დანაშაულებრივი რეჟიმის მიერ ჩემი სამშობლო, ჩვენი სამშობლო უფსკრულის პირასაა მისული და ამ დროს განზე დგომა დაუშვებელია, – ამის შესახებ ოპოზიციონერმა დეპუტატმა არმაზ ახვლედიანმა ახალი პოლიტიკური პლატფორმის „ერთიანობა საქართველოს გადარჩენისთვის“ პრეზენტაციაზე განაცხადა.

როგორც ახვლედიანმა სიტყვით გამოსვლისას აღნიშნა, ეს ერთიანობა საბოლოოდ დაუსვამს წერტილს იმ უკუღმართ მმართველობას, რომელიც ათწლეულებია, ქვეყანაში არსებობს.

„დანაშაულებრივი რეჟიმის მიერ ჩემი სამშობლო, ჩვენი სამშობლო უფსკრულის პირასაა მისული და ამ დროს განზე დგომა დაუშვებელია. ერთობა, ერთიანობა – ამ იდეას ყველაზე დიდი მხარდამჭერი ჰყავდა და ჰყავს ჩვენი პარტიის დამფუძნებლის სახით. მეც ამ იდეას ვემხრობი და მიმაჩნია, რომ ერთადერთი გზა, რომ ხერხემალში გადავტეხოთ პოლიციური რეჟიმი – ეს ის გზაა, რომ ყველამ ერთად, ვინც აქ ვართ და აქ არ ვართ, ყველამ მთელს საქართველოში შევძლოთ, კეთილგონიერებით, სიმართლით, სიმტკიცით, ერთიანი ფრონტით საყრდენი გამოვაცალოთ ამ რეჟიმს და აღვადგინოთ საყრდენი ჩვენი სახელმწიფოებრიობისა, ჩამონგრეული რომ არის დღეს. დამოუკიდებელი მართლმსაჯულება, მრავალპარტიული დემოკრატია, ევროატლანტიკური ინტეგრაცია, კულტურისა და განათლების პრიმატი და, რა თქმა უნდა, კეთილდღეობა. მე გავიხსენებ ყველა დროის ყველაზე დიდი მეფის დავით მეფსალმუნის სიტყვებს: „ცოდვაი ჩემი წინაშე ჩემსა არს მარადის“ – როცა კაცს და კაცთა ერთობას ამის გააზრება შეუძლია, მაშინ გაურღვეველი წრე არ არსებობს. მე მჯერა, რომ ეს ერთობა დიდი ქართული სახალხო საზოგადოებრივ-პოლიტიკური ერთობა, რომელიც აქ და ახლა იბადება, შეძლებს, საბოლოოდ დაუსვას წერტილი ათწლეულების უკუღმართობას, ყველა წინა გაუგებრობა, შეცდომა სწორად გააზრებული იყოს, რომ ვიაროთ სწორი გზით, პატრიოტული სულისკვეთებით და რომ საქართველო იყოს ფეხზე დამდგარი, ევროპული, გამართული სახელმწიფო. მე მჯერა, ჩვენი თავდადებით ეს დღე მალე დადგება. ოქტომბრის შემდეგ ვიწყებთ ახლის შენებას და ეს ახალი გავითვალისწინოთ, რომ იქნება სწორი და სამართლიანი, ეს იქნება ყველას მთავრობა“, – განაცხადა არმაზ ახვლედიანმა.

ახლა არ არის დანაწევრების, დაპირისპირების, ამბიციების ან ეგოების ჭიდილის დრო. ახლა საქართველოსთვის ერთიანობის დროა, – ამის შესახებ „ერთიანი ნაციონალური მოძრაობის“ თავმჯდომარე თინა ბოკუჩავამ ყილობაზე განაცხადა, სადაც პოლიტიკური პლატფორმა „ერთიანობა საქართველოს გადარჩენისთვის“ დაფუძნების შესახებ გახდა ცნობილი.

მისი თქმით, 26 ოქტომბრის არჩევნები ქვეყნის გადარჩენის შანსია.

„დღეს პუტინის რუსეთმა დაბომბა უკრაინაში, ევროპაში ყველაზე დიდი ბავშვთა საავადმყოფო და მინდა გთხოვოთ, წუთიერი დუმილით პატივი მივაგოთ დაღუპულთა ხსოვნას.

დღეს თქვენს წინაშე ვდგავარ უდიდესი პასუხისმგებლობის შეგრძნებით. პასუხისმგებლობის თითოეული თქვენგანის და საქართველოს თითოეული მოქალაქის წინაშე, ვისთვისაც 26 ოქტომბრის არჩევნები ქვეყნის გადარჩენის შანსია.

26 ოქტომბერი არის შანსი დავიბრუნოთ ჩვენი ისტორიული ევროპული არჩევანი.

ეს არის შანსი იმ დაპირისპირების და დანაწევრების მორევიდან, რომლისკენაც ივანიშვილი 12 წელია მიგვაქანებს ამოვიდეთ წელში გამართული, ამაყი, ერთიანი და დავიმკვიდროთ ჩვენი ღირსეული ადგილი ევროპაში.

26 ოქტომბრის არჩევნები ივანიშვილმა რეფერენდუმად აქცია – რეფერენდუმად რუსულ ბნელეთსა და წარმატებულ ევროპულ მომავალს შორის. ჩვენი ქვეყნისთვის ესოდენ მნიშვნელოვან გზაგასაყარზე, როგორც არასდროს, მჯერა, რომ დღეს არის ერთიანობის დრო. არ არის სხვადასხვა ფლანგებად დაყოფის დრო; არ არის ურთიერთ კრიტიკის დრო; არ არის ამბიციების ან ეგოების ჭიდილის დრო; დღეს ერთიანობის დროა, ერთიანობის საქართველოსთვის, ერთიანობის გამარჯვებისთვის, ერთიანობის ევროპისთვის, ერთიანობის ქვეყნის გადარჩენისთვის. ერთიანობით ჩვენ ყველაფერი შეგვიძლია. ერთიანობით ჩვენ შეუძლებელიც შეგვიძლია.

ყველაზე ცხადად ჩვენი ეროვნული ნაკრების ბიჭებმა დაგვანახეს, რომ ერთიანობით, გუნდურობით, თავდადებით ჩვენ ევროპაზე გასვლაც და გიგანტების დამარცხებაც შეგვიძლია.

ახალგაზრდებმა დღეს და მრავალგზის მოგვიწოდეს ერთიანობისკენ. მათ გვაჩვენეს, რომ არ არსებობს იმაზე დიდი და დიადი მიზანი, ვიდრე ქვეყნის გადარჩენაა. მათ მოგვცეს ერთიანობის მისაბაძი მაგალითი, როდესაც ხელისუფლების დაუნდობელ ძალადობას თუ უსამართლო პროპაგანდას უპირისპირდებოდნენ მხოლოდ ერთიანობით, სიმტკიცითა და სიმშვიდით. მათ მოგვცეს შეუპოვრობისა და ბრძოლის მაგალითი და დაგვიბრუნეს გამარჯვების ურყევი რწმენა. მადლობა ქართველ ახალგაზრდებს ამისთვის – მეამაყებით და მეიმედებით, საქართველოს მომავალი თქვენია!

ჩვენ გვაქვს ერთი ქვეყანა. ერთი საქართველო. ერთი სახელმწიფო. და დღეს – ერთადერთი მიზანია – გადავარჩინოთ ქვეყნის ევროპული მომავალი და ამით, ჩვენი ქვეყნის სახელმწიფოებრიობა.

ჩვენი ვალია, გვერდზე გადავდოთ ყველა განსხვავება და გავერთიანდეთ ამ საერთო უზენაესი მიზნის ირგვლივ.

თუ სხვა პარტიები ამ ეტაპზე ვერ ერთიანდებიან, გავერთიანდეთ პოლიტიკოსებთან, საზოგადოებრივად აქტიურ პირებთან, სამოქალაქო ორგანიზაციებთან, და რაც მთავარია – ახალგაზრდებთან, რომლებმაც ყველაზე კარგად დაგვანახეს ერთიანობის ძალა და ამით სხვებსაც მივცეთ ბიძგი ერთიანობისკენ”, – განაცხადა ბოკუჩავამ.

ბოკუჩავამ პლატფორმის ახალი წევრები წარადგინა:

„მინდა სცენაზე ვთხოვო პროფესორ გია ჯაფარიძეს, ყოფილ ელჩს, ახალგაზრდებისთვის საყვარელ ლექტორს, ჩემთვის კი უბრალოდ დიდი ხნის მეგობარს, ადამიანს, რომლისთვისაც მთავარი ღირებულებებია.

ასევე მინდა სცენაზე ვთხოვო სოფო ჯაფარიძეს, პრეზიდენტ სააკაშვილის პირად წარმომადგენელს, რომელიც მთელმა ქვეყანამ ჯერ კიდევ კოვიდ პანდემიის დროს გაიცნო, როდესაც მისმა შექმნილმა სამედიცინო პლატფორმამ გადაარჩინა უამრავი ადამიანის სიცოცხლე.

მინდა სცენაზე ვთხოვო ლაშა ბაქრაძეს, მწერალს, მსახიობს, რეჟისორს და ადამიანს, რომელსაც დიდი წვლილი აქვს ქართული კულტურის გადარჩენისა და განვითარების საქმეში. მჯერა, სწორედ თქვენი ძალისხმევით, ჩვენი კულტურული მემკვიდრეობისა და ეროვნული იდენტობის დაცვით საქართველო ევროპის ღირსეული და ამაყი წევრი გახდება.

გთხოვთ მიესალმოთ ანა მოსაშვილს, რომელიც აქტიურად იყო ჩართული საპროტესტო მოძრაობაში, მაგრამ ის მე რამდენიმე დღის წინ ჩატარებული ახალგაზრდული ფორუმის მზადების პროცესში თავიდან აღმოვაჩინე. ანასნაირი მშრომელი და პატრიოტი ახალგაზრდებისაა ჩვენი ქვეყნის მომავალი და ამიტომ, თქვენ ყველაზე აქტიურად უნდა ჩაერთოთ ამ ნათელი მომავლის შენების საქმეში.

მინდა, სცენაზე ვთხოვო თამარ კორძაიას, ჩემს მეგობარს, ბევრი ახალგაზრდის საყვარელ ლექტორს, ადამიანის უფლებათა დამცველს, რომელიც თავისი კომპეტენციით და ღირებულებებით გამოირჩეოდა ყოველთვის.

გთხოვთ, მიესალმოთ არმაზ ახვლედიანს, რომლისთვისაც ადამიანია მთავარი ღირებულება. 1999 წელს პოლიტიკური სკოლის დაფუძნების დღიდან დღემდე ყოველთვის იბრძოდა დემოკრატიისთვის, რომელიც მოქალაქიდან იწყება და მოქალაქეს ემსახურება. მიხარია, რომ გვიერთდებით, ბატონო არმაზ.

გთხოვთ, მიესალმოთ გამორჩეულ ახალგაზრდებს, ირაკლი ფავლენიშვილს და ლაშა დიაროვს, რუსული კანონის წინააღმდეგ პროტესტში თქვენ ყველას ბრძოლის მაგალითი გვიჩვენეთ და ახლა ეს ბრძოლა საერთო ძალებით გამარჯვებამდე უნდა მივიყვანოთ.

და ბოლოს, მინდა სცენაზე ვთხოვო გიორგი ვაშაძეს, “სტრატეგია აღმაშენებლის” თავმჯდომარეს და დიდ მამოძრავებელ ძალას ერთიანობისთვის. ერთიანობას არ აქვს ალტერნატივა. ერთიანობით გავიმარჯვებთ. ერთიანობით გაიმარჯვებს საქართველო. და ამ გამარჯვების სტარტი არის დღეს, აქ, თქვენთან ერთად!”, – განაცხადა თინა ბოკუჩავამ.

ახალი პოლიტიკური პლატფორმა „ერთიანობა საქართველოს გადარჩენისთვის“ დაფუძნდა. პლატფორმის პრეზენტაცია „ერთიანი ნაციონალური მოძრაობის“ თავმჯდომარემ თინა ბოკუჩავამ გახსნა და გუნდის წევრები წარადგინა: გიორგი ვაშაძე, გია ჯაფარიძე, სოფო ჯაფარიძე, ლაშა ბაქრაძე, ანა მოსაშვილი, თამარ კორძაია, არმაზ ახვლედიანი, ირაკლი ფავლენიშვილი და ლაშა დიაროვი. „ერთიანობის“ საარჩევნო ნომერი – 5 იქნება.

„ნაციონალური მოძრაობამ“ და „სტრატეგია აღმაშენებელმა“ ახალი პოლიტიკური პლატფორმა „ერთიანობა საქართველოს გადარჩენისთვის“ დააფუძნეს.

როგორც „ნაციონალური მოძრაობის“ თავმჯდომარემ, თინა ბოკუჩავამ პარტიის ყრილობაზე განაცხადა, გაერთიანებაში გიორგი ვაშაძისა და სოფო ჯაფარიძის გარდა ასევე იქნებიან – გია ჯაფარიძე, ლაშა ბაქრაძე, თამარ კორძაია და არმაზ ახვლედიანი.

„სხვა პარტიებმა თუ ვერ შეძლეს ამ ეტაპზე გაერთიანება, გავერთიანდეთ ჩვენ პოლიტიკოსებთან, საზოგადოებრივად აქტიურ პირებთან, სამოქალაქო ორგანიზაციებთან და რაც მთავარია, ახალგაზრდებთან, რომლებმაც ყველაზე კარგად დაგვანახეს ერთიანობის ძალა. ეს არის ის, რითაც ჩვენ გავიმარჯვებთ, რაც ჩვენ გვაძლევს ძალას. ახლა ჩვენი ვალია, ეს გამარჯვება ბოლომდე მივიყვანოთ“, – განაცხადა ბოკუჩავამ.

ახალი გაერთიანება არჩევნებზე „ნაციონალური მოძრაობის“ საარჩევნო ნომრით წარდგება.

„გირჩის“ ტაქტიკაა, ამომრჩეველს ვაჩვენოთ განსხვავება ჩვენსა და დანარჩენ პოლიტიკურ სპექტრს შორის. ერთადერთი პარტია ვართ, რომელსაც პრინციპები და იდეები გააჩნია, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

მისივე თქმით, იმედოვნებს, რომ ამომრჩეველი სხვაობას დაინახავს და 26 ოქტომბერს სათანადოდ დააფასებს.

„ჩვენ მხარს ვუჭერდით ყველა იმ პარტიის გაერთიანებას, რომელიც მიხეილ სააკაშვილის ხმებზე პარაზიტობს. არ არის სწორი, მიხეილ სააკაშვილს ხმები წაართვა, რადგან ვერ გაიყავი ადგილები თუ თანამდებობები. მიხეილ სააკაშვილის წინადადებას მხარს ვუჭერდით, „ახალი“ იქნება, „ლელო“ თუ ზურა ჯაფარიძე-ხოშტარია და ა.შ., მათ შორის, „ევროპული საქართველოც“ „ნაცებში“ შესულიყვნენ, მაგრამ, როგორც ჩანს, ვერ გაინაწილეს ადგილები, ვერ დალაგდნენ თანამდებობებზე და ეს ამბავი არ გამოდის.

არ მჯერა, რომ ორი განსხვავებული პოლიტიკური ძალაა, სადაც ერთ მხარესაა, მაგალითად, ნიკა გვარამია და მეორე მხარეს – მიხეილ სააკაშვილი და თინა ბოკუჩავა. ეს არასერიოზულად გამოიყურება. თავადვე აწერენ დოკუმენტს ხელს, სადაც ამბობენ, რომ არჩევნებამდე ერთიანი იქნებიან და არჩევნების შემდეგ ერთიანად უქმდებიან. ამბობენ, რომ „ქართულ ოცნებას“ კოალიციას არ შეუკრავენ და შეუკრავენ მხოლოდ „ნაციონალურ მოძრაობას“. არ მესმის, რატომ ატყუებენ ამომრჩეველს, რომ „ნაცები“ არ არიან. თუ ბიძინა ივანიშვილის დამარცხებაა მთავარი ამოცანა, შენ მსუყე მეორე ადგილისთვის კი არ უნდა იმუშავო, რომ უფრო მეტი ადგილები გქონდეს პარლამენტში და მიშას დაუმტკიცო, რომ ტყუილად დაკარგა მთავარი პროპაგანდისტი, არამედ რეალურად გვერდზე გადადო ადგილებზე ვაჭრობა და მართლა პოლიტიკას დაუთმო დრო“, – აღნიშნა რაქვიაშვილმა.

მისივე თქმით, „ახალი“ იქნება თუ „ლელო“, ბოლო თვეები მხოლოდ იმაზე დააკარგინეს პოლიტიკურ სპექტრს და ქვეყანას, გაერთიანდებიან თუ არა.

„პრობლემა ისაა, რომ მათ მოგება არ უნდათ. თუ მოგება უნდათ, დალაგებულიყვნენ. დარწმუნებული ვარ, „ლელოს“ ფულიც დაეხმარებოდა „ნაცმოძრაობას“. „ნაცმოძრაობის“ აქტივი და სტრუქტურა დაეხმარებოდა „ლელოს“ და იმ პარტიებს, რომლებსაც ეს არ აქვთ. ყველასთვის გასაგები იქნებოდა, რომ ის პარტიები, რომლებიც ერთობას აცხადებენ და დეკლარაციას ხელს აწერენ, ერთად არიან.

ჩვენ დიდი ხანია, საარჩევნო კამპანიაში ვართ. ჩვენი ტაქტიკაა, რომ ამომრჩეველს ვაჩვენოთ განსხვავება ჩვენსა და მთელ დანარჩენ პოლიტიკურ სპექტრს შორის. ერთადერთი პარტია ვართ, ვისაც პრინციპები და იდეები გააჩნია. ერთადერთი პარტია ვართ, ვინც მზად ვართ, ყველასთან ვითანამშრომლოთ და, ამავდროულად, ჩვენი პრინციპები არ დავარღვიოთ. იმედია, ამომრჩეველი ამ სხვაობას დაინახავს და 26 ოქტომბერს სათანადოდ დააფასებს“, – განაცხადა ალექსანდრე რაქვიაშვილმა.