საქართველოს მორაგბეთა ნაკრებმა მსოფლიო თასისთვის მზადების ფარგლებში, ზაფხულის ბოლო ტესტმატჩი შოტლანდიის ნაკრებთან გამართა და ანგარიშით 6:33 დამარცხდა

შეხვედრა ედინბურგში, „მარიფილდზე“ გაიმართა. მატჩის პირველი ნახევარი „ბორჯღალოსნების გამარჯვებით, ლუკა მატკავას ორი ზუსტი ჯარიმის დამსახურებით, ანგარიშით 6:0 დასრულდა. თუმცა მეორე ტაიმში მასპინძლებმა თამაში შემოაბრუნეს და უპირატესობის მოპოვება შეძლეს.

შემდეგ შეხვედრას „ბორჯღალოსნები“ უკვე მსოფლიო თასზე, 9 სექტემბერს გამართავენ. საქართველოს ნაკრები ავსტრალიას დაუპირისპირდება.

შიდასახელმწიფოებრივი მნიშვნელობის ქუთაისი(ჭომა)-ალპანა-მამისონის უღელტეხილის საავტომობილო გზის 107-ე კმ-სა და საჩხერე-რაჭის დამაკავშირებელი საავტომობილო გზის მიერთების გაუმჯობესების მიზნით, მიმდინარე სამუშაოებისას, ჩამოიშალა მიწის მცირე მეტრიანი მასა. შემთხვევის გამო, არავინ დაშავებულა, ვინაიდან მიმდინარე სამუშაოების გამო, უსაფრთხოების ზომები წინასწარ იყო მიღებული. აღნიშნულ მონაკვეთზე არსებული კედელი იყო დაბზარული, რის გამოც, გზის სავალი ნაწილი შემოსაზღვრული იყო პარაპეტებით და მოძრაობა მიმდინარეობდა მხოლოდ ერთ ზოლში. გზის მონაკვეთზე წარმოებდა კედლის გამაგრების სამუშაოები. დამცავი კედლის 140 მეტრი უკვე მოწყობილია და დარჩენილი 40 მეტრიანი სექციის სამუშაოები, რომლის 15 მეტრზეც ჩამოიშალა მიწის მასა, გრძელდება კედლის დარჩენილ სექციაზე. ჩამოშლილი მიწის მასა არ გასცდენია პარაპეტებით შემოსაზღვრულ ადგილს და საავტომობილო მოძრაობა არ შეფერხებულა. გავრცელებული ინფორმაცია, თითქოს მიწის ჩამოშლა გამოიწვია ხიდის მშენებლობისას კლდის მოჭრამ, არ შეესაბამება სინამდვილეს.

ორი დღის განმავლობაში, დაგეგმილი ფრენები ქუთაისის საერთაშორისო აეროპორტის ნაცვლად, თბილისისა და ბათუმის საერთაშორისო აეროპორტებში შესრულდება, – ამის შესახებ განცხადებას ქუთაისის საერთაშორისო აეროპორტი ავრცელებს და მიზეზს განმარტავს:

,,მგზავრთა საყურადღებოდ!
სექტემბრის დასაწყისში, ქუთაისის საერთაშორისო აეროპორტის სააეროდრომო ინფრასტრუქტურის გეგმური სარეაბილიტაციო სამუშაოების გამო, ორი დღის განმავლობაში, დაგეგმილი ფრენები ქუთაისის საერთაშორისო აეროპორტის ნაცვლად, თბილისისა და ბათუმის საერთაშორისო აეროპორტებში შესრულდება.

რეაბილიტაციის პერიოდი 3 სექტემბრის დილის 07:00 საათიდან, 5 სექტემბრის ღამის 01:00 საათამდე პერიოდში იგეგმება. მგზავრებს ბოდიშს ვუხდით შექმნილი დისკომფორტისთვის. ამ პერიოდში დაგეგმილი გაფრენა/მოფრენის დროები უცვლელია, იცვლება მხოლოდ აეროპორტები!

ავიაკომპანიებმა აეროპორტების ცვლილების შესახებ ინფორმაცია მგზავრებს ელექტრონული ფოსტის საშუალებით უკვე აცნობეს. მგზავრების თბილისიდან ქუთაისისა და ბათუმის მიმართულებით, ასევე ქუთაისიდან და ბათუმიდან თბილისის საერთაშორისო აეროპორტის მიმართულებით გადაყვანას ქუთაისის საერთაშორისო აეროპორტის ოფიციალური გადამყვანი კომპანია Omnibus Express • ომნიბუს ექსპრესი უზრუნველყოფს. დამატებითი ინფორმაციისთვის დაუკავშირდით სატრანსპორტო კომპანიას.

2023 წლის 7 თვის მონაცემებით, ქუთაისის საერთაშორისო აეროპორტი მგზავრთა რეკორდულ მაჩვენებელს მოემსახურა. რეისების მატებასთან ერთად, ფრენების უსაფრთხოებიდან გამომდინარე, საჭიროა სააეროდრომო ინფრასტრუქტურის გეგმური სარემონტო სამუშაოების განხორციელება.

ფრენების უსაფრთხოების მიზნით, მუდმივად ხდება საერთაშორისო სტანდარტებისადმი შესაბამისობის შემოწმება. მიმდინარე სარემონტო სამუშაოები წლიური გეგმის მიხედვით განხორციელდება, რაც აეროპორტის გამართული ოპერირების შემადგენელი ნაწილია”, – ნათქვამია განცხადებაში.

დღეს ლაგოდეხელები ქალაქის ცენტრში შეიკრიბნენ და დამცავი ჯებირების აშენება მოითხოვეს.

„ჩვენ ვიცით, რომ დამცავი გაბიონები ასე სწრაფად ვერ აშენდება, მაგრამ გადაუდებლად აუცილებელია ამოწმენდა, კალაპოტის დაღრმავება და რამენაირად, მეწყრული პროცესის შეჩერება. ნაპრალები უკვე ბევრგან არის გაჩენილი და როდის რა მოხდება, არავინ იცის, განსაკუთრებით, წვიმების დროს”- თქვა ერთ-ერთმა ადგილობრივმა.

მდინარე ლაგოდეხის ხევზე სოფლის მეურნეობისა და გარემოს დაცვის სამინისტროს გეოლოგიის დეპარტამენტის დასკვნა, ლაგოდეხის მუნიციპალიტეტის მერიის დაკვეთით, უკვე არსებობს. დასკვნის თანახმად, საფრთხე, რომელსაც მდინარე ქალაქს უქმნის, რეალურია.

„მდინარე ლაგოდეხის ხევის მარცხენა სანაპიროზე გააქტიურებულია მეწყერი. უხვი ატმოსფერული ნალექის დროს ხდება წლის ნაკადის მარჯვენა მხარეს გადადინება, რითაც საფრთხე ექმნება ქალაქ ლაგოდეხის აღმოსავლეთ ნაწილში მცხოვრებ მოსახლეობას. ამ ნაწილში საჭიროა მდინარის კალაპოტის გასწორხაზოვნება, დაღრმავება და ნაპირსამაგრის მოწყობა. რაც შეეხება მეწყერს, საჭიროა მეწყრული მასების ჩამოწმენდა და დროის უმოკლეს პერიოდში გაბიონის ტიპის ნაპირსამაგრის მოწყობა რამდენიმე საფეხურად. ლაგოდეხის ხევის წყლის ნაკადი უნდა დაუბრუნდეს კალაპოტის ღერძულ ნაწილს. სამუშაოები უნდა განხორციელდეს შესაბამისი პროექტის საფუძველზე. ასევე საჭიროა ადგილობრივი ძალებით განხორციელდეს მონიტორინგი“ – წერს სამინისტროს დეპარტამენტი.

ლაგოდეხის ხევს ღვარცოფული მდინარის პირველი კატეგორია 2014 წელს მიენიჭა.

მდინარეზე 2022 წლის შემოდგომაზე დაიწყო და 2023 წლის მაისში დასრულდა მიწაყრილების მოწყობა, თუმცა როდის დაიწყება დამცავი ჯებირების აშენება, ლაგოდეხის მუნიციპალიტეტის მერიაში, ჯერ ვერ აკონკრეტებენ.

25 აგვისტოს ბათუმის ილია ჭავჭავაძის სახელობის პროფესიულ სახელმწიფო დრამატულ თეატრში „ღამის სერენადების“  ბათუმური კონცერტების დასკვნითი საღამო გაიმართა.

მსმენელის წინაშე წარსდნენ მსოფლიოში აღიარებული კორეელი მევიოლინე ჰეიონ პარკი, ცნობილი ქართველი პიანისტი თამარ ლიჩელი,  ფესტივალის საბაზო ორკესტრი „საქართველოს ვირტუოზები“ (კონცერტმაისტერი ლელა მჭედლიძე). საღამოზე აჟღერდა ლუდვიგ ვან ბეთჰოვენის – სავიოლინო კონცერტი რე მაჟორი, თხზ. 61 (კ. ჰაინდის ვერსია ვიოლინოსა და სიმებიანი კვინტეტისთვის) ფრანს ლისტის / შარლ გუნოს – ვალსი ოპერიდან „ფაუსტი“ რალფ ვოან უილიამსის – The lark Ascending (ტოროლას აფრენა) სერგეი რახმანინოვის – „სალონური პიესები“ – უნგრული ცეკვა, თხზ.6 №2.

„ღამის სერენადები“ 22 სექტემბრიდან თბილისში გადმოინაცვლებს და კლასიკური მუსიკის მოყვარულებს კონსერვატორიის დიდ დარბაზში სეხვდება.

გიორგი ისაკაძე:

ძალიან ბედნიერები ვართ. ფესტივალის პირველი სამი კონცერტი დასრულებულია, რომლებმაც უდიდესი წარმატებით ჩაიარა. კონცერტებში მონაწილეობდნენ შესანიშნავი მუსიკოსები, სოლისტები, გვქონდა ძალზედ მდიდარი ვოკალური და ინსტრუმენტალური პროგრამა. შესრულდა ლუდვიგ ვან ბეთჰოვენის არაჩვეულებრივი სავიოლინო კონცერტი რე მაჟორი, თხზ. 61 (კ. ჰაინდის ვერსია ვიოლინოსა და სიმებიანი კვინტეტისთვის) ფრანს ლისტის / შარლ გუნოს – ვალსი ოპერიდან „ფაუსტი“ რალფ ვოან უილიამსის – The lark Ascending (ტოროლას აფრენა) სერგეი რახმანინოვის – „სალონური პიესები“ – უნგრული ცეკვა, თხზ.6 №2.

ჩვენი ფესტივალი უკვე თბილისში გაგრძელდება – 22, 23 და 24 სექტემბერს დედაქალაქში შევხვდებით მსმენელს. საფესტივალო საღამოები შედგება ვანო სარაჯიშვილის სახელობის კონსერვატორიის დიდ დარბაზში, სადაც მსმენელის წინაშე შესანიშნავი ხელოვანები წარსდგებიან.

თამარ ლიჩელი:

უბედნიერესი დღეა. „ღამის სერენადები“ კვლავ დაბრუნდა ბათუმში თავისი არაჩვეულებრივი საღამოებით. ძალიან მიხარია, რომ ამ ფესტივალის მონაწილე ვარ. ძალიან სასიამოვნოა მსმენელთან და უნიჭიერეს მონაწილეებთან შეხვედრა. ჩვენმა კონცერტმა დიდი წარმატებით ჩაიარა და მინდა ძალიან დიდი მადლობა გადავუხადო ფესტივალის ორგანიზატორებს, რომ ნამდვილ მუსიკალურ დღესასწაულს ჩუქნის მუსიკის მოყვარულებს ყოველ წელს.

ჰეიონ პარკი:

უბედნიერესი ვარ, რომ დავუკარი შესანიშნავ ქართველ პიანისტთან თამარ ლიჩელთან ერთად. რახმანინოვისა და უილიამსის ნაწარმოებები შევასრულე და იმედია, მსმენელმა დიდი სიამოვნება მიიღო. დიდი მადლობა, რომ მომეცა საშუალება, ამ ფესტივალის მონაწილე ვყოფილიყავი.

ლელა მჭედლიძე:

უბედნიერესი ვარ, რომ ვმონაწილეობ „ღამის სერენადებში“, რომელიც ლეგენდარულმა ქალბატონმა ლიანა ისაკაძემ დააარსა. ამ ფესტივალს აგრძელებს ისაკაძეების გვარის წარმომადგენელი – გიორგი ისაკაძე, არ იკარგება ეს უძვირფასესი ფესტივალი და მასშტაბურად გრძელდება. გარდა იმისა, რომ არაჩვეულებრივი სოლისტები გვყავდა – ჰეიონ პარკი და თათა ლიჩელი, ჩვენ კვინტეტის სახით, ანუ „საქართველოს ვირტუოზებმაც“ წარმოვადგინეთ ურთულესი პროგრამა, ეს არის ბეთჰოვენის სავიოლინო კონცერტის ახლებური ვერსია.

ფესტივალის დამფუძნებელია მსოფლიოში სახელგანთქმული მევიოლინე და დირიჟორი ლიანა ისაკაძე, სამხატვრო  ხელმძღვანელი გერმანიაში მოღვაწე მუსიკოსი გიორგი ისაკაძე.

„ღამის სერენადები“ ყველაზე ხანგრძლივი ისტორიის მქონე საერთაშორისო ფესტივალია საქართველოში, რომელიც არსებობის 41 წელს ითვლის. ფესტივალის შექმნის იდეა ეკუთვნის ლიანა ისაკაძეს – ქართველ მევიოლინესა და დირიჟორს, საქართველოს სახალხო არტისტს, რომელიც საუკუნის უდიდესი მუსიკოსების რიცხვს მიეკუთვნება. იგი კემბრიჯის ბიბლიოგრაფიული ცენტრის მიერ შეყვანილია XX საუკუნის 2000 გამოჩენილ მუსიკოსთა ენციკლოპედიაში (ინგლისი, 2002 წელი).

ჯერ კიდევ 1982 წელს, ლიანა ისაკაძემ, საქართველოს უმშვენიერეს მხარეში – აფხაზეთში, დაარსა საერთაშორისო ფესტივალი „ღამის სერენადები“, რომელიც ზაფხულობით ბიჭვინთაში იმართებოდა და უდიდესი პოპულარობით სარგებლობდა. სამწუხაროდ, ჩვენს ქვეყანაში განვითარებული ტრაგიკული მოვლენების გამო, 1991 წელს ფესტივალმა არსებობა შეწყვიტა,2002 -2009 წლებშიფესტივალი ტარდებოდა ბორჯომში „ხელოვნების ზეიმის” სახელით, 2009 წლიდან კი შესაძლებელი გახდა „ღამის სერენადების“აღდგენა და ფესტივალმა შავიზღვისპირეთის ულამაზეს ქალაქ ბათუმში გადაინაცვლა.

ფესტივალი არსებობის  მანძილზე არაერთ მსოფლიო დონის მუსიკოსს მასპინძლობდა, მათ შორის არიან: ალფრედ შნიტკე, კურტ მაზური, გიდონ კრემერი და მრავალი სხვ.

ფესტივალის მხარდამჭერები არიან: საქართველოს კულტურის, სპორტისა და ახალგაზრდობის სამინისტრო, ქალაქ ბათუმის მერია, ქალაქ თბილისის მერია, ქალაქ ბორჯომის მერია,აჭარის განათლების, კულტურისა და სპორტის სამინისტრო იტალიის საელჩო საქართველოში, გერმანიის საელჩო საქართველოში.

მასპინძელი სასტუმროები: ბორჯომი ლიკანი, ჰილტონ გარდენ ინნ თბილისი.

ფესტივალის პარტნიორები: ეროვნული სიმფონიური ორკესტრი, ბათუმის ილია ჭავჭავაძის სახელობის პროფესიული სახელმწიფო დრამატული თეატრი. ხარისხისა და დიზაინის საუკეთესო გარანტი ავეჯის სახლი „ნიტა“, პარფიუმერულ მაღაზიათა ქსელი „ლუტეცია“, მცენარეული კოსმეტიკის ფუძემდებელი საფრანგეთიდან “ივ როშე”, კომპანია „სარაჯიშვილი“, ძმები ხუციშვილების “ღვინის მარანი” “HOTSALE.GE”-ს პრემიუმ მიმართულება, ფარმაცევტული კომპანია „პსპ“

საინფორმაციო მხარდამჭერები: აჭარის საზოგადოებრივი მაუწყებელი, საქართველოს პირველი არხი, ტელეკომპანია „რუსთავი2“, ტელეკომპანია „იმედი“, „პოსტ ტვ“, „ევრონიუს ჯორჯია“, მედიაჰოლდინგი „ჯორჯიან თაიმსი“, საპატრიარქოს ტელევიზია „ერთსულოვნება“,„ტვ25“, მედია და ციფრული კომუნიკაციების სააგენტო „კლიპ არტი“, საინფორმაციო პორტალი “ამბები.ჯი”, საინფორმაციო სააგენტო „პრაიმ ტაიმი“, „ჯორჯიან პრესი“ , ინგლისურენოვანი გაზეთი “Georgia Today“, ინგლისურენოვანი ყოველდღიური გაზეთი „Messenger“, ჟურნალი „სარკე“, გაზეთი „აჭარა“, რადიო „ფორტუნა“ და ვებ–საიტი ფორტუნა.ჯი