“ისეთი გაოგნებული კომენტარები მხვდება კეზერაშვილზე, თითქოს, არც ბიზნესების ახევა გსმენიათ, არც ის გაგიგიათ, 24 წლის ბიჭი თანამდებობებზე ყოფნის მერე, უცებ, მილიონერად რომ გავიდა პოლიტ-არენიდან” – ასე ეხმაურება სოციალურ ქსელში თავდაცვის ყოფილი მინისტრი,  თინა ხიდაშელი  ე.წ. ქოლ ცენტრების საქმეზე BBC-ის რეპორტაჟს, რომლის მიხედვითაც, ერთ-ერთ მთავარ ფიგურანტად ყოფილი თავდაცვის მინისტრი, ტელეკომპანია „ფორმულას” მფლობელი დავით კეზერაშვილი სახელდება.

“ორი დღე არ დაიტოვებით ისეთი გაოგნებული კომენტარები მხვდება კეზერაშვილზე თითქოს არც ბიზნესების ახევა გსმენიათ, არც ის გაგიგიათ 24 წლის ბიჭი თანამდებობებზე ყოფნის მერე უცებ მილიონერად რომ გავიდა პოლიტ არენიდან

მის ბოლო ინტერვიუს მაინც უსმინეთ თავად ყვება ყველაფერს! სულ ყველაფერს, უბრალოდ ცოტა უნდა მოინდომოთ რომ გაიგოთ

აი აღფრთოვანებულ ოცნების მომხრეებს კი როგორ არ გიტყდებათ რომ BBC დაჭირდა იმას რაც თქვენმა სათაყვანო პროკურატურა-სასამართლომ ვერ შეძლო? და არასოდეს რომ არ გაქვთ კითხვები როგორ ხდება ასეთი ამბები შესძლებელი” – წერს ხიდაშელი.

BBC-მ მილიარდ დოლარიან თაღლითურ სქემასთან დაკავშირებით საგამოძიებო სტატია გამოაქვეყნა, რომლის ერთ-ერთ მთავარ ორგანიზატორად დავით კეზერაშვილია მოხსენიებული.

„ფორმულა“ უნდა გადარჩეს, მისი მფლობელის რეპუტაციას კი მხოლოდ ბრიტანული სასამართლო თუ უშველის რამეს”, – ასე ეხმაურება მწერალი ლაშა ბუღაძე, ე.წ. ქოლ ცენტრების საქმეზე BBC-ის რეპორტაჟს, რომლის მიხედვითაც, ერთ-ერთ მთავარ ფიგურანტად ყოფილი თავდაცვის მინისტრი, ტელეკომპანია „ფორმულას” მფლობელი დავით კეზერაშვილი სახელდება.

„ფორმულა“ არის ქართული საზოგადოების მოკავშირე საქართველოს რუსეთისგან გათავისუფლების და პოლიტიკური ევროპეიზაციის გზაზე. „ფორმულაში“ მუშაობენ პროფესიონალები და ცოდნის თუ კულტურის კუთხით, ეს ტელევიზია უთუოდ მაღალი ხარისხის მატარებელია. სამწუხაროდ, იმხელა ფული, რომ ტელევიზიის გახნა-შენარჩუნება გახდეს შესაძლებელი, საქართველოში მხოლოდ იმ კაცებს აქვთ, ვისაც არაერთი „ჩონჩხი მოეპოვება კარადაში“ და ეს ჩვენი უდიდესი პრობლემაა. მედიის თავისუფლება და რუსული გავლენის აგენტურის მხილება კრიტიკული პლატფორმებიდან უაღრესად მნიშვნელოვანია საქართველოსთვის და იმის მიუხედავად, რომ არსებობდა რეპუტაციული უხერხულობა „ფორმულას“ მფლობელის პოლიტიკური მორალის მიმართ, კონტექსტის და რეჟიმთან დაპირისპირების მოდელის გათვალისწინებით, თუნდაც პირადად ჩემთვის (და ბევრი ადამიანისათვის) ყოველთვის უპირატესი არგუმენტი იყო და არის თავისუფალი მედიის მხარდაჭერა და მისი შეძლებისდაგვარი გაძლიერება.

მიზანი „ფორმულას“ დადუმებაა, რაკი პატიოსანი პასუხს თავის ქმედებებზე და შრომაზე აგებს და არა სხვის ცოდვებზე. ახლა ჩვენ სცილასა და ქარიბდას შორის ვართ. ამიტომ, ჩემი რჩევა იქნება, თუ არ გინდათ, რომ ტელევიზიას გაეცალონ პროფესიონალები და საზოგადოებისთვის სანდო ადამიანები, ბ-ნი კეზერაშვილი თავად უნდა გაერიდოს როგორც ქართულ პოლიტიკას, ასევე ამ ტელევიზიას, რადგან სხვანაირად „ფორმულა“ იქამდე დაიცლება, ვიდრე ივანიშვილი მოასწრებს მის დახურვას. ბევრჯერ მსმენია, როგორ უჭირთ დასავლელ დონორებს ჩვენი ოპოზიციური ტელევიზიების მხარდაჭერა მათი პარტიული აფილაციების გამო. და ეს პრობლემაა. მაგრამ ამავდროულად შანსიც, თუკი პოლიტიკის ძველი და ობსესიური პარტიული ბობილები დაეხსნებიან ჟურნალისტებს. მოვუწოდებ ბ-ნ კეზერაშვილს გადასცეს თავისი აქტივები „ფორმულას“ ჟურნალისტებს – მართალია, ფული მან ჩადო „ფორმულაში“, მაგრამ ტელევიზია შექმნეს პროფესიონალმა ჟურნალისტებმა და ამათ გარეშე „ფორმულა“ იქნებოდა რომელიმე მდარე ხარისხსის Post-tv. „ფორმულა“ მისი ჟურნალისტების რეპუტაციაზე დგას და არა ვინმე სხვაზე. თავისუფლება არ ასუსტებს, პირიქით, გვაძლიერებს“, – წერს ლაშა ბუღაძე.

“დღეს ღმერთი მოვკალით, რომელიც ხვალ ჯოჯოხეთში ჩავა და პირველ ადამიანს აიყვანს სამოთხეში”-
ყველაზე დამამცირებელი სიკვდილით, ავაზაკებთან ერთად აცვა ჯვარს”,-წერს სოციალურ ქსელში პოეტი, თორნიკე ნაროზაული.

“უცნაური დღეა. ქმნილებამ შემოქმედი მოკლა”.

ამაზე აბსურდული და ალოგიკური რაღა უნდა მოხდეს სამყაროში.

ეს რომ სინამდვილე არ იყოს, რომელ სულელს დასჭირდებოდა ამ ამბის გამოგონება. ეს რომ ჭეშმარიტად არ მომხდარიყო, როგორ გავრცელდებოდა ასეთ აბსურდულ მოტივებზე შექმნილი ცრუ რელიგია?!
მაშინ, როცა ადამიანი გამუდმებით ძლევამოსილ მფარველს ეძებს.

ჩანს, ჩვენი მხსნელი თავისი ძლევამოსილების გამო კი არ არის ჩვენი მხსნელი, არამედ – აბსოლუტური სიყვარულის გამო.

ქრისტე ადამიანმა კი არა, საკუთარმა სიყვარულმა აცვა ჯვარს.

დასაბამიდან არსებულ არცერთ რელიგიაში, არცერთი ღმერთი არ დაუშვებდა ამას.

პირიქით, რელიგიები გამუდმებით ეჯიბრებოდნენ ერთმანეთს, რომელი უფრო ძლევამოსილ ღმერთს გამოიგონებდა.

ის კი, ის ერთადერთი და ჭეშმარიტი, მოვიდა და ნაცვლად იმისა ნაფლეთებად ექცია ადამის მოდგმა, ადგა და საკუთარი თავი გადასცა მსხვერპლად.

(სასაცილოა, როცა ამ ღმერთს მსხვერპლად სხვადასხვა ცხოველებს ვწირავთ.)

პარადოქსია, მაგრამ დღეს ჩვენი გამოსყიდვის, გამოხსნის დღეა.

სწორედ მან გვიხსნა სიკვდილისგან, ვინც ჩვენ მოვკალით.

სწორედ მან მოგვცა მარადიული სიცოცხლის აღთქმა, ვისაც სიცოცხლე მოვუსწრაფეთ.

დღეს ღმერთი მოვკალით, რომელიც ხვალ ჯოჯოხეთში ჩავა და პირველ ადამიანს აიყვანს სამოთხეში.

ღმერთი, რომელიც ავაზაკს გამოასახლებს საკუთარი ჯოჯოხეთიდან და სამუდამო სიყვარულში დაასახლებს.

ღმერთი, რომელიც არც გრიგალისა და არც ქარიშხლის, არამედ სიოს საამური ხმით გვესაუბრება.

ღმერთი, რომელიც არის ანი და ჰოე, ალფა და ომეგა, დასაბამი და დასასრული.

ღმერთი, რომელმაც მსახურებად კი არა შეგვქმნა, არამედ შვილებად.

ღმერთი, რომელიც გვეუბნება, რომ შეგვიძლია მამა ვუწოდოთ, მეტიც, მოფერებით ფორმით, “მამი” ან “მამიკო” დავუძახოთ.

მისალოცად გვაქვს თუ არა საქმე?!

გვაქვს, რადგან სწორედ დღეს, როგორი მტკივნეული დღეც არ უნდა იყოს, ქრისტემ საკუთარი სისხლით გამოგვისყიდა.

ჩვენ თავისუფლები ვართ.

მთავარია, ვინ როგორ და რისთვის გამოვიყენებთ ამ თავისუფლებას.

ზოგიერთი ჩვეგანი ხვალაც ჯვარს აცვამს ქრისტეს, ზოგიერთი დაგვარწმუნებს, რომ ის საერთოდ არ არსებობდა, ზოგიერთი კი იხილავს და განიცდის მის აღდგომას და მთელს მსოფლიოს ახარებს ამ ამბავს:
ქრისტემ სძლია ჯოჯოხეთს და გამოგვიხსნა მისი დილეგებიდან.

ჩვენ გამოსყიდულები, თავისუფლები ვართ და ამის სანაცვლოდ მხოლოდ ერთი რამ მოგვეთხოვება: გვიყვარდეს ერთმანეთი ისე, როგორც მან შეგვიყვარა!”- წერს სოციალურ ქსელში თორნიკე ნაროზაული.