„ნაციონალური მოძრაობის“ აქციამ ხმაური რომ გამოიწვიოს, საჭირო გახდა მისი 9 აპრილს ჩატარება, რაც არის პარაზიტირება, იმ ხალხის ნამოღვაწარის, რომელიც ამას არ იმსახურებს, – ამის შესახებ „გირჩის“ წევრმა, იაგო ხვიჩიამ განაცხადა.
როგორც ხვიჩიამ აღნიშნა, „ნაციონალური მოძრაობის“ აქციას აკლია გულწრფელობა.
„მე არ ვეთანხმები არაფერს „ნაციონალური მოძრაობის“ აქციაში, არც მის ჩატარების თარიღს, არც იქ მყოფი ხალხის გულწრფელობის მჯერა მაინც და მაინც ყველა საკითხზე, რასაც ამბობენ. მოთხოვნები ბუნდოვანია. არ მჯერა არც ის, რომ ჩაფიქრებული იყო, როგორც რაღაც ერთობლივი აქცია. ისე იქცეოდა „ნაციონალური მოძრაობა“, რომ თითქოს ეს აქცია ერთობლივი ყოფილიყო ან საერთო და არა – „ნაცმოძრაობის“. ჩემი აზრით, ამ აქციას თავიდან ბოლომდე აკლია გულწრფელობა, არავის სჯერა მისი წარმატების და იმისთვის, რომ რაღაცნაირად ხმაური გამოიწვიოს ამან, საჭირო გახდა მისი 9 აპრილს ჩატარება, რაც არის პარაზიტირება, იმ ხალხის ნამოღვაწარისა და ნაშრომის, რომელიც ამას არ იმსახურებს“, – განაცხადა ხვიჩიამ.
თბილისის მერი კახა კალაძე მედიასთან საუბრისას სტატუსის მიღებასთან დაკავშირებით კონკრეტული პოლიტიკოსების განცხადებებს გამოეხმაურა და განაცხადა, რომ გარკვეული ოპოზიციური ძალები კანდიდატის სტატუსის თემას პოლიტიკური სპეკულაციებისთვის იყენებენ.
დედაქალაქის მერის თქმით, სიტყვის და გამოხატვის თავისუფლება ქვეყანაში დაცულია, თუმცა კანონის გვერდის ავლით, ქვეყანაში არეულობის გამოწვევისკენ მიმართული ქმედებებზე სახელმწიფოს მხრიდან შესაბამისი სამართლებრივი რეაგირება იქნება.
„ეს ადამიანები არ მალავენ იმ ზრახვებს, რაც აქვთ – ქვეყანაში მოაწყონ დაპირისპირება, არეულობა. ერთ-ერთს ინტერვიუში წამოცდა და გააჟღერა იმ გეგმებთან დაკავშირებით, რაც აქვთ ჩაფიქრებული კანდიდატის სტატუსის არმოცემასთან დაკავშირებით. ასეთი რამ თქვა – აი, დეკემბერში, როდესაც სტატუსს არ მოგვცემენ, ეს ვითარება კიდევ უფრო გამწვავდება. ვიცით, ჩვენ ამ სტატუსს რისთვის იყენებენ, კიდევ ერთხელ ვიმეორებ, ბევრჯერ მითქვამს – ჩვენ ნამდვილად ვიმსახურებდით სტატუსის მიღებას. იმ ქვეყნებს შორის, ვისაც რეალურად ჰქონდა რაღაც გაკეთებული და წინგადადგმული ნაბიჯები, ეს იყო საქართველო.
გულდასაწყვეტია, ის რომ მათ ასეთი გადაწყვეტილება მიიღეს. მეორე მხრივ, საზოგადოებასაც ყველამ ძალიან კარგად უნდა იცოდეს, თუ რატომ იქნა ეს გადაწყვეტილება მიღებული, ეს აქვთ თემად აწეული, რომ თუ სტატუსს არ მოგვცემენ დეკემბერში, უნდათ გამოიყენონ ქვეყანაში არეულობის მიზნით, დაპირისპირების მიზნით და ქვეყანაში ხელისუფლების შესაცვლელად. კიდევ ერთხელ ვიმეორებ, რა თქმა უნდა, სიტყვის გამოხატვის თავისუფლება, შეკრების თავისუფლება, ამ ქვეყანაში დაცულია და ნებისმიერ, პარტიას, ნებისმიერ ადამიანს აქვს იმის შესაძლებლობა, თავისი მოსაზრებები გამოხატოს, დააფიქსიროს ამა თუ იმ ფორმით, მაგრამ ეს ყველაფერი უნდა იყოს კანონის ფარგლებში. თუ ვინმე ფიქრობს, რომ რაღაც დაპირისპირებით, რაღაც რევოლუციური გზით, მთავრობის დამხობით რაიმეს მიაღწევს ამ ქვეყანაში, ძალიან ცდება. ასეთ ქმედებებს სახელმწიფოს შესაბამისი უწყებების მხრიდან, ყოველთვის მოჰყვება მკაცრი რეაგირება. ქვეყანაში შენარჩუნებული იქნება სიმშვიდე, მშვიდობა რომ მოხდეს ქვეყნის განვითარება“, – განაცხადა კახა კალაძემ.
„ხვალ ყველას ველოდებით აქციაზე, მიუხედავად პოლიტიკური გემოვნებისა“, – ამის შესახებ „ნაციონალური მოძრაობის“ თავმჯდომარემ ლევან ხაბეიშვილმა ხვალ პარლამენტთან დაგეგმილ აქციასთან დაკავშირებით განაცხადა.
მისი თქმით, ეს არ არის მხოლოდ ერთი პარტიის აქცია.
„არაფერი არანორმალური არ არის იმ მოთხოვნებში, რაც ხვალ იქნება. საუბარია ჩვენი ქვეყნის ევროპულ მომავალზე, 12 პუნქტის შესრულებაზე, დეპოლარიზაციაზე, სასამართლო რეფორმაზე, ცხადია მოსამართლეებზეც – რანაირად შეიძლება ეს ხალხი თანამდებობაზე იყოს. ასევე, არ შეიძლება არ მოვითხოვოთ ლაზარეს თავისუფლება, ასევე, პოლიტიკური პატიმრების – პრეზიდენტ სააკაშვილის გადაყვანა და ნიკა გვარამიას თავისუფლება. ხვალ ყველას ველოდებით, მიუხედავად პოლიტიკური გემოვნებისა. მნიშვნელოვანია, მსოფლიოს ვაჩვენოთ, რომ ევროპული მომავლისთვის ბრძოლას ვაპირებთ, ამ ბრძოლაში დანებება არ იქნება და ერთიანი ვიქნებით“,- აღნიშნა ლევან ხაბეიშვილმა.
ოკუპირებული აფხაზეთის ე.წ. „შეიარაღებულმა ძალებმა“ ფართომასშტაბიანი „წვრთნები დაიწყო“, – ინფორმაციას რუსული მედია ე.წ. აფხაზეთის თავდაცვის სამინისტროს პრესსამსახურზე დაყრდნობით ავრცელებს.
მათივე ინფორმაციით, წვრთნებისას განსაკუთრებული ყურადღება დაეთმობა თანამედროვე ძალებითა და საშუალებებით მტრის კომპლექსური განადგურების საკითხების შემუშავებას.
„შტაბისა და ჯარების წვრთნა მიმდინარეობს აფხაზეთისა და რუსეთის შეიარაღებული ძალების ერთობლივი საბრძოლო მომზადების გეგმის შესაბამისად”, – აცხადებენ ე.წ. სამინისტროში.
მათივე განმარტებით, წვრთნების მთავარი მიზანია შტაბისა და ჯარების მზადყოფნის ამაღლება, ასევე მოულოდნელად წარმოშობილი ამოცანების გადაჭრის მიზნით მათი კოორდინაციის ამაღლება. წვრთნების სხვადასხვა ეტაპზე აფხაზეთის ე.წ. „ძალოვანი სტრუქტურების“ ძალები და საშუალებებიც ჩაერთვებიან.
რუსეთის პრემიერ-მინისტრმა მიხეილ მიშუსტინმა მთავრობის წარმომადგენლებს ქვეყნის დატოვება აუკრძალა. ამის უცხოური მედია წერს.
ანუ მთავრობის წევრები რუსეთის დატოვებას მხოლოდ სპეციალური ნებართვით შეძლებენ. და საზღვარგარეთ მხოლოდ ოფიციალურ საქმეზე უნდა მიდიოდნენ.
გამოცემა The Bell იუწყება, რომ მინისტრების, მათი მოადგილეების, აპარატებისა და დეპარტამენტების ხელმძღვანელების ქვეყნიდან გასვლის ნებართვას პირადად მიშუსტინი აწერს ხელს. საინტერესოა, რომ რუსეთის რეზიდენტის ადმინისტრაციის წარმომადგენლებზე ასეთი შეზღუდვები არ დაწესებულა.
დაახლოებით ერთი კვირის წინ გამოცემა Financial Times იუწყებოდა, რომ რუსეთის სპეცსამსახურებმა საშუალო რგოლის ჩინოვნიკებს, ასევე სახელმწიფო კომპანიების თანამშრომლებს პასპორტები ჩამოართვეს. ჟურნალისტები ამ ინფორმაციას „საზღვარგარეთ გაქცევის გამო პარანოია“ უწოდეს.
„რა 9 აპრილი და რა ნაციონალური მოძრაობა, თავხედობასთან გვაქვს საქმე“, – ამის შესახებ „ქართული ოცნების“ ფრაქციის თავმჯდომარემ მამუკა მდინარაძემ „ენმ„-ის ხვალინდელ აქციასთან დაკავშირებით განაცხადა.
მისი თქმით, 9 აპრილს აქციის ჩანიშვნა თავხედობაა.
„9 აპრილი და „ნაციონალური მოძრობა“ – 9 აპრილის თარიღის ქვეშ ხომ გარკვეული სიმბოლიზმია ამ ქვეყანაში, რაღაცა ღირებულებები, რაღაცა ისტორია ამ ქვეყნის ხომ არის?! და ისტორია ამ ქვეყნის სამწუხაროა, ასევე, ნაცმოძრაობა თავისი წარსულით, თავისი ადამიანის უფლებების აყრით, ღირსების შელახვით.
დღეს ჩვენ სახეზე გვაქვს მოცემულობა, როდესაც პოლიციელის ცოცხლად დაწვის მცდელობაში ბრალდებულ ადამიანს იცავენ ადამიანები. ესეც კი გაბედეს. რა 9 აპრილი და „რა ნაციონალური მოძრაობა“. რამხელა თავხედობასთან გვაქვს საქმე, როდესაც ისინი ბედავენ ამ თარიღში, ატარებენ თავის აქციას“, – აცხადებს მამუკა მდინარაძე.
“ბიძინა ივანიშვილის ადვოკატის, ყიფიანის დისტანცირება “ოცნებისაგან”, კობახიძის სიტყვებით კი, თავად ივანიშვილისგან, სავარაუდოდ უკავშირდება შვეიცარიულ ბანკთან-“კრედი სვისთან” ურთიერთობას.
ამ ბანკმა უთხრა უარი საკუთარი ფულის გატანაზე ივანიშვილს. მოტივად დაასახელა ევროპარლამენტის რეზოლუცია ბიძინას რუს ოლიგარქად მოხსენიების შესახებ. ბიძინას ადვოკატებმა აირჩიეს არასწორი გზა. მათ მიერ გასაჯაროებული ინფორმაციით, ჯამში თითქმის მილიარ დნახევარი ნაღდი ფული გაუყინა კრედი სვისმა ბიძინას. ადვოკატებმა პრესის მეშვეობით სცადეს შვეიცარიის მთავრობაზე შეტევა, რამაც არავითარი შედეგი არ გამოიღო.
წესით, გამოცდილ იურისტებს უნდა სცოდნოდათ, რომ კრედიტ სვისი, შვეიცარიის იდენტობის ტოლფასი ინსტიტუტი იყო, და ხელისუფლება მთლიანად იყო ჩართული მის პრობლემებში.
მილიარდერი რომ ხარ და ბანკი რომ უკანასკნელ საცხოვრებელ ფართს ართმევს იმ საკუთარ თანამოქალაქეს “ასწავლი”— ბანკთან მუშაობა ისწავლეთ, ან იურისტი აიყვანეთო, იმდენი უნდა იცოდე, რა მდგომარეობაშია ის ფინანსური გიგანტი, სადაც მილიარდ ნახევარ დოლარს ინახავ. ბოლო ორი ათწლეულის განმავლობაში, საქმიანი წრეებისთვის კარგად იყო ცნობილი “გლობალურ ფინანსურ ცენტრად” გამოცხადებული კრედიტ სვისის სერიოზული პრობლემები, გადასახადებისგან თავის არიდების მიზნით, ამ ბანკთან ურთიერთობდნენ: ნიგერიელი დიქტატორები, იაპონელი იაკუძები, ბულგარელი ნარკომოვაჭრეები, ახალგამოჩეკილი პოსტსაბჭოთა ოლიგარქები და ა.შ.
ამაზე მუდმივად წერდა მედია, მიმდინარეობდა ჟურნალისტური გამოძიებები, ხელისუფლების რეაქცია კი არ იყო. შავი ფულით გამდიდრებული ადამიანები, გადასახადების გადაუხდელობით მოგებას დახარბებულები, რისკავდნენ და ბოლო დრომდე განაგრძობდნენ ამ ბანკთან ურთიერთობას.
დღეს ეს “ყველაზე მთავარი და საიმედო ბანკი” აღარ არსებობს!!!!!!
შვეიცარიის მთავრობამ, უკვე ძალიან შეშინებულმა, “კრედი სვისის” კრახის მასშტაბებით, მარტის ბოლოს, ამ ბანკის აქციები აყიდინა მის მთავარ კონკურენტს—UBS ბანკს, სასაცილო ფასად—3.3 მილიარდ დოლარად.
ამ ბანკს მარტო ბიძინას მილიარდნახევარი ჰქონდა “შეხრამუნებული”, სხვა კლიენტები კი 15, 9, 7 და 4.5 მილიარდებს ედავებიან. მხოლოდ 2022 წლის ოქტომბერ-ნოემბერში ბანკიდან კლიენტების მიერ 88 მილიარდი დოლარი იყო გატანილი.
UBS ბანკს შვეიცარიის მთავრობამ მისცა დაცვის გარანტიები. მათ შორის, ასი მილიარდი დოლარის სახელმწიფო კრედიტის მიცემის გარანტია. თუმცა, ძალიან საეჭვოა, რომ შვეიცარიის მთავრობამ ბიძინას “ვალის” გადახდაზე იზრუნოს, ისევე როგორც სხვა საეჭვო მევალეების დაუბრუნებელ თანხებზე.
ეს ანადგურებს შვეიცარიის, როგორც “საიმედო ფინანსური სამოთხის” იმიჯს, მაგრამ ამას უკვე აღარავინ ნაღვლობს.
ოლიგარქების დაუოკებელმა სწრაფვამ იოლი მოგებისადმი, გადასახადების დამალვის საბანკო პირამიდებმა, არამარტო კრედი სვისს, სხვა ცნობილ საბანკო გიგანტებს-გერმანულ “დოიჩე ბანკს”, ამერიკულ “სილიკონ ველის” და ა.შ. შეუქმნეს სერიოზული პრობლემები. ბოლოს, კი, თავად ოლიგარქები აღმოჩნდნენ დარტყმის ქვეშ.
ოლიგარქების სიხარბემ, სამყაროს უსაფრთხო განვითარებას შეუქმნა საფრთხე. შედეგად გამოცხადდა დეოლიგარქიზაცია, რამაც გარყვნილი საბანკო გიგანტები შეარყია და ოლიგარქების ეპოქის დასასრულის წამ ზომიც ჩართო”,- წერს სოციალურ ქსელში კოტე კემულარია.
დედაქალაქის მერი კახა კალაძე აცხადებს, რომ კანცელარიასთან ლანდშაფტური სივრცის მოწყობის სამუშაოები მიმდინარეობს და საუბარია სკვერის მოწყობაზე.
კალაძის თქმით, მერიის სამსახურს სკვერის მოწყობასთან დაკავშირებით თანხმობა ჯერ არ გაუცია, თუმცა დასძენს, რომ მერიის მხრიდან თანხმობა იქნება გაცემული.
„ყოველთვის ხდება ხოლმე მანიპულაცია ამგვარი თემებით. მახსოვს, როდესაც ჩვენ დავიწყეთ პარლამენტის წინ არსებული სივრცის მოწესრიგება და კეთილმოწყობა, მაშინაც იგივე განცხადებები კეთდებოდა, სამწუხაროდ.
საზოგადოება ძალიან კარგად შეაფასებს ამ ყველაფერს, ხდება კონკრეტული სივრცის მოწესრიგება, გალამაზება, ამაში ცუდი არაფერია, თუმცა კონკრეტული პოლიტიკური პარტიები, პოლიტიკოსები, სამწუხაროდ, ყოველთვის ცდილობენ, რომ ეს რაღაცას დაუკავშირონ.
ერთი გვეუბნებოდა, რომ თურმე რიკოთის უღელტეხილი ჩაგვიკეტია იმისთვის, რომ ხალხი დასავლეთიდან აღმოსავლეთში აქციაზე არ წამოვიდეს. ნუ, ყოველთვის იქნება ასეთი მანიპულაციები, სანამ ასეთი ოპოზიციური პოლიტიკური სპექტრი გვყავს“, – აცხადებს კახა კალაძე.
21 წლის ლაზარე გრიგორიადისის აღმკვეთი ღონისძიების შეცვლის მოთხოვნაზე სააპელაციო სასამართლომ დაცვის მხარის მოთხოვნა დაუშვებლად ცნო.
ადვოკატის თქმით, სააპელაციომ აღკვეთის შეცვლის მოთხოვნაზე მიმართვა წარმოებაში არ მიიღო და შესაბამისად, ძალაში დარჩა საქალაქო სასამართლოს გადაწყვეტილება.
31 მარტს თბილისის საქალაქო სასამართლომ მარტის აქციებზე დაკავებულ ლაზარე გრიგორიადისს აღკვეთის ღონისძიების სახით პატიმრობა შეუფარდა.
შსს-ს მტკიცებით, მან 7 მარტის საპროტესტო აქციაზე ორჯერ ისროლა ე.წ მოლოტოვის კოქტეილი პოლიციელების მიმართ, რის შედეგადაც რამდენიმე პოლიციელი დაშავდა. მას ასევე ბრალი ედება პოლიციის კუთვნილი მანქანის დაწვაში.
საქმეზე გამოძიება სსკ-ის 353-ე პრიმა და 187-ე მუხლებით მიმდინარეობს. ბრალის დამტკიცების შემთხვევაში, დაკავებულს 7-დან 11 წლამდე პატიმრობა ემუქრება.
ყვარელში, სახელმწიფო ტყის ტერიტორიაზე, მოქალაქემ ბზის ნარგაობების დაზიანებით მოიპოვა ტოტები (სამი ტომარა) და მის უკანონო ტრანსპორტირებას ახდენდა შემდგომი რეალიზების მიზნით.
მარტვილის მუნიციპალიტეტის სოფელ დობერაზენში, გადამოწმების მიზნით შეჩერებულ ავტომანქანაში, მოქალაქეს განთავსებული ჰქონდა უკანონოდ მოპოვებული ბზის 3 ერთეული ნერგი და ათეულობით ტოტი.
ორივე ფაქტი შეიცავს სისხლის სამართლის დანაშაულის ნიშნებს; მასალები, შემდგომი რეაგირების მიზნით, შესაბამის უწყებებში გადაიგზავნა.
ბზის მოჭრა, ამოძირკვა ან ტოტების დაზიანება დასჯადი ქმედებაა. სანქციის ოდენობა 500-დან 1000 ლარამდე ჯარიმას ითვალისწინებს, ხოლო თუ გარემოსთვის მიყენებული ზიანი 1000 ლარს აჭარბებს, საქმეს სისხლის სამართლის კვალიფიკაცია ენიჭება. გარემოსდაცვითი ზედამხედველობის დეპარტამენტის შესაბამისი სამსახურების მიერ, ბზობის დღესასწაულის მოახლოებასთან დაკავშირებით, მთელი ქვეყნის მასშტაბით, ბზის მოჭრაზე კონტროლი გამკაცრებულია.
საქართველოს თავდაცვის ძალების დასავლეთის სარდლობის მე-3 ქვეითი ბრიგადის 31-ე ქვეითმა ბატალიონმა წვრთნისა და შეფასების პროგრამა ვაზიანის პოლიგონზე საჩვენებელი სწავლებით დაასრულა. სიმულაციური სცენარის მიხედვით მოეწყო თავდაცვითი პოზიციები, განხორციელდა რეიდი, მოხდა პირობითი მოწინააღმდეგის შეყოვნება და მნიშვნელოვანი ადგილმდებარეობის შენარჩუნება. სწავლებას თავდაცვის ძალების მეთაურის მოადგილე, გენერალ-მაიორი ზაზა ჩხაიძე, წვრთნებისა და სამხედრო განათლების სარდალი, პოლკოვნიკი ზურაბ ხვიჩია და დასავლეთის სარდალი, ბრიგადის გენერალი კობა გრიგოლია დაესწრნენ.
ოთხკვირიანი სწავლების განმავლობაში 31-ე ქვეითი ბატალიონის „ალფა“, „ბრავო“ და „ჩარლი“ ქვეითი ასეულების ქვედანაყოფებმა რეალურ ვითარებასთან მაქსიმალურად მიახლოებულ გარემოში პრაქტიკული მეცადინეობები გაიარეს. სწავლება სამი ფაზისაგან შედგებოდა. პირველი ეტაპი სამეთაურო-საშტაბო სწავლებას მოიცავდა, მეორე ეტაპი საველე-სიტუაციურ სწავლებას დაეთმო, ხოლო დასკვნითი ფაზა ბატალიონის საბრძოლო სროლებს ითვალისწინებდა. ნატო-საქართველოს წვრთნებისა და შეფასების ერთობლივი ცენტრის (JTEC) საბრძოლო მომზადების ცენტრის (CTC) დამკვირვებლები სამივე ფაზის განმავლობაში აკვირდებოდნენ წვრთნების პროცესს და შესაბამის რეკომენდაციებს ამზადებდნენ. მათ 31-ე ქვეითი ბატალიონი ერთ-ერთ დისციპლინირებულ და მოტივირებულ ქვედანაყოფად შეაფასეს.
GDRP-ის შემდგომი წვრთნისა და შეფასების პროგრამა მიზნად ისახავდა ბატალიონის მზადყოფნისა და საბრძოლო მომზადების დონის ამაღლებას.
აღდგომის დღესასწაულის მოახლოებასთან დაკავშირებით, სურსათის ეროვნულმა სააგენტომ სამომხმარებლო ბაზრის კონტროლი გაააქტიურა.
სააგენტოს ინსპექტირების ჯგუფები საბითუმო, მსხვილ და მცირე სავაჭრო ობიექტებს მთელი ქვეყნის მასშტაბით ამოწმებენ. განსაკუთრებული აქცენტი კეთდება ხორცისა და კვერცხის სარეალიზაციო ობიექტების, ასევე საკონდიტროების კონტროლზე. მოწმდება კვერცხის ვარგისიანობის ვადა, ეტიკეტირება და რეალიზაციის პირობები, ხოლო საკონდიტრო საცხობებსა და ხორცის სარეალიზაციო ობიექტებში წარმოების პროცესი, სანიტარიულ-ჰიგიენური მდგომარეობა და მიკვლევადობა.
„სადღესასწაულო დღეებში განსაკუთრებით იზრდება მოთხოვნა სურსათზე. სააგენტო სამომხმარებლო ბაზარს აქტიურად ამოწმებს და მოუწოდებს მომხმარებელს, განსაკუთრებით მაღალი რისკის სურსათის შეძენისას, ყურადღება მიაქციოს რეალიზაციის პირობებსა და ტემპერატურული რეჟიმის დაცვას,“ – აღნიშნა სურსათის უვნებლობის დეპარტამენტის უფროსმა, ვასილ კვერნაძემ.
მიმდინარე წელს სააგენტომ საცხობებში განახორციელა 522 ინსპექტირება და 42 დოკუმენტური შემოწმება, გამოვლინდა 85 სამართალდარღვევა. სახელმწიფო კონტროლი ჩატარდა კვერცხის წარმოებებში, სადაც დარღვევის მხოლოდ 2 შემთხვევა აღინიშნა. მიმდინარე შემოწმების შედეგებს სააგენტო ეტაპობრივად გაავრცელებს
