„გირჩი- მეტი თავისუფლებას“ ლიდერის, ზურა ჯაფარიძის განცხადებით, ნიკა მელიასა და ნიკა გვარამიასთან, რომლებმაც გუშინ პოლიტიკური გაერთიანება „ახალი“ დააფუძნეს, კოორდინაციასა და კონსულტაციებს აპირებს.

როგორც ჯაფარიძემ ჟურნალისტებთან განმარტა, ნიკა გვარამიასთან კომუნიკაცია ჰქონდა, რაც მომავალშიც გაგრძელდება.

„ნიკა გვარამიასთან ჩვენ კომუნიკაცია გვქონდა, მომავალშიც გვექნება. ჯერჯერობით, ჩვენ ჩვენს საქმეს ვაკეთებთ, ვგულისხმობ „გირჩი მეტი-თავისუფლებას“ და „დროას“, ჩვენი კამპანიით დავკავდებით, ისინიც თავისი კამპანიით, მაგრამ მომავალში კოორდინაციას და ერთმანეთთან კონსულტაციებს ვაპირებთ“, – განაცხადა ჯაფარიძემ.

ცნობისთვის, ნიკა მელია და ნიკა გვარამია ერთიანდებიან. მათი გაერთიანების სახელწოდება იქნება “ახალი”, ხოლო არჩევნებში მონაწილეობას საარჩევნო ნომერი 4-ით მიიღებენ.

2012 წელს თუ 20 ლიტრი საწვავის შეძენა შეიძლებოდა 39 ლარად და 50 თეთრად, ადამიანებს დღეს უწევთ 62 ლარის გადახდა. ხალხს აქვს მარტივი შეკითხვა – რატომ გაუძვირეს ხალხს ცხოვრება და რატომ იხდიან ადამიანები საწვავში იმაზე უფრო მეტს, ვიდრე იხდიდნენ ოდესმე?- ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა.

მისივე თქმით, „საქართველომდე საწვავი ერთი ლარი და 65 თეთრი ღირს, მაგრამ ფოთიდან, ბათუმიდან სანამ ბენზინგასამართ სადგურებზე გადანაწილდება, ამ თანხას აორმაგებენ“.

„20 ლიტრში რომ 62 ლარს გადაიხდით, ზუსტად იმავე 20 ლიტრის შეძენა შესაძლებელი იყო 39 ლარად და 50 თეთრად 2012 წელს და რომ არ თქვან, 2012 წელს რატომ ადარებენო, მარტივი რამე უნდა ვუთხრათ საზოგადოებას – საქართველომდე საწვავი ერთი ლარი და 65 თეთრი ღირს (დღევანდელი ფასით მსოფლიო ბირჟაზე), მაგრამ ფოთიდან, ბათუმიდან სანამ ბენზინგასამართ სადგურებზე გადანაწილდება, ფაქტობრივად, ამ თანხას აორმაგებენ, ამიტომ შეკითხვა გვაქვს და უნდა უპასუხონ ხალხს – რატომ გაუძვირეს ხალხს ცხოვრება და მათ შორის ადამიანები რომ ასხამენ საწვავს, ბენზინი იქნება თუ დიზელი, რატომ იხდიან უფრო მეტს, ვიდრე ოდესმე იხდიდნენ?“- განაცხადა ლევან ხაბეიშვილმა.

მიხეილ სააკაშვილი არის უსამართლო სასამართლოს, უსამართლო რეჟიმის ტყვეობაში და აუცილებელია მისი გათავისუფლება, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მანჯგალაძეს კითხვა დაუსვეს უკრაინის რადას ფრაქცია „ხალხის მსახურის“ თავმჯდომარე დავით არახამიას განცხადებაზე, სადაც საქართველო-უკრაინის ურთიერთობების ნორმალიზებისთვის აუცილებელ ერთ-ერთ საკითხად სააკაშვილის უკრაინაში დაბრუნებას ასახელებს.

„ამ სამი საკითხიდან ჩვენთვის, საქართველოს მომავლისთვის, ქვეყნის ინტერესებისა და თანხმობისთვის საინტერესო არის, რომ გათავისუფლდეს მიხეილ სააკაშვილი. ამ ნაწილში შემიძლია ვთქვა, რომ მიხეილ სააკაშვილი არის უსამართლო სასამართლოს, უსამართლო რეჟიმის ტყვეობაში და აუცილებელია მისი გათავისუფლება სამართლიანი პოლიტიკური დღის წესრიგის შექმნისთვის“, – განაცხადა პაატა მანჯგალაძემ.

კითხვაზე, იზიარებს თუ არა დავით არახამიას ულტიმატუმს, მანჯგალაძემ აღნიშნა:

„რა ულტიმატუმს, ვიდრე არახამია იტყოდა ამას, ორი წელია, მაგაზე ვსაუბრობთ. რა შუაშია არახამია. მიხეილ სააკაშვილის გათავისუფლება საჭიროა“, – განაცხადა პაატა მანჯგალაძემ.

უკრაინის რადას ფრაქცია „ხალხის მსახურის“ თავმჯდომარე დავით არახამია საქართველოს მთავრობის განცხადებას გამოეხმაურა.  „დაგვიბრუნდეს მიხეილ სააკაშვილი, შეწყდეს ფრენები რუსეთთან, აგრესორის დახმარება სანქციების გვერდის ავლაში, მაშინ ურთიერთობების ნორმალიზებაც მარტივად მოხდება“.

ამასთან, საქართველოს მთავრობამ გუშინ გაავრცელა განცხადება, სადაც აღნიშნულია, რომ ურთიერთობების მოსაწესრიგებლად მნიშვნელოვანი და აუცილებელია, უკრაინის ხელისუფლებამ საქართველოს გადასცეს დამნაშავეები, რომლებიც დღეს უკრაინის ხელისუფლებაში მაღალ თანამდებობებს იკავებენ. „ვიმედოვნებთ, უკრაინის ხელისუფლება გადახედავს გადაწყვეტილებებს, რომლებიც უხეშად ეწინააღმდეგება მეგობრულ სულისკვეთებას საქართველოსა და უკრაინას შორის“, – აღნიშნულია განცხადებაში.

ხელისუფლებასა და ოპოზიციას ვთავაზობ, მხარი დაუჭიროს „ვეტინგის“ სისტემას იუსტიციის უმაღლეს საბჭოში – უნდა მივდიოდით იმ სტანდარტებს, რომელიც ვენეციის კომისიამ დაგვისახა, – ამის შესახებ “ევროოპტიმისტების” დეპუტატმა, ხატია დეკანოიძემ ბრიფინგზე განაცხადა.

მისივე თქმით, “ვეტინგის” სისტემა სამ ძირითად კომპონენტს მოიცავს: 1. შესამოწმებელი პირის და მასთან დაკავშირებული ახლო პირების ქონების წარმომავლობის კანონიერება, ფინანსური ვალდებულებების და მათგან მომდინარე კერძო ინტერესების შეფასება; 2. პროფესიული უნარების, ეთიკის, ცოდნის შეფასება; 3. ორგანიზებულ დანაშაულში ჩართულ პირებთან კავშირის დადგენა.

„მე მოვითხოვ შესრულდეს ვენეციის კომისიის რეკომენდაციები, რაც გულისხმობს იმას, რომ პირველ რიგში უნდა დაიწყოს იუსტიციის უმაღლესი საბჭოს არამოსამართლე თუ მოსამართლე წევრის კეთილსინდისიერების და კორუფციის შემოწმებას, რაც არის “ვეტინგის” სისტემა. “ვეტინგის” სისტემა გულისხმობს შესამოწმებელი პირის და მასთან დაკავშირებული ახლო პირების ქონების წარმომავლობის კანონიერების შემოწმებას, ფინანსური ვალდებულებებისა და მათგან მომდინარე კერძო ინტერესების შეფასებას. მეგობრებო, წარმოუდგენელია საჯარო სამსახურში იყო მთელი ამ წლების განმავლობაში, გქონდეს ის ხელფასი, რაც დეკლარაციაშია ნაჩვენები და უბრალოდ, ასეთ ფუფუნებაში ცხოვრობდე. არ არსებობს საჯარო პატიოსანი მოხელე, რომელსაც ასეთი ფუფუნება აქვს. მეორე – პროფესიული უნარების ეთიკის შეფასება. მესამე – ორგანიზებულ დანაშაულში ჩართულ პირებთან კავშირის დადგენა. ეს არის სწორედ “ვეტინგის” სისტემა, რაზეც “ქართული ოცნება” გვესაუბრება, რომ თითქოს, ეს არის რაიმე სახის პოლიტიკური გადაწყვეტილება.

მე ვთავაზობ ხელისუფლებას, ყველა პოლიტიკურ პარტიას – უმრავლესობას, თუ ოპოზიციას, მხარი დაუჭიროს “ვეტინგის” სისტემას იუსტიციის უმაღლეს საბჭოში. იუსტიციის უმაღლესი საბჭო არის ორგანო, რომელიც უნდა იყოს სრულიად დამოუკიდებელი. ეს არის ორგანო, რომელიც ახდენს ადმინისტრირებას, მართვას და კოორდინირებას სასამართლო სისტემაზე. ამიტომ მე ვფიქრობ, რომ იუსტიციის უმაღლესი საბჭოდან დაწყება არის ყველაზე უფრო მნიშვნელოვანი. ნებისმიერი ადამიანი, რომელიც ამბობს, რომ “ვეტინგის” გარეშე შესაძლებელია ამ ადამიანების “კლანის” ან გათავისუფლება, ან გაგდება სამსახურიდან, არის მიუღწეველი ამოცანა. ამიტომ უნდა მივდიოდით იმ სტანდარტებს, რომელიც ვენეციის კომისიამ დაგვისახა“, – განაცხადა დეკანოიძემ.