“აქონდროპლაზიის სამკურნალო მედიკამენტები არ გულისხმობს ავტომატურად ბიუჯეტიდან დაფინანსებას” – აზარაშვილი

12:09 - 19/04/2023

აქონდროპლაზიის სამკურნალო მედიკამენტზე FDA-ის და EMA- ს ავტორიზაცია ეხება ქვეყნებში შეტანის და გაყიდვის უფლებას და არ გულისხმობს ავტომატურად ბიუჯეტიდან მედიკამენტის დაფინანსებას – ვერანაირ ვადებზე ვერ ვისაუბრებთ, ამაზე საბჭო მსჯელობს, – ამის შესახებ ჯანდაცვის მინისტრმა ზურაბ აზარაშვილმა ჟურნალისტებთან, ადამიანის უფლებათა კომიტეტის სხდომის დასრულების შემდეგ განაცხადა.

როგორც მან აღნიშნა, ამა თუ იმ მედიკამენტთან დაკავშირებით სამინისტროში მოქმედი იშვიათი დაავადებების საბჭო მსჯელობს და ბოლო შეხვედრაზე, რომელიც მარტის ბოლოს გაიმართა, კონკრეტული გადაწყვეტილება არ მიღებულა.

„თემა იმდენად სენსიტიურია, რომ ამ ფორმატში გადაწყდა განხილვა, რადგან ბავშვებს შეეხება. კომიტეტს დეტალურად გავაცანი საბჭოს გადაწყვეტილებები, რა ეტაპზეა, რა ხდება პროტოკოლთან, „გაიდლაინების“ შემუშავების კუთხით და ა.შ. კითხვები იყო მედიკამენტის შესყიდვასთან დაკავშირებით. აქვე დეტალურად გავაცანი ინფორმაცია, რომ მსოფლიოს არც ერთ ქვეყანაში, არც ერთი სახელმწიფო ბიუჯეტიდან ეს მედიკამენტი არ ფინანსდება. არის სხვადასხვა ქვეყნების მაგალითები, მაგალითად გერმანიის, ბრიტანეთის, სადაც განხილვაც კი შეჩერებულია ამის ბიუჯეტიდან დაფინანსების თაობაზე. ის ნაწილი, რაც ეხება FDA- ის (აშშ-ისს საკვების და წამლის მარეგულირებელი სააგენტო) და EMA- ს (ევროპის წამლის სააგენტო) ავტორიზაციას, ეს არის ქვეყნებში შეტანის და გაყიდვის უფლება, ეს არ გულისხმობს ავტომატურად იმ ქვეყნების ბიუჯეტიდან მედიკამენტის დაფინანსებას.

არაერთი შეხვედრა, ათეულობით შეხვედრა გაიმართა სამინისტროში დეპარტამენტების უფროსების, ჩემი მოადგილეების დონეზე. ამ მხრივ, ვფიქრობ, ძალიან გამჭვირვალეა ჩვენი სამინისტროს მუშაობა, არ ვაკლებთ მცდელობას, რომ თუ რაიმე შესაძლებლობაა მედიკამენტის შეძენა იქნება, დაფინანსება თუ ა.შ, უკან არ დავიხიოთ.

ასევე, კითხვა იყო აღნიშნული დიაგნოზის მქონე ბავშვების სხვა საჭიროებებზე. ამასთან დაკავშირებით ჩვენ მზად ვართ, ნებისმიერი საჭიროება ფსიქოლოგთან დაკავშირებული იქნება, მასაჟთან თუ სხვა, განვიხილოთ და უზრუნველვყოთ საყოველთაო ჯანდაცვის ფარგლებში. ასევე, მშობლებს შევთავაზე იმ ბავშვებისთვის, სადაც თანმდევი დაავადებებიც არსებობს, რომელიც სიცოცხლის რისკთან არის დაკავშირებული, დიაგნოსტიკა ჩატარდეს როგორც საქართველოში, ასევე ქვეყნის გარეთ, შეგვიძლია ეს დავაორგანიზოთ.

(მედიკამენტის შემოტანასთან დაკავშირებით) ვერანაირ ვადებზე ვერ ვისაუბრებთ“, – განაცხადა აზარაშვილმა.

ადამიანის უფლებათა კომიტეტის სხდომაზე ჯანდაცვის მინისტრს დახურულ მოუსმინეს. მინისტრი კომიტეტზე „ლელოს“ მოთხოვნის საფუძველზე მივიდა.კომიტეტზე აქონდროპლაზიის დიაგნოზის მქონე ბავშვთა საკითხი განიხილეს.

სხდომას ესწრებოდნენ მშობლებიც, რომლებიც რამდენიმე თვეა მინისტრთან შეხვედრის მოთხოვნით აქციებს მართავენ.

ნიუ-იორკში პარკინგის ჩამონგრევის შედეგად ერთი ადამიანი დაიღუპა, ხუთი დაშავდა

11:48 - 19/04/2023

ნიუ იორკში, მანჰეტენზე ოთხსართულიანი ავტოსადგომის ჩამონგრევის შედეგად, სულ მცირე, ერთი ადამიანი დაიღუპა და ხუთი დაშავდა.

სასწრაფო დახმარების პერსონალს შენობიდან დაშავებულების გამოსაყვანად სპეცტექნიკის გამოყენება მოუწია.

შენობაში მყოფი ერთ-ერთი მუშა ადგილზე გარდაიცვალა, ხოლო ხუთი დაშავებული ადგილობრივ საავადმყოფოშია გადაყვანილი.

მედიის მიერ გავრცელებულ კადრებში ჩანს, რომ ბეტონის ფილებს შორის რამდენიმე მანქანაა მოყოლილი.

სამაშველო ოპერაცია ადგილზე ამ დრომდე გრძელდება, რადგან, პოლიციის ინფორმაციით, შენობის ნგრევის საშიშროება ამ დრომდე არის.

ნიუ იორკის მერიის ცნობით, ავტოსადგომის შენობა დაზიანებული იყო და ბზარები აღენიშნებოდა.

ხილითა და თხილით გლობალური ვაჭრობა შემცირდა – როგორია საქართველოს მაჩვენებლები

11:47 - 19/04/2023

2022 წელს ხილითა და თხილით გლობალური ვაჭრობა, რომელიც სტაბილურად წლიდან წლამდე იზრდებოდა, პირველად შემცირდა. შესაბამისად, EastFruit-ის ანალიტიკოსებმა მიზეზების გამოკვლევა დაიწყეს.

მსოფლიოს ხილის ყველაზე მსხვილი ექსპორტიორი 25 ქვეყნის მონაცემებით, რომელზეც მსოფლიოში ხილის ექსპორტის მოცულობის 80% მოდის, 2022 წელს 4,05 მილიარდი დოლარით შემცირდა.

საინტერესოა ისიც, რომ ლიდერი 25 ქვეყნიდან მხოლოდ 6-მა ქვეყანამ აჩვენა ექსპორტის ზრდა, ეს კი უკვე ნიშნავს იმას, რომ ამ მიმართულებით სერიოზული პრობლემებია.

თუკი შევხედავთ სტატისტიკას, ვინ გაზარდა ექსპორტი და ვინ შეამცირა, მაშინ პრობლემის კრიზისის გამომწვევ მიზეზებზე პასუხი უფრო აშკარა ხდება: ხილისა და თხილის ექსპორტი გაზარდა ისეთმა ქვეყნებმა, როგორიცაა ჩილე, პერუ, კოსტა რიკა, ეგვიპტე, მაროკო და გვატემალა, ე.ი. იმ ქვეყნებმა, რომლებმაც ისარგებლეს არასეზონური მიწოდების შესაძლებლობითა და იაფი მუშახელის არსებობით. მაგრამ ევროკავშირის ქვეყნებმა, ისევე როგორც აშშ-მა, ე.ი. ქვეყნებმა, რომლებსაც აქვთ მაღალი შემოსავალი და მაღალი შრომითი ხარჯები, მნიშვნელოვნად შეამცირეს ხილისა და თხილის ექსპორტი.

რატომ დაეცა გლობალური ვაჭრობა ხილითა და თხილით 2022 წელს?

„ხილი და თხილი, როგორც წესი, არ არის აუცილებელი საკვები. 2022 წელს მსოფლიომ განიცადა ეკონომიკური და ენერგეტიკული შოკი, რომელიც გამოწვეული იყო რუსეთის სამხედრო აგრესიით უკრაინის წინააღმდეგ. ამან გამოიწვია მწარმოებლებისთვის ენერგიის ხარჯების მკვეთრი ზრდა, ლოჯისტიკის ღირებულების მკვეთრი ზრდა და ასევე ძირითადი საკვები პროდუქტების ხარჯების ზრდა. ამიტომ ამ პირობებში ხილსა და თხილზე მოთხოვნა შესამჩნევად შესუსტდა. კიდევ ერთი მიზეზი იყო კლიმატის ცვლილებით და სხვადასხვა ამინდის ანომალიებით გამოწვეული პრობლემები, რაც იწვევს ხილის კულტურების ზარალს“, – განაცხადა ანდრიი იარმაკმა, გაეროს სურსათისა და სოფლის მეურნეობის ორგანიზაციის (FAO) საინვესტიციო დეპარტამენტის ეკონომისტმა.

გასათვალისწინებელია ისიც, რომ ვაჭრობის ვარდნა ფასდება დოლარში ღირებულებით, ხოლო 2022 წელს დოლარის ინფლაციამ ბოლო წლების რეკორდულ 8%-ს გადააჭარბა, რაც, ფაქტობრივად, მსოფლიო ექსპორტის ძალიან მკვეთრ რეალურ შემცირებაზე მიუთითებს.

როგორ შეიცვალა ხილის გლობალური ექსპორტი წამყვან ქვეყნებში?

შეერთებული შტატები თხილისა და ხილის მსოფლიოს წამყვანი ექსპორტიორი, დაახლოებით 15 მილიარდი დოლარის შემოსავლით, შემოსავლის უმეტეს ნაწილს ნუშის, ფისტას, კაკლის, ახალი ვაშლისა და სუფრის ყურძნის ექსპორტიდან იღებს. ყველა ამ თანამდებობაზე, გარდა კაკლისა, საექსპორტო შემოსავლის შესამჩნევი კლება დაფიქსირდა.

ესპანეთმა მკვეთრად შეამცირა ექსპორტი ხილის ექსპორტის ხუთივე ძირითად კატეგორიაში: ციტრუსები, კენკრა, ქვის ხილი, გოგრა და თხილი. ესპანეთის ექსპორტის შემოსავალი ასევე დაეცა ფინიკისა და სუფრის ყურძნის კატეგორიაში.

მექსიკამ, მიუხედავად იმისა, რომ შეამცირა ექსპორტი, დარჩა მესამე ადგილზე ექსპორტიორთა გლობალურ რეიტინგში. ამავდროულად, საექსპორტო ძირითადი კატეგორია, ავოკადო, დინამიკურ ზრდას განაგრძობდა. მაგრამ მექსიკიდან კენკრის ექსპორტი 2022 წელს თითქმის განახევრდა! შემცირდა თხილის ექსპორტიც, მაგრამ ციტრუსისა და ნესვის საექსპორტო გადაზიდვები კვლავ იზრდებოდა.

ნიდერლანდები – ხილის უმსხვილესი რეექსპორტიორი მსოფლიოში, მრეწველობის მდგომარეობის გარკვეული მაჩვენებელია. ნიდერლანდებში შემცირდა შემოსავალი ეგზოტიკური ხილისა და ავოკადოს, კენკრის, ციტრუსის, ვაშლის, თხილისა და ყურძნის ექსპორტიდან, მაგრამ გაიზარდა ბანანის რეექსპორტიდან მიღებული შემოსავალი.

ჩილე ერთადერთი ქვეყანაა ხუთეულში, რომელმაც გაზარდა ექსპორტი, მკვეთრად, თითქმის სამჯერ, გაზარდა შემოსავალი სუფრის ყურძნის ექსპორტიდან, რომელიც გახდა ქვეყნის შემოსავლის მთავარი წყარო, გაუსწრო ალუბალს. ჩილეს ალუბლის ექსპორტის შემოსავალიც საკმაოდ მნიშვნელოვნად გაიზარდა 2022 წელს და მიაღწია რეკორდულ 2,1 მილიარდ დოლარს. კივის ექსპორტის შემოსავალი გაორმაგდა, ხოლო ჩილეს მოცვისა და ახალი ვაშლის ექსპორტის შემოსავალი შემცირდა.

როგორ შეიცვალა ხილის ექსპორტი ჩვენი რეგიონის ქვეყნებიდან?

საქართველომ ექსპორტიდან შემოსავალი 6%-ით, 13 მილიონი დოლარით შეამცირა, ძირითადი კლება დაფიქსირდა საექსპორტო ძირითად კატეგორიაში, რომელიც საქართველოსთვის თხილია. ასევე შემცირდა საქართველოს ექსპორტის შემოსავალი მანდარინიდან, ვაშლიდან და ხურმადან. მეორე მხრივ, შესაძლებელი გახდა ექსპორტის მოცულობის გაზრდა ისეთ საექსპორტო კატეგორიებში, როგორიცაა მოცვი, ატამი, ბროწეული, ქლიავი, ჩირი, ლიმონი, ნუში და სუფრის ყურძენიც კი.

თურქეთი, ხილისა და თხილის უმსხვილესი ექსპორტიორი ჩვენს რეგიონში, ექსპორტიორთა მსოფლიო რეიტინგში მერვე ადგილზე იყო. ამასთან, 2022 წელს თურქეთიდან ექსპორტი 8%-ით ან 424 მილიონი დოლარით შემცირდა, თურქეთიდან ექსპორტი თითქმის ევროკავშირის ქვეყნებსა და უკრაინაში შემცირდა. გაიზარდა მიწოდება აშშ-სა და რუსეთში.

პოლონეთი იღებს ძირითად შემოსავალს ექსპორტიდან გაყინული ჟოლოს გარე მარაგებიდან. ამ კატეგორიაში დაფიქსირდა ზრდა რეკორდულ დონემდე 2022 წელს, ისევე როგორც გაყინული ხილის კატეგორიაში. მაგრამ პოლონეთიდან გაყინული ბაღის მარწყვის ექსპორტი დაეცა. შემცირდა პოლონური ვაშლისა და მოცვის ექსპორტიდან მიღებული შემოსავალიც.

უზბეკეთმა 2022 წელს ხილისა და თხილის ექსპორტის შემოსავალი 21%-ით გაზარდა, შემოსავლის ზრდა დაფიქსირდა საექსპორტო ოთხ ძირითად პროდუქტზე: სუფრის ყურძენი, ქიშმიში, ატამი და ხურმა. მაგრამ უზბეკეთიდან ტკბილი ალუბლის ექსპორტი თითქმის სამჯერ დაეცა ანტი-რეკორდამდე ბოლო წლებში, რაც გამოწვეული იყო ამინდის ანომალიებით.

უკრაინამ ხილისა და თხილის ექსპორტი 15%-ით შეამცირა. შემცირება დაფიქსირდა სამ ძირითად კატეგორიაში: გაყინული ჟოლო და სხვა გაყინული ხილი. ისევე როგორც კაკალი. ამასთან, გაიზარდა შემოსავალი უკრაინული ახალი ვაშლის, მოცვისა და გაყინული მარწყვის ექსპორტიდან.

მოლდოვამ, რომელიც რამდენიმე წელია ხილისა და თხილის ექსპორტიორთა რეიტინგში უკრაინის ქვემოთ იყო, 2022 წელს ექსპორტი 6%-ით, 15 მილიონი დოლარით გაზარდა, მიუხედავად უკრაინაში რუსეთის შეჭრის შედეგად წარმოქმნილი მრავალი სირთულისა.

როგორ იმოქმედებს გლობალური ხილითა და თხილით ვაჭრობის კრიზისი რეგიონის ქვეყნებზე და რამდენ ხანს გაგრძელდება ეს პროცესი?

როგორც east-fruit-ის ანალიტიკოსები ამბობენ, მოთხოვნის შემცირება ყოველთვის ყველაზე უარესია, რაც შეიძლება მოხდეს ნებისმიერ ბაზარზე, გამონაკლისი არც ხილი და თხილია. როდესაც მოთხოვნა მცირდება, ფასები როგორც წესი, იკლებს. თუ გავითვალისწინებთ, რომ წარმოების ხარჯები კვლავ რჩება რეკორდულ მაჩვენებლებთან ახლოს, ეს უარყოფითად აისახება ხილისა და ბოსტნეულის სექტორის ყველა საწარმოს ეკონომიკაზე – ფერმერებიდან დაწყებული გადამამუშავებლებით და საბითუმო და საცალო მოვაჭრეებით დამთავრებული.

ეს არის ზუსტად ის, რაც ახლა ხდება გლობალურ სურსათის ბაზარზე.

როგორც FAO-ს სურსათის ფასების ინდექსიდან ვხედავთ, სასურსათო კალათაში ფასები აგრძელებს კლებას ზედიზედ მრავალი თვის განმავლობაში და უკვე 2021 წლის დონეს უახლოვდება.

მოთხოვნის აღორძინების მიზნით, მსოფლიომ უნდა გააცოცხლოს გლობალური ეკონომიკის ზრდის მაჩვენებლები. თუმცა, ჯერჯერობით არ არსებობს მკაფიო სიგნალები გლობალური ეკონომიკური ზრდის აღდგენის შესახებ.

მეორე მხრივ, რეგიონის ქვეყნებს კვლავ აქვთ უპირატესობა შრომის ხარჯებში, რაც ძალიან მნიშვნელოვანია ხილის ბაზარზე წარმატებისთვის. ამ გლობალურმა კრიზისმა შეიძლება ახალი პერსპექტივები გაუხსნას ქვეყნებს, როგორიცაა საქართველო, უზბეკეთი, მოლდოვა, ტაჯიკეთი და უკრაინა. ყოველივე ამის შემდეგ, იმპორტიორები მსოფლიოს განვითარებული და მდიდარი ქვეყნებიდან ეძებენ შესაძლებლობებს ხილსა და თხილზე მოთხოვნის აღორძინების მიზნით, თუნდაც მხოლოდ მაღალი ხარისხის პროდუქტებზე ფასების შემცირებით. და სწორედ ეს კატეგორიის ხილის ექსპორტი შეიძლება გახდეს რეგიონის ქვეყნებისთვის ზრდის ყველაზე მნიშვნელოვანი წერტილი.

წყარო

“ქართული ოცნება“ საგამოძიებო კომისიის შექმნას ეწინააღმდეგება, რას მალავენ, სასამართლოში კლანი თუ არ არსებობს”

11:41 - 19/04/2023

„სტრატეგია აღმაშენებლის“ წევრის, პაატა მანჯგალაძის განაცხადებით, მისთვის გაუგებარია, რატომ ეწინააღმდეგება „ქართული ოცნება“ პარლამენტში დროებითი საგამოძიებო კომისიის შექმნას.

„რას მალავენ? – მესმის, რომ დროებითი საგამოძიებო კომისიის შექმნას პროცედურით ეწინააღმდეგებიან, მაგრამ თუ არაფერი ხდება, სასამართლოში კლანი არ არსებობს, უკეთესი არ იქნება, კომისია შეიქმნას და ვნახოთ, რომ არაფერი ხდება – არც კორუფცია არსებობს, არც კეთილსინდისიერების პრობლემა. სათქმელი თუ არ გვექნება, „ქართული ოცნება“ უფრო გამარჯვებული არ იქნება, ვიდრე ოპოზიციას ჩაუსაფრდეს, იქნებ, ოპოზიციის რომელიმე წარმომადგენელმა ფეხი მოიტეხოს და პარლამენტში არ მოვიდესო“, – განაცხადა პაატა მანჯგალაძემ.

პარლამენტის გუშინდელ პლენარულ სხდომაზე სასამართლოსთან დაკავშირებით დროებითი საგამოძიებო კომისიის შექმნის საკითხისთვის უნდა ეყარათ კენჭი. რეგისტრაცია გაიარა პარლამენტის 51-მა წევრმა. კვორუმის არარსებობის გამო, კენჭისყრა ვერ შედგა. სხდომაზე ირაკლი კობახიძემ აღნიშნა, რომ საპარლამენტო უმრავლესობაში მიიღეს გადაწყვეტილება, არ გაიარონ რეგისტრაცია კენჭისყრამდე. „ეს არის სოლიდარობის აქტი ქართველი მოსამართლეების მიმართ“, – განაცხადა ირაკლი კობახიძემ.

” სააკაშვილის ჯანმრთელობის მდგომარეობას იყენებენ მხოლოდ პოლიტიკური დღის წესრიგისთვის”- თალაკვაძე

11:38 - 19/04/2023

სააკაშვილის ჯანმრთელობის მდგომარეობას იყენებენ მხოლოდ პოლიტიკური დღის წესრიგისთვის, – ამის შესახებ პარლამენტის თავმჯდომარის მოადგილემ არჩილ თალაკვაძემ განაცხადა.

„თუ რამე კომისიის შექმნა შეუძლიათ, თუ რამე მხარდამჭერი გუნდის გაკეთება შეუძლიათ, დღეს ყველაზე მთავარი არის, რომ ისინი მივიდნენ მიხეილ სააკაშვილთან დაარწმუნონ და დაეხმარონ მას, რომ აღადგინოს სრულფასოვანი კვება, შეასრულოს დანიშნულება და რეკომენდაციები, რომელიც გასცეს ექიმებმა“, – განაცხადა არჩილ თალაკვაძემ.

ოპოზიციური პარტიები კიდევ ერთი საგამოძიებო კომისიის შექმნას ითხოვენ, რომელიც მიხეილ სააკაშვილს ეხება. „ნაციონალური მოძრაობის“ ინტერესია, კომისიამ დაადგინოს, ირღვეოდა თუ არა პენიტენციურ დაწესებულებაში სააკაშვილის უფლებები და კლინიკა „ვივამედში“ იმყოფება თუ არა პატიმარი სათანადო პირობებში.

უკრაინამ ბელარუსიდან ელჩი გაიწვია

11:28 - 19/04/2023

უკრაინის საგარეო საქმეთა სამინისტრომ ბელარუსში უკრაინის ელჩი იგორ კიზიმა კონსულტაციებისთვის გაიწვია.

ამის მიზეზი ბელარუსის პრეზიდენტის ალექსანდრ ლუკაშენკოს ე.წ. დონეცკის სახალხო რესპუბლიკის დე – ფაქტო ხელმძღვანელთან დენის პუშილინთან შეხვედრა გახდა.

ამის შესახებ ინფორმაციას თავად უკრაინის საგარეო უწყება ავრცელებს.

„რუსეთის საოკუპაციო ადმინისტრაციის წარმომადგენელთან შეხვედრას, რომელიც უკრაინის მართლმსაჯულებას ჩადენილი მძიმე დანაშაულების გამო ემალება და არის უკრაინისა და საერთაშორისო სანქციების ქვეშ, ბელარუსის რესპუბლიკის მხრიდან განვიხილავთ მორიგ არამეგობრულ აქტად, რომელიც მიმართულია აგრესორი სახელმწიფოს მხარდაჭერისკენ.

ამასთან დაკავშირებით უკრაინის საგარეო საქმეთა სამინისტრომ მიიღო გადაწყვეტილება უკრაინის ელჩი ბელარუსის რესპუბლიკაში კონსულტაციებისთვის გამოიწვიოს“,- ნათქვამია უწყების განცხადებაში.

ამასთან, უკრაინის საგარეო საქმეთა სამინისტრომ მოუწოდა ოფიციალურ მინსკს თავი შეიკავოს მსგავსი დესტრუქციული ნაბიჯებისგან და შეწყვიტოს უკრაინის წინააღმდეგ რუსეთის აგრესიული ომის მხარდაჭერა.

“დავბრუნდებით უფრო ძლიერები, წინ ბევრი მატჩია, ოცნება გრძელდება” – ხვიჩა კვარაცხელია

11:15 - 19/04/2023

„მილანთან“ წაგებული ჩემპიონთა ლიგის მეოთხედფინალური დაპირისპირების (0:1, 1:1) შემდეგ, ხვიჩა კვარაცხელიამ სოციალურ ქსელში პოსტი გამოაქვეყნა და გულშემატკივრებს წაგებისა და გამოუყენებელი პენალტისთვის ბოდიში მოუხადა.

„რთულია, როცა ვხედავ ცრემლებს თქვენს თვალებზე და თქვენთვის ბედნიერება ვერ მომაქვს. ყველანაირად ვეცდები დღევანდელი დღე გამოცდილებად მივიღო.

ბოდიში და მადლობა იმ მხარდაჭერისთვის, რომელსაც ყოველ წამს ვგრძნობ! მიყვარხართ და დავბრუნდებით უფრო ძლიერები. წინ ბევრი მატჩია, ოცნება გრძელდება!“, – დაწერა ხვიჩა კვარაცხელიამ.

შეგახსენებთ, რომ „ნაპოლის“ დამარცხების მიუხედავად, მატჩის საუკეთესო მოთამაშედ საერთაშოროსო საფეხბურთო ანალიტიკურმა ვებგვერდებმა Whoscored-მა და sofascore-მ მატჩის საუკეთესო მოთამაშედ მაინც ქართველი ფეხბურთელი დაასახელეს.

ორი მატჩის ჯამში „მილანმა“ მოიგო 2:1 (1:0, 1:1) და ჩემპიონთა ლიგის ნახევარფინალში თამაშის უფლება მოიპოვა.

“წერეთლის გამზირზე მოძრაობა პერიოდულად შეიზღუდება” – თბილისის მერია განცხადებას ავრცელებს

11:13 - 19/04/2023

თბილისის მერია, აკაკი წერეთლის გამზირისა და შოთა შალიკაშვილის სახელობის ხიდის რეაბილიტაციასთან დაკავშირებით განცხადებას ავრცელებს, რომელსაც, “ჯორჯიან თაიმსი” უცვლელად გთავაზობთ:

“დიდუბის რაიონში, აკაკი წერეთლის გამზირისა და შოთა შალიკაშვილის სახელობის ხიდის რეაბილიტაცია იწყება.

დაგეგმილი ინფრასტრუქტურული სამუშაოების გამო, 19 აპრილს, 23:00 საათიდან წერეთლის გამზირზე საავტომობილო გადაადგილება ნაწილობრივ შეიზღუდება.

კერძოდ, მოძრაობა სავალი ნაწილის ორივე მხარეს მონაცვლეობით შეიზღუდება აკაკი წერეთლის გამზირზე, გიორგი ცაბაძის ქუჩიდან შოთა შალიკაშვილის სახელობის ხიდის ჩათვლით.

რეაბილიტაციის პერიოდში, ავტომობილებისა და საზოგადოებრივი ტრანსპორტის გადაადგილებისთვის აკაკი წერეთლის გამზირზე მოძრაობა დარჩება ორმხრივი, თითო მიმართულებისთვის გამოყოფილი იქნება მხოლოდ ერთი სამოძრაო ზოლი.

ავტომობილების მოძრაობა პერიოდულად შეიზღუდება საგურამოს, არჩილ ქურდიანის, ბათუმის, არჩილ კერესელიძის, სულიკო კოროშინაძისა და წყალტუბოს ქუჩებიდან წერეთლის გამზირის მიმართულებით და პირიქით.

საგურამოს, არჩილ ქურდიანის და ბათუმის ქუჩებიდან ავტომობილები გადაადგილებას შეძლებენ, ვლადიმერ მაიაკოვსკის ქუჩიდან გიორგი ცაბაძის ქუჩის მიმართულებით. ასევე, დავით ყიფიანის ქუჩიდან, ვახუშტი ბაგრატიონის ქუჩის გავლით აკაკი წერეთლის გამზირის მიმართულებით.

არჩილ კერესელიძის ქუჩიდან ავტომობილები გადაადგილებას შეძლებენ რაჟდენ გვენეტაძის ქუჩით, ან, რაფაელ აგლაძისა და ალექსი გოგოლაურის ქუჩების გამოყენებით, აკაკი წერეთლის გამზირის მიმართულებით.

სულიკო კოროშინაძის ქუჩიდან ავტომობილები გადაადგილდებიან გოგოლაურის ქუჩის გავლით აკაკი წერეთლის გამზირის მიმართულებით.

წყალტუბოს ქუჩიდან ავტომობილები იმოძრავებენ აგლაძის ქუჩის გავლით, როგორც მირცხულავას, ასევე, სამტრედიის ქუჩების გამოყენებით აკაკი წერეთლის გამზირის მიმართულებით.

ამასთან, საჭიროების შემთხვევაში, პერიოდულად, ღამის საათებში, 00:00 საათიდან 07:00 საათამდე, გადაადგილება შეიზღუდება, როგორც გრიგოლ რობაქიძის გამზირიდან მარცხენა სანაპიროს მიმართულებით ჩამსვლელი ავტომობილებისთვის, ასევე, მარცხენა სანაპიროდან წერეთლის გამზირისკენ, დიდუბის ავტოსადგურის მიმდებარედ ამსვლელი ნაკადისთვის.

აღნიშნული შეზღუდვის პერიოდში, ავტომობილები გადაადგილებას შეძლებენ ალტერნატიული გზის გამოყენებით, მარცხენა სანაპიროდან სამტრედიის ქუჩისა და წერეთლის გამზირის გავლით, შოთა შალიკაშვილის სახელობის ხიდისა და გრიგოლ რობაქიძის გამზირის მიმართულებით. ხოლო, გრიგოლ რობაქიძის გამზირიდან მარცხენა სანაპიროზე ჩამსვლელი ნაკადი გადაადგილებას შეძლებს აკაკი წერეთლის გამზირისა და სამტრედიის ქუჩების გამოყენებით.
გიორგი ცაბაძის ქუჩიდან აკაკი წერეთლის გამზირისა და მარცხენა სანაპიროს მიმართულებით, ავტომობილების გადაადგილება დარჩება უცვლელი.

სარეაბილიტაციო სამუშაოების სირთულიდან გამომდინარე, მიმდებარე ქუჩებიდან აკაკი წერეთლის გამზირის მიმართულებით მოძრაობა პერიოდულად შეიზღუდება, რის შესახებაც საზოგადოებას ინფორმაცია ეტაპობრივად მიეწოდება”, – ნათქვამია განცხადებაში.

სუდანში შეიარაღებული დაპირისპირების შედეგად 270 ადამიანი დაიღუპა

11:06 - 19/04/2023

სუდანში ქვეყნის არმიასა და სწრაფი რეაგირების ძალებს შორის შეტაკებებს, რომელიც 15 აპრილს დაიწყო, 270 ადამიანი ემსხვერპლა. დაჭრილია 2,6 ათასი ადამიანი. ამის შესახებ Deutche Welle იუწყება.

დაღუპულთა შორის ჯანმრთელობის მსოფლიო ორგანიზაციის 3 თანამშრომელია. ჯანმოს ხელმძღვანელმა თედროს გებრეისუსმა ამ ფაქტთან დაკავშირებით ღრმა სინანული გამოთქვა.

სუდანში 15 აპრილს სწრაფი რეაგირების ძალებმა სამხედრო გადატრიალება სცადეს, მაგრამ მათ ქვეყნის შეიარაღებულმა ძალებმა მხარი არ დაუჭირეს. მას შემდეგ ქვეყანაში სამხედრო დაპირისპირება მიმდინარეობს.

საგამოძიებო სამსახურმა ყალბი უცხოური ვალუტის გასაღების ფაქტზე ორი პირი დააკავა

11:06 - 19/04/2023

საქართველოს ფინანსთა სამინისტროს საგამოძიებო სამსახურის თანამშრომლებმა, ქვემო ქართლის საოლქო პროკურატურის თანამშრომლებთან კოორდინაციით გატარებული ღონისძიებების შედეგად, წინასწარი შეთანხმებით ჯგუფის მიერ ყალბი ფულის გასაღების ფაქტზე ორი პირი დააკავეს.

ინფორმაციას საქართველოს ფინანსთა სამინისტროს საგამოძიებო სამსახური ავრცელებს.

„გამოძიებით დადგინდა, რომ 2023 წლის მარტი-აპრილის პერიოდში სხვადასხვა პირზე საქონლის შეძენისას გასაღებულ იქნა, ჯამში, 2 200 აშშ დოლარის ოდენობის ყალბი 100-დოლარიანი კუპიურა. გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად მოხდა დანაშაულის ჩამდენ პირთა იდენტიფიცირება და დაკავება. გამოძიების პროცესში ერთ-ერთი ბრალდებულისაგან დამატებით ამოღებულ იქნა 1 800 ევროს ოდენობის ცხრა ცალი ყალბი კუპიურა და ერთი ცალი ყალბი 50-დოლარიანი კუპიურა. გამოძიება მიმდინარეობს საქართველოს სისხლის სამართლის კოდექსის 212-ე მუხლის მე-2 ნაწილით, რაც სასჯელის სახით 7-დან 10 წლამდე ვადით თავისუფლების აღკვეთას ითვალისწინებს. აღნიშნულ დანაშაულში თანამონაწილე პირების დადგენა-მხილების მიზნით შესაბამისი ღონისძიებები ტარდება“, – ნათქვამია ინფორმაციაში.

“უკრაინელებმა ოდესაში 12 „კამიკაძე“ დრონიდან 10 ჩამოაგდეს” – ომის 420-ე დღე

10:46 - 19/04/2023

ომის 420-ე დღეს, რუსულმა ძალებმა წუხელ ოდესის ოლქზე Shahed-ის დრონებით თავდასხმა განახორციელეს, – ინფორმაციას უკრაინული მედია ავრცელებს.

მათივე ინფორმაციით, უკრაინის თავდაცვის ძალებმა 12 „კამიკაძე“ დრონიდან 10 გაანადგურეს.

„საჰაერო სარდლობის ოდესის საზენიტო-სარაკეტო ბრიგადის ჯარისკაცებმა 12 Shahed-136/131 „კამიკაძე“ დრონიდან 10 გაანადგურეს“, – აცხადებენ უკრაინის შეიარაღებული ძალების საჰაერო ძალებში.

ოდესის საოლქო ადმინისტრაციის ცნობით, რუსულმა ძალებმა ინფრასტრუქტურის ობიექტს დაარტყეს. თავდასხმის შედეგად არავინ დაღუპულა ან დაშავებულა.

უკრაინის შეიარაღებული ძალების გენერალური შტაბის ინფორმაციით, ომის დაწყებიდან დღემდე უკრაინელებმა 183 750 რუსი ჯარისკაცის ლიკვიდაცია განახორციელეს, მათ შორის, 620 ჯარისკაცი ბოლო 24 საათის განმავლობაში მოკლეს.

ამასთან, უკრაინაში შეჭრის დღიდან რუსების საერთო დანაკარგები მოიცავს: 3 665 ტანკს, 7 110 ჯავშანტექნიკას, 2819 ერთეულ საარტილერიო სისტემას, 308 საბრძოლო თვითმფრინავს და 293 ვერტმფრენს, 5 692 ავტომობილსა და საწვავის ავზს, 18 გემს/ნავს, 2376 უპილოტო საფრენ აპარატს, 911 ფრთოსან რაკეტას და 538 ზალპური ცეცხლის რეაქტიულ სისტემას.

გერმანიამ კი, უკრაინას საჰაერო თავდაცვის სისტემა Patriot-ი გადასცა, – ინფორმაციას გერმანიის მთავრობა ავრცელებს.

მთავრობაში აცხადებენ, რომ უკრაინის შეიარაღებულმა ძალებმა მიიღო მესაზღვრეებისთვის ორი მანქანა, Zetros-ის მარკის 16 სატვირთო ავტომობილი და Patriot-ის საჰაერო თავდაცვის სისტემა რაკეტებთან ერთად.

ამასთან, ინფორმაციაში დაზუსტებული არ არის უკრინისთვის გადაცემული Patriot-ის საჰაერო თავდაცვის სისტემის რაკეტების რაოდენობა.

ცნობისათვის, 2022 წლის ბოლოს ვაშინგტონმა უკრაინისთვის Patriot-ის საჰაერო თავდაცვის სისტემების გადაცემის გადაწყვეტილება მიიღო. თეთრი სახლის ამ ინიციატივას 2023 წლის 5 იანვარს ბერლინიც შეუერთდა.

“მარიინკაში ვითარება უცვლელია, ავდეევკაშიც ჩვენები წარმატებით იგერიებენ ურდოს შემოტევებს”

10:43 - 19/04/2023

ალექსი პეტრიაშვილი სოციალურ ქსელში უკრაინაში მიმდინარე მოვლენებს ეხმაურება:

“14 ერთეული ბრიტანული სუპერ ტანკი ჩელენჯერ 2 უკვე უკრაინაშია;

ფრანგული მსუბუქი ტანკები (უფრო ზუსტად თვითმავალი არტილერიული სისტემა) უკვე უკრაინელი საზღვაო ქვეითების განკარგულებაშია;
გერმანიის მიერ დაპირებული ამერიკული ჰაერსაწინააღმდეგო სისტემა პატრიოტი ადგილზეა, ანუ ისიც უკრაინაშია;
ამასობაში ურდოსიამ ფართომასშტაბიანი ომი დაიწყო “ტ-90-ებით და ტ-80-ებით”, ახლა კი ჩამოგორდა “ტ-55-ებზე” და მეორე მსოფლიო ომის შემდგომი პერიოდის არტილერიაზე;

“ომი ძალიან, ძალიან მალე დასრულდება”; “ყირიმის გათავისუფლება გეგმის მიხედვით მოხდება” – ასეთი ოპტიმისტური განცხადებები ეკუთვნის არც მეტი, არც ნაკლები უკრაინის შეიარაღებული ძალების მთავარი სადაზვერვო სამმართველოს ხელმძღვანელს, გენერალ კირილო ბუდანოვს;

ამავე დროს, ურდოსიაში და დროებით ოკუპირებულ ტერიტორიებზე პანიკა სულ უფრო მატულობს როგორც პროპაგანდისტულ არხებზე, ისე ადგილზე. ხერსონის ოლქის ოკუპირებულ ნაწილში მოსახლეობას ნავებს ართმევენ, ხოლო ზაპოროჟიეში მოსახლეობას მოუწოდებენ დატოვონ საცხოვრებელი და გადავიდნენ რუსეთში, იმიტომ რომ სულ მალე დაიწყება უკრაინელების შეტევა;

პრეზიდენტი ზელენსკი ფრონტის ხაზზე ჩავიდა. ავდეევკა ერთ-ერთი ყველაზე ცხელი წერტილია და სწორედ იქ ჩავიდა უკრაინის პრეზიდენტი; მან დააჯილდოვა უკრაინელი მებრძოლები, გაამხნევა და მადლობა გადაუხადა მათი გმირული ბრძოლისთვის;

შეუიარაღებელი თვალითაც კი ადვილია განსხვავების პოვნა, რამდენად ბუნებრივია ზელენსკი თავის სამხედროებთან ურთიერთობაში საბრძოლო მოქმედებების 5კმ-იან რადიუსში და რამდენად ყალბი და ხელოვნურია პუტლერი თუ მისი ორეული ვითომ ხერსონის და ლუჰანსკის ოლქებში ყოფნის დროს; თანაც პუტლერის პიარის მანქანაც ირღვევა უკვე ფაჩიკოს გარმონივით – პუტლერი ამბობს, მალე აღდგომააო, პიარი ამტკიცებს აღდგომის მერე 2 დღეში ჩავიდაო. თანაც, რომც დავუშვათ, რომ უშუალოდ რეალური პუტლერი იმყოფებოდა ადგილზე, ღია სადაზვერვო წყაროების ანალიზზე დაყრდნობით, ის იმყოფებოდა ხერსონის ოლქში საბრძოლო მოქმედებების არეალიდან 130-150 კილომეტრში (სადაც მას ჩვენი რაკეტები ვერ მიწვდებოდა); ეს მართლა ბუნკერის ვირთხა ესა.

ფრონტის ხაზზე ყველაზე მძიმე ვითარება მაინც ბახმუტშია. მის დასავლეთ ნაწილში მიდის გაცხარებული ბრძოლები. ჩვენები ანადგურებენ როგორც ურდოს რეგულარულ ნაწილებს, ისე ვაგნერელ ორკ-ესტრანტებს. ძალიან სერიოზულად ფიტავენ ურდოს რესურსს; სავსეა სანგრები ურდოს ტვირთი 200-ებით; თანაც ჩვენების დრონებიც ჩინებულად მუშაობს – უშვებენ და უშვებენ კობოზნის კონცერტზე “იღბლიანებს”; სახმელეთო ჯარების სარდალი, გენერალი სირსკი კვლავ აცხადებს, რომ ადგილზე ვითარება კრიტიკულია, მაგრამ კონტროლს ექვემდებარება; უნდა გავითვალისწინოთ ის გარემოებაც, რომ ჩვენები პირველ რიგში ცოცხალ ძალას ზოგავენ და ყველაფერს აკეთებენ, რომ მინიმუმამდე იყოს დაყვანილი ჩვენების მსხვერპლი და მაქსიმალური ზიანი მიაყენონ მტერს;

მარიინკაში ვითარება უცვლელია; ავდეევკაშიც ჩვენები წარმატებით იგერიებენ ურდოს შემოტევებს; კრემინა-სვატოვო-ლიმანი-კუპიანსკის მიმართულებაზე პოზიციურ ბრძოლები გრძელდებოდა მთელი დღის განმავლობაში;

დიდი შვიდეულის საგარეო მინისტრები შეიკრიბნენ იაპონიაში; შემაჯამებელ კომუნიკეში მათ კვლავ მოუწოდეს რუსეთს, დაუყოვნებლივ გაიყვანოს საკუთარი შეიარაღებული ძალები მთელი უკრაინის ტერიტორიიდან;

ბლუმბერგის ინფორმაციით, მაკრონი ამზადებს სამშვიდობო გეგმას და იმედი აქვს, რომ ჩინეთის დახმარებით ზაფხულში მოლაპარაკების მაგიდასთან დასვამს უკრაინას და რუსეთს; სავარაუდოდ, მაკრონიც კი უკრაინის ფართომასშტაბიან შეტევას დაელოდება;

ბრაზილიის პრეზიდენტს ოფიციალურმა კიევმა ხომ უპასუხა, არ ვიცით რაზე საუბრობს ბატონი ლულა, ჩვენ ჩვენი მშვიდობის ფორმულა გვაქვსო; მერე საერთაშორისო კრიტიკის ქარცეცხლში მოყვა ლულა ბატონი და იძულებული შეიქნა, დაეკორექტირებინა თავისი გზავნილები. მან დაგმო უკრაინის ტერიტორიული მთლიანობის წინააღმდეგ განხორციელებული ქმედებები;

მოკლედ, ვინც რა “სიბრძნე არ უნდა აფრქვიოს”, ყველაფერი მაინც ბრძოლის ველზე გადაწყდება! ამასთან დაკავშირებით თეთრ სახლში განაცხადეს, რომ უახლოესი კვირები და თვეები გადამწყვეტი იქნება და აშშ ყველაფერს გააკეთებს უკრაინის დასახმარებლად!

უკრაინა გაიმარჯვებს 2023-ში! საქართველომ უნდა გაიხაროს 2023-ში! პუტლერის ბოროტების იმპერია გრუხუნით ჩამოინგრევა 2023-ში!
დიდება უკრაინას!
დიდება გმირებს!
დიდება ერს!
სიკვდილი მტერს!”- წერს ალექსი პეტრიაშვილი.

1...2,2342,2352,236...2,304 Page 2,235 of 2,304