საფრანგეთის ყოფილმა პრეზიდენტმა, ნიკოლა სარკოზიმ განაცხადა, რომ დიპლომატია, დისკუსიები და მოლაპარაკებები ერთადერთი გზაა უკრაინაში ომის საკითხის გადასაჭრელად.

ფრანგულ გაზეთ Le Figaro-ში გამოქვეყნებულ ინტერვიუში, სარკოზიმ აღნიშნა, რომ ევროპამ უნდა “დააზუსტოს თავისი სტრატეგია” და კომპრომისი მოძებნოს რუსეთთან.

“კომპრომისების გარეშე არაფერი იქნება შესაძლებელი და იმის რისკია, რომ სიტუაცია ნებისმიერ მომენტში შეიძლება გაუარესდეს. ამას საშინელი შედეგები შეიძლება მოჰყვეს”, – აღნიშნა საფრანგეთის ყოფილმა პრეზიდენტმა.

სარკოზიმ დაგმო უკრაინაში შეჭრის თაობაზე ვლადიმირ პუტინის გადაწყვეტილება, თუმცა აღნიშნა, რომ რუსეთი “ევროპის მეზობელია” და საერთო ისტორიაში გაუგებრობების მიუხედავად, “ჩვენ გვჭირდება ისინი და მათ ვჭირდებით ჩვენ”.

სარკოზიმ ასევე აღნიშნა, რომ მაკრონის ადრინდელი ინტუიცია სწორი იყო, მაგრამ ის ვერ მიჰყვა მას, ნაწილობრივ აღმოსავლეთ ევროპელების ზეწოლის გამო.

სარკოზიმ ასევე უარყო უკრაინის ევროკავშირსა და ნატოში გაწევრიანების პერსპექტივა და აღნიშნა, რომ “ჩვენ ცრუ დაპირებებს ვყიდით, რომელიც არ შესრულდება”.

“უკრაინა დასავლეთისა და აღმოსავლეთის დამაკავშირებელია. უკრაინა ნეიტრალური უნდა იყოს, რადგან მისი მოწოდებაა, იყოს ხიდი ევროპასა და რუსეთს შორის. უკრაინას სთხოვო, არჩევანი გააკეთოს ამ ორ ერთეულს შორის, მეჩვენება, რომ ეს ეწინააღმდეგება ამ რთული რეგიონის ისტორიასა და გეოგრაფიას. არ მესმის, ეს ნეიტრალიტეტი შეურაცხყოფა როგორ იქნება. ის ასევე შეიძლება იყოს გარანტირებული საერთაშორისო შეთანხმებით, რომელიც ითვალისწინებს უსაფრთხოების უკიდურესად ძლიერ გარანტიებს, რათა დაიცვას იგი ახალი აგრესიის რისკისგან”, – განაცხადა მან.

“2014 წელს ყირიმის ანექსია საერთაშორისო სამართლის აშკარა დარღვევა იყო. რაც შეეხება ამ ტერიტორიას [ყირიმს], რომელიც 1954 წლამდე რუსეთის იყო და სადაც მოსახლეობის უმრავლესობა თავს ყოველთვის რუსად გრძნობდა, მე ვფიქრობ, რომ სიტუაციის შემოტრიალება ილუზორულია. მაშინაც კი, თუ მივიჩნევ, რომ უდავო რეფერენდუმი, ანუ საერთაშორისო თანამეგობრობის მკაცრი კონტროლის ქვეშ ორგანიზებული, აუცილებელი იქნება არსებული მდგომარეობის რატიფიცირებისთვის”, – აღნიშნა ნიკოლა სარკოზიმ.

უკრაინამ ისრაელს შეიძლება უვიზო რეჟიმი გაუუქმოს. მიზეზად ისრაელში უკრაინის ელჩი რამდენიმე ფაქტორს ასახელებს. ევგენი კორნიჩუკის თქმით, ყოველწლიურად ქალაქ უმანში როშ-ჰა-შანას დღესასწაულზე 20 ათასზე მეტი ხასიდი მომლოცველი ჩადის, რუსეთის სარაკეტო თავდასხმების ფონზე კი მათი უსაფრთხოების უზრუნველყოფა გაჭირდება.

„ჩვენ არ გვყოფნის საჰაერო თავდაცვის სისტემები და ამ პრობლემაზე ისრაელს არაერთგზის ვესაუბრეთ, მაგრამ თავდაცვითი სისტემების მოყიდვა მათ არ სურთ. გარდა ამისა, ბოლო პერიოდში ისრაელში შესვლაზე უკრაინის სულ უფრო მეტ მოქალაქეს ეუბნებიან უარს და მათ მიმართ უკიდურესად არამეგობრულად არიან განწყობილნი.“ -აღნიშნა კორნიჩუკმა.

თურქეთში რეკორდულად მაღალი ტემპერატურა დაფიქსირდა.

14 აგვისტოს ჰათაის პროვინციის სამხრეთ-აღმოსავლეთ ნაწილში ჰაერის ტემპერატურამ 50 გრადუს ცელსიუსს მიაღწია.

ადგილობრივი მედიის ინფორმაციით, 6 თებერვლის მიწისძვრით დაზარალებულ რეგიონში, რეკორდულად მაღალი ტემპერატურის ფონზე, ადგილობრივი მოსახლეობა სასმელი წყლის დეფიციტს განიცდის.

თურქეთის სხვადასხვა რეგიონში 48 გრადუსი სიცხეა. ქვეყნის მეტეოროლოგთა განმარტებით, უახლოეს დღეებში ჰაერის ტემპერატურა საშუალო სეზონურ მაჩვენებელზე 6-10 გრადუსით მაღალი იქნება.

უკრაინის პრეზიდენტმა, ვოლოდიმირ ზელენსკიმ დაადასტურა გასულ ღამეს რუსეთის საჰაერო იერიში უკრაინის პორტებზე. ამის შესახებ ზელენსკიმ ყოველდღიურ ვიდეომიმართვაში განაცხადა.

„ყოველი პორტზე თავდასხმა არის დარტყმა მსოფლიო სასურსათო ფასებზე, დარტყმა სოციალურ და პოლიტიკურ სტაბილურობაზე აფრიკასა და აზიაში. ძირითადი რამ, რაც უზრუნველყოფს საზოგადოების ნორმალურ ცხოვრებას, ეს არის საკვები. მსოფლიოში არცერთ სხვა ტერორისტს, რუსეთის გარდა, არასოდეს დაუმიზნებია ამდენი ერის უსაფრთხოებისთვის ერთდროულად ასე ღიად და მიზანმიმართულად“, – აღნიშნა ზელენსკიმ.

უკრაინის პრეზიდენტმა ასევე განაცხადა, რომ ახლა უკვე მეშვიდე მასობრივი თავდასხმა განხორციელდა რუსეთის მხრიდან უკრაინის პორტზე მას შემდეგ, რაც მოსკოვმა გაერო-ს მიერ მხარდაჭერილი შეთანხმება დატოვა.

ზელენსკის თქმით, რუსეთის პრეზიდენტი ვლადიმერ პუტინი არ ზრუნავს გლობალურ სასურსათო უსაფრთხოებაზე.