სახეზეა პოლიტიკური ფლირტი. აქედან გამოვა ერთობა ან კავშირი, მოდით, დაველოდოთ გია ხუხაშვილის მარებლობის მარიფათს. ვნახოთ, რა გამოუვა, რადგან იღვწის ეს ადამიანი, შედეგებს დაველოდოთ. მარებლობა რას ნიშნავს? მეგრულად ნიშნავს ადამიანს, რომელიც წყვილებს ურთიერთობის დალაგებაში ეხმარება, – ამის შესახებ „გირჩის“ წევრმა, იაგო ხვიჩიამ საარჩევნოდ ხაზარაძე-გახარიას შესაძლო გაერთიანების საკითხის შესახებ განაცხადა.

იაგო ხვიჩიას განმარტებით, გულშემატკივრობს ამ გაერთიანებას, რათა მათი ტრაექტორია გაარჩიოს.

„პოლიტიკურ ფლირტში აქტიურობენ ვაჟები, როგორც კლასიკურ ურთიერთობებში. თქვენ იცით, რომ „ლელო“ მაინც ჰგავს მოკლეკაბიან ლამაზ ქალს, რომელიც თავისი ფულით სხვადასხვა პოლიტიკურ აქტორს ხიბლავს“, – განუცხადა იაგო ხვიჩიამ საქართველოს პირველ არხს.

გუშინდელი სამარცხვინო ინტერვიუს შემდეგ, ირაკლი რუხაძე ბიძინა ვანიშვილის თოჯინებში დაწინაურდა – ეროვნული ინტერესების და ხალხის ღალატის ფასს ყველა პერსონალურად გადაიხდის, – ამის შესახებ „გახარია საქართველოსთვის“ ლიდერი, გიორგი გახარია სოციალურ ქსელში წერს, რითაც „იმედის“ მფლობელის, ირაკლი რუხაძის განცხადებას გამოეხმაურა.

მისივე თქმით, ირაკლი რუხაძე გახდა პირველი ადამიანი, რომელმაც ივანიშვილის დავალებით, ჩვენი ქვეყნის კონსტიტუციის ჩანაწერი კითხვის ნიშნის ქვეშ დააყენა.

„გუშინდელი სამარცხვინო ინტერვიუს შემდეგ, ეს კაცი [ირაკლი რუხაძე] ივანიშვილის თოჯინებში დაწინაურდა! ის გახდა პირველი ადამიანი, რომელმაც ივანიშვილის დავალებით, ჩვენი ქვეყნის კონსტიტუციის ჩანაწერი კითხვის ნიშნის ქვეშ დააყენა.

ადამიანი, რომელსაც თავად ამერიკის პასპორტი აქვს და ევროპაში ცხოვრობს, საკუთარი ფულის გადასარჩენად და ივანიშვილის დავალებით, საკუთარი პროპაგანდისტული ტელევიზიიდან ჩვენს შვილებს არწმუნებს, რომ ევროპა ცუდია.

ეროვნული ინტერესების და ხალხის ღალატის ფასს ყველა პერსონალურად გადაიხდის! დროის საკითხია და ეს დრო უკვე მოდის,“ – წერს გახარია.

ცნობისთვის, როგორც ტელეკომპანია „იმედის“ მფლობელმა ირაკლი რუხაძემ აღნიშნა, ევროინტეგრაცია კონსტიტუციაში არ უნდა ჩაწერილიყო.

„მინდა შესვლა“-ს – ბევრი ამბობს, მაგრამ „მნიშვნელოვანია“-ს ამბობს ბევრად უფრო პატარა ნაწილი. ჩვენ გავაფეტიშეთ ეს, ოპოზიცია ამას აკეთებს ღიად დასავლეთის მხარდაჭერით. მთელი ქვეყნის ყურადღება ამაზეა გადატანილი, რადგან ეს არის აყვანილი საკრალურ დონეზე. წერია კონსტიტუციაშიც და მე თუ მკითხავთ არც უნდა ჩაგვეწერა, კონსტიტუცია ცოტა სხვანაირი დოკუმენტია, მუდმივი დოკუმენტია“, – განაცხადა რუხაძემ.

დღევანდელი დღე მკაფიოდ გვანახებს, რომ ტრამპი ამერიკის ხვალინდელი დღეა, მოწონს ეს ვინმეს თუ არ მოსწონს, – ამის შესახებ გიორგი გამსახურდია სოციალურ ქსელში წერს.

„ყოველთვის ვამბობდი და ახლაც ვიძახი, არ არის ამერიკა და მით უფრო ამერიკული პოლიტიკა რამდენიმე სენატორი, ან კონგრესმენი. ძალიან ფართო და ყოვლისმომცველი თემაა. ასევე არც ჯო ბაიდენის ადმინისტრაციის პირობებში დაწყებულა და მთავრდება ქართულ-ამერიკული ურთიერთობები. ავადმყოფ მიშას უნდოდა თავისი ლობისტების მეშვეობით და სხვა თითლიბაზობებით, რომ ყველა სიტუაციის ჭიპი ყოფილიყო. ასევე სხვადასხვა დროში, ნაცებისადმი ლოიალურად განწყობილმა დიპსტაფმა შეუწყო ხელი ყოველივეს თავისი ჩუმი საბოტაჟით. დღევანდელი დღე მკაფიოდ გვანახებს, რომ ტრამპი ამერიკის ხვალინდელი დღეა, მოწონს ეს ვინმეს თუ არ მოსწონს, დღევანდელი რეალობა არის ეს.

როგორც რეიგანმა, თავდასხმის შემდეგ, 1984 წელს 50 შტატიდან 49- ში მოუგო კარტერის ვიცე-პრეზიდენტ მონდეილს, ისე პირწმინდად მოუგებს ტრამპი, ჯო ბაიდენს წლევანდელ არჩევნებს (მიშელ ობამას შემოყვანა კიდევ, უფრო გაამყარებს დღევანდელ თავდასხმასთან დაკავშირებით გამეფებულ ეჭვებს). ისმის კითხვა, ჩვენ რა უნდა ვქნათ? რა უნდა ვქნათ და ჩვენი ქვეყნის ინტერესებზე გათვლილი პოლიტიკა უნდა ვაწარმოოთ, ავუხსნათ ჩვენს პარტნიორებს, რომ არავის წინააღმდეგ არ არის ჩვენი მოქმედება მიმართული, მივაწოდოთ სრული ინფორმაცია და სრული სურათი, თუ რა ხდება და რა გამოწვევების წინაშე ვდგავართ. უნდა ვილაპარაკოთ წელში გამართულად და ღირსებით, არანაირად ენის მოჩლექით, ცალ ფეხზე დგომით და ა.შ. ძლიერ მოკავშირეებს, ყოველთვის ძლიერი მოკავშირე აინტერესებთ, აბა ვასალები და მონები, სადაც ბრძანდებიან ყველამ ვიცით. ღმერთო, დალოცე საქართველო

ჩვენ ოპოზიციაში გვყავს ხალხი, რომლებიც ყოფილი გენერალური პროკურორის, ზურაბ ადეიშვილის მარიონეტები არიან დღემდე, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

მისივე თქმით, ზოგიერთი ევროპელი პოლიტიკოსი აცდენილია ევროპულ ბიუროკრატიას იმით, რომ იფარებს ადეიშვილს, იფარებს კეზერაშვილს, იფარებდა სააკაშვილს.

„ცალკე სათქმელია და ბარემ აქაც გამოვიყენებ შესაძლებლობას, რომ ზურაბ ადეიშვილი, კრიმინალი, რომელიც ევროკავშირში თავისუფლად გადაადგილდება და ევროკომისიის კორიდორებში დაიარება, ხვდება იმ ხალხს, რომლებიც შემდეგ აქ ჭკუას გვასწავლის ჩვენ. რა თქმა უნდა, ეს სირცხვილია, როდესაც ზურაბ ადეიშვილისთვის კარი ღიაა ევროკავშირის სხვადასხვა ინსტიტუტში შესახვედრად.

გახსოვთ თქვენ, რომ ის ბრიუსელში შეხვდა, ხაზს ვუსვამ, მართლმსაჯულების კომისარს და ამის შემდეგ იწყინეს ევროკავშირის ზოგიერთმა წარმომადგენელმა ჩვენი საყვედური ამასთან დაკავშირებით და თქვეს, რომ არ ვიცოდით ვინ იყო, უკრაინის გენერალურ პროკურორს ვხვდებოდით და დელეგაციაში იყო ვიღაცო. რამდენიმე კვირა გავიდა და მართლმსაჯულების კომისარი ჩავიდა უკრაინაში, კიევში და კიდევ ერთხელ შეხვდა ზურაბ ადეიშვილს, როცა უკვე იცოდა ზუსტად, რომ ხვდება კრიმინალს, რომელიც აქ წამების სისტემას ქმნიდა და რომელიც დღეს სათანამშრომლოდ ჰყავთ უკრაინაში მართლმსაჯულებისა და პროკურატურის რეფორმაში. ამიტომ, ეს ღირებულებების ნაკლებობა ზოგიერთი ბიუროკრატის მხრიდან, რა თქმა უნდა, ჩვენში შეშფოთებას იწვევს და ქართველი ხალხი როდესაც ხედავს ამ სურათებს, რომ კრიმინალი ადეიშვილი დაიარება ბრიუსელის სხვადასხვა ოთახში, როდესაც ხედავს, რომ კრიმინალი კეზერაშვილი მფარველობით სარგებლობს და თავისუფლად გადაადგილდება ევროკავშირში და საქართველოში აფინანსებს რადიკალიზმს, რა უშლის ხელს ევროკავშირს, რომ გადმოგცეს კრიმინალი ადეიშვილი?! რა უშლის ევროკავშირს ხელს, რომ გადმოგცეს კრიმინალი კეზერაშვილი და რატომ ჰქონდა თავისუფლება მიხეილ სააკაშვილს, რომ ევროკავშირის ტერიტორიაზე თავისუფლად გადაადგილებულიყო და იქიდან ხელი ეფათურებინა, როგორც უკრაინის მოქალაქეს, საქართველოს პოლიტიკაში და ათი წელი არ მოასვენა ჩვენი საზოგადოება იმ რადიკალური დღის წესრიგით, რომელიც მას შემოჰქონდა.

ამიტომ, კიდევ ერთხელ, როდესაც დღეს ზოგიერთი ევროპელი ბიუროკრატი, დიპლომატი, თუ პოლიტიკოსი, რაღაც მორალური პიედესტალებიდან ღირებულებებზე გველაპარაკება, ქართველი ხალხი ერთგულია ევროპული ღირებულებებისა, თუმცა ზოგიერთი ევროპელი პოლიტიკოსი აცდენილია ევროპულ ბიუროკრატიას იმით, რომ იფარებს ადეიშვილს, იფარებს კეზერაშვილს, იფარებდა სააკაშვილს. მთელი ქართული კრიმინალური კლანი პოლიტიკოსებისა თავს აფარებდა ან დღეს აფარებს ევროპულ სივრცეს“, – აღნიშნა შალვა პაპუაშვილმა.

პარტია „გირჩის“ ერთ-ერთი ლიდერის, ალექსანდრე რაქვიაშვილის განცხადებით, ამნისტიის შესახებ კანონპროექტის განხილვებში ჩაერთვება. ამის შესახებ დეპუტატმა „ქრონიკასთან“ ისაუბრა.

„ძალიან კარგია, რომ ამნისტია შემოვიდა. მე რა თქმა უნდა, უფრო დიდი ამნისტია მინდა – უფრო მეტ პატიმარს რომ შეეხოს და არანაირი პრობლემა არ მაქვს, რომ ამით „ქართულმა ოცნებამ“ ქულები დაიწეროს, თუ დაიწერს, რადგან ბედნიერებაა, თუ პოლიტიკური პარტიები კარგი საქმეებით იწერენ ქულებს, ცუდია, როცა ცუდი საქმეებით იღებენ ხმებს. ამიტომ განხილვაში აუცილებლად ჩავერთვები“, – აღნიშნა რაქვიაშვილმა.

საპარლამენტო ფრაქცია „ქართულმა ოცნებამ“ „ამნისტიის პროექტი“ დააინიცირა.

ქალბატონ სალომეს განზრახვაა, მიმართოს იმ საკონსტიტუციო სასამართლოს, რომლის გადაწყვეტილებასაც სამარცხვინო უწოდა და არ აღიარა ეს გადაწყვეტილება, – ამის შესახებ პარლამენტის თავმჯდომარე შალვა პაპუაშვილმა პრეზიდენტის გადაწყვეტილებასთან დაკავშირებით განაცხადა. საუბარია „უცხოური გამჭვირვალობის“ შესახებ კანონთან დაკავშირებით საკონსტიტუციო სასამართლოში ზურაბიშვილის სარჩელზე.

მისი თქმით, თუკი პრეზიდენტი სასამართლოში სარჩელს შეიტანს, ეს იმის დასტური იქნება, რომ ის აღიარების ამ ინსტიტუციის გადაწყვეტილებას, რომლითაც დადგინდა, რომ ზურაბიშვილმა კონსტიტუცია დაარღვია.

„რა შეიცვალა ამ თვეების განმავლობაში? თუ კი ის საკონსტიტუციო სასამართლოს მიმართავს, გამოდის რომ აღიარებს მის ლეგიტიმაციას, ამ მოსამართლეების ლეგიტიმაციას და შესაბამისად, მის მიერ კონსტიტუციის დარღვევაზე გადაწყვეტილების და იმპიჩმენტის ლეგიტიმაციასაც. მას რომ ჰქონდეს ის კონსტიტუციური თუ მორალური სტანდარტი, რაც ამ თანამდებობაზე მყოფ ადამიანს უნდა ჰქონდეს, თანამდებობიდან უნდა გადადგეს. ვხედავთ, რომ გაურიგდა „ნაციონალურ მოძრაობას“ იმისთვის, რომ შეენარჩუნებინა საკუთარი თანამდებობა, იკადრა ის, რომ საკონსტიტუციო სასამართლოს მოსამართლეებს სამარცხვინო უწოდა და დღეს ისევ ამ მოსამართლეებს მიმართავს სამართლის საძიებლად. ეს არის საერთო ჯამში ჩვენი რადიკალური ოპოზიციის სახე, სადაც ქალბატონი სალომეც არის ჩაწერილი. ვინმეს თუ რაიმე კითხვა აქვს კანონთან დაკავშირებით, ნებისმიერ მოქალაქეს შეუძლია მიმართოს სასამართლოს, ჩვენ ვართ სამართლებრივი სახელმწიფო, „ქართულმა ოცნებამ“ ამ ქვეყანაში სამართლიანობა დააბრუნა ამიტომ ყველას შეუძლია მიმართოს და არა ისე მოიქცეს, როგორც იქცევიან ენჯეოები, რომლებიც ამბობენ, რომ კანონს არ დაემორჩილებიან, რადგან არ მოსწონთ. ეს ენჯეოები და მათ უკან მდგომი დონორები ახალისებენ იმას, რომ კანონის მიმართ დაუმორჩილებლობა იყოს და ფაქტობრივად გვეუბნებიან, რომ ქვეყანაში ჯუნგლების კანონი უნდა იყოს და არა სამართლებრივი სახელმწიფო. ეს მოიტანა ამ ენჯეოების საქმიანობამ. ეს არის ის მაგალითი, რასაც ამერიკული და ევროპული დონორები აძლევენ საქართველოს მოქალაქეებს. ვიღაცა გამოვა და იტყვის, რომ არ მოსწონს პარკირების წესი, ვიღაცა იტყვის, რომ წითელი, ყვითელი და მწვანე ფერები არ არის სწორი და არ დაემორჩილება ამ ფერებს, ვიღაცა სხვა წესებს არ დაემორჩილება. სინამდვილეში ეს არის მათი ევროპა. „ნაციონალურ მოძრაობას“ ხომ ასეთი ევროპა ჰქონდა აშენებული ამ ქვეყანაში, სადაც უკანონონობა, დევნა და ძალადობა მმართველობის ნაწილი იყო“, – განაცხადა პაპუაშვილმა.