მიუხედავად უკრაინის ომისა, ევროპის რეკონსტრუქციისა და განვითარების ბანკის (EBRD) შეფასებით, რუსეთის ეკონომიკა 1,5%-იან ზრდას დაინახავს. წინა პროგნოზით ნავარაუდევი იყო, რომ ის მსგავსი მაჩვენებლით შემცირდებოდა, თუმცა რუსეთის ეკონომიკა დასავლეთის სანქციების ფონზე ბევრად უფრო გამძლეა, ვიდრე მოსალოდნელი იყო. ამის შესახებ Euronews წერს.
„ჩვენი ბოლო პროგნოზების დროს, ჩვენ ველოდით, რომ სანქციები, განსაკუთრებით ნავთობის ფასების შეზღუდვა, უფრო ეფექტური იქნებოდა რუსეთის აქტივობის შეზღუდვისთვის… მოსკოვის სახელმწიფო ხაზინა გაძლიერდა. ისევ იმაზე მეტად, ვიდრე მოსალოდნელი იყო“, – აღნიშნულია EBRD-ის განცხადებაში.
ამასთან აღნიშნულია, რომ რუსეთში მშპ-ის მაჩვენებლები – ეკონომიკური ჯანმრთელობის საზომი, რომელიც ქვეყნის მიერ წარმოებული საქონლისა და მომსახურების მთლიან ღირებულებას ასახავს – მეორე კვარტალში ასევე მაღალი იყო.
