მადლობა ღმერთს ცოტა ხანში ქვეყანას ახალი პრეზიდენტი ეყოლება, – ამის შესახებ პარლამენტის იურიდიულ საკითხთა კომიტეტის თავმჯდომარის პირველმა მოადგილემ, დავით მათიკაშვილმა „დღის ქრონიკაში“ განაცხადა.

მისივე თქმით, სალომე ზურაბიშვილის განცხადება არა თუ მიუღებელია, არამედ მას საერთოდ არ უნდა მიექცეს ყურადღება.

„პრეზიდენტი, რომელმაც ზუსტად ის კონსტიტუცია გათელა ფეხქვეშ, სადაც 78-ე მუხლი, ანუ ქვეყნის ევროინტეგრაცია არის ქვეყნის საგარეო კურსის განმსაზღვრელად დადგენილი. ზურაბიშვილს ქვეყნის უმრავლესობამ იმპიჩმენტი გამოუცხადა და მისგან არა თუ მიუღებელია, არამედ საერთოდ ყურადღება არმისაქცევია ის განცხადებები, რომელსაც ეს ქალბატონი აკეთებს, რამეთუ ფაქტობრივად, ის არის ფორმალური პრეზიდენტი. სულ რამდენიმე თვე დარჩა მას ამ პოსტზე და მადლობა ღმერთს ცოტა ხანში ქვეყანას ახალი პრეზიდენტი ეყოლება“, – აღნიშნა მათიკაშვილმა.

ძალადობა იწვევს ძალადობას. ეს არის სპირალი, რომელშიც შეჰყავს „ნაციონალურ მოძრაობას“ საზოგადოება მთლიანად, – ამის შესახებ პარლამენტის თავმჯდომარემ, შალვა პაპუაშვილმა ჟურნალისტებს განუცხადა, როდესაც უპასუხა შეკითხვას კანონპროექტის მოწინააღმდეგე ადამიანებზე განხორციელებულ ფიზიკურ ძალადობაზე.

მისი თქმით, პირდაპირ ძალადობის ტალღა იყო პოლიტიკოსების, უმრავლესობის წარმომადგენლების მიმართ, რაზეც მას არავის აღშფოთება არ უნახავს და ეს მაშინ, როდესაც „პარლამენტის წევრების პლაკატები დადო ყველა NGO-მ, საელჩოები რომ აფინანსებენ“.

პაპუაშვილის თქმით, „ქართული ოცნება“ და მისი პარტიული დანაყოფი შესაბამისად, იმუშავებს იმისთვის, რომ ყველა მოძალადე ამხილონ.

ამასთან, პაპუაშვილის თქმით, როდესაც მამუკა მდინარაძეს ალეკო ელისაშვილი თავს დაესხა, პარლამენტის გარეთ მყოფ ელისაშვილს „ჟურნალისტები ეხვეოდნენ და მადლობას უხდიდნენ“.

„ძალადობა, რომელიც არათუ ფარულად, გაუგებრად, ვიცით, არ ვიცით, ვინ იყო, არამედ პირდაპირ ეთერში, საქართველოს პარლამენტის შენობაში მოხდა ძალადობრივი თავდასხმა პარლამენტის წევრზე და ხარობდა ნახევარი ოპოზიცია. როდესაც რამდენიმე დღის წინ ბრიფინგი ჩავატარე, ზუსტად ამაზე ვსაუბრობდი, რომ ძალადობა იწვევს ძალადობას. ეს არის სპირალი, რომელშიც შეჰყავს „ნაციონალურ მოძრაობას“ საზოგადოება მთლიანად“, – განაცხადა პაპუაშვილმა.

ჟურნალისტის შეკითხვის საპასუხოდ მან გაიხსენა შარშანდელი პროტესტი, რომელიც იგივე კანონპროექტთან დაკავშირებით იყო ქვეყანაში.

„შარშანაც იგივეს ამბობდნენ, რომ მათ ჰქონდათ უფლება ეძალადათ პოლიციაზე და წელსაც ამას ამბობენ, ჰქონდათ უფლება ეძალადათ პოლიციაზე, ესროლათ „მოლოტოვის კოქტეილი“ იმიტომ, რომ მიზანი ჰქონდათ დიადი. ეს არის ის ბოლშევიკური აზროვნება, როდესაც მიზანი ამართლებს საშუალებას.

ძალადობის სპირალში შესვლა, რაც მოხდა, მათ შორის დაიწყო იმით, რომ პარლამენტის შენობაზე მოხდა თავდასხმა. მეორე დღეს ვთქვი კიდევაც, ცოტა ხანი ველოდე – სამწუხაროდ, ვერცერთი საელჩოს, უცხოური აქტორის განცხადება ვერ ვნახე, ვინც დაგმობდა იმ ძალადობას, რომელიც მოხდა საქართველოს პარლამენტის შენობაზე მომხდარი თავდასხმის სახით და პოლიციელების დაზიანების სახით, რაც იყო ძალადობრივი აქცია. პირიქით, ეს შეირაცხა, როგორც მშვიდობიანი აქცია ისევე, როგორც ეს მოხდა 2019 წლის 20 ივნისთან დაკავშირებით, შარშან, მარტის აქციების დროს, როდესაც ძალადობა ყოველ ჯერზე ფორმდება, როგორც მშვიდობიანი აქცია. საბოლოო ჯამში, ზუსტად ეს ახალისებთ მოძალადეებს, ხედავენ, რომ ესროლა „მოლოტოვის კოქტეილი“ – შეიწყალა პრეზიდენტმა. თქვეს, რომ მშვიდობიანია, გმირად გამოაცხადეს ის, ვინც პოლიციელს წვავდა.

ხელისუფლების პასუხისმგებლობაა, რა თქმა უნდა, ყველა ამ საკითხის ჩაყოლა და გამოძიება. ყველანაირი ძალადობა არის მიუღებელი და პირველი, რასაც ხელისუფლება აკეთებს სიტყვიერად გმობს და რა თქმა უნდა, შსს-ს სათანადო რეაგირება აქვს.

მნიშვნელოვანია, ვინც ამ სიძულვილს წვეთ-წვეთ აღვივებს და ჩუმად ხართ, აქ ვგულისხმობ, როგორც უცხოელ აქტორებს განსაკუთრებით, რომლებიც პარლამენტში ძალადობრივ თავდასხმას შემდეგ ნათლავენ, როგორც მშვიდობიან აქციას უკვირთ, რომ შემდეგ ძალადობაში ჩართული ადამიანების დაკავებები ხდება“-განაცხადა პაპუაშვილმა.

ქალბატონ სალომეს თავისი გზა არჩეული აქვს – ეს არის ის გზა, რომელიც საქართველოს, ქართველი ხალხის ინტერესების საწინააღმდეგო გზაა, – ამის შესახებ პარლამენტის თავმჯდომარე შალვა პაპუაშვილმა ჟურნალისტებს განუცხადა, როდესაც გამოეხმაურა ირაკლი კობახიძის წერილზე სალომე ზურაბიშვილის განცხადებას, რომ „ახალგაზრდებსა და ბერბიჭაშვილს შორის ტოლობის ნიშნის დასმა ნებისმიერი ადამიანისთვის უდიდესი სირცხვილი იქნებოდა“.

პაპუაშვილის თქმით, სალომე ზურაბიშვილის განცხადებას „ნაკლები მნიშვნელობა აქვს, მითუმეტეს, რომ საქართველოს პარლამენტის უმრავლესობის და შესაბამისად, საქართველოს მოსახლეობის უმრავლესობის მხრიდან, მას იმპიჩმენტი აქვს გამოცხადებული“.

რაც შეეხება თავად კობახიძის წერილის იმ ნაწილს, სადაც ის აქციის მონაწილე ახალგაზრდების ნაწილს გიგლა ბერბიჭაშვილს ადარებს, პაპუაშვილი ფიქრობს, რომ ეს შედარება ზუსტია.

„ეს ზუსტი შედარებაა. დღეს არის „ეიჯიზმის“ მცდელობა, თითქოს, რომელიმე ასაკის ადამიანს მეტი ეთქმის და რომელიმე ასაკის ადამიანს – ნაკლები. მიხეილ სააკაშვილმა და „ნაციონალურმა მოძრაობამ“ ასაკოვანი ადამიანები ფაქტობრივად ჩარეცხა და ეს იყო „ეიჯიზმი“. ახლაც ეს „ნაციონალური მოძრაობის“ გამოგონებულია და გამოყენებული აქვთ სხვა მხრივ – გარკვეულ პერიოდში დაბადებულ ადამიანებს რატომღაც ამ ქვეყანაში მეტი უნდა ეთქმოდეთ, ვიდრე სხვებს. ეს ქვეყანა ყველასია- უფროსის და უმცროსის, ქალის და კაცის, ყველას ერთი ხმა აქვს, ეს არის დემოკრატია.

აქციებზე როცა საუბრობენ, მათ აქციებზე 10-20 ათასი ადამიანი იყო პიკში, 29 აპრილს აქციაზე 200 ათასი ადამიანი მოვიდა ზუსტად ამ იდეების მხარდასაჭერად და იმათი ხმა ხმა არ არის? რანაირად ზომავენ, ასაკით, სქესით, თვალის ფერით? არ ვიცი, კიდევ სხვა რა მიდგომები აქვთ – „ეიჯისტური“ თუ ფაშისტური, როდესაც ასეთ საზომებს იყენებენ.

მთავარი სათქმელი ზუსტად ესაა – საამაყო და ხაზგასასმელი ასაკი კი არაა, მთავარი შინაარსია. არა ფორმა, არამედ შიგთავსი. ზოგი ახალგაზრდაა, ზოგი – ასაკოვანი, ზოგი ასაკოვანი ახალგაზრდულად გამოიყურება, ზოგი ახალგაზრდა ასაკოვანად. ფორმა ხომ არაა მთავარი, მთავარი შინაარსია. კითხვა არის მარტივი, რა არის ამ კანონში ისეთი, რაც არის მიუღებელი და ქართველი ხალხის ინტერესების საწინააღმდეგო?- განაცხადა შალვა პაპუაშვილმა.

შეგახსენებთ, რომ დღეს, საქართველოს პრემიერ – მინისტრმა ირაკლი კობახიძემ ახალგაზრდებისადმი ღია წერილი გამოაქვყნა.

„როდესაც 29 წლის გიგლა ბერბიჭაშვილმა 70 წლის ილია ჭავჭავაძეს ესროლა, მას ღრმად სწამდა, რომ თავად იყო პროგრესული გულწრფელი ახალგაზრდა, ხოლო ილია ჭავჭავაძე – ჩამორჩენილი არაკეთილსინდისიერი მოხუცი. ბერბიჭაშვილს და მის თანამოაზრე ახალგაზრდებს ეს რწმენა ბოლშევიკურმა იდეოლოგიამ ჩაუნერგა. მსგავსი მეთოდებით მუშაობს ფსევდოლიბერალური იდეოლოგიაც, რომელმაც კოლექტიური „ნაცმოძრაობის“ პირდაპირ თუ ირიბად მიმდევარ ახალგაზრდებს დააჯერა, რომ სწორედ ისინი არიან გულწრფელობისა და პროგრესულობის მაგალითი ამ ქვეყანაში“,- განაცხადა კობახიძემ.

პრემიერის ამ წერილის შეფასებისას კი საქართველოს პრეზიდენტმა სალომე ზურაბიშვილმა თქვა, რომ „ახალგაზრდებსა და ბერბიჭაშვილს შორის ტოლობის ნიშნის დასმა ნებისმიერი ადამიანისთვის უდიდესი სირცხვილი იქნებოდა“.

„ეს სიტყვები პრემიერ-მინისტრს როცა ეკუთვნის, ეს მას უკვე სხვა განზომილებაში გადასულ ადამიანად წარმოაჩენს და მის მთავრობის გაუცხოებას საკუთარ ხალხისგან ადასტურებს! მმართველობა ჯერ საკუთარი ხალხის სიყვარულით იწყება, „მამულის” სიყვარული სხვა არაფერია“,- განაცხადა პრეზიდენტმა.

მეორედ ჩამისაფრდნენ დღეს, ამჯერად დღისით! – ამ განცხადებას „ფეისბუქზე“ პარტია „გირჩი – მეტი თავისუფლების“ ლიდერი ზურაბ ჯაფარიძე ავრცელებს, რომელიც პოსტს ავტომობილის ფოტოს ურთავს თან.

„გირჩი ტვ-დან” გამოვედი, მანქანა განათლების სამინისტროს წინ მყავდა დაპარკინგებული.

ერთ-ერთ მანქანას, რომ ჩავუარე გადმოხტა პირბადიანი კუნთმაგარი ვირთხა და გამოექანა ჩემკენ. ასევე, გაიღო მანქანის მეორე კარიც და მეორე ვირთხაც აპირებდა გადმოსვლას. ჰაერში ვისროლე და დავემუქრე. პირველი ვირთხა ისე სწრაფად გაიქცა, ვერ დავინახე, სად შეძვრა. ეს “მერსედესი” ადგილზე “დაბუქსავდა” და სწრაფად დაეშვა მიწისქვეშა გვირაბში. ბევრი მოწმე იყო გარშემო, დაადასტურებენ რასაც ვწერ თუ საჭირო გახდა“, – წერს ზურაბ ჯაფარიძე.

პარტია „ქართული ოცნების“ ცენტრალურ ოფისში უმრავლესობის სხდომა მიმდინარეობს. რა საკითხზე მსჯელობენ მმართველი პარტიის წევრები უცნობია, თუმცა, სავარაუდოდ, საკითხი “უცხოური გავლენის გამჭვირვალობის შესახებ” კანონპროექტს და მის გარშემო ქვეყანაში დაწყებულ საპროტესტო აქციებს შეეხება.

არსებული ინფორმაციით, სხდომის დასრულების შემდეგ, მედიის შეკითხვებს პარლამენტის თავმჯდომარე, შალვა პაპუაშვილი უპასუხებს.

ჩვენმა გუნდმა, პარტიამ „გახარია საქართველოსთვის“ დეპუტატებმა, ოფიციალური წერილით მივმართეთ საქართველოს გენერალურ პროკურორს, ირაკლი შოთაძეს, რომ რაც შეიძლება დროულად დაიწყონ გამოძიება 151-ე, მუქარის მუხლით,- ამის შესახებ პარტია „გახარია საქართველოსთვის“ წევრმა ანა ბუჩუკურმა განაცხადა.

როგორც ბუჩუკურმა აღნიშნა, დაუსჯელი არავინ დარჩება.

მისივე თქმით, მოლოდინი არ აქვს, რომ პროკურატურა ირაკლი შოთაძის ხელმძღვანელობით გამოძიებას დაიწყებს.

„როგორც იცით, მასობრივად ხდება საქართველოს მოქალაქეების დაშინება, მუქარა, გინება სატელეფონო ზარებით და ადამიანების ქუჩაში ცემა. ჩვენი გუნდის საკრებულოს წევრების უმრავლესობას უკვე დაურეკეს და მათ მიიღეს ეს მუქარის ზარები. ეს პროცესი გრძელდება. კონკრეტული მტკიცებულებებით, ე.წ. სქრინებით შევიტანეთ განცხადება „ოცნებასთან“ აფილირებული ე.წ ჩატის, სოცმედიის საშუალებით როგორ ხდება კონკრეტული ადამიანების იდენტიფიცირება იმ მიზნით, რომ ამ ადამიანებს შემდგომ გაუსწორდნენ, დაემუქრონ, შეურაცხყოფა მიაყენონ, ქუჩაში დახვდნენ.

შესაბამისად, ყველას უნდა ესმოდეს, რომ დაუსჯელი არ დარჩება არავინ, დანაშაულს აქვს ხანდაზმულობა და თითოეული ადამიანის სისხლის სამართლებრივი პასუხისმგებლობა ადრე თუ გვიან აუცილებლად დადგება.

შესაბამისად, რომ გითხრათ მოლოდინი მაქვს, ირაკლი შოთაძე გამოძიებას დაიწყებს, ბუნებრივია – არა, მაგრამ ყველა მტკიცებულება ჩვენი გუნდის მიერ იქნება წარდგენილი. ვიმეორებ, დაუსჯელი ამ ქვეყანაში არ დარჩება არავინ, ადრე თუ გვიან თითოეულ ამ დანაშაულს, მათ შორის, მუქარას აქვს თავისი ხანდაზმულობის ვადა“,- განაცხადა ბუჩუკურმა, რომლის კომენტარსაც პარტია „გახარია საქართველოსთვის“ ავრცელებს.

იურიდიულ საკითხთა კომიტეტმა „კორუფციის წინააღმდეგ ბრძოლის შესახებ“ კანონში ცვლილება მეორე მოსმენით განიხილა და მხარი დაუჭირა.

მომხსენებლის, იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, კანონპროექტში დაბრუნდება კანონის მოქმედი რედაქციის ის მუხლი, რომლის თანახმად, კანონის შესაბამისი პუნქტებით განსაზღვრული თანამდებობის პირი ვალდებულია ანტიკორუფციული ბიუროს უფროსის მიერ მისთვის დადგენილ ვადაში გაიაროს ნარკოლოგიური შემოწმება და შესაბამისი ცნობა მისი გაცემიდან 3 დღის ვადაში ანტიკორუფციულ ბიუროს წარუდგინოს.

„ვენეციის კომისიის მოსაზრება იყო, რომ ან მომხდარიყო ამ საკითხის ამოღება, ან ლეგიტიმური მიზნების უფრო დაკონკრეტება. ჩვენ თავიდან გადაწყვიტეთ, რომ ამ მუხლის ამოღება შეიძლება უფრო მიზანშეწონილი ყოფილიყო, თუმცა ჩვენი ხელისუფლების გაცხადებული პოლიტიკაა, რომ ნარკოპოლიტიკის მიმართულებით მაქსიმალურად მკაცრი მიდგომები უნდა იყოს გამოყენებული, განსაკუთრებით ნარკოტიკული საშუალების რეალიზებასთან დაკავშირებით. ამ მიმართულებით ჩვენ უკვე დავაინიცირეთ კონკრეტული პროექტი, რომელიც განსაზღვრავს ახალი ტიპის ნარკოტიკული საშუალებების დოზებს, რომლებზეც შინაგან საქმეთა სამინისტრომ, საერთაშორისო ორგანიზაციის მეშვეობით, კონკრეტული კვლევა ჩაატარა.

ნარკოპოლიტიკის მიმართ კიდევ უფრო მეტად უნდა გამკაცრდეს მიდგომა, მითუმეტეს, ეს უნდა შეხებოდეს თანამდებობის პირს. თანამდებობის იმ პირის მიერ მიღებულ გადაწყვეტილებას, რომელიც უარს ამბობს ნარკოტესტის გავლაზე, სანდოობა ვერ ექნება. პირველი მოსმენის დროს, დათქმით ვამბობდი, რომ თუ განხილვების დროს ყველა არ დაუჭერდა მხარს ამ საკითხს, ისე გამოვიდოდა, რომ თითქოს მხოლოდ ჩვენი ინიციატივაა ნარკოტესტების გაუქმება. აქედან გამომდინარე, მე ამ საკითხს უკან ვაბრუნებ და გთავაზობთ, რომ დავტოვოთ მოქმედი ნორმა“, – აღნიშნა ანრი ოხანაშვილმა.

მისი თქმით, ვენეციის კომისიის რეკომენდაციის შესაბამისად, კანონპროექტის თავდაპირველ ვერსიაში ჩაიწერა, რომ ანტიკორუფციული ბიუროს უფროსის დაკავებაზე, დაპატიმრებაზე და პასუხისგებაში მიცემაზე საქართველოს პარლამენტის თანხმობაა საჭირო, თუმცა უფლებამოსილების შეჩერების საკითხი ღიად იყო დარჩენილი.

შესაბამისად, კანონპროექტში ხდება ამ საკითხის დაზუსტება შემდეგი ჩანაწერით – ანტიკორუფციული ბიუროს უფროსის დაკავებაზე ან დაპატიმრებაზე საქართველოს პარლამენტის მიერ თანხმობის მიცემის შემთხვევაში მას საქართველოს პარლამენტის დადგენილებით შეუჩერდება უფლებამოსილება სისხლის სამართლებრივი დევნის შეწყვეტის შესახებ დადგენილების/განჩინების გამოტანამდე ან სასამართლოს განაჩენის კანონიერ ძალაში შესვლამდე.

როგორც ანრი ოხანაშვილმა განაცხადა, კანონპროექტში ასევე ბრუნდება მოქმედი ნორმა, რომლის თანახმად, ანტიკორუფციული ბიუროს უფროსის უფლებამოსილების ვადამდე შეწყვეტის ერთ-ერთი საფუძველია მის მიერ ნარკოტიკული საშუალების მოხმარება ან სავალდებულო ნარკოლოგიური შემოწმების გავლისთვის თავის არიდება.

ინფორმაციას საქართველოს პარლამენტის პრესსამსახური ავრცელებს.

„ერთიანი ნაციონალური მოძრაობის“ და მისი სატელიტი რადიკალური ძალების ხელისუფლებაში დაბრუნება ნიშნავს მასშტაბურ რეპრესიებს და საქართველოს, როგორც სახელმწიფოსა და საზოგადოების განადგურებას!  -ნათქვამია პარტია „სოლიდარობა მშვიდობისთვის“ პოლიტიკური საბჭოს  მიერ გავრცელებულ განცხადებაში, რომელსაც „ჯორჯიან თაიმსი“ უცვლელად გთავაზობთ.

„საქართველოში სიტუაცია უკიდურესად დაძაბულია. ვითარების დესტაბილიზაციისათვის საბაბად იყენებენ კანონპროექტს „უცხოური გავლენის გამჭვირვალეობის შესახებ“, რომელსაც სრულიად უსაფუძვლოდ „რუსული კანონი“ შეარქვეს.

„ქართული ოცნების“ ხელმძღვანელობას ყველაფერი შეიძლება დასწამო, გარდა „რუსული“ კანონის ინიციირებისა, თანაც ასეთ მწვავე ვითარებაში!

რუსული ანალოგისაგან განსხვავებით, „ოცნების“ ამ კანონპროექტის მოქმედება, ჯერ ერთი, არ ვრცელდება ფიზიკურ პირებზე, და მეორეც, არ ითვალისწინებს სისხლის სამართლებლივ პასუხისმგებლობას.

ამასთან, კანონი შეზღუდავს არა მხოლოდ ევროპული ან ამერიკული ფულის, არამედ თუნდაც რუსული ფულის უკანონო შემოდინებასაც, რასაც მივესალმებით!

კანონპროექტი დროული და მეტად აქტუალურია ქვეყნის სუვერენიტეტის განმტკიცებისათვის, რადგანაც მიღების შემთხვევაში ის შეაფერხებს უცხოეთიდან უკანონოდ შემოსული დიდძალი ფინანსური სახსრების  ძალადობრივი, ანტიკონსტიტუციური გადატრიალებისათვის გამოყენებას.

პროდასავლური, ლიბერალური, ანტიქართული პოლიტიკური ძალები და მრავალრიცხოვანი არასამთავრობო ორგანიზაციები სწორედ ამიტომაც მიდიან პროვოკაციაზე, ცოცხალ ფარად იყენებენ რა სტუდენტ ახალგაზრდობას და მოზარდ თაობას, მათ გულრწფელობას, ნებსით თუ უნებლიედ რომ გახდნენ დესტრუქციული პროპაგანდის მძევალნი!

პარტია „სოლიდარობა მშიდობისთვის“ კატეგორიულად გმობს მცირეწლოვანთა მიზანმიმართულ ჩართვას პოლიტიკურ პროცესებში, მათი პირით განცხადებების დეკლარირებას, პოლიტიკური მიზნებისათვის ბავშვების უნამუსო გამოყენებას!

დაპირისპირების ბოლო დღეები გვიჩვენებს, რომ რევანშისტული ძალები ნებისმიერ მსხვერპლზე წავლენ, თვითონვე შექმნიან რა ფატალურ შედეგებს კიევის 2014 წლის „მაიდნის“ მოვლენების გამოცდილებით.

ერთიანი ნაციონალური მოძრაობის და მისი სატელიტი რადიკალური ძალების ხელისუფლებაში დაბრუნება ნიშნავს მასშტაბურ რეპრესიებს და საქართველოს, როგორც სახელმწიფოსა და საზოგადოების განადგურებას!

პარტია „სოლიდარობა მშვიდობისთვის“ მიმართავს საქართველოს მოსახლეობას, ქართველ ხალხს, გაერთიანდნენ პროფაშისტური რევანშის საფრთხის წინააღმდეგ, რათა გადავარჩინოთ  ათასწლოვანი კულტურა, მართლმადიდებლური რწმენა, ტრადიციები და თვით ქართული იდენტობა, რომელიც თავის თავში უნიკალურ მრავალეროვნულობასა და რელიგიურ შემწყნარებლობას გულისხმობს!

„სოლიდარობა მშვიდობისთვის“ გამოთქვამს რწმენას, რომ საპარლამენტო უმრავლესობა უზრუნველჰყოფს „უცხოური გავლენის გამჭვირვალეობის შესახებ“ კანონის მესამე მოსმენით მიღებას.

„სოლიდარობა მშვიდობისთვის“ გამოთქვამს რწმენას, რომ სამართალდამცავი ორგანოები გააგრძელებენ კანონის შესაბამისად მოქმედებას და მტკიცედ დაიცავენ მშვიდობას საზოგადოებაში და კონსტიტუციურ წესრიგს ქვეყანაში”-ნათქვამია განცხადებაში