ბატონი არახამიას უსამართლო განცხადებები, რომლებიც რეალურად საქართველოს შიდა პოლიტიკაში ჩარევაა, ვერ შეცვლის ქართველი და უკრაინელი ხალხის მეგობრობას, ვერ შეცვლის ჩვენს მხარდაჭერას უკრაინის მიმართ, – ამის შესახებ პარლამენტის ვიცე-სპიკერმა, არჩილ თალაკვაძემ საქართველოს პირველი არხის გადაცემაში „დღის თემა“ განაცხადა.

„საქართველო ყველაფერს აკეთებს უკრაინის მხარდასაჭერად, რაც შეუძლია. ეს არის პოლიტიკური მხარდაჭერა, ეს არის ვიზიტი, რომელიც ჩვენ გვქონდა; საქართველოს საპარლამენტო დელეგაცია იყო მსოფლიოში ერთ-ერთი პირველი, რომელიც კიევში ჩავიდა ჩვენი კოლეგის, ბატონი სტეფანჩუკის მოწოდების შემდეგ. აღარ მინდა, ვისაუბრო ჰუმანიტარულ დახმარებაზე. საქართველომ ყველა პოლიტიკურ პლატფორმაზე დაუჭირა მხარი უკრაინას, მათ შორის, რეზოლუციებს, საერთაშორისო გამოძიების დაწყებას ჰააგაში და რუსეთის გარიცხვას ევროპის საბჭოდან. შესაბამისად, საქართველომ გააკეთა ყველაფერი, რაც შეუძლია და ამაზე იყო არაერთი საერთაშორისო პარტნიორის განცხადება, რომ საქართველო აკეთებს ყველაფერს, რაც შეუძლია. რატომღაც ამ ოპოზიციას და მათ მიერ მართულ ტელევიზიებს ეს განცხადებები უყურადღებოდ რჩებათ, სამაგიეროდ, ძალიან ინტერესდებიან განცხადებებით, რომლებიც საქართველოს მიმართ უსამართლოდ და უსაფუძვლოდ არის გამოთქმული. რაც შეეხება ბატონ არახამიას, მისი უსამართლო განცხადებები, რომლებიც რეალურად საქართველოს შიდა პოლიტიკაში ჩარევაა, ვერ შეცვლის ქართველი და უკრაინელი ხალხის მეგობრობას, ვერ შეცვლის ჩვენს მხარდაჭერას უკრაინის მიმართ“, – განაცხადა თალაკვაძემ.

თალაკვაძის განცხადებით,ძალიან სამწუხარო და სევდიანია, როდესაც უკრაინელი პოლიტიკოსი და მაღალი თანამდებობის პირი ასეთი მძიმე ომის დროს იცლის და საკმაოდ ხშირად აკეთებს განცხადებებს საქართველოს შიდა პოლიტიკურ პროცესებზე.

„ჩვენ სხვას არაფერს არ ვიტყვით ახლა, როდესაც ჩვენი მეგობარი უკრაინა არის ომში, თუმცა, როგორც ჩანს, საქართველოში უფრო უკეთ ესმით, რა მძიმე გამოწვევების წინაშეა ჩვენი მეგობარი უკრაინა და რამდენად მნიშვნელოვანია ერთიანობის შენარჩუნება ახლა, ვიდრე ეს ესმის ბატონ არახამიას, რომელიც უკრაინაშია და პირდაპირ ვალდებულია, მთელი დრო და ენერგია დაუთმოს საკუთარი ქვეყნის სუვერენიტეტისა და ინტერესების დაცვას“, – განაცხადა თალაკვაძემ.

მაშინ ემოციური ფონი იყო განსხვავებული საქართველოში და ზოგადადაც, მაშინ ასეთი მარტივი გათვლა იყო, რომ იმ ფონზე ზელენსკის მიერ ელჩის გაწვევა ქვეყანაში არეულობას გამოიწვევდა. მარტივი პოლიტიკური მიზანი ჰქონდა მაშინაც ელჩის გაწვევას, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ გადაცემაში „იმედი LIVE“ განაცხადა.

„საქართველოს ელჩი უკრაინაში არის ადგილზე, მუშაობს და ბევრ რამეს აკეთებს იმისთვის, რომ უკრაინელ ხალხს დაეხმაროს, მიუხედავად უკრაინის ხელისუფლების ასეთი დამოკიდებულებისა. ჩვენ მოგვარებული გვაქვს ეს ყველაფერი. რეალურად საქართველოში ელჩის დანიშვნა უკრაინულ მხარეს სჭირდება. როდესაც ამას არ აკეთებენ, ამით საკუთარი ქვეყნის ინტერესების წინააღმდეგ მოქმედებენ“, – განაცხადა ირაკლი კობახიძემ.

დღეს თუ ეს ქართული ოცნებისთვის არის ჯილდო, გამოდის, რომ მაშინ, 2019 წელს რუსეთმა ქართული ოცნება დასაჯა. მაშინაც ჩვენ რუსულ ძალად გვაცხადებდნენ, ანუ მაშინ დასაჯა ქართული ოცნება, დღეს დააჯილდოვა, – სად არის აქ ლოგიკა?, – ასე გამოეხმაურა ქართული ოცნების“ თავმჯდომარე ირაკლი კობახიძე ოპონენტების განცხადებებს, რომ რუსეთის გადაწყვეტილება საქართველოსთან სავიზო რეჟიმის გაუქმების თაობაზე, არის ხელისუფლებისთვის ჯილდო. როგორც მან გადაცემაში „იმედი LIVE“ განაცხადა კონსტიტუცია ხელისუფლებას აკისრებს ვალდებულებას, რომ ხელი შეუწყონ დიასპორის კავშირს საქართველოსთან. მისივე თქმით, რუსეთის გადაწყვეტილება სანქციის დაწესებაზე და გაუქმებაზეც ცალმხრივი იყო და ამასთან დაკავშირებით ხელისუფლებას ვერ ექნება პოზიცია. „ჩვენ მოგვიწია თავის დროზე ჩვენი პოზიციის დაფიქსირება გამომდინარე იქიდან, რომ რუსული მხრიდან წინასწარ იყო გაჟღერებული ეს პოზიცია. ჩვენი პოზიცია არის ასეთი – არის მილიონამდე ქართველი პირი, რომელიც ცხოვრობს რუსეთში, ამ ადამიანებს უწევთ სხვა ქვეყნების გავლით საქართველოში ჩამოსვლა რაც აძვირებს ხარჯებს ქმნის დისკომფორტს.

პირდაპირ შემიძლია გითხრათ, რადიკალური ოპოზიცია ყველანაირად ეცდება ეს თემა კიდევ ერთხელ გამოიყენოს იმ კამპანიისთვის, რომელსაც აწარმოებენ კანდიდატის სტატუსის წინააღმდეგ. არავითარი კავშირი არ არსებობს ამ საკითხსა და კანდიდატის სტატუსს შორის, მაგრამ დაიმახსოვრეთ, რადიკალური ოპოზიცია ყველანაირად ეცდება გამოიყენოს ეს თემა იმ კამპანიისთვის, რომელსაც ისინი კანდიდატის სტატუსის წინააღმდეგ აწარმოებენ. ჩვენ დსთ-ს წევრი არ გავმხდარვართ დღეს. იყო დაწესებული სასჯელი რუსეთის მხრიდან და ეს სასჯელი მოიხსნა“, – განაცხადა კობახიძემ.