საქართველოს პრეზიდენტი, სალომე ზურაბიშვილის ევროკავშირის, დიდი ბრიტანეთის ელჩებსა და აშშ-ს ელჩის მოვალეობის შემსრულებელს შეხვდა.

პრეზიდენტის ადმინისტრაციის ინფორმაციით, ორბელიანების სასახლეში გამართულ შეხვედრაზე ფინანსური სანქციებისა და ეროვნული ბანკის საკითხი განიხილეს.

შეხვედრის სხვა დეტალები უცნობია.

გრიგოლს, ჯუანშერს, ირაკლის ვულოცავ მონათმფლობელობის დაბრუნების კანონის მიღებას, ვულოცავ საქართველოს მოსახლეობას, რომელსაც ეძინა – პრეზიდენტს ვთხოვთ მისთვის შეურაცხმყოფელ კანონს ვეტო დაადოს, – ამის შესახებ „გირჩის“ დეპუტატმა იაგო ხვიჩიამ თავდაცვის კოდექსის დამტკიცების შემდეგ განაცხადა.

მისივე თქმით, მათ ყველაფერი გააკეთეს, რომ ეს კანონი არ მიეღოთ, “სამი აქციის გამართვის ჩათვლით” და „პირნათელი“ არიან მოქალაქეების წინაშე.

„ბატონ გრიგოლს (გიორგაძეს), ჯუანშერს (ბურჭულაძე) ირაკლის (ღარიბაშვილი) მინდა მივულოცო მონათმფლობელობის დაბრუნების კანონის მიღება, პარლამენტმა დიდი ხნის წვალების მერე ეს თხოვნა დაუკმაყოფილა, ვულოცავ საქართველოს მოსახლეობას, რომელსაც მთელი ეს პროცესი ეძინა და ვერ აფასებდა ვერც „გირჩის” შრომას, ვერც „ბიბლიურ თავისუფლებას“ სათანადოდ ამდენი ხნის განმავლობაში, მათაც მივულოცავდი, კეთილი კომისარი ცოტა ხანში კარებთან რომ დაუკაკუნებს ჯუანშერის, გროგოლის და ირაკლის დამსახურებით. მიუღებელია ყველაფერი მასში, მიუღებელია კანონი მიიღო ისე, რომ არაფერი ახალი არ იყოს მასში, 300 გვერდიანი დოკუმენტი მიიღეს და გადავადების, თავის არიდების, იგივე პროცედურები დატოვეს, ისევ ყურადღებამიუქცეველი რჩება პროფესიონალი ჯარისკაცი და მათი ბედი არავის აინტერესებს, მიუღებელია, რომ ბოლოს და ბოლოს არ წერია ,ვის წინააღმდეგ იღებ კანონს. როგორ შეიძლება ჩვენ მთავარი მტრის წინააღმდეგ ამ პოლიტიკურ კონტექსტში რაიმე კანონი მიგვეღო და სწორედ ასეთია ეს კანონი. რაც მთავარია, ეს კანონი არის უპატივცემულობა პრეზიდენტის მიმართ, რადგან ისაა მთავარსარდალი, რომელსაც არც ერთი ბრძანების გაცემის უფლება არ აქვს, ამიტომ ყველაზე გასაგები ნაბიჯი ახლა ისაა, რომ პრეზიდენტს ვთხოვოთ მისთვის, პრეზიდენტის ინსტიტუტის შეურაცხმყოფელ კანონზე ვეტოს დადება მანამ, სანამ ერთი ბრძანების გაცემის უფლება მაინც არ ექნება, ან არ იქნება მთავარსარდალი, რადგან როგორც ყველაფერი, ესეც ტყუილია „ქართული ოცნების“ ხელში – ჩვენ გვყავს მთავარსარდალი, რომელსაც არც ერთი ჯარისკაცი არ ექვემდებარება და არც ერთი ბრძანების გაცემა არ შეუძლია“, – განაცხადა ხვიჩიამ.

„ქართულმა ოცნებამ“ საბოლოოდ გააფორმა ეროვნული ბანკის დამოუკიდებელი სტატუსის გაუქმება – ეს ნიშნავს, რომ თურნავას ბრძანება არ გაუქმდება, რომელიც საქართველოს მოქალაქეებს აყენებს საფრთხის ქვეშ, ამაზე გაგვაფრთხილა სახელმწიფო დეპარტამენტმა,- ამის შესახებ „ლელოს“ დეპუტატმა სალომე სამადაშვილმა განაცხადა.

როგორც მან აღნიშნა, ეროვნული ბანკის გარშემო მიმდინარე მოვლენები საფრთხეს უქმნის სტატუსის მიღების შესაძლებლობასაც, რადგან ევროკავშირის ერთ-ერთი მთავარი მოთხოვნა ინსტიტუციების დამოუკიდებლობის ხელშეწყობაა.

„დღევანდელი გადაწყვეტილებით, „ქართულმა ოცნებამ“ საბოლოოდ გააფორმა ეროვნული ბანკის დამოუკიდებელი სტატუსის გაუქმების პროცესი. ამიტომ არის კობახიძე კმაყოფილი, რადგან რუსული დავალება რაც აქვთ არის, რომ შეუძლებელი გახადოს სტატუსის მონიჭება ევროკავშირმა, რადგან ინსტიტუციების დამოუკიდებლობა და დეოლიგარქიზაცია არის ორი მთავარი მოთხოვნა ევროკავშირის. „ქართულმა ოცნებამ” დღეს წარმატებით გააფორმა ამ მიმართულებით უკან გადადგმული დიდი ნაბიჯი. ეს ნიშნავს სახელმწიფოს გაუქმებას ჩვენს ქვეყანაში და ნიშნავს იმას, რომ გადაწყვეტილება, რომელიც თურნავამ მიიღო, არ გაუქმდება, რაც საქართველოს თითოეულ მოქალაქეს აყენებს საფრთხის ქვეშ, რაზე გაგვაფრთხილა სახელმწიფო დეპარტამენტმა, როდესაც გვითხრა, რომ სანქციებს ვინც არ ემორჩილება, ქმნის საფრთხეს, რომ გახდეს სანქციების სამიზნე. რაც შეეხება კანდიდატებს, ხომერიკზე მე ვერ ვიტყვი ვერაფერს, რადგან პროფესიულ წრეებში მას როგორც ჩანს, აქვს მეტ-ნაკლებად პოზიტიური რეპუტაცია, რაც შეეხება ყეინიშვილს, მისი, მისი ოჯახის ბიოგრაფია იძებნება, ჩემთვის გაუგებარია, საერთოდ, როგორ შეიძლებოდა ამ პოსტზე მსგავსი პიროვნების დასახლება. თუმცა, გასაგებია, „რუსულმა ოცნებამ“ რატომ დაამტკიცა სიხარულით ეს ქალბატონი, რადგან გარდა საეჭვო ფინანსური გარიგებებისა, მისი ოჯახი პირდაპირ მხილებულია რუსეთთან კავშირებში, ასე რომ „ქართული ოცნებისთვის“ ეს ძალიან ლოგიკურია”, – განაცხადა სამადაშვილმა.

ცნობისთვის, ეროვნული ბანკის საბჭოს არსებულ ორ ვაკანტურ ადგილზე პარლამენტმა ხმათა უმრავლესობით ნანა ყეინიშვილი და თეიმურაზ ხომერიკი აირჩია.

ნანა ყეინიშვილის კანდიდატურას 84-მა დეპუტატმა დაუჭირა მხარი, ხოლო თეიმურაზ ხომერიკს უმრავლესობის 82-მა წევრმა.

აღსანიშნავია, რომ პარლამენტის ორმა კომიტეტმა კანდიდატურების არჩევის საკითხი დღევანდელ სხდომაზე განიხილა და პარლამენტს უარყოფითი დასკვნა წარუდგინა. საკომიტეტო განხილვას თავად კანდიდატები არ ესწრებოდნენ.

თავის მხრივ, პრეზიდენტს მის მიერ წარდგენილი კანდიდატების პარლამენტიდან უკან გაწვევა სურდა, თუმცა უმრავლესობის წევრების განცხადებით, სალომე ზურაბიშვილს ამის უფლება არ ჰქონდა.

პარტია “დროას” თავმჯომარემ, ელენე ხოშტარიამ ბრიფინგი გამართა, რომელზეც ოთარ ფარცხალაძესა და ნათია თურნავას პირდაპირ კავშირზე ისაუბრა.

ელენე ხოშტარიას განცხადებით, ეროვნული ბანკის დირექტორი ნათია თურნავა პირდაპირ კავშირშია, როგორც ოთარ ფარცხალაძესთან ისე რუს ბიზნესმენებთან.

მისივე თქმით, პარტია „დროა“ ასაჯაროვებს დამატებით მტკიცებულებებს, რომლებიც ნათია თურნავას ეკონომიკის მინისტრობის დროსაა ხელმოწერილი ანუ იმ დროს, როდესაც იგი სახელმწიფოს სახელით მოქმედებდა.

„კერძოდ, 2021 წელს, როცა თურნავა ეკონომიკის მინისტრი იყო, ფორმდება მემორანდუმი სამინისტროსა და შპს საქართველოს ბიზნეს ბროკერიჯს შორის. მემორანდუმში წერია, რომ სამინისტრო მზადაა, კომპანიას შესაბამისი ლიცენზიებისა და ნებართვების მოპოვებაში ხელი შეუწყოს. მემორანდუმს ხელს აწერს ფარცხალაძის ბიზნეს პარტნიორი რომან ბოკერია, რომელიც საკუთარ თავს რუსეთში საქართველოს ბიზნეს ელჩს უწოდებს. არის კრემლთან დაკავშირებული ბიზნესმენი და აირზენას ყოფილი დირექტორი. იგი საავიაციო და სარკინიგზო მიმოსვლის აღდგენასთან დაკავშირებით გამართული რუსული ფორუმების მონაწილეა.

2022 წლის 15 თებერვალს, რუსეთის იუსტიციის სამინისტრო არეგისტრირებს კომპანიას სახელად შპს მასკოვსკი ბიზნეს ბროკერიჯ, რომლის ყველაზე მსხვილი აქციონერი, 50%-იანი წილის მფლობელი, ოთარ ფარცხალაძეა.

რუსეთში დარეგისტრირებული კომპანიის მფლობელი, ოთარ ფარცხალაძესთან ერთად, არის  რომან ბოკერიას ცოლი, რუსეთის მოქალაქე  ვიქტორია ბოკერია (35%). ვიქტორია ბოკერია 2022 წლის დეკემბერს, რუსეთის დუმის და საქართველოში დაფუძნებულ მოძრაობა სოლიდარობა მშვიდობისთვის ორგანიზებით ჩატარებულ ფორუმში იღებდა მონაწილეობას, სადაც რუს დეპუტატებთან პირდაპირი ავიარეისების აღდგენის შესახებ მოლაპარაკებები მიმდინარეობდა. მოძრაობა სოლიდარობა მშვიდობისთვის განათლების ექსპერტი კი ოთარ ფარცხალაძის შვილი ანზორ ფარცხალაძეა“, – განაცხადა ელენე ხოშტარიამ.