„ნაციონალური მოძრაობა“ პოლიტიკურ „აიწონა-დაიწონას“ თამაშობს – ვაშაძე „ნაციონალური მოძრაობისთვის“ საუკეთესო კანდიდატი იქნება, ზუსტად გამოხატავს, „ნაციონალური მოძრაობის“ იდეოლოგიას, მდგომარეობას და მის მომავალს, – ამის შესახებ პარლამენტის ვიცე-სპიკერმა არჩილ თალაკვაძემ ჟურნალისტებს განუცხადა, რითაც გამოეხმაურა გავრცელებულ ინფორმაციას, რომ „ნაციონალური მოძრაობის“ პრემიერ-მინისტრობის კანდიდატი, საარჩევნოდ, შესაძლოა გიორგი ვაშაძე იყოს.

„როგორც ჩანს, კონსულტაციები მიმდინარეობს. იმედი მაქვს, საერთო ენას გამოძებნიან და მშვიდობიან გადაწყვეტილებას მიიღებენ. გასაკვირია, რომ ნიკა მელია ჯერ კიდევ რჩება „ნაციონალურ მოძრაობაში“, იქ, სადაც ის არ უნდათ და გადააყენეს. „ნაციონალური მოძრაობა“ სერიოზულ და საქმიან პოლიტიკურ ლოგიკას მოკლებულია. ეს არის პარტია, რომელიც დაშლის გზაზეა, პოლიტიკურ „აიწონა-დაიწონას“ თამაშობს. წინა სერიაში ხაბეიშვილმა გადაწონა მელია, ახლა მელია გადაწონის ხაბეიშვილს, შემდეგში შეიძლება ცისკარიშვილთან ერთად გაიმართოს მორიგი შერკინება. არჩევნებზე საზოგადოებას კარგი შესაძლებლობა ექნება, რომ ეს არასერიოზული პოლიტიკური პარტია აუტსაიდერებში გადაიყვანოს“, – განაცხადა არჩილ თალაკვაძემ.

„ნაციონალურ მოძრაობას“ ვაშაძე კი არა, ვინც გინდა, ის ჰყავდეს პრემიერ-მინისტრობის კანდიდატი, ჩვენ „ნაციონალურ მოძრაობასთან“ არანაირ ურთიერთობას და პარტნიორობას არ ვგეგმავთ, – ამის შესახებ ოპოზიციონერმა დეპუტატმა, ალეკო ელისაშვილმა განაცხადა.

როგორც ალეკო ელისაშვილმა აღნიშნა, „ნაციონალური მოძრაობა“ ძალიან კომიკური ძალა ხდება.

„მივქარეთ, რომ დავდიოდით იმ ფანჩატურ-მანჩატურებში და რაღაც მაღალი მატერიების გვჯეროდა. კარგი გამოცდილება მივიღეთ და მსგავს აჯაფსანდალში მონაწილეობას არ ვაპირებთ. „ნაციონალური მოძრაობა“ ძალიან კომიკური ძალა ხდება და, შესაბამისად, ამ გზაზე წარმატებას ვუსურვებ. რამდენადაც კიდევ უფრო კომიკური გახდება „ნაციონალური მოძრაობა“ და რამდენადაც ხალხი მიხვდება, რომ ამ პარტიისთვის ხმის მიცემა არ შეიძლება, მით უფრო იოლი გახდება „ქართული ოცნების“ ძალაუფლებიდან ჩამოშორება. 11 წელია, „ქართული ოცნება“ ძალაუფლებაშია მხოლოდ და მხოლოდ „ნაციონალური მოძრაობის“ გამო. შესაბამისად, მთავარი საფრთხობელა რაც უფრო სასაცილო და ნაკლებად ანგარიშგასაწევი გახდება, ხალხიც მიხვდება, რომ „ნაციონალურ მოძრაობას“ თუ არ მისცემენ ხმას, „ქართული ოცნების“ ხელისუფლებიდან წასვლა დაჩქარდება და ქვეყანასაც მაშინ ეშველება“, – განაცხადა ელისაშვილმა.

ნატო-ს გენერალურ მდივანს შემიძლია, მოვიწვიო საბჭო და ცალკეული მოკავშირეები ან საბჭოს წევრები მას ვერ დაბლოკავენ. საბჭოს მოწვევა ასევე შეუძლიათ ცალკეულ წევრ სახელმწიფოებს კრიზისული კონსულტაციისთვის, – ამის შესახებ ნატო-ს გენერალურმა მდივანმა, იენს სტოლტენბერგმა უკრაინის პრეზიდენტთან, ვოლოდიმირ ზელენსკისთან ერთად გამართულ პრესკონფერენციაზე განაცხადა.

სტოლტენბერგის თქმით, პრეზიდენტ ზელენსკის თუ სურს ნატო-ს საბჭოს მოწვევა, მას შეუძლია ამის გაკეთება.

„ვერ მოხდება მისი დაბლოკვა, რადგან ჩვენ ვიკრიბებით როგორც თანასწორები. ჩვენ გადავწყვიტეთ, რას ვაპირებთ, რომ გავაკეთოთ, მათ შორის ისიც, რომ კრიზისული კონსულტაციები შეიძლება, მოიწვიოს ამ საბჭოს ნებისმიერმა წევრმა. ასე რომ, ეს რაღაც ახალი და განსხვავებულია. ეს არის ძლიერი პოლიტიკური ინსტრუმენტი შემდგომი პოლიტიკური ინტეგრაციისა და ასევე მიზნების განსახორციელებლად. ეს არის ერთ-ერთი ელემენტი იმ გადაწყვეტილებების, რომელსაც დღეს ვიღებთ, რათა უკრაინა დაუახლოვდეს ნატო-ს წევრობას და ჩვენ ყველამ უნდა დავაფასოთ ეს“, – განაცხადა სტოლტენბერგმა.

ამასთან, სტოლტენბერგის თქმით, გუშინ ნატო-ს მოკავშირეების ჯგუფმა შექმნა კოალიცია, რათა უზრუნველყონ F-16-ის პილოტების წვრთნა უკრაინისთვის.

„ეს არის ნიდერლანდებისა და დანიის ინიციატივა. მივესალმები, რომ კიდევ რამდენიმე მოკავშირე შეუერთდა. ამჟამად მომზადების ზოგიერთი პროცესი უკვე მიმდინარეობს და წვრთნები შეძლებისდაგვარად სწრაფად დაიწყება. მოკავშირეები აცხადებენ, რომ წვრთნები ამ ზაფხულში დაიწყება. კოალიციაში 10-ზე მეტი წევრია. ეს ასევე არის F-16-ების მიწოდებაზე შემდგომ გადაწყვეტილებასთან დაკავშირებული. გარანტიები, დოკუმენტები, საბჭოები, შეხვედრები მნიშვნელოვანია, მაგრამ ყველაზე სასწრაფო ამოცანა არის უკრაინის საკმარისი შეიარაღებით უზრუნველყოფა.

შეხვედრებზე ჩვენ მოვისმინეთ ახალი განცხადებები ნატო-ს მოკავშირეებისგან. საფრანგეთმა გადაწყვიტა შორ მანძილზე მოქმედი ფრთოსანი რაკეტების მიწოდება, გერმანიამ გამოაცხადა ახალი დიდი პაკეტი საჰაერო თავდაცვის სისტემებით, სამხედრო მანქანებით, აშშ-მა – ახალი დიდი პაკეტი, სხვა მოკავშრეებმაც განაცხადეს დახმარების შესახებ. სასწრაფო ამოცანა არის იმის უზრუნველყოფა, რომ უკრაინამ გაიმარჯვოს, რადგან უკრაინა თუ ვერ გაიმარჯვებს, ნიშნავს, რომ გაწევრიანების საკითხი ამოცანა საერთოდ აღარ იქნება“, – განაცხადა იენს სტოლტენბერგმა.