სიების ჩახსნა შესაძლებელი გახდება მას შემდეგ, რაც პარლამენტის უფლებამოსილება იქნება ცნობილი, ამის შემდეგ ჩვენ იურიდიულად ყველაფერს სწორად გავაკეთებთ – დღეს იქ არ წავალთ, სადაც გვეტყვიან, უკაცრავად, სამუშაო საათები არ არის, – ამის შესახებ „ძლიერი საქართველოს“ ერთ-ერთმა ლიდერმა, ანა დოლიძემ „პალიტრანიუსის“ გადაცემაში „პოლიტიკური სივრცე“ განაცხადა.

როგორც დოლიძემ „ძლიერი საქართველოს“ პარლამენტში არ შესვლასთან დაკავშირებით საუბრისას განაცხადა, პარტიის მიზანი არა მხოლოდ პარლამენტში არ შესვლაა, არამედ არის ის, რომ საერთოდ არ შედგეს მეთერთმეტე მოწვევის პარლამენტის პირველი სხდომა.

„რა თქმა უნდა, ვაპირებთ საპარლამენტო სიების ჩახსნას და ეს ნათქვამიც გვაქვს. „ძლიერი საქართველო“ ვართ კოალიცია, სადაც 4 პარტია შედის: „პარტია ხალხისთვის“, „ლელო“, „თავისუფლების მოედანი“ და „მოქალაქეები“. ცალ-ცალკე ყველა ლიდერს ეს განცხადება გაკეთებული აქვს. იძულებული ვარ ავხსნა რა ხდება დღეს, რა საკითხთან გვაქვს საქმე და იძულებული ვარ, რომ მოქალაქეებისთვის განვმარტო იურიდიული საკითხების მოკლე კურსი. მოქალაქეები იმსახურებენ იმას, რომ ვთქვათ – ჩვენ ამ პარლამენტში არ შევალთ და ამ პარლამენტს ქმედით უნარიანობას არ მივანიჭებთ.

გარდა ამისა, ჩვენი ამოცანაა, საერთოდ არ შედგეს ეს სხდომა. აბა რატომ ვართ ქუჩაში?! ორი კვირაა ქუჩებს ვკეტავთ, ყველა არა, ჩვენ ვკეტავთ ქუჩებს, იმიტომ, რომ არ გვინდა ეს სხდომა საერთოდ შედგეს. ჩვენ ყველანაირი ძალებით ვეცდებით, რომ სხდომა არ შედგეს“, – განაცხადა დოლიძემ.

როგორც ის განმარტავს, სიების ჩახსნა შესაძლებელი იქნება მაშინ, როდესაც პარლამენტის უფლებამოსილება იქნება ცნობილი, ხოლო ყველა განცხადება, რაც მანამდე კეთდება, დოლიძის თქმით, არის სიმბოლური ტიპის პოლიტიკური განცხადებები.

„როდესაც საუბარია უფლებამოსილების შეწყვეტაზე და სიების ჩახსნაზე, ეს არის სხვადასხვა რაღაც. ორივე შეიძლება მოხდეს მხოლოდ მაშინ, როდესაც პარლამენტის უფლება-უნარიანობა იქნება ცნობილი. საარჩევნო კოდექსის 120-ე მუხლი. მაპატიეთ, ვისაც იურიდიულზე არ გინდოდათ ჩაბარება. ყველაფერი რაც მანამდე კეთდება, მსგავსი განცხადებები არის სიმბოლური ტიპის პოლიტიკური განცხადებები.

რამდენჯერაც ვიღაცას მოაფიქრდება – „აბა კიდე გააკეთეთ განცხადება!“… სიების ჩახნა შესაძლებელი გახდება მას შემდეგ, რაც პარლამენტის უფლებამოსილება იქნება ცნობილი, ამის შემდეგ ჩვენ იურიდიულად ყველაფერს სწორად გავაკეთებთ. დიდი ხანია განცხადებები უკვე დაწერილი გვაქვს. დღეს იქ არ წავალთ, სადაც გვეტყვიან, რომ უკაცრავად, სამუშაო საათები არ არის“,- განაცხადა ანა დოლიძემ.

გარდა ამისა, დოლიძემ ოპოზიციის სამოქმედო სტრატეგიაზე საუბრისას აღნიშნა, რომ მათი მთავარი ამოცანაა ხელი შეუშალონ ცესკოს შემაჯამებელი ოქმის შედგენაში და არ შედეგს პარლამენტის სხდომა.

„ჩვენი შუალედური ამოცანა ხელი შევუშალოთ ცესკოს შემაჯამებელი ოქმის შედგენაში. ის ამას უახლოეს დღეებში გააკეთებს. საპროტესტო მოძრაობა მუშაობს იმაზე, რომ ეს გააკეთოს. მეორე შუალედური ამოცანაა, არ შედეგს საქართველოს პარლამენტის სხდომა, ამ ყველაფერს ვაკეთებთ მშვიდობიანი წინააღმდეგობის მეშვეობით. ამის შემდეგ, მიუხედავად იმისა თუ რა მოხდება, ჩვენი ბრძოლა გრძელდება. ეს არის პროევროპული მოძრაობა, აპოთეოზი არის საქართველოს გათავისუფლება და ევროკავშირში შეყვანა“, – განაცხადა დოლიძემ.

საქართველოს ევროკავშირში უნდა ყოფნა და არა ახალ ნეოკოლონიურ მდგომარეობაში ჩადგომა, – განაცხადა საპროცედურო საკითხთა და წესების საპარლამენტო კომიტეტის თავმჯდომარემ, ირაკლი ქადაგიშვილმა ევროპელი პოლიტიკოსების ნაწილის მიერ საქართველოში ლგბტ პროპაგანდის საწინააღმდეგო და გამჭვირვალობის კანონების გაუქმების მოთხოვნის შეფასებისას.

„დაგველაპარაკეთ ჩვენ როგორც ზრდასრულ სახელმწიფოს. უნდა გვითხრან, რატომ არის გამჭვირვალობა ევროპის ყველზე დიდი მტერი. საკუთარ ფასეულობებზე გადაბიჯება არის ის, რასაც ევროკავშირის რეალურ ფასეულობასთან კავშირი არ აქვს და რაც არის გარკვეულწილად, ნეოკოლონიალური პოლიტიკის რეციდივები. საქართველო ამ რეციდივების ქვემდებარე არ იქნება. საქართველოს ევროკავშირში უნდა ყოფნა და არა ახალ ნეოკოლონიურ მდგომარეობაში ჩადგომა“, – განაცხადა ირაკლი ქადაგიშვილმა.

არაერთგზის გვისაუბრია ამაზე და კიდევ შეგვიძლია ვისაუბროთ, აუცილებლად გადაიტვირთება ურთიერთობები ჩვენს სტრატეგიულ პარტნიორებთან, – განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ დავით მათიკაშვილმა.

„ჩვენ აქამდეც გვსმენია საკითხები, თემები ევროპელი ლიდერებისგან, რომლებიც შემდგომ ისე არ გადაწყვეტილა, როგორც იმ მომენტში ამ სიტყვებში შინაარსი საზოგადოებას ამცნობდა. მაგალითად, მაკრონის სიტყვებს გაგახსენებთ, როდესაც კანდიდატის სტატუსი ვერ მიიღო საქართველომ, ეს განმარტა თავისი შესაბამისი ლოგიკით, რომ საქართველო გეოგრაფიულად მოცილებულია ევროპულ არეალს და ა.შ. გავიდა გარკვეული პერიოდი ამ განცხადების შემდგომ და საქართველომ მიიღო კანდიდატის სტატუსი. მიიღო ღირსებით, მიიღო ღირსეულად და ის, რომ საქართველო გეოგრაფიულად ამ წუთას არ წარმოადგენს ევროკავშირის მოსაზღვრეს, არ ყოფილა იმის დამაბრკოლებელი, რომ საქართველოს კანდიდატის სტატუსი მიეღო.

ზუსტად იმავეს გეტყვით ახლაც, ჩვენ არაერთგზის გვისაუბრია ამაზე და კიდევ შეგვიძლია ვისაუბროთ, აუცილებლად გადაიტვირთება ეს ურთიერთობები ჩვენს სტრატეგიულ პარტნიორებთან. ომი, სამწუხაროდ, ჯერ კიდევ მიმდინარეობს უკრაინაში. ომის დასრულება უკრაინაში, რომელსაც ჩვენ ყველანი ველოდებით, განაპირობებს ახალ პოლიტიკურ მიდგომებს, მათ შორის საქართველოსთან მიმართებით ევროკავშირის და დანარჩენი ცივილიზებული მსოფლიოს მხრიდან, რადგანაც, საქართველოს ზოგიერთი ძალების, ასე ვთქვათ, არეალში და თვალსაზრისით, აღარ ექნება ის გამორჩეული მნიშვნელობა უკრაინასთან მიმართებით, რუსეთთან მიმართებით არსებულ პოლიტიკურ ვითარებაში, რაც აქვს დღეს, როდესაც მიმდინარეობს უკრაინაში ომი.

ჩვენ კარგად ვიცით, რომ შეერთებულ შტატებში შეიცვლება დამოკიდებულება და პოლიტიკა. ყოველ შემთხვევაში არჩეული პრეზიდენტის წინასაარჩევნო პლატფორმა და მანამდე არსებული განცხადებები სწორედ ამაზე მეტყველებს.

ის, რომ მაგალითად ოჯახური ღირებულებების შესახებ კანონის გაუქმებას გვთხოვენ ჩვენ ევროპიდან და არაევროპულს ეძახიან, შევხედოთ ამას საკითხის მნიშვნელობის ჭრილში. შეერთებული შტატების არჩეულმა პრეზიდენტმა დონალდ ტრამპმა თქვა, რომ ის აუცილებლად ინიციატივით გამოვა მსგავსი საკითხის. ეს ზოგადი საერთო ფედერალური კანონი სახით იქნება შეერთებულ შტატებში თუ რა ფორმა ექნება ლგბტ პროპაგანდის აკრძალვას და ოჯახური ღირებულებების დაცვას, ეს ჩვენ არ ვიცით, მაგრამ ეს იქნება აუცილებლად, ვინაიდან ტრამპმა ამის შესახებ თქვა. ახლა, რას ამბობენ იგივე ევროპული სახელმწიფოების ლიდერები, საინტერესოა იგივე წერილით მიმართავენ შემდგომ ტრამპს და სთხოვენ, რომ მოდით გააუქმეთ ეგ კანონი, თორემ ევროკავშირს და შეერთებულ შტატებს შორის ურთიერთობები გადაიხედება. თქვენ გჯერათ ამის? მე არ მჯერა. არ მჯერა იმიტომ, რომ ეს მოცემულობა არ არის ადეკვატური მსოფლიო პოლიტიკური ვითარების და გეოპოლიტიკური მოცემულობის“, – აღნიშნა დავით მათიკაშვილმა.

უცხო ქვეყნის პოლიტიკოსების მხრიდან ჩვენი ქვეყნის შიდა პოლიტიკურ პროცესში ჩარევას დიპლომატიასთან არანაირი საერთო არ აქვს, არც იმ განცხადებებს, რომელიც გუშინ მოვისმინეთ. როთი და პავილიონისი რასაც ამბობდნენ, ეს ადრეც მოგვისმენია, – ამის შესახებ დიპლომატმა კოტე ჟღენტმა განაცხადა.

„ხალხის მიერ არჩეული ხელისუფლების ასე მოხსენიება, როგორც ისინი ადრე აკეთებდნენ და გუშინ კიდევ ბრძანეს გამოსვლების დროს, ამას დიპლომატიასთან არანაირი კავშირი არ აქვს. ისინი არიან სხვადასხვა ქვეყნების პარლამენტების საგარეო საქმეთა კომიტეტების თავმჯდომარეები. ეს სტატუსი ხომ პასუხისმგებლობას აკისრებს მათ.

მათი ეს ვიზიტი და მთელი „ღონისძიება“ უფრო პიარ სვლა იყო, ვიდრე რაიმე რეალურის მომტანი მათთვის და ოპოზიციისთვის. ეს პიარი იყო რადიკალური ოპოზიციის მომხრეებისთვის, რომ აი კვლავ ჩამოვიდა ევროპიდან დიდი დელეგაცია და ისინი ჩვენ მხარს გვიჭერენ იმ კუთხით, რომ მათ მომხრეებს მიაწოდონ დამატებითი მასალა პოზიციების გაძლიერებისთვის.

ჩვენც და საზოგადოებაც, ძალიან კარგად ვხვდებით ვინ გადაიხადა მათი ჩამოსვლის თანხები, საერთოდ ვინ დაგეგმა ეს ყველაფერი. როდესაც მიხაილ როთს ჰკითხეს თქვენს ვიზიტს ხომ არ მიიჩნევთ შიდა საქმეებში ჩარევადო, მან უპასუხა არ მივიჩნევ, რადგან ხომ შეიძლება თქვენმა პრეზიდენტმა დაგვპატიჟა ოპოზიციასთან სალაპარაკოდო. ამაზე მეტი ლუსტრაცია რა გნებავთ. ეს იმას ნიშნავს, რომ თუ ეს მართალია, ქვეყნის ჯერ კიდევ პრეზიდენტმა, კიდევ ერთხელ ითამაშა ოპოზიციის თამაში და კიდევ ერთხელ შეუწყო ხელი სიტუაციის დაძაბვას და არეულობის შექმნას ქვეყანაში“, – აღნიშნა კოტე ჟღენტმა “ქრონიკის” ეთერში.

„ძლიერი საქართველოს“ წევრი, ბადრი ჯაფარიძე არჩევნების შესაძლო გაყალბების საქმის გამოძიების ფარგლებში, პროკურატურაში დაიბარეს. ამის შესახებ ინფორმაციას ჯაფარიძე სოციალურ ქსელში ავრცელებს.

მისი თქმით, დაკითხვას მაგისტრი მოსამართლის თანდასწრებით გეგმავს, რადგან ჯაფარიძის აზრით, პროკურატურას არჩევნების გაყალბების გამოძიება არ აქვს მიზნად დასახული, არამედ „ყალბი პროცესის შექმნა“ სურს.

„გენერალური პროკურატურიდან დამიკავშირდნენ არჩევნების გაყალბების საქმესთან დაკავშირებით გამოკითხვაზე! დამოუკიდებელი პროკურატურა პოლიტიკოსების გამოკითხვით და მათგან მტკიცებულებების წარდგენის მოთხოვნით კი არ იქნებოდა დაკავებული, არამედ თვითონ ექნებოდა უკვე უამრავი მტკიცებულება შეგროვებული !

ცხადია, “ოცნების” პროკურატურას არჩევნების გაყალბების გამოძიება არ აქვს მიზნად დასახული, არამედ სურთ ყალბი პროცესის შექმნა და შემდეგ თქმა რომ არჩევნების გაყალბების მტკიცებულებები ვერ მოიპოვეს.

მაგისტრი მოსამართლის თანდასწრებით კიდევ ერთხელ ვისაუბრებთ ამ მტკიცებულებებზე”, – წერს ჯაფარიძე.