რუსეთის ფედერაციის მხრიდან რაც სანქციის სახით, ცალმხრივად იყო დადებული, ახლა არის მოხსნილი. შესაბამისად, გაუგებარია, რა შეუძლია საქართველოს, საქართველოს მოქალაქეებს დაადოს დამატებით სანქცია და თუ ვინმეს სურვილი აქვს, ამ შეზღუდვის არქონით ისარგებლოს, ეს აუკრძალოს? – ამის შესახებ საპარლამენტო უმრავლესობის წევრმა ალუდა ღუდუშაურმა განაცხადა.

ღუდუშაური რუსეთის მხრიდან საქართველოსთან სავიზო რეჟიმის გაუქმებისა და პირდაპირი ფრენების აღდგენის გადაწყვეტლებას გამოეხმაურა.

„პუტინის გადაწყვეტილების დროსა და მის ზრახვებთან დაკავშირებით ვერ ვისუაბრებ. ფაქტია, რომ ჩვენი ხელისუფლება აკეთებს იმას, რაც ჩვენი ხალხისთვის და ქვეყნისთვის პრიორიტეტია. რაც შეეხება ოპოზიციას და აჟიოტაჟს, ოპოზიციას უნდა ჰკითხოთ, რა პრიზმიდან უყურებენ გადაწყვეტილებას, რომელიც მიიღო რუსეთის ფედერაციამ და პირადად ვლადიმერ პუტინმა. მე თუ მეკითხებით, არც წასვლას, არც ამ ფრენებით სარგებლობას ვაპირებ, ვისაც ეს ეხება, მათი გადასაწყვეტია. ფაქტია, რომ საქართველოს მოქალაქეებს რუსეთის ფედერაციის მხრიდან რაც სანქციის სახით, ცალმხრივად ჰქონდა დადებული, ახლა არის მოხსნილი. შესაბამისად, გაუგებარია, ახლა რა შეუძლია საქართველოს, საქართველოს მოქალაქეებს დაადოს დამატებით სანქცია და აუკრძალოს, თუ ვინმეს სურვილი აქვს, ამ შეზღუდვის არქონით ისარგებლოს? ეს ძნელად წარმომიდგენია. ეთნიკურად ჩვენი თანამემამულეები, რომლებიც რაიმე ფორმით დაკავშირებული იყვნენ რუსეთის ფედერაციასთან, ალბათ აქამდეც ახერხებდნენ მიმოსვლას. რაღაც დოზით გაუადვილდებათ მიმოსვლა ადამიანებს, ვინც ამას მესამე ქვეყნის გავლით ახერხებდა, მაგრამ ძნელად წარმომიდგენია ადამიანი, რომელმაც გაიგო, თურმე ვიზა არ სჭირდება, ადგეს და ახლა მოინახულოს რუსეთის რომელიმე ოლქი, თუ რაიონი, ტურისტულად იმოგზაუროს“, – აღნიშნა ალუდა ღუდუშაურმა.

საქართველოსთვის რუსეთის გუშინდელი ნაბიჯი ნიშნავს ყველს სათაგურში და უნდა შევაფასოთ ზუსტად ასე, რომ ყველი კარგია, მაგრამ ის სათაგურშია, უნდა გვესმოდეს, რომ ჯილდოს კი არ ვიღებთ, არამედ ხაფანგში შევდივართ ამ ყველის მოსაციცქნად, – ამის შესახებ „გირჩის“ ლიდერმა, იაგო ხვიჩიამ განაცხადა.

ხვიჩიას თქმით, ვლადიმერ პუტინის გადაწყვეტილება მეგობრული ჟესტი არ არის.

„უნდა გვესმოდეს, რომ მეგობრული ჟესტი კი არ არის, ეს არის ჟესტი, რომ ჩვენი თავი მოსტაცონ დასავლეთს, მცდელობა, თორემ რომ არ გამოვა მე მესმის ეს. საბჭო დიდი ხანია, მგონი, არ მოწვეულა ისედაც და რამდენად ფუნქციონალურია ვერ გეტყვით. ასევე, მგონი ვიზების დაწესება რუსეთის მოქალაქეებზე არ არის სწორი და მართებული პასუხი. მგონია, რომ სწორი პასუხი იქნება, ჩვენს მოქალაქეებს ველაპარაკოთ იმ საფრთხეებზე, რომელიც მომდინარეობს რუსეთიდან და რომ ეს არის არა მეგობრული ნაბიჯი, არამედ ნაბიჯი იმისთვის, რომ საქართველო რუსეთს დაუახლოვდეს, თუმცა ეს არ ნიშნავს, რომ საქართველოს მოქალაქეებმა, ვისაც საჭიროება აქვთ ამის, ეს არ გამოიყენოს“, – განაცხადა ხვიჩიამ.

რუსეთის პრეზიდენტმა, ვლადიმერ პუტინმა გამოსცა განკარგულებები, რომლებიც საქართველოსთან სავიზო რეჟიმის გაუქმებას და პირდაპირი ფრენების აღდგენას ითვალისწინებს.

საქართველოსთან რუსეთს სავიზო რეჟიმი ცალმხრივად ჰქონდა დაწესებული. რუსეთის ფედერაციასთან სავიზო რეჟიმი 2012 წელს მაშინდელი პრეზიდენტის, მიხეილ სააკაშვილის ბრძანებით გაუქმდა. მანამდე კი, 2010 წლის ოქტომბერში სავიზო რეჟიმის გაუქმება რუსეთის ფედერაციაში შემავალი ჩრდილოეთ კავკასიის რესპუბლიკების მცხოვრებლებს შეეხოთ.

შეკითხვაზე დღეს რომ საპარლამენტო არჩევნები ტარდებოდეს, რომელ პარტიას მისცემდით ხმას, შედეგები ასე გამოიყურება:

„ქართული ოცნება“ 53 %

„ერთიანი ნაციონალური მოძრაობა“ 19 %

„ლელო“ 4 %

„გირჩი – მეტი თავისუფლება“ 3 %

„ლეიბორისტული პარტია“ 3 %

„საქართველოს პატრიოტთა ალიანსი“ 2 %

„სტრატეგია აღმაშენებელი“ 2 %

„ევროპული საქართველო“ 2%

„საქართველოსთვის“ 2 %

„მოქალაქეები“ 2 %

„ახალი პოლიტიკური ცენტრი“ – გირჩი 1 %

სხვა პარტიები 7 %

ტელეკომპანია „იმედის“ დაკვეთით GORBI საზოგადოებრივი აზრის კვლევის შედეგებს აქვეყნებს. კვლევით ირკვევა, რომ მმართველი პარტიის რეიტინგი წინა კვლევასთან შედარებით გაზრდილია.

კვლევა ტელეკომპანია „იმედის“ დაკვეთით, საზოგადოებრივი აზრისა და ბიზნესის კვლევის საერთაშორისო ცენტრმა „გორბიმ“ 22 აპრილიდან 7 მაისის ჩათვლით ჩაატარა. წარმომადგენლობითი შერჩევით ქვეყნისა და თბილისის მასშტაბით, პირისპირ ინტერვიუს წესით საქართველოს 2026 მოქალაქე გამოიკითხა. 59 %, ანუ 1212 რესპონდენტი სავარაუდო ამომრჩეველია, რომელიც, სავარაუდო ხმის მიცემის შესახებ 2 შეკითხვაზე პასუხისა და 2020 წლის საპარლამენტო არჩევნებზე ხმის უფლების მქონეთა თვითგაცხადებული ხმის მიცემის ისტორიის მიხედვით გამოვლინდა,

ცდომილების ზღვარი: ქვეყნის მასშტაბით რიგითი მოქალაქეების გამოკითხვის შემთხვევაში – +/- 2.2%-ია. ქვეყნის მასშტაბით სავარაუდო ამომრჩევლის შემთხვევაში – +/- 2.9%-ი.

“პირდაპირი ფრენების აღდგენის ან სავიზო რეჟიმის შეცვლის ნაცვლად, ქართველ ხალხს, სავარაუდოდ ის ურჩევნია, რომ პუტინმა რუსეთის მიერ ოკუპირებული საქართველოს ტერიტორიის 20 პროცენტიდან, რუსეთის ჯარი გაიყვანოს” – ასე ეხმაურება  ამერიკის სახელმწიფო დეპარტამენტი კრემლის გადაწყვეტილებას.

რუსეთის პრეზიდენტმა ვლადიმირ პუტინმა საქართველოსთან პირდაპირი ავიამიმოსვლის აკრძალვის გადაწყვეტილება 10 მაისიდან გააუქმა. პუტინმა საქართველოს მოქალაქეებს ასევე სავიზო შეზღუდვებიც მოუხსნა, რის საფუძველზეც, 15 მაისიდან, საქართველოს მოქალაქეებს რუსეთში უვიზოდ 90 დღის განმავლობაში ყოფნა კანონიერად შეეძლებათ.

“ამერიკის ხმისთვის” მიცემულ წერილობით კომენტარში, სახელმწიფო დეპარტამენტის წარმომადგენელი ამბობს, რომ ახლა რუსეთთან დაახლოების დრო არ არის.

“ბევრი დასავლური ქვეყანა, მათ შორის შეერთებული შტატები, რუსულ თვითმფრინავებს საკუთარ საჰაერო სივრცეში შესვლას უკრძალავს. თუ რუსეთსა და საქართველოს შორის პირდაპირი ფრენები აღდგება, ჩვენ შეგვაშფოთებს ის, რომ კომპანიები საქართველოს აეროპორტებში შესაძლოა სანქციების რისკის წინაშე აღმოჩნდნენ ისეთი თვითმფრინავების მომსახურების გამო, რომლებიც იმპორტისა და ექსპორტის კონტროლს ექვემდებარება.

ამ სასტიკ რეჟიმს მთელი დასავლური საზოგადოება დაშორდა – ახლა რუსეთთან ჩართულობის გაზრდის დრო არ არის. პირდაპირი ფრენების აღდგენის ან სავიზო რეჟიმის შეცვლის ნაცვლად, ქართველ ხალხს, სავარაუდოდ ის ურჩევნია, რომ პუტინმა რუსეთის ჯარი გაიყვანოს რუსეთის მიერ ოკუპირებული საქართველოს ტერიტორიის 20 პროცენტიდან”, – აცხადებს სახელმწიფო დეპარტამენტი.

პრემიერ-მინისტრ, ირაკლი ღარიბაშვილის ხელმძღვანელობით, საქართველოს დემოგრაფიულ საკითხთა განმხილველი საბჭოს სხდომა გაიმართა. ამის შესახებ ინფორმაციას მთავრობის ადმინისტრაცია ავრცელებს.

მათივე ცნობით, მთავრობის ადმინისტრაციაში გამართულ სხდომაზე დემოგრაფიული განვითარების ძირითადი მიზნები განიხილეს. საბჭოს წევრებმა იმსჯელეს დემოგრაფიული მდგომარეობის გაუმჯობესების მიზნით შემუშავებულ ინიციატივებზე. ყურადღება გამახვილდა სხვადასხვა პროგრამების შემუშავებასა და დანერგვაზე, ასევე უკვე არსებული პროგრამების დახვეწასთან დაკავშირებით. განიხილეს დასაქმების ხელშეწყობისა და მიგრაციის საკითხები, ასევე იმსჯელეს ჯანდაცვის, სოციალური სფეროსა და განათლების მიმართულებით არსებულ ინიციატივებზე.

როგორც საბჭოს სხდომის დასრულების შემდეგ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამარ გაბუნიამ განაცხადა, უმოკლეს ვადაში მომზადდება პაკეტი, რომელიც წარმოდგენილი იქნება მომდევნო სხდომაზე განსახილველად.

„საბჭოს პირველი სხდომა გაიმართა დღეს. წარმოდგენილი იქნა ის ძირითადი ტენდენციები, რაც აღინიშნება დემოგრაფიული კუთხით და ასევე ინიციატივები, რაც უკვე მიმდინარეობს ჯანდაცვის, განათლებისა და სოციალური მიმართულებით. ვიმსჯელეთ საჭირო გაუმჯობესებებზე, საერთაშორისო პრაქტიკაზე და იმ აუცილებელ ცვლილებებზე, რაც ხელს შეუწყობს დემოგრაფიული ტენდენციების გაუმჯობესებას მომავალში. შედგა შეთანხმება, რომ უმოკლეს ვადაში მომზადდეს პაკეტი, რომელიც წარმოდგენილი იქნება მომდევნო სხდომაზე განსახილველად“, – განაცხადა თამარ გაბუნიამ.

მათივე ინფორმაციით, მთავრობის ადმინისტრაციაში გამართულ შეხვედრას საკანონმდებლო და აღმასრულებელი ხელისუფლების წარმომადგენლები, აჭარის ავტონომიური რესპუბლიკის მთავრობის თავმჯდომარე, თორნიკე რიჟვაძე, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი, ლერი ბარნაბიშვილი და საქართველოს სტატისტიკის ეროვნული სამსახურის აღმასრულებელი დირექტორის მოადგილე, ირაკლი აფხაიძე ესწრებოდნენ.

როგორც ჩაკეტვაზე, ისე გახსნაზე გადაწყვეტილება ცალმხრივად იყო მიღებული – ჩვენი პარტნიორი ქვეყნების მიერ იმპორტისა და ექსპორტის კონტროლს დაქვემდებარებული სატრანსპორტო საშუალებები საქართველოში შესაბამის ოპერაციებს ვერ განახორციელებენ, ვერ იფუნქციონირებენ,- ამის შესახებ ფინანსთა მინისტრმა ლაშა ხუციშვილმა სსფ-ის მისიის დასრულებასთან დაკავშირებით გამართულ პრესკონფერენციაზე განაცხადა, რითაც რუსეთის მიერ საქართველოს მოქალაქეებისთვის სავიზო რეჟიმის გაუქმებასა და რუსული ავიაკომპანიებისთვის საქართველოში ფრენებზე აკრძალვის მოხსნას გამოეხმაურა.

მისი თქმით, საქართველოს მიერ საერთაშორისო დონეზე დაწესებული რეგულაციების აღსრულების თაობაზე კითხვები არაა.

„ეს არის ცალმხრივად მიღებული გადაწყვეტილება – როგორც ჩაკეტვასთან, ისე გახსნასთან მიმართებით. ამ მიმართულებით მე რაც შემიძლია ვთქვა ისაა, რომ პარტნიორი ქვეყნების მიერ იმპორტისა და ექსპორტის კონტროლს დაქვემდებარებული სატრანსპორტო საშუალებები საქართველოს ტერიტორიაზე აქტივობას ვერ განახორციელებენ. შესაბამისად, შეშფოთებას, რომელიც გამოითქვა, საფუძველი არ აქვს, გამომდინარე იქიდან, რომ კონკრეტული რეგულაციების აღსრულებაზე, რომელიც საერთაშორისო დონეზეა დაწესებული, საქართველოში კითხვები არც აქამდე ყოფილა, არც ახლაა და არ მომავალში არ იქნება“,- განაცხადა ლაშა ხუციშვილმა.

ცნობისთვის, რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა.