საქართველოს პრეზიდენტმა, სალომე ზურაბიშვილმა რიგაში ლატვიის პრეზიდენტთან, ედგარს რინკევიჩთან შეხვედრა გამართა.

როგორც პრეზიდენტმა სოციალურ ქსელში დაწერა, ლატვიის მტკიცე მხარდაჭერა გადამწყვეტია საქართველოს ევროინტეგრაციის გზაზე.

„შესანიშნავი შეხვედრა მქონდა ლატვიის პრეზიდენტთან, ედგარს რინკევიჩთან ჩვენი ევროპული გზისათვის ამ გადამწყვეტ მომენტში. მადლობას ვუხდი ლატვიას წლების განმავლობაში საქართველოს გვერდით დგომისთვისა და მხარდაჭერისათვის.

თქვენი მტკიცე მხარდაჭერა გადამწყვეტია საქართველოს ევროინტეგრაციის გზაზე“, – დაწერა პრეზიდენტმა ზურაბიშვილმა.

ოთარ ფარცხალაძე საქართველოს მოქალაქეობას ერთ კვირაში დაკარგავს თუ სამ თვეში, ეს „ქართული ოცნების“ ხელისუფლებას სამართლებრივი რეაგირების ვალდებულებისგან არ ათავისუფლებს – არ აკეთებს რა ამას, ფარცხალაძის მიერ საქართველოს საზიანოდ ჩადენილი ყველა ქმედება როგორც სამართლებრივად, ასევე პოლიტიკურად „ქართულ ოცნებაზე“ გადმოდის, – ასეთია „ლელოს“ დეპუტატის ანა ნაცვლიშვილის პოზიცია.

ნაცვლიშვილის განცხადებით, იმის ნაცვლად, რომ “ქართული ოცნების” ხელისუფლებას ფარცხალაძესთან დაკავშირებულ საქმეს იძიებდეს, იცავს და ბოლომდე ეფარება მას.

მისივე აზრით, თუ მმართველი გუნდი დაინახავს, რომ ოთარ ფარცხალაძის სკანდალმა შეიძლება მათი ძალაუფლება შეიწიროს, ფარცხალაძეს მხოლოდ ასეთ შემთხვევაში გაწირავენ.

“ფარცხალაძე საქართველოს მოქალაქედ დარჩება თუ დაკარგავს მოქალაქეობას, “ქართულ ოცნებას” სამართლებრივი თვალსაზრისთ არ უშლის ხელს, რომ მის წინააღმდეგ გამოძიება დაიწყოს. მისი როგორც სამართლებრივი, ასევე პოლიტიკური ვალდებულებაა, რომ რუსეთის სპეცსამსახურების ჯაშუშობაში მხილებული პირი პასუხისგებაში მისცეს.

“ქართულ ოცნებას” პასუხისმგებლობას ვერ ჩამოხსნის მათ შორის ისიც, თუ ფარცხალაძე საქართველოს მოქალაქე არ იქნება. მთავარი, რაც ამ თემის ფარგლებში დავინახეთ, არის ის, რომ გენერალური პროკურორის პოსტზე იუსტიციის მინისტრის მიერ წარდგენილი და პრემიერი მიერ მხარდაჭერილი პირი რუსეთის ჯაშუშობაში მხილებული ადამიანი აღმოჩნდა. თეა წულუკიანმა და ირაკლი ღარიბაშვილმა უნდა უპასუხონ კითხვას, რა ნიშნით შეარჩიეს და წარადგინეს თავის დროზე ფარცხალაძე ასეთ მაღალ თანამდებობაზე – ამ კითხვაზე პასუხი მათ თავზე ჰკიდია”, – განაცხადა ანა ნაცვლიშვილმა.

ეკონომიკისა და მდგრადი განვითარების სამინისტროს ინიცირებით საქართველოს მთავრობამ დღევანდელ სხდომაზე ელექტროენერგიის წარმოების სიმძლავრის პირველ აუქციონში გამარჯვებულ რამდენიმე კომპანიასთან გასაფორმებელი ტექნიკურ-ეკონომიკური კვლევის ხელშეკრულებები დაამტკიცა. ამ საკითხზე ვიცე-პრემიერმა, ეკონომიკისა და მდგრადი განვითარების მინისტრმა მთავრობის ადმინისტრაციაში გამართულ ბრიფინგზე ვრცლად ისაუბრა და ზოგადად, განახლებადი ენერგიის პროექტების წახალისების მექანიზმების შესახებ მედიას დეტალური ინფორმაცია მიაწოდა.

როგორც დავითაშვილი აღნიშნავს, პრემიერ-მინისტრის ინიციატივით, განახლებადი ენერგიის პროექტების წახალისება სახელმწიფოს მხრიდან განსაკუთრებულ პრიორიტეტადაა გამოცხადებული. კონკრეტულად, მთავრობის დღევანდელ სხდომაზე ხელშეკრულება დამტკიცდა 6 პროექტზე, რომელთა ჯამური სიმძლავრეა 44 მგვტ; გამომუშავება 71 მლნ კვტ სთ; ინვესტიციის მოცულობა კი 26,9 მლნ აშშ დოლარს შეადგენს.

აღსანიშნია, რომ საქართველოს მთავრობის წინა სხდომაზე ასევე 11 პროექტის ხელშეკრულება დაამტკიცეს, რომელთა ჯამური სიმძლავრე 161 მეგავატია, ჯამური გამომუშავება 661,9 მლნკვტ სთ; ინვესტიციის მოცულობა კი 218 მლნ აშშ დოლარი.

„ჩვენ თითქმის ერთო წელი ვიმუშავეთ საერთაშორისო პარტნიორებთან – პროცესში ჩართული იყო როგორც მსოფლიო ბანკი, ისე საერთაშორისო სავალუტო ფონდი, რათა ისეთი მექანიზმი მოგვეფიქრებინა, რომელიც განსაკუთრებით გამჭვირვალედ მოახდენდა პროექტების შერჩევას და მხარდაჭერას სახელმწიფოს მხრიდან. ამასთან, კონკურენციის პირობებში ისეთი ფასები განისაზღვრებოდა, რომლებიც სამართლიანი იქნებოდა როგორც ინვესტორებისთვის, ისე სახელმწიფოსთვის და ადრე არსებული მექანიზმი ჩანაცვლდებოდა უფრო მეტად კონკურენტული მექანიზმით. როგორც იცით, ჩვენ გვაქვს ე.წ. CFD მექანიზმი – ეს არის კონკრეტულად ფასის სხვაობის კომპენსირება სახელმწიფოს მხრიდან ასეთი პროექტებისთვის“, – განაცხადა ვიცე-პრემიერმა.

დავითაშვილის ინფორმაციით, განახლებადი წყაროებიდან ენერგიის წარმოებისა და გამოყენების მხარდაჭერის ახალი სქემის ფარგლებში პირველი აუქციონი გაზაფხულზე წარმატებით ჩატარდა და მასში კერძო სექტორის მხრიდან მაღალი ინტერესი დაფიქსირდა – წარმოდგენილი იყო 78 განაცხადი 943 მგვტ დადგმულ სიმძლავრეზე. სულ გამოვლინდა 27 გამარჯვებული კომპანია, ისინი საქართველოში 15 ჰიდროელექტროსადგურის, 2 ქარის ელექტროსადგურისა და 10 მზის ელექტროსადგურის მშენებლობის პროექტს განახორციელებენ.

ეკონომიკის მინისტრის ინფორმაციით, ეს 27 სადგური, ამოქმედების შემდეგ, ჯამურად შეძლებს 1,1407 მლრდ. კვტ სთ. ენერგიის გამომუშავებას ყოველწლიურად, ხოლო ინვესტიცია, რომელიც ამ პროექტებში განხორციელდება, ჯამურად 400 მლნ აშშ დოლარს გადააჭარბებს.

„ეს არის მხოლოდ პირველი აუქციონის შედეგები, რასაც უნდა მოჰყვეს კიდევ რამდენიმე აუქციონი იმისთვის, რომ ახალი პროექტები შეირჩეს. ჯამში, ჩვენ საერთაშორისო პარტნიორებთან ერთად შევჯერდით, რომ ქვეყანა, ამ პრინციპით, დაახლოებით 1500-მდე მგვტ-ის სიმძლავრის პროექტებს შეარჩევდა. ვფიქრობ, რომ ჩვენი ენერგეტიკული სექტორის გაძლიერებისთვის მორიგი ძალიან მნიშვნელოვანი ეტაპი გავიარეთ“, – აღნიშნა დავითაშვილმა.

დარჩენილი დასამტკიცებელი პროექტების შესახებ საქართველოს მთავრობა შემდგომ სხდომებზე იმსჯელებს.

არც ერთი ადამიანი, ვისაც დახმარება სჭირდებოდა, დახმარების გარეშე არ დარჩენილა, ვერტმფრენების თემა არის სპეკულაციური და მორალთან მწყრალად მყოფი თემა, – ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა, რითაც უპასუხა კითხვას გავრცელებულ ინფორმაციასთან დაკავშირებით, რომლის თანახმად, საქმის მასალებში მითითებულია, რომ შსს-მ შოვში ვერტმფრენის გაშვების გადაწყვეტილება მიღებული შეტყობინებებიდან 50 წუთის შემდეგ მიიღო.

ვოლსკის განცხადებით, იყო ამინდის პრობლემები და სახელმწიფო ვერტმფრენის ეკიპაჟის სიცოცხლეს უფრთხილდება.

ვოლსკი იქვე დასძენს, რომ დაგვიანებას ადგილი არ ჰქონია.

„ცდილობენ დეზინფორმაცია მიაწოდონ საზოგადოებას, რომ ვერტმფრენის დროულად არჩასვლის გამო ადამიანი დაზარალდა, ან მის სიცოცხლეს საფრთხე დაემუქრა, ეს არ დასტურდება. ეს ყველამ კარგად იცის და მოიგონეს ახალი თემა, რომ გაფრენა დააგვიანეს. იყო ამინდის პრობლემები და გამონაკლისი არ არის ჩვენი სახელმწიფო, რომელიც ვერტმფრენის ეკიპაჟის სიცოცხლეს უფრთხილდება, რაც იმ პერიოდში აუცილებლად გასათვალისწინებელი იყო და მომავალშიც გასათვალისწინებელია. არანაირი შეყოვნება არ ყოფილა, შეგროვდა ტვირთი, შეგროვდა გუნდი და ვერტმფრენი აფრინდა და საკმაოდ სერიოზული სამუშაოც ჩაატარა მაშველთა გუნდმა. ვერტმფრენების მისვლამდე იქ, რა საკვირველია, მაშველები იმყოფებოდნენ”, – განაცხადა ვოლსკიმ.

იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, 3 ოქტომბერს საკონსტიტუციო სასამართლოზე დასწრების და პოზიციების წარდგენის შესაძლებლობა უმრავლესობის 5 დეპუტატს – ირაკლი კობახიძეს, ანრი ოხანაშვილს, გიორგი კახიანს, თენგიზ შარმანაშვილს, მიხეილ სარჯველაძეს აქვს. ასევე, კანონი ითვალისწინებს პრეზიდენტის დასწრების უფლებამოსილებასაც.

მისივე თქმით, საოქმო ჩანაწერში წარდგინების ავტორთა და შესაბამისი თანამდებობის პირის მონაწილეობა მითითებულია.

ოხანაშვილი აცხადებს, რომ საბოლოო გადაწყვეტილება დაესწრება თუ არა საკონსტიტუციო სასამართლოს სხდომას ხუთივე დეპუტატი, ამაზე გადაწყვეტილებას მიიღებენ.

მისივე თქმით, მათთვის პრინციპულად მნიშვნელოვანია კონსტიტუციის დარღვევა დადგინდეს.

„კანონმდებლობა ითვალისწინებს, რომ როგორც კონსტიტუციური წარდგინების ავტორებს, ასევე შესაბამის პირს, ვისი იმპიჩმენტის საკითხიც განიხილება, აქვთ დასწრების უფლებამოსილება. საქართველოს პარლამენტის წევრებს ჰქონდათ უფლებამოსილება, რომ განესაზღვრათ ვინ იქნებოდნენ წარმომადგენლები და თქვენთვის ცნობილია, რომ 5 დეპუტატს გვაქვს შესაძლებლობა წარვდგეთ საკონსტიტუციო სასამართლოს წინაშე. ხუთივეს გვაქვს შესაძლებლობა და უფლება, რომ დავესწროთ საკონსტიტუციო სასამართლოს სხდომას და წარვადგინოთ ჩვენი პოზიციები. საბოლოოდ, როგორ შევთანხმდებით, ხუთივე წავალთ თუ იქნება გამონაკლისი, ეს დამოკიდებულია პლენარული სხდომის დღის გრაფიკზე. სამშაბათს გვაქვს პლენარული სხდომა და ამასთან დაკავშირებით მივიღებთ გადაწყვეტილებას. რაც შეეხება პრეზიდენტს, რომელი თანამდებობის პირის იმპიჩმენტის საკითხიც განიხილება, მას ეგზავნება შესაბამისი შეტყობინება, ამიტომ საოქმო ჩანაწერში მითითებულია, წარდგინების ავტორთა ანუ ჩვენი და შესაბამისი თანამდებობის პირის მონაწილეობა, ამ შემთხვევაში პრეზიდენტის. ჩვენ ველოდებით ამ პროცესს, ჩვენთვის პრინციპულად მნიშვნელოვანია, საკონსტიტუციო სასამართლომ სამართლებრივად, კონსტიტუციურ სამართლებრივი გაგებით, კონსტიტუციის ჩანაწერების თანახმად განიხილოს ეს საკითხი და დადგინდეს კონსტიტუციის დარღვევა. ჩვენ გვექნება ეს პოზიცია, რაც ასახულია წარდგინებაში, ეს ხელმისაწვდომია საჯაროდ”, – განაცხადა ოხანაშვილმა.