საქართველოს საგარეო საქმეთა მინისტრს, ილია დარჩიაშვილსა და საქართველოში აშშ-ის ელჩს, რობინ დანიგანს შორის შეხვედრა გაიმართა.

მხარეებმა განიხილეს ორ ქვეყანას შორის არსებული სტრატეგიული პარტნიორობის საკითხთა ფართო სპექტრი და შესაბამისი მიმართულებების შემდგომი განვითარების პერსპექტივები. შეხვედრის ფარლგებში ყურადღება, ასევე, გამახვილდა რეგიონული პოლიტიკისა და უსაფრთხოების საკითხებზე.

საქართველოში აშშ-ის ელჩმა, რობინ დანიგანმა კიდევ ერთხელ დაადასტურა აშშ-ის ურყევი მხარდაჭერა საქართველოს სუვერენიტეტისა და ტერიტორიული მთლიანობისადმი, ასევე ქვეყნის საგარეო პოლიტიკური პრიორიტეტების მიმართ

მხარეებმა, დაადასტურეს ქვეყნებს შორის არსებული ნაყოფიერი თანამშრომლობის გაგრძელებისა და კიდევ უფრო გააქტიურების მზადყოფნა.

ოთარ ფარცხალაძეს მოქალაქეობა შეუწყდა, შესაბამისად, ეს ყველაფერი დამთავრებული ამბავია, – ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებთან საუბრისას განაცხადა.

მისივე თქმით, ამერიკის შეერთებული შტატების მიერ დასანქცირებული საქართველოს ყოფილი გენერალური პროკურორის, ოთარ ფარცხალაძის საკითხი ქართული სამართლებრივი სივრცისთვის ნაკლებად რელევანტური გახდა.

როგორც კობახიძემ აღნიშნა, ოთარ ფარცხალაძის სავარაუდო „ეფ-ეს-ბეს“ აგენტობასთან დაკავშირებით მტკიცებულებები დღემდე არაა წარმოდგენილი.

„საკითხი პრინციპში ამოიწურა. გუშინ ოთარ ფარცხალაძეს მოქალაქეობა შეუწყდა. დამთავრებული ამბავია, შესაბამისად, ეს ყველაფერი. ქართული სამართლებრივი სივრცისთვის ეს საკითხი ნაკლებად რელევანტური გახდა. რაც იყო ეს სპეკულაციები იმანაც ამოწურა საკუთარი თავი.

რაც შეეხება „ეფ-ეს-ბეს“ აგენტობას – საინტერესოა, რომ მტკიცებულებები არ იყო წარმოდგენილი. მე მართლა მაინტერესებს რაიმე მტკიცებულება იქნება თუ არა წარმოდგენილი მას შემდეგ, რაც ეს ბრალი გაჟღერდა. შეიძლება არსებობდეს ეს მტკიცებულებები, მაგრამ საზოგადოებისთვის, რა თქმა უნდა უნდა, იყოს ცნობილი, სამწუხაროდ, პრაქტიკულად თვეზე მეტია გასული და საზოგადოებისთვის ამ ბრალდებასთან დაკავშირებით მტკიცებულებები ჯერ არავის წარუდგენია, რაც ძალიან სამწუხაროა. საზოგადოების მიმართ ღიაობა აბსოლუტურად ყველას პასუხისმგებლობაა, მათ შორის, ჩვენი პარტნიორების მხრიდან,“ -განაცხადა კობახიძემ.

საუბარი შეიძლება იყოს არა სალომე ზურაბიშვილის და გიორგი გახარიას ალიანსზე, არამედ „ნაციონალური მოძრაობის“ ანტიქართულ კოალიციაზე, რომელიც იკვრება მომავალი არჩევნებისთვის, იმაზე, ვინ გახდება და არ გახდება ამ ანტიქართული კოალიციის ნაწილი, – ამის შესახებ საქართველოს პარლამენტის თავმჯდომარე შალვა პაპუაშვილმა გიორგი გახარიას და სალომე ზურაბიშვილის შესაძლო ალიანსთან დაკავშირებულ კითხვაზე პასუხისას განაცხადა.

პაპუაშვილის თქმით, „ნიშანდობლივია ის სახეცვლილება, რომელიც გიორგი გახარიამ და სალომე ზურაბიშვილმა განიცადეს მას შემდეგ, რაც გადავიდნენ „ნაციონალური მოძრაობის“ ბანაკში“.

„რაც შეეხება შესაძლო ალიანსს, ვერ გეტყვით, მათ უნდა გასცენ ამაზე პასუხი. მგონი, ძალიან ნიშანდობლივია ის სახეცვლილება, რომელიც როგორც გიორგი გახარიამ, ისე სალომე ზურაბიშვილმა განიცადეს მას შემდეგ, რაც გადავიდნენ „ნაციონალური მოძრაობის“ კალაპოტში და ბანაკში. ერთი ერთზე ხდება, პირდაპირ ეთერში ვაკვირდებით ხოლმე ამ სახეცვლილებას, როგორ იცვლიან რიტორიკას, როგორ იცვლიან დამოკიდებულებას, როგორ ესხმიან თავს სახელმწიფო ინსტიტუტებს, ერთი-ერთში როგორ ხდება ხოლმე ამ დროს „ნაციონალური მოძრაობის“ მეთოდების შეთვისება. ასე რომ, აქ საუბარი შეიძლება იყოს არა სალომე ზურაბიშვილის და გიორგი გახარიას ალიანსზე, არამედ „ნაციონალური მოძრაობის“ ანტიქართულ კოალიციაზე, რომელიც იკვრება მომავალი არჩევნებისთვის, იმაზე, ვინ გახდება და არ გახდება ამ ანტიქართული კოალიციის ნაწილი“, – განაცხადა შალვა პაპუაშვილმა.

„მაუწყებლობის შესახებ“ კანონში ცვლილებების მიმართ არავითარი პოლიტიკური ინტერესი არ გვაქვს, არის ევროკავშირის დირექტივა, რომელიც სრულდება, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კობახიძის თქმით, რეგულაციები თავიდან-ბოლომდე ევროკავშირის დირექტივას ეფუძნება.

„კანონპროექტი გაგზავნილია ევროკავშირში, ვარიანტებიც შევთავაზეთ. სამიდან ერთ-ერთ ვარიანტს თითი დაადეს და მას ვიღებთ, დამთავრებული ამბავია. უხამსობაზე ჩანაწერი ძველია და რჩება, როგორც მოქმედებდა წარსულში, ასევე იმოქმედებს დღესაც. კულტურის საქმე რაც არის, ამაში არ ვერევით. პროექტის დეტალებიც კი არ ვიცი, კენჭისყრამდე გავეცნობი და რატომ? – არავითარი პოლიტიკური ინტერესი ცვლილებების მიმართ არ გვაქვს, არის ევროკავშირის დირექტივა, რომელიც სრულდება. ევროკავშირის არჩევანი იყო ჯერ თვითრეგულირება და შემდეგ კომისია. სამიდან ეს ვარიანტი აირჩიეს. ვუთხარით, რასაც გვეტყვით, იმას გავაკეთებთო. ვინმეს ეს კანონპროექტი თუ არ მოსწონს, ევროკავშირს უნდა ელაპარაკოს. ჩვენ არავითარი პოლიტიკური ინტერესი არ გვაქვს. რაც შეეხება სიძულვილის ენის დეფინიციას, მაქსიმალურად ვიწროდ არის ჩამოყალიბებული, რომ ინტერპრეტაცია არ მიეცეს. თუ ვინმეს კანონპროექტი მაინც აშფოთებს, ევროკავშირს უნდა ესაუბრონ. სიძულვილის ენაზე ვიწრო გაგებით არის საუბარი“, – განაცხადა ირაკლი კობახიძემ.

საპრეზიდენტო უფლებამოსილების ვადის განმავლობაში პრეზიდენტი არის ხელშეუვალი კონსტიტუციის თანახმად, მხოლოდ იმპიჩმენტის წესით შეიძლება ამ შემთხვევაშიც მისი პასუხისგებაში მიცემაც, სხვა შემთხვევაში არის შეუძლებელი, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, პრეზიდენტი არ აფინანსებდა ვიზიტებს სახელმწიფო ბიუჯეტიდან, რადგან იცოდა, რომ მას არ ჰქონდა ვიზიტების განხორციელების ნებართვა.

„რატომ არ აფინანსებდა ბიუჯეტიდან მის არალეგიტიმურ ვიზიტებს? მას ეშინია პრეზიდენტობის შემდგომი პერიოდის, შეიძლება, ამ წლის განმავლობაში მის მიმართ ვერ აღიძრას საქმე, მაგრამ როგორც კი ამოიწურება საპრეზიდენტო უფლებამოსილების ვადა, მაშინვე შეიძლება, მოხდეს ასეთი სისხლის სამართლებრივი საქმის აქტუალიზაცია, ამიტომ ეშინოდა მას სისხლის სამართლებრივი კანონმდებლობის დარღვევის, როდესაც ბიუჯეტიდან არ გასწევდა ხარჯებს ვიზიტებისთვის. გუშინდელი დღის შემდეგ საერთოდ არ არის აქტუალური და საინტერესო სალომე ზურაბიშვილი. გუშინდელი დღიდან ის რჩება მხოლოდ „ნაცმოძრაობის“ პრეზიდენტად, ამ ქვეყანას ვერაფერს დაუშავებს, როგორც სამადაშვილს და ხაბეიშვილს არ შეუძლიათ არაფრის დაშავება ამ ქვეყნისთვის, ასევე ვერ დაუშავებს სალომე ზურაბიშვილი“, – განაცხადა კობახიძემ.

ლილუაშვილთან კითხვა მექნება „მეორე ფრონტთან“ დაკავშირებით „ქართული ოცნების“ პროპაგანდაზე – სუს- ის ანგარიშში წერია, რომ მეორე ფრონტზე რუსული დეზინფორმაცია ოკუპირებულ ტერიტორიებზე ანექსიურ პროცესებს აძლიერებს,- ამის შესახებ ჟურნალისტებთან ოპოზიციონერმა დეპუტატმა თეონა აქუბარდიამ განაცხადა.

როგორც მან აღნიშნა, კითხვები ასევე შეეხება ფარცხალაძეს და რუსეთის სპეცსამსახურების ქმედებებს საქართველოში.

„სუს-ის ანგარიშში მეორე ფრონტთან დაკავშირებით რუსულ დეზინფორმაციაზე წერია, ამ მოცემულობაში როგორ აფასებს სუს-ის უფროსი „ქართული ოცნების“ პროპაგანდას მეორე ფრონტზე, რამდენადაც ანგარიშში წერია, რომ ეს აძლიერებს რუსეთის ანექსიურ პროცესებს ოკუპირებულ აფხაზეთსა და ცხინვალში. მეორე კითხვა ეხება კონტრდაზვერვით საქმიანობას და რუსეთის სპეცსამსახურების მოქმედებებს საქართველოში, როგორ გაეპარა ფარცხალაძე სუს-ს? ვინ არის კიდევ მასთან ერთად, ეს სუს-მა უნდა იცოდეს და არ წერია ეს ამ ანგარიშში. იმავდროულად კითხვები მექნება ოკუპირებულ რეგიონებში შექმნილ ვითარებაზე, გაძლიერებულია ბორდერიზაცია, გატაცება და უკანონო პატიმრობა ჩვენი მოქალაქეების”, – განაცხადა აქუბარდიამ.

დღეს პარლამენტი პლენარულ სხდომაზე სახელმწიფო უსაფრთხოების სამსახურის საქმიანობის ანგარიშს მოისმენს.

დოკუმენტს სუს-ის ხელმძღვანელი გრიგოლ ლილუაშვილი წარადგენს.

სალომე ზურაბიშვილმა გუშინ გვითხრა, რომ ის არის სახელმწიფო, ფაქტობრივად, ლუი მეთოთხმეტის პათოსით საუბრობდა, – ამის შესახებ ჟურნალისტებს საქართველოს პარლამენტის თავმჯდომარე შალვა პაპუაშვილმა განუცხადა.

კითხვაზე, რატომ შეიცვალა „ნაციონალური მოძრაობის“ დამოკიდებულება სალომე ზურაბიშვილის მიმართ, რომელსაც ადრე აკრიტიკებდნენ, შალვა პაპუაშვილმა აღნიშნა, რომ „ნაციონალურ მოძრაობას“ სჭირდება სალომე ზურაბიშვილის მაგვარი ადამიანი პრეზიდენტად.

„ჯაშუში და რეზიდენტი, ეს არ არის მხოლოდ ეპითეტი. ეს, რა თქმა უნდა, არის შეფასება რაღაც ფაქტისა, რომელსაც ცდილობდა მაშინ „ნაციონალური მოძრაობა“. ამიტომ მათი სასაუბროა ეს, იტყუებოდნენ მაშინ, თუ იტყუებიან ახლა. ერთი რამ არის ნათელი, რომ „ნაციონალურ მოძრაობას“ სჭირდება სალომე ზურაბიშვილის მაგვარი ადამიანი პრეზიდენტად, რათა სწორედ ის მიზანი განახორციელონ, რომელიც მათ აქვთ სინამდვილეში. გუშინ ეს ითქვა კიდევაც“, – აღნიშნა შალვა პაპუაშვილმა.

მისივე თქმით, ეს არ არის სალომე ზურაბიშვილის მხრიდან ერთეული ექსცესი და ის, ზოგადად, ძირს უთხრის ქვეყნის სახელმწიფოებრივი წყობის პრინციპებს.

„ის ძირს უთხრის მთავრობას იმით, რომ ცდილობს, უზურპირება მოახდინოს და მიითვისოს მისი უფლებამოსილება. ის ძირს უთხრის საქართველოს პარლამენტს მისი დამოკიდებულებით, თუნდაც გუშინ, როდესაც მან არ იკადრა ქართველი ხალხის სახელით დეპუტატების მიერ დასმულ კითხვებზე პასუხი. ის ძირს უთხრის ეროვნულ ბანკს, როდესაც ითხოვდა ეროვნული ბანკის პრეზიდენტის გადადგომას. ის ძირს უთხრის საკონსტიტუციო სასამართლოს, როდესაც სამარცხვინოდ მოიხსენიებს საკონსტიტუციო სასამართლოს გადაწყვეტილებას. ძირს უთხრის საერთო სასამართლოებს, როდესაც ამაზე საუბრობს. ძირს უთხრის სახალხო დამცველის ინსტიტუტს. საერთო ჯამში, ის დაპირისპირებულია და ცდილობს, ძირი გამოუთხაროს ჩვენს სახელმწიფოს. ბოლოს მიადგა კიდევაც კონსტიტუციას და გუშინ რაც გვითხრა, იყო ის, რომ ის არის სახელმწიფო და გუშინ მე ვთქვი კიდევაც, რომ ფაქტობრივად, ლუი მეთოთხმეტეს პათოსით საუბრობდა, რომ სახელმწიფო არის ის და კონსტიტუცია არის ის. რაზეც ის იტყვის, რომ არის კონსტიტუცია, მას არაფრად მიაჩნია ქართველი ხალხი, მისი კონსტიტუცია და ის უფლებამოსილებები, რომლებიც განსაზღვრა ქართველმა ხალხმა სხვადასხვა კონსტიტუციურ ორგანოს შორის“, – განაცხადა შალვა პაპუაშვილმა.

გუშინ სპექტაკლი ვნახე, სადაც ყველა მონაწილეს თავისი როლი ჰქონდა, სხვათა შორის, ძალიან კარგად იყო კოსტუმირებულიც, ისეთი შედეგით არ დასრულდა, რომ ვინმეს გული დასწყვეტოდა, სცენარისტი შეიძლება, ბიძინა ივანიშვილი იყო ან „ქართულ ოცნებაში“ სხვა ვინმე ერთობა ასეთი რაღაცებით, – ამის შესახებ „გირჩის“ ლიდერმა, იაგო ხვიჩიამ განაცხადა.

ხვიჩიას თქმით, გუშინ პარლამენტში მიმდინარე მოვლენებს დამაჯერებლობა და რეალურობა აკლდა.

„როცა როლში შედიხარ, მეტი დამაჯერებლობაა საჭირო. სრული სიაფანდობაა სისხლის სამართლის დანაშაულზე საუბარი, რადგან ვიდრე პრეზიდენტია, ხელშეუხებელია და მისი სისხლის სამართლის პასუხისგებაში მიცემა ვერც მოხერხდება და ამას არც „ქართული ოცნება“ აპირებს. ეს იყო სპექტაკლი ქართველი ხალხისთვის, ვინც უნდა დაუჯეროს, რომ სალომე ზურაბიშვილი არის ოპოზიციონერი და მხარდამჭერები, ვინც „ქართულ ოცნებას“ ანტიდასავლური რიტორიკის გამო ხელიდან გაუვარდა, სალომე ზურაბიშვილის საშუალებით დაიბრუნოს“, – განაცხადა ხვიჩიამ.

ვისაც უნდა, აჩვენოს პატივისცემა ქართველი ხალხის და სახელმწიფოს მიმართ, უნდა აჩვენოს პატივისცემა საქართველოს კონსტიტუციის მიმართ, ჩვენი მოლოდინია, რომ თუ იქნება ასეთ ვიზიტებზე მოთხოვნა, მოიკითხავენ არის თუ არა ნებართვა მთავრობისგან, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პაპუაშვილის თქმით, პრეზიდენტს მთავრობის ნებართვა სჭირდება ოფიციალური ვიზიტისას, სხვა შემთხვევაში, ის ვერ იქნება ოფიციალური ვიზიტი.

„ამ სავარაუდო მოგზაურობებს აქვს მეორე მხარეც, ეს არის მიმღები მხარე. ასეთ დროს ის უხერხულობაში ჩააგდებს მიმღებ მხარეს. თუ აქამდე მისი ვიზიტების დროს ჩვენს მეგობრებს შეეძლოთ, ეთქვათ ან ამბობდნენ, რომ არის საკითხი, რომელიც ჯერ გარკვევას საჭიროებს ქვეყნის შიგნით, საკონსტიტუციო სასამართლოს დასკვნა არის მნიშვნელოვანი, რომ გავერკვეთო, 16 ოქტომბრის შემდეგ ჩვენი პარტნიორებისთვისაც ცხადია, რომ ასეთი ვიზიტი არის საქართველოს კონსტიტუციის დარღვევა. ამიტომ, მათი მხრიდან არ უნდა იყოს ხელშეწყობა ამ დარღვევისა. ჩვენ ველოდებით თანამეგობრობისგან დამოუკიდებელი და თავისუფალი ქვეყნებისა, რომლის ნაწილიც გავხდით 30 წლის წინ, გავხდით იმიტომ, რომ გვინდოდა, გვქონოდა დამოუკიდებელი სახელმწიფო, ჩვენი კონსტიტუცია, რომელსაც პატივს სცემდნენ სხვა სახელმწიფოები“, – განაცხადა პაპუაშვილმა.

პარლამენტის თავმჯდომარის განცხადებით, სახელმწიფოს პატივისცემა გამოიხატება ქვეყნის კონსტიტუციის დაცვით.

„ჩვენი ქვეყნის პატივისცემა სხვების მხრიდან გამოიხატება ჩვენი კონსტიტუციის პატივისცემაში. თუ ჩვენი კონსტიტუცია ამბობს, რომ პრეზიდენტს არ აქვს უფლებამოსილება განახორციელოს ვიზიტი მთავრობის თანხმობის გარეშე, ჩვენმა პარტნიორებმაც უნდა სცენ ამას პატივი. ჩვენს ხინკალს და ხაჭაპურს პატივს სცემს ბევრი ადამიანი და მათ შორის ჩვენი ოკუპანტი ქვეყანაც პატივს სცემდა. ეს არ არის საკმარისი. ვისაც უნდა, აჩვენოს პატივისცემა ქართველი ხალხის და სახელმწიფოს მიმართ, უნდა აჩვენოს პატივისცემა საქართველოს კონსტიტუციის მიმართ. ჩვენი მოლოდინია, რომ თუ იქნება ასეთ ვიზიტებზე მოთხოვნა, მოიკითხავენ არის თუ არა ნებართვა მთავრობის, თუ არ არსებობს ასეთი თანხმობა, უარი იქნება ნათქვამი“, – განაცხადა პაპუაშვილმა.

სალომე ზურაბიშვილმა მილიონ ორასი ათასი ამომრჩევლის ლეგიტიმაცია გაცვალა რამდენიმე „ნაციონალის“ ლეგიტიმაციაში, გუშინდელი დღიდან ჩვენ გვყავს „ნაციონალური მოძრაობის“ არჩეული პრეზიდენტი, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

როგორც შალვა პაპუაშვილმა აღნიშნა, სალომე ზურაბიშვილი გუშინ „ნაციონალური მოძრაობის„ მფარველობის წყალობით ვერ ჩამოსცილდა თავის პოზიციას, თუმცა შედეგი არის ის, რომ მას აქვს უნდობლობა საპარლამენტო უმრავლესობის და მოსახლეობის უმრავლესობის.

„იმპიჩმენტის პროცესი საბოლოო ჯამში მივიდა იმ მომენტზე, რასაც ჩვენ ვამბობდით თავიდანვე, როდესაც წამოვიწყეთ იმპიჩმენტის პროცედურა და მივმართეთ საკონსტიტუციო სასამართლოს. ჩვენ მაშინ ვთქვით ორი რამ, ერთი – ჩვენი მოსაზრებით პრეზიდენტი არღვევდა კონსტიტუციას და გვჭირდებოდა ამ საკითხზე სამართლებრივი დასკვნა, მეორე – იქიდან გამომდინარე, რომ პრეზიდენტი სარგებლობს „ნაციონალური მოძრაობის“ პროტექციით და მფარველობით, ამ იმპიჩმენტის ბოლომდე მიყვანა პარლამენტში შეუძლებელი იქნებოდა. ზუსტად ეს ვნახეთ ჩვენ, რომ საბოლოო ჯამში ორივე საკითხი ასე მოხდა. პირველი – ამ მთლიანი პროცესის შედეგად ჩვენ გვაქვს პირველი სამართლებრივი ვერდიქტი, რომელმაც ბოლო ინსტანციით დაადგინა, რომ სალომე ზურაბიშვილმა დაარღვია კონსტიტუცია და დაარღვია არამხოლოდ რაიმე ტექნიკური ხასიათის ნორმა, არამედ მან შებღალა ერთ-ერთი ფუძემდებლური ნორმა ამ კონსტიტუციაში, რომელიც მთავრობას აკისრებს ექსკლუზიურ უფლებამოსილებას საგარეო პოლიტიკის განხორციელებაში. სასამართლომ დაადგინა, რომ საქართველოს პრეზიდენტმა მიითვისა სხვა კონსტიტუციური ორგანოს უფლებამოსილება და უზურპირებას ახდენდა ამ უფლებამოსილების, ეს დაადგინა საკონსტიტუციო სასამართლომ, ეს არის სამართლებრივი ვერდიქტი, რომელსაც წყალი აღარ გაუვა.

რაც შეეხება პარლამენტის გადაწყვეტილებას, გუშინდელი შედეგი იყო პოლიტიკური ვერდიქტი, რომელიც სალომე ზურაბიშვილს გამოუტანა საპარლამენტო უმრავლესობამ საქართველოს მოსახლეობის უმრავლესობის სახელით. ჩვენ ვნახეთ გუშინ სალომე ზურაბიშვილი, რომელიც „ნაციონალური მოძრაობის“ მფარველობის წყალობით ვერ ჩამოსცილდა თავის პოზიციას, თუმცა შედეგი არის ის, რომ მას აქვს უნდობლობა საპარლამენტო უმრავლესობის და მოსახლეობის უმრავლესობის. ჩვენ რაც ვნახეთ გუშინ იყო ის რომ სალომე ზურაბიშვილმა მილიონ ორასი ათასი ამომრჩევლის ლეგიტიმაცია გაცვალა რამდენიმე „ნაციონალის“ ლეგიტიმაციაში, გუშინდელი დღიდან ჩვენ გვყავს „ნაციონალური მოძრაობის“ არჩეული პრეზიდენტი“, – განაცხადა შალვა პაპუაშვილმა.