პალესტინური მედია იტყობინება, რომ „ჰამასის“ პოლიტიკური ბიუროს პირველი და ერთადერთი ქალი წევრი ისრაელის საჰაერო იერიშის შედეგად დაიღუპა. ამის შესახებ BBC წერს.
გამოცემის ინფორმაციით, პოლიტიკური ბიურო „ჰამასის“ გადაწყვეტილებების მიმღები მთავარი ორგანოა. მათივე ცნობით, ჯამილა ალ-შანტი ორგანოს წევრად 2021 წელს აირჩიეს.
ის „ჰამასის“ თანადამფუძნებლის, აბდელ აზიზ ალ-რანტისის ქვრივი იყო და „ჰამასში“ ქალთა მოძრაობა დააფუძნა.
ალ-შანტის გარდაცვალების დეტალები ამ ეტაპზე უცნობია.
სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.
