ჩვენი ქვეყნის მოსახლეობა და არსებული ხელისუფლება დააშორონ და გაყონ ერთმანეთისგან. თუმცა, დღეს საქართველოს ხელისუფლება წარმოადგენს ჩვენი ქვეყნის მოსახლეობის უმრავლესობას. მოყოლებული 2012 წლიდან, „ქართული ოცნება“ სარგებლობს დიდი ავტორიტეტით და ეს ყველაფერი გამოისახება არჩევნებში, მოსახლეობის მხრიდან მხარდაჭერით, რაც ძალიან მნიშვნელოვანია. ერთი რამ მინდა იცოდეს ყველამ, გუშინ მგონი სააკაშვილის განცხადება იყო სხვა პოლიტიკოსებთან მიმართებაში, რომ მათ ევროპელების მხარდაჭერა არ ექნებათ და არანაირი რესურსი არ გააჩნიათო. როდესაც ქვეყანაში პოლიტიკოსის სტატუსი გაქვს, გაქვს პოლიტიკური პარტია, რა თქმა უნდა, პირველ რიგში პოლიტიკოსმა უნდა იზრუნოს, რომ საკუთარი ქვეყნის მხარდაჭერა მოიპოვოს და ჰქონდეს მხარდაჭერა მოსახლეობის მხრიდან, რომ წარმატებას მიაღწიო. ეს მიუთითებს იმაზე, თუ როგორი დამოკიდებულება აქვთ ამ რადიკალებს ქვეყნის მოსახლეობის მიმართ, არაფრად აგდებენ ჩვენი ქვეყნის მოსახლეობას“, – განმარტა კალაძემ.

ჩვენ გვინდა, საქართველო იყოს სტაბილური, ძლიერი ქვეყანა, ძალიან ძლიერი ინსტიტუტებით, – ამის შესახებ ჟურნალისტებს საქართველოში ევროკავშირის ელჩმა, პაველ ჰერჩინსკიმ პრეზიდენტის იმპიჩმენტის პროცედურასთან დაკავშირებით დასმულ კითხვაზე განუცხადა.

„პრეზიდენტის მიმდინარე იმპიჩმენტზე თუ მკითხავთ, მე უცხოელი დიპლომატი ვარ. ძალიან ფრთხილად უნდა ვიყო, რადგან არ მინდა, საქართველოს საშინაო საქმეებში ჩარევა. რაც ჩვენ გვინდა, არის ის, რომ საქართველო იყოს სტაბილური, ძლიერი ქვეყანა, ძალიან ძლიერი ინსტიტუტებით. ასე რომ, რა თქმა უნდა, იმპიჩმენტის პროცედურა არ არის ის, რაც ეხმარება საქართველოს, გახდეს სტაბილური, ძლიერი, მყარი ქვეყანა ძლიერი სახელმწიფო ინსტიტუტებით. მაგრამ კიდევ ერთხელ, მე ამაზე კომენტარს ვერ გავაკეთებ“, – განაცხადა ჰერჩინსკიმ.

კითხვაზე, რაზე ისაუბრეს გუშინ პრეზიდენტთან შეხვედრაზე, პაველ ჰერჩინსკიმ აღნიშნა, რომ საუბრის მთავრი თემა საქართველოს ევროინტეგრაცია იყო.

„გუშინ პრეზიდენტმა მიგვიწვია ევროკავშირის ყველა სხვა ელჩთან ერთად. ჩვენი შეხვედრის მთავარი თემა კი საქართველოს ევროინტეგრაცია იყო“, – აღნიშნა პაველ ჰერჩინსკიმ.

საქართველო დღესვე იმსახურებს ნატო-ს წევრობას, ისეთი გაწვრთნილი ჯარი და მაგარი მეომრები გვყავს, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.

„ნატო-ს ერთობლივი წვრთნები წლების განმავლობაში მიმდინარეობდა და მიმდინარებს. საქართველოსა და ქართველ სამხედროებს მისიებში კონტრიბუცია იმდენი აქვთ და ისეთი წვლილი აქვთ შეტანილი, ჩვენი გმირი ჯარისკაცები დაღუპულები არიან, რამდენიმე ათეული დაგვეღუპა და რამდენიმე ასეული დაგვეჭრა“, – განაცხადა მამუკა მდინარაძემ.

მისივე თქმით, ქართველი სამხედროები ნატო-ს ჯარებთან ერთად ებრძოდნენ მსოფლიო მშვიდობისთვის.

„ხალხი დაგვეღუპა, მისიებში დაღუპული გვყავს ჯარისკაცები და თქვენ მეკითხებით, ვის მიმართეთო. არავის მივმართეთ, ერთად ვართ ამ საკითხებში და საქართველო იმსახურებს ნატო-ს წევრობას დღესვე, თუ ძალიან გაინტერესებთ. ყველაფრით მზად არის. იმ სფეროში ადამიანი არ გამოჩნდა მსოფლიოში, რომელსაც სიტყვა მოუბრუნდა და რაღაცით საქართველო მზად არ არის ამ მიმართულებითო, რომ ეთქვა. ერიდება ყველა ამ თემაზე ლაპარაკს იმიტომ, რომ დღესვე იმსახურებს საქართველო ნატო-ს წევრობას ისეთი გაწვრთნილი ჯარი და ისეთი მაგარი მეომრები გვყავს“, – აღნიშნა მამუკა მდინარაძემ.

სამწუხაროა, რომ თავდაცვისა და უსაფრთხოების საკითხებზე დეზინფორმაციის მორიგი სერია მოვისმინეთ. სრული პასუხისმგებლობით შემიძლია გითხრათ, რომ ჩვენი პარტნიორების მხრიდან ბაზების გახსნის თაობაზე შემოთავაზება არ მიგვიღია, – ამის შესახებ პარლამენტის თავდაცვის კომიტეტის თავმჯდომარე ირაკლი ბერაიამ განაცხადა.

მისივე თქმით, ასეთი სახის დეზინფორმაცია გამაოგნებელი და შემაშფოთებელია.

„აშშ-ის საელჩომ საქართველოში აშშ-ის სამხედრო ბაზის გახსნის საკითხზე დეზინფორმაციის გამავრცელებელ სუბიექტებს საკუთარი განცხადებით თავზე დაახურა და დაამხო, რისი დამხობაც შეიძლებოდა. ჩვენთვის ამერიკასთან პარტნიორობა ძალიან მნიშვნელოვანია, ის ჩვენი სტრატეგიული პარტნიორია. ჩვენი ამოცანა და პრიორიტეტია, ამ ქვეყანასთან თანამშრომლობის განმტკიცება, შემდგომი გაღრმავება თავდაცვისა და უსაფრთხოების სფეროში. ეს ბევრ დოკუმენტში წერია და პრაქტიკული ნაბიჯებიც ამაზე მეტყველებს. დინამიკა, რაც ამ მიმართულებით არსებობს, ამის ნათელი მაგალითია. ეს ასევე მოიცავს თავდაცვისა და შეკავების გაძლიერების ინიციატივას, რომლის მიზანია, ჩვენი თავდაცვის ძალების უფრო ინსტიტუციური გაძლიერება, ძალთა გენერირების სისტემის დახვეწა და გაძლიერება, ეროვნული წინააღმდეგობის მექანიზმების მხარდაჭერა. ასევე ის შეთანხმება, რასაც ხელი მოეწერა აშშ-ის თავდაცვის მდივნის ოსტინის თბილისში ვიზიტის დროს. დეზინფორმაცია არის გამაოგნებელი და შემაშფოთებელი“, – განაცხადა ირაკლი ბერაიამ.

ტელეკომპანია „მთავარმა არხმა“ 12 სექტემბერს გაავრცელა ინფორმაცია, თითქოს „ქართულმა ოცნებამ“ 2021 წელს საქართველოში ჩამოსულ შეერთებული შტატების თავდაცვის მდივანს უარი უთხრა ქვეყანაში ამერიკული სამხედრო ბაზის გახსნაზე. საქართველოში აშშ-ის საელჩო მედიაში გავრცელებულ ინფორმაციას გამოეხმაურა და განაცხადა, რომ შეერთებულ შტატებს საქართველოსთვის ამერიკული სამხედრო ბაზის შექმნა არ შეუთავაზებია.