ხალხის ძალის“ გენერალური მდივანი დიმიტრი ხუნდაძე გამჭვირვალობის კანონის ირგვლივ ქვეყანაში განვითარებულ მოვლენებს ეხმიანება და აცხადებს, რომ რევოლუციური სცენარის მცდელობები ჯერ კიდევ 2020 წელს დაიწყო და ახლაც გრძელდება.

„პირველი, რაც ჩვენ გვახსოვს ხელისუფლების ცვლილების უკვე არა შეფარული, არამედ ღია მცდელობა, იყო 2020 წელს, როდესაც ჩატარებული არჩევნები „ისფედმა“ სრულიად უსამართლოდ გამოაცხადა გაყალბებულად, ანუ პარალელური დათვლის შედეგები გააყალბა, რამაც საზოგადოებაში გამოიწვია ემოცია და ეს ემოცია რასაკვირველია, შექმნილი იყო იმისთვის, რომ შემდეგ ის გამხდარიყო მართული და შეეცვალათ ხელისუფლება იმ მოტივით, რომ მან არჩევნები გააყალბა.

დესტრუქციული ჯგუფები, რომელთაც ეს სცენარი უნდა შეესრულებინათ შეეცადნენ, ხალხის ემოცია პიკში აეყვანათ და აქაც უკვე თავისუფალი მედიის შეზღუდვის სურათის შექმნით ქვეყანაში, ისევ რევოლუციისთვის დაედოთ საფუძველი. ესეც არ გამოუვიდათ, მაგრამ მცდელობები ისევ გრძელდება“, – აცხადებს ხუნდაძე.

როდესაც ფორმალურად, მაგრამ მაინც საქართველოს პრეზიდენტი ხდება უცხო ქვეყნის წარმომადგენელი, ბუნებრივად იქნება ქაოსი პრეზიდენტის ინსტიტუციაში,” – განაცხადა პარტია „ხალხის ძალის“ აღმასრულებელმა მდივანმა გურამ მაჭარაშვილმა ჟურნალისტებთან საუბრისას.

მისი თქმით, საქართველოს პრეზიდენტის სახელს სალომე ზურაბიშვილი ფორმალურად ატარებს და მას მხოლოდ უცხოელი პატრონების მითითებების შესრულება ევალება.

მაჭარაშვილის თქმით, ზურაბიშვილი ქვეყანაში მოსიარულე ნაღმია და როდის და სად აფეთქდება არავინ იცის.

„როდესაც ფორმალურად, მაგრამ მაინც საქართველოს პრეზიდენტი ხდება უცხო ქვეყნის წარმომადგენელი, ბუნებრივად იქნება ქაოსი პრეზიდენტის ინსტიტუციაში. მისი, თუნდაც როგორც ფორმალური პრეზიდენტის როლი, არის მხოლოდ ის, რომ გააკეთოს და თქვას ის, რასაც მისი პატრონები ეტყვიან.

წარმოიდგინეთ, საქართველოს პრეზიდენტი ამბობს ამას [საქართველოს არც ჯარი ჰყავს, არც იარაღი აქვს და არც ექნება] და მერე ჩვენ გვიწევდა თავის მართლება, რომ ჯარში არ ყოფილიყო დემოტივაცია. რა თქმა უნდა, ეს არ არის შემთხვევითი. როდესაც შენ ხელს მოაწერ უცხო ქვეყნის წარმომადგენლობას, სამწუხაროდ, შემდეგ აღარ გეკითხებიან რა გააკეთო და რა არა.

სალომე ზურაბიშვილი არის მოსიარულე ნაღმი – სად აფეთქდება და სად მოგვიწევს ჩვენ ამის ჩაქრობა, არ ვიცი. მათ შორის იყო ცნობილი ფაქტი დავით გარეჯთან დაკავშირებული, რომელიც არის, რა თქმა უნდა, სენსიტიური ხასიათის. როდესაც იყო ასეთი პროვოკაციული მცდელობაზე საუბარი, ზუსტად მაშინ ჩავიდა იმ ადგილას პროვოკაციების მოსაწყობად საქართველოს პრეზიდენტი. ჩვენ მოგვიწია ჩვენს მეგობარ ქვეყანასთან გარკვეული კონსულტაციები იმასთან დაკავშირებით, რომ ეს არ იყო ჩვენი ჟესტი და ეს ადამიანი გასული იყო მომსახურების ზონიდან,“ – განაცხადა გურამ მაჭარაშვილმა.

თეა წულუკიანმა უცხოელი დიპლომატების თბილისში მიმდინარე აქციებში ჩართულობა შეაფასა. კომენტარი ამ თემაზე კულტურის, სპორტისა და ახალგაზრდობის მინისტრმა, ვიცე-პრემიერმა „იმედის კვირასთან“ საუბრისას გააკეთა.

„როდესაც ჩვენ ვხედავთ უცხო ქვეყნის თანამდებობის პირებს, რომლებიც ჩამოდიან ვიზიტით საქართველოში და მთავრობის საწინააღმდეგო აქციას უერთდებიან, ეს არის ყველა საერთაშორისო ნორმის დარღვევა, რომელიც ასეთ შემთხვევებში რელევანტურია. ეს არის მასპინძელი ქვეყნის სუვერენიტეტის ხელყოფა და მის შიდა საქმეებში პირდაპირ ჩარევა. აქ უკვე მცდელობასთან აღარ გვაქვს საქმე. პირდაპირ იფიქრებ ადამიანი, რომ ეს ის ხალხი და იმ ხალხის წარმომადგენლები შეუერთდნენ, სტუმრად ჩამოსულნი, ხელისუფლების წინააღმდეგ აქციას, რომლებიც მანამდე კულუარებიდან ცდილობდნენ ემართათ რევოლუციური პროცესები საქართველოში და როდესაც ეს არაერთი მცდელობა ჩაიფუშა, შემდეგ უკვე იძულებულები გახდნენ თავიანთ მსახიობებთან ერთად, როგორც რეჟისორები გამოსულიყვნენ სცენაზე“, – განაცხადა წულუკიანმა

საქართველოს ყველა ელჩმა კარგად უნდა გაიაზროს, რომ დღეს ისინი რუსული სპეცოპერაციის თანამონაწილეები არიან – ეს არის ბოლო მომენტი, როდესაც კომპასი უნდა გაასწორონ და ერის გვერდით დადგნენ, – ამის შესახებ „ლელოს“ საგარეო მდივანი გრიგოლ გეგელიამ განაცხადა.

მისი თქმით, საკმარისზე მეტი საფუძველია იმის გასაცნობიერებლად, რომ საქართველოს ხელისუფლება გავიდა კონსტიტუციური ჩარჩოდან, „ღიად შეცვალა საგარეო ვექტორი და საბოლოოდ მოაწერა ხელი კაპიტულაციას“.

„საქართველოს ყველა ელჩმა კარგად უნდა გაიაზროს, რომ დღეს ისინი რუსული სპეცოპერაციის თანამონაწილეები არიან.

პრეზიდენტის ვეტო, საფრანგეთისა და გერმანიის პრეზიდენტების განცხადებები, აშშ-ს ჰელსინკის კომისიის განცხადება მომავალ სანქციებთან დაკავშირებით, ასობით გამოხმაურება მსოფლიო ლიდერების მხრიდან – ეს საკმარისზე მეტი საფუძველია იმის გასაცნობიერებლად, რომ საქართველოს ხელისუფლება მთლიანად გავიდა კონსტიტუციური ჩარჩოდან, ღიად შეცვალა საგარეო ვექტორი და საბოლოოდ მოაწერა ხელი კაპიტულაციას.

ეს არის ხელისუფლება, რომელიც საელჩოებს 26 მაისის ღონისძიებებსაც კი აუქმებინებს, მანამ სანამ პრემიერ-მინისტრი აშშ-ს ღიად სდებს ბრალს სახელმწიფო გადატრიალების მხარდაჭერაში, დე ფაქტო ბელადი კი გლობალურ შეთქმულებებზე საუბრობს.

ასეთ ვითარებაში, წარმოუდგენელია თავმოყვარე დიპლომატმა შეძლოს რაიმე საერთოდ გამონახვა აღმასრულებელი ხელისუფლების კურსსა და საკუთარი მისიის მიზნებს შორის. ამ ხელისუფლების დესპანობა აღარ არის თავსებადი ქართველის ხალხის გეოპოლიტიკური არჩევანის მსახურებასთან.

ყველა დიპლომატს, რომელიც არ მიიღებს ღირსეულ გადაწყვეტილებას, გააზრებული უნდა ჰქონდეს, რომ ისინი საერთაშორისო ასპარეზზე წარმოადგენენ იმ ხელისუფლების ნებას და ინტერესებს, რომელიც ღალატობს საქართველოს ინტერესებს. შესაბამისად, ისინი არიან პასუხისმგებლობის თანაზიარი და მონაწილეობენ რუსული დაზვერვის გეგმის აღსრულებაში.

თუმცა, დროები სწრაფად იცვლება და ქართველი ხალხი სულ მალე გაასწორებს ეროვნულ კომპასს, როდესაც ახალი ხელისუფლების კურსი ხელახლა დაემთხვევა ერის ნებას. როცა კომპასი გასწორდება, ამ დროს, საგარეო სამსახურში აღარ იქნება იმ დიპლომატების ადგილი, ვინც კრიტიკულ მომენტში სამშობლოს და სახელმწიფოს საგარეო ინტერესების დაცვას პირადი კომფორტი და კარიერული კონფორმიზმი ამჯობინა. ან ახლა, ან აღარასდროს – ეს არის ბოლო მომენტი, როდესაც საქართველოს ელჩებმა კომპასი უნდა გაასწორონ და ერის გვერდით დადგნენ“, – აცხადებს გეგელია, რომლის კომენტარსაც „ლელოს“ პრესსამსახური ავრცელებს.

2024 წლის 16 მაისს საქართველოს და ჩეხეთის იუსტიციის მინისტრებმა პრაღაში რიგით მეორე ქართულ-ჩეხური სამართლებრივი ფორუმი გახსნეს. ღონისძიებასთან დაკავშირებით ჩეხური მედიისთვის მიცემულ ინტერვიუში ჩეხეთის იუსტიციის მინისტრმა პაველ ბლაჟეკმა აღნიშნა, რომ საუბარი ჰქონდა მის ქართველ კოლეგა რატი ბრეგაძესთან უცხოური გავლენის გამჭირვალობის შესახებ საქართველოს კანონის თაობაზე და მისთვის გასაგებია საქართველოს მთავრობის პოზიცია არსებული გეოპოლიტიკური სიტუაციის გათვალისწინებით. პაველ ბლაჟეკის თქმით, არასწორია, საქართველოს ხელისუფლებას რუსული ეწოდოს.

აღნიშნული კომენტარის გამო  ჩეხეთის იუსტიციის მინისტრი სოციალურ ქსელ X-ში გააკრიტიკა ჩეხმა ევროპარლამენტარმა მარკეტა გრეგოროვამ, რომელიც ჩეხეთის იუსტიციის მინისტრს წითელი ბარათით დაემუქრა თუ ის არ შეწყვეტდა „პრორუსი აგენტების“ დაცვას.

პაველ ბლაჟეკმა აღნიშნულ განცხადებას გრეგოროვასთვის დამახასიათებელი ზედაპირული ტყუილი უწოდა და მოიყვანა მის მიერ მედიისთვის მიცემული ინტერვიუდან ამონარიდები:

„ფუნდამენტური შეცდომაა, როცა მხოლოდ ჩვენი გადმოსახედიდან განვიხილავთ განსხვავებული ისტორიისა და გეოგრაფიული რეალობის მქონე უცხო სახელმწიფოს. ქართველებს ჩვენგან განსხვავებულ გარემოში უწევთ გადაწყვეტილებების მიღება.  ჩვენ უნდა ვეცადოთ, ვიყოთ ემპათიურები მათი სიტუაციის მიმართ და მხოლოდ ამის შემდეგ შეგვეძლება მათი შეფასება“.

„მან ამიხსნა, რამდენად რთულია მათი მდგომარეობა რუსეთთან მიმართებით, იმის გათვალისწინებით, რომ საქართველოს ტერიტორიის ნაწილი რუსების მიერ არის ოკუპირებული. არ მინდა, საქართველოს დღევანდელ ხელისუფლებას პრორუსული იარლიყი მიენიჭოს. დასავლეთი არასოდეს გაგზავნის იქ ჯარს. ისინი შეჩვეულები არიან რუსული არმიის პირისპირ ყოველთვის მარტო ყოფნას. მათ შეიძლება ჩვენი შეხედულებებისგან განსხვავებულად იმოქმედონ, მაგრამ ისინი მარტონი არიან“. – ციტირებს საკუთარ ინტერვიუდან ამონარიდს  სოციალურ ქსელ X-ზე  პაველ ბლაჟეკი.

https://twitter.com/blazek_p/status/1791740512489050276?s=46&t=Bkh-eDvTTM3h-jekoLCxvw 

https://twitter.com/blazek_p/status/1791740512489050276?s=46&t=Bkh-eDvTTM3h-jekoLCxvw