ჯო ბაიდენის თქმით, ის ისრაელში მიმდინარე მოვლენებს ყურადღებით ეცნობა. ამის შესახებ CNN-ი იტყობინება.
ტელეარხის ცნობით შესაბამისი განცხადება აშშ-ის პრეზიდენტმა თეთრ სახლში, ვარდების ბაღში ჟურნალისტებთან საუბრისას განაცხადა. ბაიდენმა დასძინა, რომ დღეს უკვე ესაუბრა ისრაელის პრემიერ-მინისტრს, ბენიამინ ნეთანიაჰუს.
„ამ თავდასხმამ ანტისემიტიზმისა და ებრაელი ხალხის გენოციდის ათასწლოვანი მტკივნეული მოგონებები და ნაიარევები გააცოცხლა. ამ დროს ძალიან მკაფიოდ უნდა ვთქვათ: ტერორიზმს გამართლება არ აქვს“, – განაცხადა ბაიდენმა.
მან კიდევ ერთხელ დაადასტურა ისრაელისადმი აშშ-ის მხარდაჭერა.
„შეერთებული შტატები ზურგს გიმაგრებთ და ამ საკითხზე მთელი დღის განმავლობაში და მომდევნო დღეებშიც ვიმუშავებთ“, – განაცხადა პრეზიდენტმა.
ტერორისტულმა ორგანიზაცია „ჰამასმა“ ისრაელზე თავდასხმა 7 ოქტომბერს, 06:30 საათზე განახორციელა და ახალი სამხედრო ოპერაციის დაწყების შესახებ განაცხადა. ისრაელმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე შეტევა დაიწყო.
