ამერიკის შეერთებული შტატების ახალი ელჩი რობინ დანიგენი საქართველოში ჩამოვიდა. ამის შესახებ ინფორმაციას საელჩო ფეისბუქგვერდზე ავრცელებს.

„აშშ-ის საელჩო სიხარულით მიესალმება ელჩი რობინ დანიგენის ჩამოსვლას საქართველოში”, – წერს საელჩო და საქართველოში ახალი ელჩის ჩამოსვლის ფოტოს აქვეყნებს.

რობინ დანიგენმა აშშ-ის ელჩის თანამდებობაზე კელი დეგნანი შეცვალა, რომელიც საქართველოში 2020 წლის იანვრიდან მუშაობდა.

საქართველოში ელჩად დანიშვნამდე რობინ დანიგენი ცენტრალური და აღმოსავლეთ ევროპის საკითხებში სახელმწიფო მდივნის თანაშემწის მოადგილედ მუშაობდა. 2018-2021 წლებში იყო ავსტრიაში აშშ-ის დიპლომატიური მისიის ხელმძღვანელის მოადგილე.

დანიგენი სახელმწიფო დეპარტამენტში 1992 წლიდან მუშაობს. 2014-2017 წლებში ის მუშაობდა სახელმწიფო მდივნის თანაშემწის მოადგილედ სახელმწიფო დეპარტამენტის ენერგეტიკული რესურსების ბიუროში.

დანიგენი ასევე მსახურობდა აშშ-ის საელჩოებში ვიეტნამში, ჩილეში, თურქეთში, კუბასა და სალვადორში.

საქართველოს პრემიერ-მინისტრ ირაკლი ღარიბაშვილის მეუღლემ, ნუნუკა თამაზაშვილმა და უნგრეთის პრემიერ-მინისტრ ვიქტორ ორბანის მეუღლემ, ანიკო ლევაიმ კომპანია „დავით კაკაბაძე მინანქარი ოქრომჭედლობა“ დაათვალიერეს.

პრემიერ-მინისტრის პრესსამსახურის ინფორმაციით, კომპანიის მფლობელმა და სამხატვრო ხელმძღვანელმა, დავით კაკაბაძემ ნუნუკა თამაზაშვილსა და ანიკო ლევაის კომპანიის საქმიანობის შესახებ ინფორმაცია მიაწოდა. პრემიერ-მინისტრთა მეუღლეები ადგილზე დეტალურად გაეცნენ სამუშაოთა მიმდინარეობის პროცესს.

დავით კაკაბაძემ სტუმრებს თავისი საავტორო წიგნები გადასცა საჩუქრად.

სახელოსნო 1999 წელს დაარსდა. კომპანიაში დასაქმებულია 60-მდე ადამიანი. სახელოსნო არის მულტიფუნქციური და მოიცავს რვა სახელოსნოს, ასევე არის ოქრომჭედლობის სრული კომპლექტაციის შექმნის პირობები. კომპანია მუშაობს საეკლესიო ნივთებსა და საერო სამკაულებზე; საათის დეტალებსა და მინანქრის ციფერბლატებზე. ის თანამშრომლობს უცხოურ კომპანიებთან, მათ შორის − საათების შვეიცარიულ კომპანია Patek Philippe-თან, რომლისთვისაც ამზადებს მინანქრის ციფერბლატებსა და საათის სხვა დეტალებს.

მე ვუსურვე ლევანს [ხაბეიშვილს], რომ ღირსებითა და სიმართლით ემართა პარტია. არ მიკვირს, შესაძლებელია, ხაბეიშვილის ხელმძღვანელობა უკმაყოფილო იყოს მისი საქმიანობით და შეიძლება მცდელობა ჰქონდეთ რაღაც გადაადგილების, იმედია, ლევანი გამოიჩენს პრინციპულობას, ღირსებას და თავს ასე არ გაათამაშებინებს კეზერაშვილ-მერაბიშვილს , – ასე უპასუხა „ნაციონალური მოძრაობის“ ყოფილმა თავმჯდომარემ ნიკა მელიამ კითხვას, რომელიც „ნაციონალური მოძრაობის“ წევრების კვიპროსზე ვიზიტსა და პარტიის თავმჯდომარეობის პოსტზე ლევან ხაბეიშვილის ნიკა გვარამიას კანდიდატურით ჩანაცვლების შესახებ დაუდასტურებელ ინფორმაციას ეხებოდა.

როგორც მელიამ აღნიშნა, მისი დამოკიდებულება დავით კეზერაშვილისა და ვანო მერაბიშვილის მიმართ უკვე ცნობილია და ის მიიჩნევს, რომ ბიძინა ივანიშვილის დამარცხება შესაძლებელია, თუმცა არა ფულით და ფულის შოვნის სურვილით, არამედ გულწრფელობითა და მორალური უპირატესობით.

„ჩემთვის ძალიან მნიშვნელოვანია, რომ ხალხის ინტერესი იყოს ასახული პოლიტიკაში, პოლიტიკა უნდა განისაზღვრებოდეს ხალხის მიერ და არა კულუარებში. რატომ არიან ესა თუ ის ადამიანები ამა თუ იმ ქვეყანაში, ამა თუ იმ ადამიანთან შეხვედრებზე მთელი შემადგენლობით, ეს, ალბათ, თავად, როდესაც ჩამობრძანდებიან, მათ უნდა ჰკითხოთ. კეზერაშვილთან, მერაბიშვილთან ჩემი დამოკიდებულება ცნობილია. მე მიმაჩნია, რომ ბიძინა ივანიშვილის რეჟიმის დამარცხება არის შესაძლებელი მხოლოდ და მხოლოდ მორალური უპირატესობით, მორალური სიცხადით, დიდი კონტრასტული სხვაობით. არ მჯერა იმ ადამიანების მიერ ბრძოლის ფრონტის გახსნის, რომელიც ძირითადად ფულის შოვნას გულისხმობს. ფული ვერ დაამარცხებს ბიძინა ივანიშვილს და ვერც ფულის შოვნის ინტერესით ვერ დაამარცხებ. დაამარცხებ გულწრფელობით, მორალური უპირატესობით და ხალხის ინტერესის ასახვით პოლიტიკაში“, – განაცხადა მელიამ.

ჟურნალისტების კომენტარის საპასუხოდ, რომლებმაც აღნიშნეს, რომ ნიკა მელიას არ ელოდნენ პარტიის ღონისძიებაზე, რომელიც მიხეილ სააკაშვილის საზოგადოებრივი მისაღების გახსნას ეძღვნება, მელიამ აღნიშნა, რომ ადამიანური, პოლიტიკური ვალდებულება აქვს იყოს იქ, სადაც სააკაშვილის ე.წ. ოფისი იხსნება.

„ჩემთვის ძალიან მნიშვნელოვანია, ქვეყანაში აღარ არსებობდნენ პოლიტპატიმრები. პოლიტპატიმრების ეპოქის დასრულება შესაძლებელია ოლიგარქიული რეჟიმის დასრულებით. მე მჯერა, რომ მიხეილ სააკაშვილი, როგორც პოლიტპატიმარი, მხოლოდ მაშინ გათავისუფლდება, როდესაც ოლიგარქიული რეჟიმი შეიცვლება დემოკრატიული წყობითა და ძალებით. მე ვარ სოლიდარული პოლიტპატიმრების მიმართ, ვარ სოლიდარული მიხეილ სააკაშვილის ტყვეობის მიმართ და არა უბრალოდ სოლიდარული, მე ყოველთვის, წლების განმავლობაში, მას შემდეგ, რაც სააკაშვილი არის უკანონო ტყვე, ჩემთვის ერთ-ერთი ვალდებულებად რჩება, სადაც არ უნდა ვიყო, რომელი პოლიტიკურ პლატფორმაზეც არ უნდა ვიყო, რომელი პოლიტიკური პლატფორმიდანაც არ უნდა ვიბრძოლო, ადამიანები, განსაკუთრებით ქვეყნის პრეზიდენტი არ იყოს ტყვე. ეს არის ჩემთვის წმინდათა წმინდა“,- განაცხადა მელიამ.

უამრავი პრობლემა აქვთ ადამიანებს, თავიანთი პრობლემებით მოვლენ სააკაშვილის ოფისში და გაუზიარებენ, შემდეგ ეს პრობლემები მივა ადრესატამდე, ჩემი სურვილი იქნება, ოფისი რაც შეიძლება ბევრ ადამიანს მოემსახუროს, – ამის შესახებ საქართველოს ყოფილი პრეზიდენტის მიხეილ სააკაშვილის დედამ, გიული ალასანიამ მიხეილ სააკაშვილის ოფისის გახსნასთან დაკავშირებით ჟურნალისტებს განუცხადა.

გიული ალასანიას თქმით, ყველაფერი მნიშვნელოვანია, რაც მოემსახურება ადამიანებს, ხალხს.

„ძალიან ბევრი ადამიანი ვერ აღწევს პარტიების ოფისამდე, მე ასე წარმომიდგენია, ეს იქნება ადგილი, სადაც ყველას მოესვლება. უამრავი პრობლემა აქვთ ადამიანებს, თავიანთი პრობლემებით მოვლენ და გაუზიარებენ. შემდეგ ეს პრობლემები მივა ადრესატამდე, ყოველ შემთხვევაში, მე ამის იმედი მაქვს. ჩემი სურვილი იქნება, რაც შეიძლება ბევრ ადამიანს მოემსახუროს. აი, ეს არის ჩემი სურვილი“, – აღნიშნა გიული ალასანიამ.

ამასთან, გიული ალასანიამ ისაუბრა მიხეილ სააკაშვილის ჯანმრთელობის მდგომარეობასთან დაკავშირებით და აღნიშნა, რომ მისი მდგომარეობა რთულია.

„სამწუხაროდ, ჯანმრთელობის მდგომარეობა არ არის კარგი, რადგან საერთოდ კუნთის ნასახი არ აქვს ადამიანს. გულიც ხომ კუნთია და, მართალი გითხრათ, ყოველ ჯერზე შიშით შევდივარ, გული რა წუთში გაჩერდება, არ ვიცი“, – განაცხადა გიული ალასანიამ.

სააკაძის დაღმართზე დღეს მიხეილ სააკაშვილის ოფისი გაიხსნა. სააკაშვილის წარმომადგენელის, სოფო ჯაფარიძის განცხადებით, მოქალაქეებს შეეძლებათ ოფისში სააკაშვილისთვის წერილების დაწერა და დატოვება.