„ვარდების რევოლუცია“ – ახალი ეტაპის გაგრძელება აუცილებლად გვაქვს წინ, რადგან ისევ აღმოსაფხვრელია კორუფცია, ისევ მოსაშორებელია კრიმინალი, ისევ გასაყვანია საქართველო საერთაშორისო არენაზე, რადგან მთელი ჩვენი საერთაშორისო კავშირები არის დანგრეული და ჩვენ ყველაფერ ამისთვის ვართ მზად, – ამის შესახებ საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო პროცესზე დისტანციურად ჩართვისას განაცხადა.

როგორც სააკაშვილმა აღნიშნა, წინ დიდი ცვლილებებია და „ასეთი რეჟიმი დიდხანს ვერ გაძლებს“.

„ისინი ანგრევენ ყველაფერს, რაც ეხება „ვარდების რევოლუციის“ მონაპოვრებს და ეს ნგრევა იღებს კატასტროფულ ხასიათს, მაგრამ ყველაზე დიდ ნგრევას ყოველთვის მოჰყვება ყველაზე დიდი აღმშენებლობა. ამას ვამბობ, როგორც „ვარდების რევოლუციის“ ლიდერი და ჩვენ „ვარდების რევოლუცია“ – ახალი ეტაპის გაგრძელება აუცილებლად გვაქვს წინ, რადგან ისევ აღმოსაფხვრელია კორუფცია, ისევ მოსაშორებელია კრიმინალი, ისევ გასაყვანია საქართველო საერთაშორისო არენაზე, რადგან მთელი ჩვენი საერთაშორისო კავშირები არის დანგრეული და ჩვენ ყველაფერ ამისთვის ვართ მზად.

ამისთვის არის როგორც შიდა, ასევე გარე პირობები. ამ ომების ხარჯზე, უკრაინაში, ირანსა და ისრაელს შორის, სადაც ისრაელმა და ამერიკამ გაიმარჯვეს, პალესტინელებთან მიმართებაში, მოყვება პოლიტიკის დიდი გადააზრების დრო და ტირანების და დიქტატორების დრო მიდის წარსულში. საქართველოში ახლა არის სრულიად გაუკუღმართებული პროცესი. ქვეყანას მართავს ივანიშვილი, რომელიც ინსტრუქციებს იღებს თავისი „ფეესბეს“ კურატორისგან. ივანიშვილს გარს ჰყავს მანქურთები, რომლებიც იღებენ თავის ინსტრუქციებს საქართველოს განადგურების მიმართულებით. ასრულებენ მტრის დავალებებს. ყველაფრის გათვალისწინებით, ისტორიული ლოგიკის გათვალისწინებით, ხალხის განწყობის გათვალისწინებით, ჩვენ გარშემო ფაქტორების გათვალისწინებით, ასეთი რეჟიმი დიდხანს ვერ გაძლებს“, – განაცხადა მიხეილ სააკაშვილმა.

ამასთან, მიხეილ სააკაშვილმა აღნიშნა, რომ დღის წესრიგში შეიძლება დადგეს „ჩვენი ისტორიული ტერიტორიების საქართველოსთან შემოერთების საკითხი“.

„ჩვენ გვაქვს წინ დიდი ცვლილებები. საქართველო აუცილებლად დაიბრუნებს თავის ტერიტორიულ მთლიანობას, დევნილები დაბრუნდებიან თავიანთ სახლებში, იმპერია იშლება და ამ საკითხებში დგას კავკასიის გაერთიანების ამბავი, რადგან კავკასიის გაერთიანებაში ყოველთვის ქართველები თამაშობდნენ ისტორიულად დიდ როლს. გავიხსენოთ ზვიად გამსახურდია, მეცნიერებაში არნოლდ ჩიქობავა. იცით, რომ მაგალითად, ინგუშებში მუდმივად დგას საკითხი საქართველოსთან შემოერთების. იმპერიის დაშლასთან ერთად, არა მხოლოდ ჩვენი ტერიტორიების დაბრუნების, არამედ დღის წესრიგში შეიძლება დადგეს ჩვენი ისტორიული ტერიტორიების საქართველოსთან შემოერთების საკითხი. ასოცირების საკითხი. მთლიანად იცვლება კავკასიაში სიტუაცია. სომხეთის პრემიერ-მინისტრი ჩავიდა თურქეთში და მოაწერა ხელი სამშვიდობო ხელშეკრულებას. ეს არის ისტორიული გარღვევა. კავკასია ისევ იკვრება ერთ მუშტად. სომხეთმა გამოაცხადა რუსეთის ბაზების გაყვანის აუცილებლობის შესახებ. ეს არის იმხელა პროცესი, რომლის გარეთ საქართველო ვერ დარჩება, როგორც უნდა მოინდომონ ეს მათ, ვისაც დღეს უნდა მაქსიმალური არეულობა“, – განაცხადა მიხეილ სააკაშვილმა.

სააკაშვილმა ერთიანობის მნიშვნელობაზე ისაუბრა და განმარტა, რომ ახლა დაყოფის დრო არ არის.

„ჩვენი ემიგრანტები აქტიურად უნდა ჩაერთონ საქართველოს საზოგადოების პოლიტიკურ ცხოვრებაში. ელექტრონული კენჭისყრა უნდა შემოვიდეს და ყველა ძირითადი გადაწყვეტილება მიღებული იქნას მათი მონაწილეობით, სახლიდან გაუსვლელად.

გაყოფის დრო რომ აღარ არის, მგონი, ამას ყველა ხვდება, ყველას სათითაოდ ანადგურებენ. ვინც მოითხოვდა, რომ მე უდანაშაულოდ ვყოფილიყავი ციხეში, რადგან ეს თურმე სტაბილურობას უწყობდა ხელს, არა მგონია, ის ახლა ამას ფიქრობდეს და ჩვენთვის ის არის ამ რეჟიმის მსხვერპლი და მე მას ვუცხადებ სოლიდარობას“, – განაცხადა მიხეილ სააკაშვილმა.

საერთო სასამართლოების შესახებ კანონში ინიცირებული ცვლილებები, რომელსაც საქართველოს პარლამენტი განიხილავს, ემსახურება სასამართლოს და მართლმსაჯულების დამოუკიდებლობის კიდევ უფრო მეტად განმტკიცებას, – ამის შესახებ საქართველოს პრემიერ-მინისტრმა, ირაკლი კობახიძემ დღევანდელ ბრიფინგზე განაცხადა.

მთავრობის მეთაურის შეფასებით, ეს არის ძალიან მნიშვნელოვანი ცვლილებები, რომლებიც ემსახურება სასმართლო სისტემის დამოუკიდებლობის განმტკიცებას.

„გახსოვთ, როგორი პროცესები წარიმართებოდა ქართული მართლმსაჯულების დამოუკიდებლობის წინააღმდეგ, მათ შორის პირდაპირი უხეში ჩარევის ფაქტები. ძალიან კარგად გახსოვთ, როგორ დაიბარა, მაგალითად, აშშ-ის საელჩოს წარმომადგენელმა ერთ-ერთი მოსამართლე, ბატონი ჩხიკვაძე და როგორ მოსთხოვა, საქართველოს კონსტიტუციის დარღვევით, ანგარიში კონკრეტულ საქმესთან დაკავშირებით. ისიც გახსოვთ, რომ მოგვიანებით სტრასბურგის სასამართლომ დაადასტურა მოსამართლის გადაწყვეტილების სამართლიანობა. თუმცა ფაქტი დარჩა ფაქტად და, სამწუხაროდ, არავის ამერიკის საელჩოდან ამ უხეში ჩარევისთვის საზოგადოების წინაშე პასუხი არ გაუცია. ეს არის სამწუხარო რეალობა. ჩვენს მართლმსაჯულების სისტემას სჭირდება დამოუკიდებლობის განმტკიცება და, რეალურად, კანონპროექტში ასახული ყველა ის ცვლილება, რომელსაც განიხილავს საქართველოს პარლამენტი, ემსახურება სასამართლოს და მართლმსაჯულების დამოუკიდებლობის კიდევ უფრო მეტად განმტკიცებას“, – აღნიშნა ირაკლი კობახიძემ.

თეა წულუკიანი – „ნაციონალური მოძრაობა“ ხელისუფლებაში იმ მოვლენების შედეგად მოვიდა, რომელსაც რევოლუცია მცდარად დაერქვა – ჩვენ ამას ვიკვლევთ და სავარაუდოდ, ვიტყვით, რომ ეს ხავერდოვანი რევოლუცია არ იყო!

„ნაციონალური მოძრაობა“ ხელისუფლებაში იმ მოვლენების შედეგად მოვიდა, რომელსაც რევოლუცია მცდარად დაერქვა – ჩვენ ამას ვიკვლევთ და სავარაუდოდ, ვიტყვით, რომ ეს ხავერდოვანი რევოლუცია არ იყო! ეს იყო ხავერდოვანი რევოლუციის ფორმით შეფუთული სახელმწიფო გადატრიალება, – აღნიშნული განცხადება პარლამენტში შექმნილი დროებითი კომისიის ხელმძღვანელმა თეა წულუკიანმა, პარლამენტის პლენარულ სხდომაზე გააკეთა.

წულუკიანი ამბობს იმასაც, რომ „სახელმწიფო გადატრიალებიდან“ მომდევნო თვეებში ჩატარებული არჩევნები გაყალბებული იყო და „ნაციონალური მოძრაობა“ ხელისუფლებაში გაყალბებული არჩევნების შედეგად მოვიდა.

„ამაზე სტრასბურგის სასამართლომ თავისი სიტყვა თქვა. მაშინ ცესკოს ზურაბ ჭიაბერაშვილი ხელმძღვანელობდა. ეს თემა გამოიკვეთა და კომისიის დასკვნის შესავალ ნაწილში – თუ ვინ როგორ მოვიდა ხელისუფლებაში, მოხსენიებული იქნება.

ხელისუფლებაში მავნებელი ძალა მოვიდა და ეს ძალა ხელისუფლებაში გადატრიალებით და გაყალბებული არჩევნებით მოვიდა.

ეს შესავალში ნაჩვენები იქნება კონკრეტულად და დოკუმენტებზე დაფუძნებულად“, – განაცხადა თეა წულუკიანმა.

პარლამენტი პლენარულ სხდომაზე დროებითი საგამოძიებო კომისიისთვის ვადის ერთ თვით – 5 აგვისტომდე გაგრძელების საკითხს იხილავს.