კონსტიტუციის დარღვევა პრეზიდენტის მხრიდან ფორმალური და სამართლებრივი თვალსაზრისით სახეზეა, ქვეყნის გარეთ რომ გავიდა პრეზიდენტი, შედეგი რა იყო?, – ამის შესახებ „ქართული ოცნების“ აღმასრულებელმა მდივანმა და ფრაქცია „ქართული ოცნების“ თავმჯდომარემ, მამუკა მდინარაძემ „რუსთავი 2“-ის ეთერში განაცხადა.

„ოპოზიცია უბრალოდ გადადის მორალურ მხარეზე, სადაც უნდათ რომ საზოგადოება შეცდომაში შეიყვანენ, მაგრამ ვერ მოხდება ასე, რადგანაც როდესაც საქართველოს პრეზიდენტი, რომლის კომპეტენციის ფარგლებშიც საგარეო ურთიერთობები არ შედის და მიდის, რომ წარმოადგინოს საქართველო მის ფარგლებს გარეთ – ეს არის დარღვევა, თუკი ამას თან არ ახლავს მთავრობის თანხმობა. ცალსახაა ეს და კონსტიტუციაში წერია იმგვარად, რომ ინტერპრეტაციის საშუალებას არ იძლევა. ქვეყნის გარეთ რომ გავიდა პრეზიდენტი, შედეგი რა იყო? წავიდა პრეზიდენტი შეხვდა ლატვიის მხარეს, ამის შემდეგ გამოვიდა ლატვიის პრეზიდენტი და მიგვითითა, რომ შევუერთდეთ სანქციებს. სალომე ზურაბიშვილის შეხვედრის შემდეგ, რომელიმემ თქვა საქართველო იმსახურებს კანდიდატის სტატუსს და ჩვენ მხარს დავუჭერთო?! პირიქით, გზავნილები მოვისმინეთ, რომ მიუერთდით, დააწესეთ სანქციებიო, ეს იყო მისი შეხვედრების შედეგი“, – განაცხადა მამუკა მდინარაძემ.

ხატია დეკანოიძე „ნაციონალური მოძრაობის“ წევრის, ნიკა მელიას განცხადებას გამოეხმაურა, რომლის თანახმად, მელია არ გამორიცხავს, რომ „სხვა პლატფორმიდან“ მოუწიოს ბრძოლა.

დეკანოიძის თქმით, „ნაციონალურ მოძრაობაში“ არსებულმა პრობლემებმა, ბევრს არ მისცა საქმიანობის საშუალება, რის გამოც, ამ პარტიაში ვერც ნიკა მელიას ხედავს.

„მე ვერ გეტყვით როგორი იქნება ნიკას გადაწყვეტილება. პირადად მე თუ მკითხავთ, მე მას ვეღარ ვხედავ „ნაციონალურ მოძრაობაში“, იმიტომ რომ იმ პრობლემებმა, რომელიც არის ამ პარტიაში, სამწუხაროდ, ბევრ ადამიანს არ მოგვცა საშუალება, რომ ამ პარტიაში გაგვეგრძელებინა საქმიანობა. ეს გადაწყვეტილება ოპოზიციური ფრონტის გაძლიერებას უნდა ემსახურებოდეს და არა – დასუსტებას“, – განაცხადა დეკანოიძემ.

არ მჯერა, რომ ხელისუფლების მიერ შესრულებულ სამუშაოზე იქნება დამოკიდებული, მივიღებთ თუ არა სტატუსს, – ამის შესახებ „ხალხის ძალის“ ერთ-ერთმა ლიდერმა დიმიტრი ხუნდაძემ განაცხადა.

მისი თქმით, დღეს მმართველი გუნდი სწორ პოლიტიკას ახორციელებს, მაგრამ ამ ურთულეს ვითარებაში დაზღვევის ძირითადი მექანიზმი არის თვითონ საზოგადოება.

„მმართველი გუნდის პოლიტიკა სწორია – ამ 12 პუნქტთან დაკავშირებით აქტიურად მუშაობს, მაგრამ რა თქმა უნდა, ამ მუშაობის პროცესში არ გადადის იმ ხაზიდან, სადაც გადის ქვეყნისა და მოსახლეობის უსაფრთხოება, ანუ ასე ხელაღებით ყველა დაკვეთას არ ასრულებს. არ მჯერა, რომ ამ სამუშაოს შესრულებაზე იქნება დამოკიდებული, მივიღებთ თუ არა სტატუსს. გეტყვით, რატომ არ მჯერა – მაქვს ჩემი არგუმენტი. მთავარი დავალება – დეპოლარიზაცია არის მოცემული ჩვენთვის დავალება, მაგრამ ყველაფერი კეთდება ამ დავალების მომცემების მიერ, რომ ქვეყანაში პოლარიზაცია არ დასრულდეს. ფაქტობრივად, ხდება ამის ხელშეწყობა და სწორედ ამ არგუმენტების გამო მე მრჩება შთაბეჭდილება, რომ სტატუსის მონიჭება არის ინსტრუმენტი ქვეყნის უსაფრთხოების საქმეებში ჩარევის, მათ საკუთარი მიზნებისთვის ამის გამოყენების და ინსტრუმენტი იმისა, როგორ გახადონ ქვეყანა მართული; ამ ვითარებაში საზოგადოებას თავისი ნეგატიური როლი მიანიჭონ და საზოგადოება დააყენონ იმ რეალობის წინაშე, რომ მათვე შექმნან ქვეყანაში ხელისუფლების შეცვლის საჭიროება, მაგრამ საზოგადოება რომ ამაზე არ მიდის, ამას თვითონაც ხედავენ. დღეს მმართველი გუნდი სწორ პოლიტიკას ახორციელებს, მაგრამ ამ ურთულეს ვითარებაში დაზღვევის ძირითადი მექანიზმი არის თვითონ საზოგადოება. რამდენად გამოხატავენ ისინი ამის გამო გაბრაზებას, სწორედ ამაზე იქნება დამოკიდებული, მოგვცემენ თუ არა სტატუსს“, – განაცხადა დიმიტრი ხუნდაძემ.

ოპოზიცია რომ სტატუსთან დაკავშირებით რაიმეს ხელშეშლაზე ლაპარაკობს, უკვე კომიკური და უხერხულია, ვინაიდან ერთადერთს რასაც რადიკალური ოპოზიცია აკეთებს, ეს არის ხელის შეშლა ევროპული წინსვლისთვის, – ასე გამოეხმაურა ფრაქცია „ქართული ოცნების“ თავმჯდომარის მოადგილე რატი იონათამიშვილი „ქრონიკასთან“ ოპოზიციის წარმომადგენლების განცხადებებს, რომ პრეზიდენტის იმპიჩმენტი იგივეა, რაც კანდიდატის სტატუსის იმპიჩმენტი.

„ამას აკეთებდნენ ყოველთვის, როდესაც რაიმე მნიშვნელოვანია გადაწყვეტილების მიღების თარიღი ახლოვდებოდა ჯერ კიდევ ასოცირების შეთანხმებისა თუ ვიზალიბერალიზაციის დროიდან მოყოლებული.

რაც შეეხება პრეზიდენტს – ადამიანი, რომელიც ასეთი ლექსიკით საუბრობს, ზიზღნარევი სიტყვებით გამოდის, არათანმიმდევრულია თავის გადაწყვეტილებებში და მიაჩნია, რომ საქართველოს არცერთი პუნქტი არ შეუსრულებია ევრორეკომენდაციებისა, – ეს ადამიანი საქართველოს ევროპული არჩევანის ადვოკატი ვერ იქნება. პირიქით, ის იქნება ხელის შემშლელი და დღეს ამაზე ჩვენ შეგვიძლია კონკრეტული ფაქტებით ვისაუბროთ: ერთ დღეს, ევროკავშირის სხვადასხვა ქვეყნის დედაქალაქში გაიმართა შეხვედრები; ერთის მხრივ, საქართველოს პარლამენტის თავმჯდომარის შეხვედრები რუმინეთში უმაღლესი თანამდებობის პირებთან და მეორეს მხრივ პრეზიდენტის შეხვედრა ლატვიაში. ასეთი მნიშვნელოვანი შეხვედრების შემდეგ ყოველთვის ჟღერდება კონკრეტული გზავნილები. პარლამენტის თავმჯდომარის შეხვედრის შემდეგ, რუმინულმა მხარემ ღიად და საჯაროდ თქვა, რომ ისინი მხარს დაუჭერენ საქართველოსთვის კანდიდატის სტატუსის მიღებას, ხოლო საქართველოს პრეზიდენტთან შეხვედრის შემდეგ, ლატვიის პრეზიდენტი გამოვიდა და სანქციებზე შეერთებისკენ მოუწოდა ჩვენს ქვეყანას. ეს არის კონკრეტული ფაქტი. ეს კონკრეტული გზავნილები გამოხატავს იმ განწყობას, რაც შეხვედრების დროს დაისვა. ეს მაგალითი იყო გუშინდელი, თორემ თუ გადავავლებთ ჩვენი გუნდის ლიდერების სხვადასხვა შეხვედრებს ევროპელ ლიდერებთან, ეს შეხვედრები მთავრდება კონკრეტული გზავნილით, რაც არის საქართველოს ევროინტეგრაციის მხარდაჭერა. პრეზიდენტის შეხვედრა, ასევე კონკრეტული მესიჯით დამთავრდა და ამ მესიჯში ჩვენ ამოვიკითხეთ სრულიად განსხვავებული საკითხი, რომელსაც არაფერი აქვს საერთო არც 12 რეკომენდაციასთან, არც ასოცირების შეთანხმებასთან, არც იმ მიმდინარე რეფორმებთან, რომელსაც საქართველოს მთავრობა და პარლამენტი ახორციელებს. მთლიანად აცდენილი იყო ამ ყველაფერთან. კანდიდატის სტატუსის საკითხის განხილვის წინ, მსგავსი თემების ხელოვნურად დაყენება, ცხადია არის ქვეყნის მტრობა, რომელშიც სალომე ზურაბიშვილი მონაწილეობს“, – განაცხადა რატი იონათამიშვილმა.