ჩვენ ვეხმარებით ქართველ ხალხს თავისუფლებისა და დემოკრატიისკენ სვლაში, – ამის შესახებ „ამერიკის ხმასთან“ ინტერვიუში ამერიკელი კონგრესმენები აცხადებენ.

გამოცემასთან ინტერვიუში კონგრესმენი და წარმომადგენელთა პალატის საგარეო ურთიერთობათა კომიტეტის წევრი ჯო უილსონი ამბობს, რომ საქართველო დემოკრატიის კარგი მაგალითი იყოს კავკასიის მთელ რეგიონში და გვსურს, რომ კიდევ უფრო მეტად მნიშვნელოვანი გახდეს.

„რესპუბლიკელები და დემოკრატები, ორ პარტიაში, ორივე პალატაში ვმუშაობთ, რადგან გვსურს, რომ საქართველო დემოკრატიის კარგი მაგალითი იყოს კავკასიის მთელ რეგიონში. აი, ამდენად მნიშვნელოვანია საქართველო, ყოველთვის იყო, და გვსურს, რომ კიდევ უფრო მეტად მნიშვნელოვანი გახდეს”, – მიიჩნევს კონგრესმენი.

ჰელსინკის კომისიის კიდევ ერთი წევრი, კონგრესმენი სტივ კოენი ამბობს, რომ „საქართველოს ხელს ჰკრავენ მოსკოვისკენ“.

„ჩვენ ვალდებულნი ვართ ქართველი ხალხის წინაშე, დავეხმაროთ დაიცვან თავისი დემოკრატია და პრო-დასავლური მომავალი. ეს კანონი სწორედ ამას აკეთებს და ქმნის საფუძველს ახალი ფურცლის დასაწყებად, უფრო მრავალფეროვანი და გაფართოებული ორმხრივი პარტნიორობისთვის“, – ამბობს სტივ კოენი.

კიდევ ერთი კონგრესმენის, გრეგორი მიქსის განცხადებით, „ის ქვეყნები, რომლებიც რუსეთთან პარტნიორობას, ან სხვაგვარ თანამშრომლობას ირჩევენ, უნდა გაფრთხილდნენ, რადგან ეს არაა დემოკრატიული ქვეყნების ადგილი“.

“ჩვენთვის პრობლემაა ნებისმიერი, ვისაც სურს ვლადიმირ პუტინის რეჟიმის მხარეს იყოს. ეს დემოკრატიისთვის საფრთხეა ყველგან. ამიტომ, ვფიქრობ ის ქვეყნები, რომლებიც რუსეთთან პარტნიორობას, ან სხვაგვარ თანამშრომლობას ირჩევენ, უნდა გაფრთხილდნენ, რადგან ეს არაა დემოკრატიული ქვეყნების ადგილი. არაა ის, სადაც უნდა ვიდგეთ, როგორც დემოკრატიული ქვეყნები. თუკი სხვაგვარად იქცევი, მაშინ ამბობ, რომ გსურს ავტოკრატიული ქვეყნების და მათი ტიპის დიქტატორების ნაწილი იყო. ვიმედოვნებ, ისინი ამას გაითვალისწინებენ”, – აცხადებს გრეგორი მიქსი.

რუსეთს ოკუპირებული აქვს ტერიტორიების დიდი ნაწილი, ათეულობით სამხედრო ობიექტი აქვს და 700 მეტრი დაშორება აქვს მთავარ გზებზე, რომელზეც უახლოეს პერიოდში უნდა გაიაროს ტვირთებმა ჩინეთიდან ევროპის მიმართულებით. წარმოიდგინეთ რა საფრთხეში ვართ და ამ საფრთხის საპასუხოდ იმას კი არ გვეუბნება ვინმე, რომ მოდით დამატებით ვიმსჯელოთ, მოდით დესტაბილიზაციის საფრთხეები განვიხილოთ, გვეუბნებიან, რომ დაგასანქცირებთ თუკი თქვენ თავდაცვის პოზიციიდან არ გამოხვალთო, – ამის შესახებ პარლამენტის პირველმა ვიცე-სპიკერმა, გიორგი ვოლსკიმ განაცხადა.

მისი თქმით, გამჭვირვალობის კანონი ყველაზე რბილი ვერსიაა იმასთან შედარებით, რაც ფრანგულ, უკვე მიღებულ კანონში წერია.

„გამჭვირვალობის კანონმა პასუხისმგებლობა უნდა გაზარდოს დონორების, არასამთავრობო ორგანიზაციების ქართული საზოგადოების წინაშე. ძალიან გაუჭირდება და შეუძლებელიცაა, რომ წარმოაჩინოს ის, თუ რა თანხას განაგებს და ამ თანხის რა ნაწილია მიმართული იმისკენ, რომ ვიღაცამ „მოლოტოვის კოქტეილი“ დაამზადოს და პოლიციას ესროლოს. ეს რეალობა თუ არსებობს, ამასთან დაკავშირებით ანგარიშის გამოქვეყნება არ უნდათ და ჩვენ ვამბობთ, რომ ამან შეიძლება გამოიწვიოს დესტაბილიზაციის პროცესი და ამ გულმხურვალე თუ გაუცნობიერებელი ახალგაზრდების ნაწილის ზურგზე ხელისუფლებისკენ წამოიყვანოს ის ხელისუფლება, რომელიც უკრაინის შეკვეთის შესრულებაში ჩაერთვება. ეს არის ფორმულა და ამისთვის გვინდა ეს კანონი და არა ანტიდასავლური რაღაც პოზიციებისთვის, რომელიც კატეგორიულად არის უსამართლობა ჩვენ მიმართ ასეთი რამის თქმა“, – აღნიშნა ვოლსკიმ.

ეკონომიკურ სანქციებსა და სამხედრო დაპირისპირების თემებზე თუ ჩვენ ვერ ვთანხმდებით რადიკალურ ოპოზიციასთან, ეს იმას არ ნიშნავს, რომ ჩვენი პოზიცია ანტიდასავლურია. ეს იმას ნიშნავს, რომ ჩვენი პოზიცია არის სწორედაც ქართული ინტერესებიდან გამომდინარე, იმ უშველებელი პრობლემების ფონზე, რომელიც მსოფლიოში მიმდინარეობს, – ამის შესახებ პარლამენტის პირველმა ვიცე-სპიკერმა, გიორგი ვოლსკიმ განაცხადა.

იგი ევროპისა და ევრაზიის საკითხებში ამერიკის სახელმწიფო მდივნის თანაშემწის, ჯიმ ო’ბრაიანის განცხადებას გამოეხმაურა. კერძოდ, ო’ბრაიანის თქმით, ენტონი ბლინკენის განცხადების საფუძველზე აშშ სანქცირებაზე სიას არ გამოაქვეყნებს.

ვოლსკიმ საზოგადოებას სენატში ჯიმ ო’ბრაიანის მოხსენებაც შეახსენა, რომელმაც ასევე განაცხადა, რომ საქართველოს ტერიტორიაზე რუსეთი ვერანაირ სანქციებს თავს ვერ აარიდებს.

„ორი თემაა – ეს არის ეკონომიკური სანქციები და სამხედრო დაპირისპირება. ამ ორ თემაში თუ ჩვენ ვერ ვთანხმდებით რადიკალურ ოპოზიციასთან, ეს იმას არ ნიშნავს, რომ ჩვენი პოზიცია ანტიდასავლურია. ეს იმას ნიშნავს, რომ ჩვენი პოზიცია არის სწორედაც ქართული ინტერესებიდან გამომდინარე, იმ უშველებელი პრობლემების ფონზე, რომელიც მსოფლიოში მიმდინარეობს. აქედან გამომდინარე, დავიწყეთ საუბარი სანქცირებაზე და მინდა პასუხი გაგცეთ, შესაძლოა, ზუსტად ვერ გითხრათ, რატომ არის სია გამოუქვეყნებელი, ან რა აკავებს მას, მაგრამ ეს არსებული სიტუაცია წარმოადგენს უკიდურესად უსამართლო დამოკიდებულებას ჩვენ მიმართ, ვინაიდან პრორუსული არც კანონს სცხია და მით უმეტეს, ხელისუფლების არცერთი ნაბიჯი, ან რაიმე გადაწყვეტილება არ გვახსოვს, რომელიც რუსულ ინტერესებს შეესაბამება საქართველოში და ზოგადად, კავკასიაში. ამის საპირისპიროდ, 2012 წლამდე შემიძლია ხელისუფლების ათეული ნაბიჯი ჩამოგითვალოთ, რომელიც რეალურად იყო სწორედაც რუსეთის ინტერესებზე მორგებული. აქედან გამომდინარე, მე იმედს გამოვთქვამ, რომ პოლიტსაბჭოს მოწოდებასთან დაკავშირებით, რაღაც რეაგირება შესაძლოა არის, თუმცა ამაზე ვერაფერს გეტყვით“, – აღნიშნა ვოლსკიმ.

საერთაშორისო ტურბულენტობის დროს მყარად ვდგავართ საერთაშორისო საზოგადოებასთან ერთად, მაგრამ არის გარკვეული ეგზისტენციალური, სასიცოცხლო მნიშვნელობის ხაზები, რომელსაც ვერ გადავკვეთ იმიტომ, რომ ტერიტორიის 20 პროცენტი ოკუპირებულია და ქვეყანაში აგრესიის სხვადასხვა ფორმით განხორციელება ადვილია, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

მისი თქმით, საქართველოს ეროვნული ინტერესების უზრუნველყოფის ხარჯზე საქართველოსთან ურთიერთობა კონტრპროდუქტიულია.

„ევროკავშირშიც ხვდებიან, რომ ის ენა, რომელიც გამოყენებულია საქართველოს წინააღმდეგ, მაშინაც გამოიყენეს, როდესაც კანდიდატის სტატუსი უსამართლოდ არ მოგვანიჭეს, ხედავენ ალბათ, რომ კონტრპროდუქტიულია. საქართველოს ეროვნული ინტერესების უზრუნველყოფის ხარჯზე საქართველოსთან ურთიერთობა კონტრპროდუქტიულია. არ ვითხოვთ ბევრს არაფერს. ჩვენ ვითხოვთ – არა ორმაგ სტანდარტს, ვიყოთ ღია ურთიერთობაში, არ იყოს გამოყენებული უცხოური გავლენა საქართველოში პოლიტიკური პროცესების რევოლუციური გზით განვითარებისთვის. ამ საერთაშორისო ტურბულენტობის დროს ჩვენ მყარად ვდგავართ საერთაშორისო საზოგადოებასთან ერთად, მაგრამ არის გარკვეული ეგზისტენციალური, სასიცოცხლო მნიშვნელობის ხაზები, რომელსაც ვერ გადავკვეთ იმიტომ, რომ ტერიტორიის 20 პროცენტი ოკუპირებულია და აგრესიის სხვადასხვა ფორმა, ეკონომიკიდან დაწყებული, პირდაპირ სამხედრო კონფლიქტამდე, საქართველოში ძალიან ადვილად მოსახდენია“, – განაცხადა ირაკლი ქადაგიშვილმა.

მისი თქმით, აქედან გამომდინარე, საქართველოს ეს სასიცოცხლოდ მნიშვნელოვანი ინტერესები ყველას მხრიდან უნდა იყოს გათვალისწინებული.

„რაც შეეხება რეფორმებს, დემოკრატიას, საქართველო ნამდვილად უპირობოდ ლიდერი სახელმწიფოა, ამაში მათი დასკვნებიც მეტყველებს, როდესაც არ არის პოლიტიკური მიკერძოებულობა და არის მშრალი ობიექტური დასკვნები. ვხედავთ, რომ ლიდერი სახელმწიფო ვართ ყველა კანდიდატ სახელმწიფოს შორის და მთელ რიგ საკითხებში, უკვე წევრ სახელმწიფოებსაც ვუსწრებთ“, – განაცხადა ირაკლი ქადაგიშვილმა.

კითხვაზე, მოხდება თუ არა ევროკავშირის წევრობაზე მოლაპარაკების გახსნა, რა მოლოდინებია საქართველოში, ირაკლი ქადაგიშვილი ამბობს, რომ „როგორც ითქვა, არჩევნების შემდეგ დაიწყება მოლაპარაკებების გახსნაზე საუბარი“.

ყველაფერი დამოკიდებულია ქართველ ხალხზე, მას უდგას არჩევანი, იხსნას საკუთარი ქვეყანა არასწორი მიმართულებისგან ან შემოდგომაზე ყველანი დავსხდეთ თვითმფრინავებზე და წავიდეთ სხვა ქვეყანაში, სადაც რუსეთის, ჩინეთის და ირანის საფრთხე ნაკლებად გვემუქრება, – ამის შესახებ „გირჩის“ წევრმა, იაგო ხვიჩიამ განაცხადა.

მისი თქმით, ამ ეტაპზე საქართველო აშშ-ს და დასავლეთს რუსეთზე, ჩინეთზე და ირანზე ცვლის, ხოლო ქვეყნის მეგობრები საზოგადოების გამოფხიზლებას ცდილობენ.

„საქმე ძალიან მარტივად არის. ამ წუთას აშშ-ს და დასავლეთს რუსეთზე, ჩინეთზე და ირანზე ვცვლით, ჩვენი მეგობრები კი ცდილობენ, გამოგვაფხიზლონ. რამდენად საკმარისი იქნება დასავლეთის ზომები დარწმუნებული არ ვარ. მაგრამ, დარწმუნებული ვარ, რომ ქართველი ხალხის გამოსაფხიზლებლად იქნება საკმარისი, რომ აქამდე თურმე სიცრუეში ვცხოვრობდით, როგორც ბატონი ბიძინა იტყოდა, გვეგონა, დასავლეთისკენ მივდიოდით და თურმე, შუა გზაზე გადაგვიხვევია, ამას ნიშნავს ჩემთვის ეს განცხადება“, – განაცხადა იაგო ხვიჩიამ.

კითხვაზე, რატომ არ ასახელებენ შეერთებულ შტატებში თუ ვინ მოხვდება სანქცირებულთა სიაში, იაგო ხვიჩია ამბობს, რომ ეს „მხოლოდ იმის ნიშანია, რომ უფრთხილდებიან არასრულწლოვანებს და ოჯახის წევრების ინტერესებს, თორემ თანამდებობის პირები, ვინც დასანქცირდება, ნებისმიერ შემთხვევაში გახდება ცნობილი და არ დაიმალება“.

„ახლა ყველაფერი დამოკიდებულია ქართველ ხალხზე, მას უდგას არჩევანი, იხსნას საკუთარი ქვეყანა არასწორი მიმართულებისგან ან შემოდგომაზე ყველანი დავსხდეთ თვითმფრინავებზე და წავიდეთ სხვა ქვეყანაში, სადაც რუსეთის, ჩინეთის და ირანის საფრთხე ნაკლებად გვემუქრება“, – განაცხადა იაგო ხვიჩიამ.