უცხოური ვალუტის კურსი 14 აპრილისთვის

17:14 - 13/04/2023

1 აშშ დოლარის ოფიციალური ღირებულება 2.5229 ლარი გახდა.

ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.5229 ლარი გახდა. კურსი, რომელიც დღეს მოქმედებდა, 2.5261 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0032 ლარი შეადგინა.

რაც შეეხება ევროს, მისი კურსი 2.7795 ლარია. მაშინ, როცა დღეს მოქმედი კურსი 2.7605 ლარს შეადგენდა. შესაბამისად, ევროს ცვლილებამ 0.0190 ლარი შეადგინა. დღევანდელი ვაჭრობის შედეგად მიღებული კურსები ძალაში ხვალ შევა.

“აუხსნელია – რატომ რჩება ,,ობიექტური“ ბლინკენისა და დეგნანის ყურადღების მიღმა მართლაც ისეთი ფაქტები, რომლებიც ხელის გულზე დევს”

16:55 - 13/04/2023

სიტყვა ,,კორუფცია“ მომდინარეობს ლათინური სიტყვიდან ,,corrumpere“, რაც ნიშნავს ,,ვაფუჭებ“. ,,კორუფციის“ საყოველთაო და ერთგვაროვანი დეფინიცია არ არსებობს, თუმცა ყველაზე ფართოდ გავრცელებული განმარტების თანახმად, ,,კორუფციის“ ცნების ქვეშ მოიაზრება პირის მიერ საზოგადოებრივი ძალაუფლების ან მდგომარეობის გამოყენება პირადი უპირატესობებისა და სარგებლის მიღების მიზნით, – ამის შესახებ „ხალხის ძალის“ წევრი, ზურაბ ქადაგიძე სოციალურ ქსელში წერს.

მისივე თქმით, 5 აპრილს აშშ-ს სახელმწიფო მდივანმა ბლინკენმა, საქართველოში აშშ-ის ელჩ დეგნანის წარდგინებით, მიიღო აბსოლუტურად დაუსაბუთებელი და საქართველოს მთელი სამოსამართლო კორპუსისათვის შეურაცხმყოფელი, უპრეცედენტო გადაწყვეტილება 3 მოქმედი და 1 ყოფილი მოსამართლის სანქცირების შესახებ, თითქოსდა მათი კორუფციულ საქმიანობაში ჩართულობის გამო.

„ისიც კი არ გვაღირსეს, ნათლად აეხსნათ, რა კონკრეტულ მტკიცებულებებზე დაყრდნობით წარმოადგინეს ეს უმძიმესი ბრალდება და შემოიფარგლნენ განმარტებით, რომ არსებობს ,,სანდო ინფორმაცია“.

ამ ვითარებაში, ჩემთვის აუხსნელია – რატომ რჩება ,,ობიექტური“ ბლინკენისა და დეგნანის ყურადღების მიღმა მართლაც ისეთი ფაქტები, რომლებიც ხელის გულზე დევს და რომლებიც მართლაც, მაღალი ალბათობით, მიუთითებს კორუფციის არსებობაზე. ალბათ იმიტომ არ რეაგირებენ, რომ პირები, რომელთა შესახებაც მინდა ვისაუბრო, მათთან აფილირებული პირები არიან, ასრულებენ მათ დაკვეთებს, მონაწილეობენ რა წლების განმავლობაში სასამართლოს წინააღმდეგ წარმოებულ ცილისმწამებლურ კამპანიაში. ამ კამპანიის მიზანი კი არის სასამართლოს დისკრედიტაცია, სამოსამართლო კორპუსის გახლეჩა და პარალიზება, რათა არასასურველი მოსამართლეები განდევნილ იქნენ სისტემიდან და დაინიშნონ ახალი, ლოიალურად განწყობილი, მორჩილი მოსამართლეები.

ახლა კი, მივყვები თანმიმდევრულად ფაქტებს. აქვე აღვნიშნავ, რომ თითოეული ჩემი დასკვნა ეყრდნობა საჯაროდ ხელმისაწვდომ დოკუმენტაციას (მაგ: საჯარო რეესტრის ვებგვერდზე განთავსებულ დოკუმენტაციას) და ინფორმაციას. ამასთან, ეს ინფორმაცია უკვე რამდენიმე წელია, რაც ხელმისაწვდომია და, თავის დროზე, წლების წინ, ეს ინფორმაცია დაამუშავა და რეაგირებას ითხოვდა კიდეც არასამთავრობო სექტორის ნაწილი (მაგ: უფლებადაცველი ნიკოლოზ მჟავანაძე).
2016 წელს 22 თებერვალს, საქართველოს იუსტიციის უმაღლესმა საბჭომ, უფლებამოსილება შეუწყვიტა თბილისის საქალაქო სასამართლოს თავმჯდომარეს – მამუკა ახვლედიანს, მის საქმიანობაში აღმოჩენილი რიგი დარღვევებისა და თვითნებობის გამო. სულ რამდენიმე დღეში ახვლედიანი საერთოდ სისტემიდან წავიდა, პირადი განცხადებით, რადგან მხოლოდ მოსამართლეობა არ იკადრა.

ამის შემდეგ, რამდენიმე თვეში, კერძოდ – 2016 წლის 3 ოქტომბერს გავრცელდა ფარული აუდიოჩანაწერები (რომლის ავთენტურობაც, ოდნავ მოგვიანებით, შსს-მ დაადასტურა) მამუკა ახვლედიანსა და ტელეკომპანია ,,რუსთავი 2“-ის გენერალურ დირექტორ ნიკა გვარამიას შორის, რომლიდანაც ირკვევა, რომ მ. ახვლედიანი წუწუნებს საქალაქო სასამართლოში შექმნილ სირთულეებზე და ამბობს, რომ ,,თუ ოჯახი არ დარჩება მშიერი, სადმე წავიდოდა“, რაზედაც ნ. გვარამია ამშვიდებს: ,,რა უნდა კაცო მაგის იმედს, ეგ არ არის რთული“. მეორე ჩანაწერში, ნ. გვარამია უკვე საუბრობს ვითარებაზე, რაც შეიქმნება მას შემდეგ, თუ საქალაქო სასამართლოს თავმჯდომარე თანამდებობიდან გადადგება ,,რუსთავი 2“-ის საქმესთან დაკავშირებული ზეწოლის ფონზე, რის სანაცვლოდ ,,6 მილიონიდან ამას მისცემს წილს“. საგულისხმოა, რომ ნ. გვარამიამ იმთავითვე დაადასტურა ჩანაწერების ნამდვილობა და განაცხადა, რომ ფარული ინფორმაციის მოსაპოვებლად ტელევიზიისათვის ეს პრაქტიკა ჩვეულებრივია, როცა ,,სისტემის მამხილებლის ფინანსური უსაფრთხოების უზრუნველყოფა ხდება“.

ანუ, ხაზგასასმელია ის ფაქტი, რომ თბილისის საქალაქო სასამართლოს თავმჯდომარე ახვლედიანი ესაუბრებოდა იმავე სასამართლოში მიმდინარე საქმესთან დაკავშირებით ერთ-ერთი მხარის – ტელეკომპანია ,,რუსთავი 2“-ის წარმომადგენელ ნ. გვარამიას და განიხილავდა მოვლენების განვითარების ისეთ დაგეგმვას (მათ შორის – ახვლედიანის სკანდალური გადადგომა თავმჯდომარის თანამდებობიდან), რომელიც იქნებოდა სწორედ ამ მხარის ,,რუსთავი 2“-ის სასარგებლო, რაც, თავის მხრივ, სარგებელს მოუტანდა ახვლედიანსაც.

თუ გავითვალისწინებთ დასაწყისში მოცემულ განმარტებას ,,კორუფციის“ ცნების შესახებ, ზემოთ აღწერილი ვითარება ცხადად მიუთითებს მ. ახვლედიანის მხრიდან საკუთარი საზოგადოებრივი ძალაუფლების ან მდგომარეობის გამოყენებაზე პირადი უპირატესობებისა და სარგებლის მიღების მიზნით. ესე იგი, ამ ფარული ჩანაწერების არსებობის ფაქტი უკვე არის თვითკმარი საფუძველი იმისათვის, რათა ახვლედიანის ქმედებები შეფასდეს ,,კორუფციად“, თანმდევი სამართლებრივი შედეგებით (გამოძიების დაწყებით, სანქცირებით და ა.შ.).

ამ ჩანაწერების გავრცელებას მოკლე დროში მოჰყვა ახვლედიანის მხრიდან სერიოზული აქტივების შეძენის ფაქტები, რომელთა შესაძენად გადახდილი ფულადი თანხების წარმომავლობას ახვლედიანი ვერ ასაბუთებს და ეს გარემოებაც ასევე ქმნის მისი კორუფციაში ბრალდებისათვის თვითკმარ საფუძველს, კერძოდ:

2016 წლის 29 ნოემბერს, მ. ახვლედიანმა შეიძინა შპს ,,ოლიმპი თბილისი+“-ის (ანუ – ცნობილი სკოლა ,,ოლიმპის“) საერთო ჯამში 66%-იანი წილი: 16% წილი ნოდარ გიორგაძისაგან 280.000 აშშ დოლარად, 50% წილი კი შპს ,,ლამინორასგან“ 520.000 აშშ დოლარად; ანუ, საერთო ჯამში, გადაუხდია 800.000 აშშ დოლარი. ეს წილები, იმავე წლის 2 დეკემბერს, ჩუქების ხელშეკრულების საფუძველზე, გადაუფორმა მეუღლეს – ქეთევან აბესაძეს (50%) და შვილს – ნინი ახვლედიანს (16%). დანარჩენი 34% წილი დარჩა მამუკა ახვლედიანის სიძის, ანუ – ნინი ახვლედიანის მეუღლის – მანუჩარ გუგეშაშვილის საკუთრებაში.
ამ გარიგების გამომზეურებისთანავე, კითხვის ნიშნები გააჩინა ორმა გარემოებამ:
1) საიდან ჰქონდა 800.000 აშშ დოლარი მამუკა ახვლედიანს ხელზე, როცა ზემოთ აღნიშნული ქონება შეიძინა. ეს თანხა ხომ მოსამართლის დაახლოებით 40 წლის განმავლობაში გასაცემი ხელფასის ოდენობას უდრიდა.
2) რამდენად რეალური იყო თავად ნასყიდობის ფასის ოდენობა – 800.000 აშშ დოლარი, რადგან შეძენილი წილი უკავშირდებოდა ქალაქ თბილისის ერთ-ერთ ცენტრალურ ადგილას მდებარე 3079 მ2 მიწის ნაკვეთს და მასზე არსებულ, გარემონტებულ, ფუნქციონირებად შენობა-ნაგებობას.
1-ლი კითხვის საპასუხოდ, მ. ახვლედიანმა განმარტა, რომ ნასყიდობის საფასური ,,პროკრედიტბანკის“ მიერ გაცემული კრედიტით დაიფარა, რაც აშკარა სიცრუეა: საბანკო კრედიტის ხელშეკრულება გაფორმდა 2016 წლის 20 დეკემბერს, ანუ – ქონების შეძენიდან 21 დღის შემდეგ.
გარდა ამისა, ცნობილი გახდა ისიც, რომ შეძენის მომენტში აღნიშნული 66% წილი დატვირთული იყო გირავნობით კერძო პირ რუსუდან ბუაძის სასარგებლოდ. მ. ახვლედიანმა რუსუდან ბუაძეს, იმავე წლის 13 დეკემბერს, გადაუხადა 1.600.000 აშშ დოლარი და ქონება გირავნობისაგან გაათავისუფლა. მხოლოდ ამის შემდეგ გაფორმდა გირავნობის ხელშეკრულება ,,პროკრედიტბანკთან“, რის საფუძველზეც ამ ბანკმა გასცა საბანკო კრედიტიც.
ამდენად, მამუკა ახვლედიანმა მორიგ ჯერზე იცრუა, როცა განაცხადა, რომ ბანკმა კრედიტი გასცა უზრუნველყოფის გარეშე იმიტომ, რომ მ. ახვლედიანს ენდობოდა. ასეთი რამ ისედაც წარმოუდგენელია, დამკვიდრებული საბანკო პრაქტიკიდან გამომდინარე, რადგან საყოველთაოდ ცნობილია, რომ არც ერთი ბანკი ამ ოდენობის საკრედიტო ხაზს, უზრუნველყოფის გარეშე, არავის უხსნის.

ამდენად, ცხადი გახდა, რომ მ. ახვლედიანმა, 2016 წლის 29 ნოემბერი-13 დეკემბრის პერიოდში, საერთო ჯამში 2.400.000 აშშ დოლარი (800.000 + 1.600.000) გადაიხადა ქონების შეძენასა და ამ ქონების გირავნობისაგან გასათავისუფლებლად. ამ თანხის წარმომავლობა უცნობია.

რაც შეეხება მე-2 კითხვაზე პასუხს. მ.ახვლედიანმა განმარტა, რომ ,,პროკრედიტბანკმა“ მასზე კრედიტი გასცა ,,მისი პირადი ავტორიტეტის“ გათვალისწინებით და კრედიტის ვადაც გაუზარდა 10 წლამდე.

სამეწარმეო რეესტრის დოკუმენტაციიდან ჩანს, რომ საკრედიტო ლიმიტმა შეადგინა 3.000.000 აშშ დოლარი, რის უზრუნველსაყოფადაც დაიტვირთა შპს ,,ოლიმპი თბილისი+“-ის 100% წილი. ამდენად, ცხადი გახდა კიდევ ერთი ფაქტი: დამკვიდრებული საბანკო პრაქტიკის თანახმად, არც ერთი ბანკი ქონების უზრუნველყოფით კრედიტს არ გასცემს, თუ გირავნობით ან იპოთეკით დატვირთული ქონების ღირებულება 2.5–3-ჯერ არ აღემატება კრედიტის ოდენობას. შესაბამისად, გამოდის, რომ შპს ,,ოლიმპი თბილისი+“-ის 100% წილის რეალური ღირებულებაა 7-9 მილიონი აშშ დოლარი; ამ გათვლით კი 66% წილის რეალური ღირებულება 4.600.000-დან დაახლოებით 6.000.000 აშშ დოლარამდე მერყეობს!

რა პირად ავტორიტეტზე შეიძლება იყოს საუბარი: რას წარმოადგენს ასეთს ბანკისთვის უმუშევარი ვინმე მ. ახვლედიანი, რომელსაც აქამდე არანაირი ბიზნეს-წარსული და ბიზნეს-საბანკო ურთიერთობები არ ჰქონია და არც სხვა რაიმე სერიოზული ღირებულების აქტივი უფიქსირდებოდა 2016 წლის ივნისში შევსებული თანამდებობრივი დეკლარაციის მიხედვით. ამასთან, ბანკისთვის ბიზნეს-კრედიტის გაცემისას უმნიშვნელოვანესია სესხის ამღების ბიზნეს ისტორია, რაც მ.ახვლედიანს უბრალოდ არ გააჩნდა.

ასევე, მეტად საინტერესოა, როგორ აპირებს მ. ახვლედიანი კრედიტის თანხის დაფარვას? მინიმალური გათვლებით, 3.000.000 აშშ დოლარის დასაფარად ყოველთვიური გადასახადი არანაკლებ 10 ან 15 ათას დოლარს უნდა შეადგენდეს. ამასთან, ისიც ცნობილია, რომ ბანკი კრედიტს იმ გათვლითაც იძლევა, რომ მსესხებლის სტაბილური შემოსავალი სულ ცოტა 2-ჯერ მაინც აღემატებოდეს ყოველთვიურად გადასახდელ თანხას. რა გამოდის, მ. ახვლედიანს ყოველთვიურად სულ მცირე 20-30 ათასი აშშ დოლარის შემოსავალი უნდა ჰქონდეს? საინტერესოა, ახდენს თუ არა ამ შემოსავლების დეკლარირებას, სათანადო წესით?

შეძენილი ქონების რეალური ღირებულება რომ 800.000 აშშ დოლარს არ შეადგენდა, შემდეგი ფაქტიც მეტყველებს:
ერთი და იმავე დღეს შეძენილ წილებში (16% + 50%) გადაუხდია სხვადასხვა თანხა, კერძოდ: 16%-ში გადაიხადა 280.000 დოლარი, მაშინ, როცა 50%-ში გადაუხდია 520.000 აშშ დოლარი; რით არის ასეთი დისპროპორცია გამოწვეული, აუხსნელია. ლოგიკურად, თუ 16% წილი ღირს 280.000 აშშ დოლარი, ე.ი. – 1%-ის ღირებულება ყოფილა 17.500 აშშ დოლარი და, ამ გათვლით, 50%-ის ღირებულება გამოდის 875.000 აშშ დოლარი და არა მ. ახვლედიანის მიერ მითითებული 520.000 აშშ დოლარი.

აი, ეს არის ღია ფაქტებიც, რომლებიც ხელის გულზე დევს. ჩემთვის აუხსნელია, რატომ არ აკმაყოფილებს ეს ინფორმაციები ბლინკენ-დეგნანისეულ ,,სანდო ინფორმაციის“ სტანდარტს, კორუფციაში ჩაბმულობის თვალსაზრისით, რაც საფუძვლად დაედებოდა მამუკა ახვლედიანის სანქცირების შესახებ გადაწყვეტილებას. არადა, იმავე სტანდარტით არის დასანქცირებული სასამართლო სისტემიდან 6 წლის წინ წასული ვალერიან ცერცვაძე.

ხომ ცხადია, რომ სახეზეა აშშ-ის მესვეურთა მხრიდან ორმაგი სტანდარტით მიდგომის ფაქტი. რატომ აფარებენ ხელს მამუკა ახვლედიანს? იმიტომ, რომ იგი, უკმაყოფილოა რა სასამართლოს მენეჯმენტით, რომელმაც ის ამხილა და სისტემიდან დასაბუთებულად მიაბრძანა, მომენტს არ უშვებს, რათა ტალახი ესროლოს თავის კოლეგებს, ყოველთვის ჩაერთოს სასამართლოს წინააღმდეგ წარმოებულ ცილისმწამებლურ კამპანიაში. ამიტომ იქცა ის ამერიკელთათვის ,,ექსპერტად“, ამ კაცს დაატარებენ სხვადასხვა ფორმატის ღონისძიებებში, მისი მოსაზრებით ყოველთვის ინტერესდებიან მასმედიის საშუალებები და ა.შ.

ეს იმ ფონზე, როცა ნიკა გვარამიას საქმის განმხილველ მოსამართლე ლაშა ჩხიკვაძეს, ელჩის დავალებით, მის მიერ გამოტანილ განაჩენთან ანგარიშს სთხოვს საელჩოს წარმომადგენელი, ხოლო გვარამიას ზღვარგადასული ქმედებები, რომელიც მოქმედ მოსამართლეს ფინანსურ სარგებელს ჰპირდებოდა მის მიერ საკუთარი მდგომარეობის ანგარებით გამოყენების სანაცვლოდ, ასევე – საშინელი ბულინგის, მორალური ტერორის ქვეშ ამყოფებდა ,,რუსთავი 2“-ის საქმის გამხილველ მოსამართლეებს და მათი ოჯახის წევრებსაც კი (ეს ქმედებები მკაფიოდ დაგმო ადამიანის უფლებათა ევროპულმა სასამართლომ საქმეში ,,შპს „სამაუწყებლო კომპანია რუსთავი 2“ და სხვები საქართველოს წინააღმდეგ“ (საჩივარი No 16812/17), იმ მოტივით, რომ ნიკა გვარამიამ დასაშვები კრიტიკის ზღვარს გადააბიჯა, როცა მოსამართლეს ტელეეთერით მძიმე შეურაცხყოფას აყენებდა – იხ: 2019 წლის 18 ივლისის გადაწყვეტილება) – დარჩა ყოველგვარი რეაგირების გარეშე“, – წერს ქადაგიძე.

ცნობისათვის, აშშ-ის სახელმწიფო მდივნის, ენტონი ბლინკენის განცხადებით, აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწესა.

ზაპოროჟიეს ატომური ელექტროსადგურის ტერიტორიაზე რუსული ნაღმი აფეთქდა

16:53 - 13/04/2023

ოკუპირებული ზაპოროჟიეს ატომური ელექტროსადგურის მე-4 ენერგობლოკის სიახლოვეს რუსული ნაღმი აფეთქდა. ამის შესახებ ინფორმაციას უკრაინული სახელმწიფო კომპანია „ენერგოატომი“ Telegram-ზე ავრცელებს.

„რუსი ოკუპანტები აგრძელებენ ზაპოროჟიეს ატომური ელექტროსადგურის სამხედრო ბაზად გადაქცევას სადგურის გარშემო ტერიტორიის დანაღმვით და არ შეიძლება, ამან არ გამოიწვიოს შედეგები. წყაროების ცნობით, მე-4 ენერგობლოკის სიახლოვეს აფეთქება მოხდა. როგორც თავად ბირთვულმა ტერორისტებმა განაცხადეს, მათი ნაღმი აფეთქდა“, – ნათქვამია ინფორმაციაში.

როგორც უკრაინული გამოცემა Unian წერს, აფეთქების ხმები უკრაინელმა ბირთვულმა მეცნიერებმა გაიგონეს, რომლებიც სადგურის ტერიტორიაზე მუშაობენ.

„ამავდროულად, ოკუპანტები ცდილობდნენ, „დაემშვიდებინათ“ ისინი და ასევე, დაეფარათ კვალი, რომ ეს არ დაენახათ ატომური ენერგიის საერთაშორისო სააგენტოს ექსპერტებს“, – წერს გამოცემა.

ცნობისთვის, რუსი ოკუპანტები ზაპოროჟიეს ატომურ ელექტროსადგურს 2022 წლის მარტიდან აკონტროლებენ.

რუსებმა ხერსონში სკოლის შენობა დაბომბეს

16:46 - 13/04/2023

რუსული ძალების მიერ ხერსონის ოლქის დაბომბვის შედეგად ორი ადამიანი დაიღუპა და ორი დაშავდა, – ინფორმაციას უკრაინული მედია ხერსონის სამხარეო სამხედრო ადმინისტრაციის ხელმძღვანელზე, ალექსანდრე პროკუდინზე დაყრდნობით ავრცელებს.

მათივე ინფორმაციით, რუსებმა ავიაციის გამოყენებით სკოლის შენობა დაბომბეს.

„დღეს მტრის ავიაციამ ბერისლავის რაიონის სოფელ ზმიევკას დაარტყა, რუსებმა ავიაბომბები ადგილობრივი სკოლის შენობაში ჩამოყარეს. წინასწარი ინფორმაციით, ერთი ადამიანი გარდაიცვალა, ერთი კი დაშავდა“, – განაცხადა პროკუდინმა.

მისი თქმით, რუსებმა სოფელი ნიკოლსკოეც დაბომბეს, რის შედეგადაც 52 წლის მამაკაცი დაშავდა.

ხერსონის ოლქის დნიპროს რაიონში პარკის დაბომბვას კი 45 წლის მამაკაცი ემსხვერპლა.

შავი ზღვა არასდროს იქნება ნატო-ს ზღვა – პესკოვი

16:29 - 13/04/2023

შავი ზღვა არასდროს იქნება ნატო-ს ზღვა, – ამის შესახებ რუსეთის პრეზიდენტის სპიკერმა, დიმიტრი პესკოვმა განაცხადა. აღნიშნულით პესკოვი უკრაინის საგარეო საქმეთა მინისტრის, დმიტრო კულებას განცხადებას გამოეხმაურა.

„ეს არის საერთო ზღვა ყველა სანაპიროს მქონე სახელმწიფოსთვის, რომელიც უნდა იყოს თანამშრომლობის, ურთიერთქმედებისა და უსაფრთხოებისთვის“, – განაცხადა დიმიტრი პესკოვმა.

უკრაინის საგარეო საქმეთა მინისტრმა, დმიტრო კულებამ ბუქარესტში, შავი ზღვის უსაფრთხოების კონფერენციაზე განაცხადა: „ჩვენ გვჭირდება ყოვლისმომცველი უსაფრთხოების სტრატეგია შავი ზღვის რეგიონის ქვეყნებისთვის. შავი ზღვა უნდა გახდეს ის, რაც უკვე გახდა ნატო-ს ზღვა, ის, რაც უკვე გახდა ბალტიის ზღვა“.

“აშშ-ის საელჩოს უმთავრესი ინტერესი სასამართლო სისტემაში შეღწევა და სასამართლოს დამოუკიდებლობის ხელყოფაა”

16:19 - 13/04/2023

აშშ-ის საელჩო სინამდვილეში არა სასამართლო სისტემაში კორუფციის წინააღმდეგ ბრძოლის ინტერესით, არამედ სწორედ კორუფციული ინტერესების კარნახით მოქმედებს, – ამის შესახებ აღნიშნულია „ხალხის ძალის“ განცხადებაში.

როგორც განცხადებაშია ნათქვამი, ის ფაქტი, რომ ამერიკის სახელმწიფო დეპარტამენტმა სამ მოქმედ და ერთ ყოფილ ქართველ მოსამართლეს ყოველგვარი მტკიცებულების გარეშე სავიზო შეზღუდვები დაუწესა, თავისთავად სასამართლოს დამოუკიდებლობის უხეში ხელყოფაა და ერთი შეხედვით, რაიმე დამატებით მსჯელობას არ საჭიროებს.

„თუმცა, მიგვაჩნია, რომ ყურადღება უნდა გავამახვილოთ ერთ მნიშვნელოვან დეტალზე, რომლის გამოც სახელმწიფო დეპარტამენტის სახელით გამოქვეყნებული ეს გადაწყვეტილება კიდევ უფრო მძიმე შეფასებას იმსახურებს. იმ პირობებში, როცა ოთ ქართველ მოსამართლეს მტკიცებულების გარეშე სჯიან, საელჩოს და ენჯეოების ერთ-ერთ გამორჩეულ ფავორიტად რჩება ყოფილი მოსამართლე – მამუკა ახვლედიანი, რომლის კორუფცია პირდაპირ ხელის გულზე დევს.

გასულ დღეებში, ტელევიზიებმა კიდევ ერთხელ გაავრცელეს ნიკა გვარამიას და მამუკა ახვლედიანის ცნობილი აუდიოჩანაწერი, სადაც გვარამია ახვლედიანს „რუსთავი 2-ის“ საქმესთან დაკავშირებით 6 მილიონი ლარიდან წილს პირდება. ამ ჩანაწერის ავთენტურობა თავად გვარამიამ დაადასტურა და თქვა, რომ „სისტემის მამხილებლის უსაფრთხოების უზრუნველსაყოფად“ თანხის შეთავაზება, მისი გადმოსახედიდან, ნორმალური მოვლენა იყო. ფაქტია, რომ გვარამია იმ დროისათვის მოქმედ მოსამართლეს დიდი ოდენობით ქრთამს სთავაზობდა, რაც ერთმნიშვნელოვნად უხეში კორუფციული ქმედებაა.

სახელმწიფო დეპარტამენტისა და კელი დეგნანის სტანდარტით, თავისთავად ეს ფაქტი უკვე იქნებოდა საკმარისი საფუძველი მამუკა ახვლედიანის დასანქცირებისთვის, თუმცა, ვხედავთ, რომ ახვლედიანი კვლავაც მათ ფავორიტად რჩება. მიზეზი მარტივია – ახვლედიანს საელჩო და ენჯეოები სასამართლოს დისკრედიტაციისა და სასამართლო კორპუსის გახლეჩის მიზნით დღემდე აქტიურად იყენებენ.

გვარამიას და ახვლედიანის საუბრიდან მალევე, ეს უკანასკნელი რამდენიმემილიონიანი ქონების მესაკუთრე გახდა, რაც ყველა სტანდარტით, მისი კორუფციული საქმიანობის უტყუარი მტკიცებულებაა. კერძოდ, მამუკა ახვლედიანმა მოსამართლის თანამდებობის დატოვების შემდეგ, 2016 წელს 2 400 000 დოლარად შეიძინა სპორტსკოლა „ოლიმპი“. გადასახდელი თანხის წყაროდ მან ერთ-ერთი კომერციული ბანკიდან გამოტანილი სესხი მიუთითა და თქვა, რომ ბანკი მას „პირადი ავტორიტეტის გამო“ ენდო. ვისაც შეხება ჰქონია საბანკო კრედიტებთან, დაგვერწმუნება, თუ იპოთეკით დატვირთული ქონების ღირებულება კრედიტის ოდენობას და ყოველთვიურად დასაფარი თანხა პირის ყოველთვიურ შემოსავალს მნიშვნელოვნად არ აღემატება, საბანკო კრედიტს არავინ მოგცემთ. აქედან გამომდინარე, ცხადია, რომ ახვლედიანმა საბანკო კრედიტი მხოლოდ ფულის გათეთრების ინსტრუმენტად გამოიყენა. აქვე ისიც უნდა აღინიშნოს, რომ 800 ათასი დოლარი ნაღდი ფული ახვლედიანმა გამყიდველს საბანკო კრედიტის გამოტანამდე ჯერ კიდევ სამი კვირით ადრე გადაუხადა.

ამ ფონზე, უნდა დაისვას მარტივი შეკითხვა – რატომ არ ასანქცირებს სახელმწიფო დეპარტამენტი მამუკა ახვლედიანს კონკრეტული მძიმე კორუფციული დანაშაულისთვის, რომელიც ხელის გულზე დევს? მით უმეტეს, რომ, როგორც ირკვევა, სახელმწიფო დეპარტამენტს და საელჩოს მოსამართლის სანქცირებისთვის არავითარი მტკიცებულება არ სჭირდება.

ვფიქრობთ, საზოგადოებისთვის ყველაფერი ნათელია. საელჩო სინამდვილეში არა სასამართლო სისტემაში კორუფციის წინააღმდეგ ბრძოლის ინტერესით, არამედ სწორედ კორუფციული ინტერესების კარნახით მოქმედებს. მისი უმთავრესი ინტერესი კი, სასამართლო სისტემაში შეღწევა და სასამართლოს დამოუკიდებლობის ხელყოფაა, რაც ხელისუფლებამ არავითარ შემთხვევაში არ უნდა დაუშვას“, – აღნიშნულია განცხადებაში.

თიბისიმ საქართველოს რეგიონებში ბიზნესის მხარდაჭერის მიზნით საინფორმაციო კამპანია ჩაატარა

16:06 - 13/04/2023

თიბისიმ ბიზნესის მხარდაჭერის მიზნით, საქართველოს რეგიონებში აგრო სექტორის და ბიზნესის წარმომადგენლებისთვის საინფორმაციო შეხვედრები გამართა, სადაც ადგილობრივ ბიზნესებს შესაძლებლობა ჰქონდათ სრულყოფილად გაეცნოთ, თუ რა საბანკო პროდუქტები და სახელმწიფო პროგრამებია მათთვის ხელმისაწვდომი.

ღონისძიებები მარტსა და აპრილში გაიმართა გორში, ქუთაისში, ზუგდიდში, თელავსა და გურჯაანში. პანელურ დისკუსიებში თიბისისთან ერთად მონაწილეობდნენ წარმომადგენლები პარტნიორი ორგანიზაციებიდან: სოფლის განვითარების სააგენტო, სააგენტო „აწარმოე საქართველოში“,USAID-ის ძლიერი სოფლის პროგრამა და კომპანია აგრო-კომი.

შეხვედრებს ადგილობრივი მიკრო, მცირე და საშუალო ზომის ბიზნესები, ასევე, საშუალო და მსხვილი ფერმერები და სტარტაპერები ესწრებოდნენ.

„ჩვენი შეხვედრების მიზანი იყო ადგილობრივი ბიზნესების მხარდაჭერა, მათი ინფორმირება იმ მასშტაბური პროექტების და შესაძლებლობების შესახებ, რასაც მათ თიბისი ბანკი სთავაზობს პარტნიორ სახელმწიფო თუ საერთაშორისო ორგანიზაციებთან ერთად. ეს არის კარგი შესაძლებლობა, რომ გააფართოვონ, ან თუნდაც წამოიწყონ ახალი ბიზნესი. თიბისიში არა მარტო ინფორმაციის კონსოლიდაცია ხდება, არამედ სხვადასხვა პროგრამის ფარგლებში ჩვენ მჭიდროდ ვთანამშრომლობთ სახელმწიფო და დონორ ორგანიზაციებთან. ამ პროგრამებში ჩართვა კი, თიბისის პროდუქტებთან ერთად მარტივია. გარდა ამისა, ჩვენი უპირატესობა ისაა, რომ უკვე შექმნილი გვაქვს ბიზნესზე მორგებული საბანკო პროდუქტები, რაც პარალელურად სახელმწიფო და დონორი ორგანიზაციების პროგრამებში მონაწილეობას მოიცავს. ჩვენ ვაძლევთ საშუალებას ბიზნესს, მაქსიმალურად გამოიყენოს ყველა შესაძლებლობა და სარგებელი, რაც მას დასაფინანსებელი პროექტის წარმატებით შესრულებაში დაეხმარება,“ – შოთა გონგლაძე, თიბისი სახელმწიფო პროექტების მართვის ხელმძღვანელი.

თიბისი პარტნიორ სახელმწიფო და დონორ ორგანიზაციებთან ერთად ფერმერებს და მეწარმეებს არაერთ პროგრამაში ჩართულობას სთავაზობს. მათ შორის: სოფლის განვითარების სააგენტოს მიერ – შეღავათიანი აგრო კრედიტების სუბსიდირება და საგრანტო პროექტების თანადაფინანსება; „აწარმოე საქართველოში“ სააგენტოს პროგრამების ფარგლებში – სესხზე დარიცხული სარგებლის სუბსიდირება, ბენეფიციარების მხარდაჭერა სესხზე არასაკმარისი უზრუნველყოფის შემთხვევაში (პროგრამა „საკრედიტო საგარანტიო სქემა)“ და მიკრო და მცირე მეწარმეების საგრანტო პროექტების თანადაფინანსება; USAID-ის ძლიერი სოფლის პროგრამით: საგრანტო თანადაფინანსება და ტექნიკური მხარდაჭერა.

შეხვედრებზე მისულმა მეწარმეებმა და ფერმერებმა ყველა ამ პროგრამის შესახებ დეტალური ინფორმაცია მიიღეს.

„ჩვენ მივაწოდეთ ინფორმაცია იმ პროგრამების შესახებ, რომლებიც მიზანმიმართულია მცირე და საშუალო ბიზნესების საჭიროებებისკენ, რომელიც სასიცოცხლოდ მნიშვნელოვანი მათთვის, ეს არის ბიზნესის დაწყება, განახლება, გადაიარაღება გაფართოება და ა.შ. ამ პროგრამების ფარგლებში ჩვენ გვაქვს ისეთი ინსტრუმენტები, რომლებიც საჭიროა დღეს ბიზნესების გაძლიერებისთვის — ასეთებია პროცენტის თანადაფინანსება, საკრედიტო საგარანტიო მექანიზმი სესხის უზრუნველყოფისთვის და სხვა. “ – ლაშა ბოსტაშვილი, სააგენტო „აწარმოე საქართველოში“-ს მცირე და საშუალო ბიზნესის განვითარების დეპარტამენტის ხელმძღვანელი.

„რეგიონებში ასეთი შეხვედრები კარგი საშუალებაა იმისა, რომ კერძო სექტორი და სახელმწიფო უფრო აქტიურად საუბრობდეს და უფრო მეტად ცვლიდეს ერთმანეთში ინფორმაციას. ჩვენ მათ მოვუყევით იმ პროექტების შესახებ, რომელსაც სოფლის განვითარების სააგენტო სთავაზობს ფერმერებს. ძალიან ნაყოფიერი შეხვედრები გვქონდა, დამსწრე საზოგადოების მხრიდან ჩართულობა იყო ძალიან მაღალი, რაც სახელმწიფო ორგანიზაციებს და კერძო სექტორს საშუალებას გვაძლევს, რომ იმ პროგრამებში, რომლებსაც ერთობლივად ვახორცილებთ ან შეიძლება მომავალში დავნერგოთ, სწორად გავითვალისწინოთ მეწარმეების სატკივარი თუ საჭიროებები,“ – მარიამ გელაშვილი, სოფლის განვითარების სააგენტოს პროექტების განვითარების დეპარტამენტის უფროსი.

„სამიზნე აუდიტორია, რომელიც ამ შეხვედრებს ესწრებოდა, ჩვენს პოტენციურ ბენეფიციარებს ემთხვევა. ამიტომ ჩვენი განმცხადებლებისთვისაც მნიშვნელოვანია, ჰქონდეთ ინფორმაცია იმაზე, თუ რა ტიპის სასესხო პროდუქტებით შეუძლიათ ისარგებლონ ბანკში და პირიქით, თიბისის კლიენტებისთვისაც მნიშვნელოვანია, იცოდნენ მეტი ჩვენი საგრანტო კონკურსების და ზოგადად, პროექტის საქმიანობს შესახებ. ჩვენთვის მნიშვნელოვანია კერძო სექტორთან ურთიერთობა. ამ პროგრამის დიზაინი კი ისეთია, რომ ბიზნესის გაძლიერებას ნამდვილად უწყობს ხელს,“ — ვერიკო ხომერიკი, USAID-ის ძლიერი სოფლის პროგრამის წარმომადგენელი.

გარდა ამ ფინანსური პროგრამებისა, თიბისი მცირე და საშუალო ბიზნესში ჩართულ ადამიანებს სთავაზობს მხარდაჭერას ტექნოლოგიების შემოტანასა და დანერგვაში, კონსულტაციებს და გამოცდილების გაზიარებას მათთვის მნიშვნელოვან სხვადასხვა საკითხზე.

“ვეცადოთ, გამოვასწოროთ ცოდვები სინანულით, აღსარებით და შევწიროთ მადლობა უფალს”

16:04 - 13/04/2023

არ არსებობს სხვა საზრდო და სხვა პური იესო ქრისტეს გარდა, რომელსაც ძალუძს ჩვენი დაპურება და განძღება, ღმერთთან შეერთების გარეშე ადამიანი მაინც მშიერი და მწყურვალი რჩება, ხოლო ამ შეერთების შედეგად ადამიანი ეზიარება ნეტარ შინაგან სიმშვიდეს, რაც არის ცათა სასუფეველი, – ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) ვნების კვირის ხუთშაბათს ქადაგებისას აღნიშნა.

„ქრისტეს მიერ საყვარელნო მამებო, ძმებო და დებო, გილოცავთ დღევანდელ დღეს, დღეს არის საიდუმლო სერობის ხსენება, დღეს ჩვენ აღვნიშნავთ კაცობრიობის ისტორიაში ყველაზე დიდ, დიად და გამორჩეულ მოვლენას, ევქარისტიის საიდუმლოების, წმინდა ზიარების საიდუმლოების დადგენას უფალი იესო ქრისტეს მიერ.

როდესაც წმინდა ეკლესია აღასრულებს ევქარისტიის საიდუმლოებას, სულიწმიდის ძალით და მადლით, იგი უერთდება იმ საიდუმლო სერობას, რომელიც აღასრულა უფალმა იესო ქრისტემ თავის მოციქულებთან ერთად, როდესაც აკურთხა,

განტეხა და პური და ღვინო გარდაქმნა თავის წმინდა სისხლად და ხორცად. და აი, ჩვენ სულიწმიდის მადლით ვუერთდებით იმ საიდუმლო სერობას, იმიტომ რომ ღმერთში არ არსებობს დრო. ამრიგად ჩვენ გადავლახავთ დროსაც, მანძილსაც, სივრცესაც და, ვიმეორებ, ვხდებით თანამონაწილენი იმ ერთადერთი საიდუმლო სერობისა. ყოველი წირვა არის გაგრძელება, არის მონაწილეობა იმ საიდუმლო სერობაში.

თქვენ იცით, რომ ევქარისტია ბერძნული სიტყვაა და ნიშნავს როგორც მადლიერებას, ასევე ნიჭსაც. მართლაც, ქრისტეს სისხლისა და ხორცის ზიარებაზე დიდი ნიჭი რა შეიძლება იყოს?! ეს არის ყველაზე მეტი, რაც შეიძლება ღმერთმა მოგვმადლოს, ვინაიდან ჩვენ თავად მაცხოვარს ვუერთდებით ამ საიდუმლოთი, როგორც მან თავად ბრძანა: „რომელი ჭამდეს ხორცსა ჩემსა და სმიდეს სისხლსა ჩემსა, იგი ჩემშია და მე მასში“. და როგორც ასწავლიან წმინდა მამები, ღირსი იოანე დამასკელი და სხვა მამები, ჩვენ წმინდა ზიარების შედეგად წილმქონენი ვხდებით ქრისტეს სისხლისა, ქრისტეს სხეულისა და ქრისტეს ღვთაებისა. ასეთ საოცარ სიტყვებს ამბობენ წმინდა მამები და ჩვენ ყველა ვხდებით ქრისტეს სხეული, შესაბამისად, ერთი მეორესაც ვეზიარებით, ამიტომ ეწოდება ამ საიდუმლოს ზიარება. მაგალითად, წმინდა იოანე დამასკელი ასევე ამბობს: „ჩვენ ვხდებით ქრისტეს თანამესხეულენი“, ე.ი. მისი სხეული, მისი სისხლი ხდება ჩვენი სისხლი და მისი ხორცი ხდება ჩვენი ხორცი.

აი, ამიტომ, ძვირფასო ძმებო და დებო, მოგეხსენებათ, რომ ეს საოცარი თანაზიარება იწყება დედამიწაზე, მიწიერ ცხოვრებაში, წმინდა ევქარისტიაში და გრძელდება მარადიულად ცათა სასუფეველშიც. აი, ასეთი დიდი მნიშვნელობა აქვს ამ საიდუმლოებას ჩვენი ცხონებისთვის, ჩვენი სულიერი ცხოვრებისთვის. ამიტომ, როცა ჩვენ ვემზადებით წმინდა ზიარებისთვის, კარგად უნდა გამოვცადოთ ჩვენი თავი, რამდენად შეესაბამება ჩვენი ცხოვრება სახარების მცნებებს, ვცხოვრობთ თუ არა სახარების მიხედვით, რომ არ მოხდეს ისე, როგორც წერდა პავლე მოციქული: „ჩვენ ჩვენს სხეულებს, რომლებიც ქრისტეს ასონი არიან, ვართმევთ ქრისტეს და მეძავის ასოებად ვაქცევთ”. ეს ხდება სწორედ მაშინ, როდესაც ადამიანი ეზიარება, მაგრამ არ ცხოვრობს სახარების მცნებებით და ამით, რა თქმა უნდა, არღვევს ამ თანაზიარებას და საკუთარ თავს აკლებს ამ საოცრად დიდ ბედნიერებას.

ღმერთმა დაგლოცოთ, გაგაძლიეროთ, უფალმა მოგვცეს ძალა და მადლი, რომ ყოველი წირვა, ყოველი დღესასწაული ყოფილიყოს ჩვენთვის შესაძლებლობა, გამოვცადოთ, შევამოწმოთ ჩვენი თავი, რამდენად ვცხოვრობთ სახარების მიხედვით. ვეცადოთ, გამოვასწოროთ ჩვენი ცოდვები სინანულით, აღსარებით და შევწიროთ მადლობა უფალს, რომელმაც ღირსი გაგვხადა ამ დიდი საიდუმლოების, ვინაიდან არ არსებობს სხვა საზრდო და სხვა პური იესო ქრისტეს გარდა, რომელსაც ძალუძს ჩვენი დაპურება და განძღება. ღმერთთან შეერთების გარეშე ადამიანი მაინც მშიერი და მწყურვალი რჩება, ხოლო ამ შეერთების შედეგად ადამიანი ეზიარება ნეტარ შინაგან მშვიდობას, სიმშვიდეს, რაც არის ცათა სასუფეველი, რომელსაც ადამიანი მიაღწევს მხოლოდ წმინდა ზიარების მეშვეობით.

ამრიგად, ძმებო და დებო, ვეცადოთ, ხშირად ვეზიაროთ ქრისტეს წმინდა სისხლსა და ხორცს და ვევედროთ მას, რომ შეგვეწიოს სახარების მცნებების აღსრულებასა და ისეთი სულიერი მდგომარეობის მიღწევაში, რომელზეც წერდა წმინდა პავლე მოციქული, როცა წერდა: „მე აღარ ვცოცხლობ, არამედ ამიერიდან ცოცხლობს ჩემში უფალი იესო ქრისტე“, რომელსა შვენის ყოველი დიდება, პატივი და თაყვანისცემა თანადაუსაბამოთ მამით მისით, ყოვლად წმიდით, სახიერით და ცხოველს მყოფელით სულითურთ, აწ და მარადის და უკუნითი უკუნისამდე, ამინ“,- განაცხადა მეუფე შიომ სამების საკათედრო ტაძარშიქადაგებისას.

პრეზიდენტმა 10 მსჯავრდებული შეიწყალა

15:59 - 13/04/2023

საქართველოს პრეზიდენტმა აღდგომის ბრწყინვალე დღესასწაულთან დაკავშირებით 10 მსჯავრდებული შეიწყალა.

პრეზიდენტის ადმინისტრაციის ინფორმაციით, აქედან, 5 მსჯავრდებული სრულად გათავისუფლდა პენიტენციურ დაწესებულებაში თავისუფლების აღკვეთის სახით დანიშნული სასჯელის შემდგომი მოხდისაგან.

ასევე, 3 მსჯავრდებულს პენიტენციურ დაწესებულებაში მოსახდელად დარჩენილი სასჯელის ვადა შეუმცირდა, ხოლო 2 მსჯავრდებული სრულად გათავისუფლდა პირობითად ჩათვლილი თავისუფლების აღკვეთის შემდგომი მოხდისაგან.

„ნავალნი იდუმალი დაავადებით იტანჯება, რომელიც შესაძლოა „ნელი მოქმედების საწამლავი“ იყოს“

15:35 - 13/04/2023

დაპატიმრებული რუსი ოპოზიციონერი პოლიტიკოსი ალექსეი ნავალნი იდუმალი დაავადებით იტანჯება, რომელიც შესაძლოა, „ნელი მოქმედების საწამლავი“ იყოს“, – ამის შესახებ მისმა პრესსპიკერმა კირა იარმიშმა განაცხადა.

მისი თქმით, 7 აპრილს ღამით ღამით ნავალნისთვის კუჭის მწვავე ტკივილის გამო სასწრაფო დახმარება გამოიძახეს, ბოლო 8 კვირაში კი ნავალნიმ 8 კილოგრამი დაიკლო.

„ჩვენ არ გამოვრიცხავთ, რომ ალექსეი ნავალნი მოწამლეს, კლავენ ნელა, რათა ნაკლები ყურადღება მიიპყროს“, – განაცხადა იარმიშმა.

კრემლის განცხადებით, ნავალნის ჯანმრთელობაზე ზედამხედველობა მას არ აქვს და ეს რუსეთის სასჯელაღსრულების სამსახურის პასუხისმგებლობაა.

ცნობისთვის, ალექსეი ნავალნი 2021 წლის 17 იანვარს შერემეტიევოს აეროპორტში დააკავეს, როდესაც ის ბერლინიდან მოსკოვში დაბრუნდა. სასამართლომ 2022 წლის 2 თებერვალს, კრემლის ლიდერის მთავარ ოპონენტს 3.5 წლიანი პატიმრობა მიუსაჯა. ნავალნი სასჯელს საერთო რეჟიმის კოლონიაში იხდის.

“კარგია, ჰელენ, ევროპენსიონერების ფული?!“ – ლაშა გეგეჭკორი

15:33 - 13/04/2023

თბილისის ცხოველთა მონიტორინგის სააგენტოს მუნიციპალური თავშესაფრის დირექტორი ლაშა გეგეჭკორი, პოლიტიკური პარტიების შემოწირულობების მაჩვენებელს აქვეყნებს, სადაც დავით კეზერაშვილის ახლო ნათესავის, დიმიტრი ჩიქოვანის მიერ „ნაციონალური მოძრაობისთვის“ და ელენე ხოშტარიას პარტია „დროასთვის“ ფულადი შემოწირულობებია ნაჩვენები.

როგორც გეგეჭკორი აღნიშნავს, ხოშტარიას განცხადება, რომ მას კეზერაშვილისგან თანხა არასდროს მიუღია, სიმართლეს არ შეესაბამება.

„ელენე ხოშტარიამ, კეზერაშვილისგან 1 თეთრი არ მიმიღია არასდროსო და დიმიტრი ჩიქოვანი, კეზერაშვილის ცოლის ძმაა, თუ ჩემი…კარგია, ჰელენ, ევროპენსიონერების ფული?!“ – წერს ლაშა გეგეჭკორი სოციალურ ქსელში.

თიბისი კაპიტალმა განახლებული მაკრო-სექტორული მიმოხილვა წარადგინა

15:29 - 13/04/2023

თიბისი კაპიტალმა განახლებული მაკრო-სექტორული მიმოხილვა წარადგინა, რომლის ფარგლებშიც, 2022 წლის მაკრო-სექტორული შედეგები შეაჯამეს. ასევე, ქვეყნის ეკონომიკის ზრდა, ვალუტის კურსი, სექტორული ტენდენციები და 2023 წლის ეკონომიკური მოლოდინები მიმოიხილეს.

ბოლო პერიოდში სავალუტო შემოსავლები მნიშვნელოვნად გაიზარდა. მართალია რუსეთის წილი მომატებულია, ძირითადად მიგრანტებისა და გზავნილე ბის ხარჯზე, თუმცა აღსანიშნავია, რომ შემოდინებები სხვა ქვეყნებიდანაც იზრდება.

ამასთან, მიგრანტების დიდი ნაწილი შემოსავალს რუსეთის გარდა სხვა ქვეყნებიდანაც იღებს. თიბისის გამოკითხვის შედეგად ირკვევა, რომ კომპანიების 48%, რომლებისთვისაც თიბისი ბანკის მომხმარებელი მიგრანტები მუშაობენ – საერთაშორისოა, 29% – ქართული, 22% – კი რუსული.

ასევე გამოკითხული მიგრანტების 35% საქართველოში 2 წელიწადზე მეტ ხანს აპირებს დარჩენას, 33%-ს ჯერ არ აქვს გადაწყვეტილი, 15% კი – 1-2 წლის განმავლობაში განიხილავს საქართველოს რეზიდენტობას.

რაც შეეხება საქართველოში ძირითად მაკროეკონომიკურ მოლოდინებს, რეალური მშპ-ის ზრდის მაჩვენებელი 2023 წელს – 5.6%, 2024-ში კი 4.8% იქნება. ინფლაციის მაჩვენებელი 2023-ში – 2.6%, 2024-ში კი 3.0% იქნება. თიბისი კაპიტალის გაცვლითი კურსის მოდელის მიხედვით, აშშ დოლარი ლართან მიმართებაში 2023 წელს – 2.60, 2024-ში კი – 2.70, ევრო ლართან მიმართებაში 2023 წელს – 2.91, 2024 წელს კი 3.08 არის ნავარაუდები. თიბისი კაპიტალის ლარის პროგნოზის მიხედვით, სავალუტო შემოდინებების ზრდის შენარჩუნების მიუხედავად, ლარის გამყარება საბაზო სცენარი არ არის.

რომ შევაჯამოთ, თიბისი კაპიტალის 2022 წლის დეკემბრის მაკრო-სექტორული მიმოხილვის შემდეგ: ევრო აშშ დოლარის მიმართებით გამყარდა, აშშ დოლარის მთავარი განაკვეთი შემცირდა, მიგრანტების გადინება წელს ნაკლებ სავარაუდოა, ეკონომიკის ზრდა ნორმალიზდება, ინფლაცია დაბალია, ლარი კი „წონასწორულ” ნიშნულს გასცდა.

რაც შეეხება თიბისი კაპიტალის სექტორულ განახლებას, 2023 წელს სამომხმარებლო სექტორის ყველა ქვედარგში (FMCG, გარეთ კვება, ფარმაცია, საწვავი, ტანსაცმელი, სამშენებლო მასალები, ავეჯი, ელექტრონიკა) დანახარჯების ზრდა არის მოსალოდნელი, რაც აღნიშნული პროდუქციის გაზრდილი მოხმარებით, მიგრანტების დასახლებითა და ტურიზმის ძლიერი აღდგენით იქნება გამოწვეული.

2023 წლის პირველ კვარტალში, ყველაზე მეტი დანახარჯი სურსათსა და საყოფაცხოვრებო საქონელზე – 21.8 მილიარდი ლარი, შემდეგ კი გარეთ კვებაზე – 4.6 მილიარდი ლარი მოდის. გასულ წლებთან შედარებით, ყველაზე მეტად ხარჯვა სწორედ სურსათისა და საყოფაცხოვრებო საქონლის მიმართულებით გაზიარდა. 2023 წლის მონაცემებით, აღნიშნული მონაცემი 2022 წელს – 18.6 მილიარდ ლარს, 2021 წელს კი 13.6 მილიარდ ლარს შეადგენდა. სამომხმარებლო სექტორში მოსახლეობის დანახარჯების ზრდის ტენდენცია 2023 წელს შენარჩუნდება და 15%-ით გაიზრდება.

მიგრანტების რაოდენობა საქართველოში 2022 წლის მსგავსად, 2023-შიც 115 000-ია, თუმცა მიმდინარე წელს, მათი დანახარჯებში წილის 5.8%-მდე – 1.66 მილიონ დოლარამდე მატებაა მოსალოდნელი.

2023 წლის პირველ კვარტალში არარეზიდენტების უნაღდო დანახარჯები კვლავ მაღალ ნიშნულზეა და მნიშვნელოვნად აღემატება 2019 წლის ხარჯვის მაჩვენებელს. სასტუმროში გადახდები და გარეთ კვება არარეზიდენტებისთვის 2023 წლის პირველ კვარტალშიც უმსხვილეს ხარჯვით კატეგორიად რჩება.

რაც შეეხება ტურიზმის სექტორს, სასტუმროზე გაწეული დანახარჯების უმეტესი ნაწილი მოდის ბიუჯეტური – 0–3 ვარსკვლავის რეიტინგის მქონე სასტუმროებზე. საქართველოს დიდ სასტუმროებში ფასის ზრდის ტენდენცია 2023 წლის პირველ თვეებშიც გრძელდება და 2023 წელს ფასი დოლარში, 2019 წლის დონეს გადააჭარბებს.

2023 წელს საცხოვრებელი უძრავი ქონების ძირითადი მაჩვენებლები ზრდას განაგრძობს. თებერვალში გასაყიდი ფასის წლიურმა ზრდამ – 30%, ქირის ფასის ზრდამ კი 125% შეადგინა, რისი ძირითადი ფაქტორებიც მაღალი ამონაგები, კურსის გამყარება, სამშენებლო მასალების ფასების ზრდა და მიგრანტების ქვეყანაში დარჩენაა.

2022 წელს უცხო ქვეყნის მოქალაქეების მიერ თბილისში და ბათუმში შეძენილი ბინების წილი გაიზარდა, რაც პანდემიის დასრულებამ, მიგრაციამ და მაღალმა ამონაგებმა განაპირობა. 2023 წლის პირველ კვარტალში თბილისში გაყიდული ბინების 7% რუსეთის მოქალაქეებმა, 9% კი სხვა ქვეყნის მოქალაქეებმა შეიძინეს. ბათუმში გაყიდული ბინების 24% – რუსეთის მოქალაქეებმა, 30% კი – სხვა ქვეყნების მოქალაქეებმა.

საქართველოში საცხოვრებელი უძრავი ქონების ქირის ამონაგები ისტორიულ მაქსიმუმზეა. შესაბამისად, ინვესტორებისთვის გაიზარდა მისი მიმზიდველობა დაზოგვის სხვა საშუალებებთან შედარებით. საცხოვრებელი უძრავი ქონების ქირის ფასისა და გაყიდვების რაოდენობის კორექცია ბაზარზე 2023 წლის ბოლოდან დაიწყება. ბინების ქირის ფასი 2024 წლის პირველ კვარტალში, 2023 წლის პირველ კვარტალთან შედარებით, 7%-ით დაიკლებს. ბინების გასაყიდი ფასი 2024 წლის პირველ კვარტალში, 2023 წლის პირველ კვარტალთან შედარებით, 1%-ით მოიმატებს. ბინების გაყიდვები კი, 2024 წლის პირველ კვარტალში, 2023 წლის პირველ კვარტალთან შედარებით, 3%-ით დაიკლებს.

თიბისი კაპიტალის პუბლიკაციას შეგიძლიათ გაეცნოთ ბმულზე.

1...2,3822,3832,384...2,432 Page 2,383 of 2,432