მსოფლიოს ჩემპიონატზე საქართველოს საკალათბურთო ნაკრებმა ვენესუელა 70:59 დაამარცხა და მომდევნო ეტაპზე გავიდა.

მწვრთნელმა, ილია ზუროსმა სასტარტო ხუთეული არ შეცვალა და მატჩი შემდეგი შემადგენლობით დაიწყო – რატი ანდრონიკაშვილი, ტად მაკდაფენი, დუდა სანაძე, თორნიკე შენგელია და გიორგი შერმადინი.

მატჩის საუკეთესო კალათბურთელი გუნდის კაპიტანი თორნიკე შენგელია გახდა, რომელმაც 25 ქულა მოიპოვა, მის ანგარიშზეა 3 მოხსნა და 3 შედეგიანი გადაცემა.

მომდევნო ეტაპზე საქართველოსა და სლოვენიის ნაკრებ გუნდებს ავსტრალია და გერმანია შეუერთდებიან. საქართველო ავსტრალიასა და გერმანიას შეხვდება, ოთხეულის ორი საუკეთესო გუნდი 1/4-ფინალში გავა.

დღეს, უგზო-უკვლოდ დაკარგულთა საერთაშორისო დღეა. ამ თარიღთან დაკავშირებით, ვეტერანების საქმეთა სახელმწიფო სამსახურის დირექტორის მოადგილემ, მირონ ჩიგოგიძემ თბილისში, თამარაშვილის ქუჩაზე მდებარე უგზო-უკვლოდ დაკარგულთა მემორიალი ყვავილებით შეამკო და დაკარგულთა ოჯახის წევრებს კიდევ ერთხელ თანაუგრძნო იმ მწუხარების გამო, რაც ოჯახის წევრისა და ახლობლის უგზო-უკვლოდ დაკარგვას ახლავს.

მემორიალთან ამ დღისადმი მიძღვნილ ღონისძიება გაიმართა, რომელიც სახელმწიფო მინისტრის აპარატის, წითელი ჯვრის საერთაშორისო კომიტეტის, ფონდ “მოლოდინისა” და ოჯახური კომიტეტების წევრთა ორგანიზებით და მონაწილეობით ჩატარდა.

ღონისძიებას, ასევე, დაესწრნენ – ვეტერანების საქმეთა სახელმწიფო სამსახურის, ადმინისტრაციული დეპარტამენტის უფროსი, ნათია ჯანაშვილი, რეგიონული მართვის დეპარტამენტის უფროსი, ლევან ამირიძე და სამსახურის თანამშრომლები.

უგზო-უკვლოდ დაკარგულთა დღე 1981 წელს, კოსტა რიკაში, ლათინურ ამერიკაში დაარსდა. საქართველოში კი, ამ დღეს, ოფიციალურად, 2003 წლიდან აღნიშნავენ.

საქართველოში, 1990-იანი წლების შეიარაღებული მოქმედებებისა და 2008 წლის აგვისტოს რუსეთ-საქართველოს ომის შედეგად, 2049 სამხედრო და სამოქალაქო პირი უგზო-უკვლოდ დაკარგულად მიიჩნევა; მათი ოჯახები, ახლობელი ადამიანის უცნობი ბედ-იღბლის გამო, გაურკვეველ ვითარებაში, მრავალი წლის მანძილზე იმყოფებიან. 2010 წელს, წითელი ჯვრის საერთაშორისო კომიტეტის ჩართულობით, ორი საკოორდინაციო მექანიზმის შექმნის შემდეგ, რომელთაგან ერთი_ 1992-1993 წლების აფხაზეთის შეიარაღებულ კონფლიქტთან, ხოლო მეორე – 90-იანი წლებისა და 2008 წლის ცხინვალის რეგიონში წარმოებულ საომარ მოქმედებებთან დაკავშირებით ფუნქციონირებს, სულ მოძიებულია 601 ნეშტი, რომელთაგან 243 ოჯახებს გადაეცათ.

უგზო-უკვლოდ დაკარგულთა იდენტიფიცირებისა და ოჯახებისთვის გადაცემისთვის, ჰუმანიტარული საკოორდინაციო მექანიზმი, მუშაობას, უწყვეტ რეჟიმში აგრძელებს.

ევროკომისია შარლ მიშელს არ ეთანხმება და 2030 წლის გაფართოების შესახებ განცხადებას უწუნებს. გაფართოებამდე ჩვენ უნდა ვიმუშაოთ კანდიდატ ქვეყნებთანო, ოღონდ რომელ ქვეყნებთან არ დაუზუსტებიათ, – წერს „ხალხის ძალის“ წევრი ზურაბ ქადაგიძე ევროკომისიის პრესსპიკერის მოადგილის განცხადების შესახებ.

როგორც ქადაგიძე აღნიშნავს, ასეთი შეუთანხმებელი და აბსურდული დამოკიდებულებები აჩენს ყველაზე დიდ ანტი-ევროპულ განწყობებს საქართველოში, რომელიც ელოდება სამართლიან გადაწყვეტილებას სტატუსთან დაკავშირებით.

„ევროკომისია შარლ მიშელს არ ეთანხმება და 2030 წლის გაფართოების შესახებ განცხადებას უწუნებს. გაფართოებამდე ჩვენ უნდა ვიმუშაოთ კანდიდატ ქვეყნებთანო, ოღონდ რომელ ქვეყნებთან არ დაუზუსტებიათ. რომელი უფრო რეალური დაპირებაა, 2030 წელს, რომ გაფართოვდება ევროკავშირი თუ კანდიდატ ქვეყნებს მოუწევთ კიდევ გაურკვეველი ვადით მუშაობა და ლოდინი? რეალობა ერთია – ევროპაში არჩევნებია მოახლოებული და უკვე იმდენად არასტაბილური პოლიტიკური პროცესები იხატება, თუნდაც გლობალური პოლიტ-კონიუნქტურის მიმართ დამოკიდებულება, კორუფციისა და ლობიზმის სკანდალები, რუსეთ-უკრაინის ომის ხარჯზე ევროპის ეკონომიკის სტაგნაცია და ბუნდოვანი პერსპექტივები, რომ სულაც არ არის გასაკვირი-ევროკომისიისა და ევროსაბჭოს ეს უაზრო, ჩამოუყალიბებელი დამოკიდებულება და შეუთანხმებელი პოზიციები. სამწუხაროდ, ასეთი შეუთანხმებელი და აბსურდული დამოკიდებულებები აჩენს ყველაზე დიდ ანტი-ევროპულ განწყობებს საქართველოში, რომელიც ელოდება სამართლიან გადაწყვეტილებას სტატუსთან დაკავშირებით, თუმცა ამ ყბადაღებული სტატუსის შემდეგ რამდენი წელი მოგვიწევს ლოდინი ეგეც ღმერთმა უწყის.“ – წერს ქადაგიძე

სიფრთხილე მართებს საზოგადოებას, თუ როგორ დაგეგმოს შვილებისთვის განათლების მიწოდება, იმავდროულად, სიფრთხილეა საჭირო, თუ რას შეიძლება გულისხმობდეს რუსეთიდან ასეთი ინიციატივები – მე ნამდვილად არ ვარ დაინტერესებული ჩემი შვილებისთვის საგანმანათლებლო სერვისების რუსეთში ძიებით, – ასე ეხმიანება ადამიანის უფლებათა კომიტეტის თავმჯდომარე რუსეთის ფედერაციის ინიციატივას, რომლის თანახმად, საქართველოს მოქალაქეებს რუსეთში უფასოდ სწავლას სთავაზობენ.

სარჯველაძის განცხადებით, გაუჭირდება თქვას, კონკრეტულად რას ემსახურება მსგავსი ინიციატივა.

„რუსეთი რას ცდილობს იმასთან შედარებით, რაც უკვე გააკეთა, ზღვაში წვეთია. რუსეთს უკვე ოკუპირებული აქვს საქართველოს ტერიტორიები და ამაზე უფრო მეტად მძიმე, არ მიმაჩნია რაიმე არსებობდეს. რისთვის აკეთებენ, ამის თქმა გამიჭირდება, თუმცა, რასაკვირველია, ყველას მართებს სიფრთხილით ყოფნა. მე პირადად ნამდვილად არ ვარ დაინტერესებული, ჩემი შვილებისთვის საგანმანათლებლო სერვისების რუსეთში ძიებით, სხვა მიმართულებებია არაერთი, რომელზეც უფრო მეტი ინტერესი მექნებოდა, პირველ რიგში, ეს იქნება ქართული საგანმანათლებლო უნივერსიტეტები და სხვა საზღვარგარეთ, მაგრამ არა რუსეთში. სიფრთხილე მართებს საზოგადოებას, თუ როგორ დაგეგმოს შვილებისთვის განათლების მიწოდება, იმავდროულად, სიფრთხილეა საჭირო, თუ რას შეიძლება გულისხმობდეს რუსეთიდან ასეთი ინიციატივები,“ – განაცხადა სარჯველაძემ.

გავრცელებული ინფორმაციით, რუსეთი საქართველოს მოქალაქეებს რუსეთის უმაღლეს სასწავლებლებში უფასოდ სწავლას სთავაზობს.

ფრაქცია „ლელოს“ წევრის, ვატო სურგულაძის განცხადებით, „ქართული ოცნების“ ხელისუფლება ვერ უზრუნველყოფს იმას, რომ მოქალაქეებმა ქვეყანაში თავი უსაფრთხოდ იგრძნონ და ამის მაგალითი დედაქალაქში გუშინ მოსული უხვი ნალექია.

როგორც მან დღეს გამართულ პრესკონფერენციაზე აღნიშნა, მოშლილია ინფრასტრუქტურა, არ არსებობს სანიაღვრე სისტემები და არ არის შესწავლილი შესაძლო რისკები.

„როცა უსაფრთხოებაზე ვსაუბრობთ, ნებისმიერი ხელისუფლების პირველი ამოცანა, იქნება ეს ადგილობრივი თუ ფედერალური, ეს არის ადამიანების უსაფრთხოება. სახელმწიფო ყოველთვის უნდა ცდილობდეს, რომ ადამიანებმა თავი უსაფრთხოდ იგრძნონ. გუშინ ჩვენ ისევ გადავრჩით და მადლობა უფალს, რომ მსხვერპლი არ იყო. რომ მოსულიყო იგივე ნალექი, რაც 8 წლის წინ, 2015 წელს მოვიდა, მერწმუნეთ, გაცილებით უფრო რთული სიტუაცია გვექნებოდა. პრობლემები იყო ვაკეში, განსაკუთრებით გლდანში, სადაც ვითომ ახლად არის გაკეთებული კანალიზაციის სისტემა. ყველაზე საინტერესო ის არის, რომ ადგილზე, რომელიც 3 თვის წინ გაიხსნა – მაჭავარიანი-მარშალ გელოვანის შემაერთებელი გზა, 3 თვეში ჯერ ქვათაცვენა იყო და გუშინ წყალიც ვერ შეაკავა. ქალაქის განვითარება არის რეალური, როცა ადამიანები უკეთესად იწყებენ ცხოვრებას და არა ის „ბეტონის ჯუნგლები“, რომელში ჩასმასაც ჩვენს ქალაქს უპირებენ. უბედურებაა, რომელსაც აპირებენ „ლაგუნა ვერეზე“ გააკეთონ. თბილისში სეისმოლოგიური პრობლემები არსებობს, ღვარცოფების პრობლემა არსებობს.

გუშინ მეტროშიც კი წყალი ჩავიდა, რაც სერიოზულ პრობლემებზე მიუთითებს. რატომ გაიჭედა სანიაღვრეების მიმღები კოლექტორები, ჩვენ გვეკითხება ბატონი მერი? რატომ არ არის გაწმენდილი?იმიტომ, რომ დასუფთავების სამსახურში რამდენი ადამიანიც მუშაობს, ყველას ერთი უფროსი ჰყავს. ეს არის პრობლემა, როცა ვერ ვაკეთებთ იმის ანალიზს, ნებისმიერი შენობის აშენება, მითუმეტეს გრანდიოზულის, რა რისკებს გამოიწვევს. ახმეტელის მეტროში წყალი შევიდა. მეტრო სტრატეგიული ობიექტია“, – განაცხადა სურგულაძემ.

ტაბახმელაში, თრიალეთის ქუჩა N2-ის მიმდებარედ სპორტული კომპლექსის მშენებლობა იწყება, – ამის შესახებ თბილისის მერმა დედაქალაქის მთავრობის სხდომაზე განაცხადა.

მისი თქმით, საერთაშორისო სტანდარტების სპორტულ კომპლექსს მთაწმინდის რაიონის გამგეობა 7 800 კვადრატულ მეტრ ფართობზე მოაწყობს.

„არაერთხელ გვითქვამს, რომ რეკრეაციული სივრცეები, სპორტული მოედნები ძალიან მნიშვნელოვანია ჯანსაღი ცხოვრების წესის პოპულარიზაციისთვის. ამ მხრივ, თბილისში ბევრი კარგი პროექტი განხორციელდა. მინდა, ერთ კარგ პროექტთან დაკავშირებით მოგაწოდოთ ინფორმაცია – სპორტული კომპლექსი, რომლის სამუშაოებსაც მთაწმინდის გამგეობა ახორციელებს, 7 800 კვადრატულ მეტრ ფართობზე მოეწყობა. პროექტი მოიცავს საერთაშორისო სტანდარტების შესაბამის საფეხბურთო და საკალათბურთო მოედნებს, 230 მაყურებელზე გათვლილ ტრიბუნას, ტექნიკურ შენობას გასახდელებითა და სხვა საჭირო სივრცეებით, ასევე საპარკინგე სივრცეს“, – განაცხადა კახა კალაძემ. თბილისის მერის თქმით, აღნიშნული სამუშაოები მომდევნო კვირების განმავლობაში დაიწყება.

მეტროსადგურ „ისნის“ მიმდებარე ტერიტორიაზე არსებული გადატვირთული სატრანსპორტო კვანძი რეაბილიტირდა, – ამის შესახებ თბილისის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.

მისი თქმით, განხორციელებული სამუშაოები მნიშვნელოვნად გაზრდის გზის გამტარობას.

„დედაქალაქში საგზაო მოძრაობის გაუმჯობესებისა და განტვირთვის მიზნით, სხვადასხვა უბანში იდენტიფიცირებული გადატვირთული სატრანსპორტო კვანძების მოწესრიგება გრძელდება. აღნიშნულ მონაკვეთზე მოეწყო საგზაო კუნძულები, კეთილმოეწყო ტროტუარი და ბორდიური, გამოიცვალა ასფალტის საფარი, დაიხაზა გზა და დამონტაჟდა შუქნიშნები, ასევე, ავტობუსის გაჩერებებზე დაიგო რკინაბეტონის საფარი. ამჟამად, აღნიშნულ კვანძზე გამავალი საზოგადოებრივი ტრანსპორტის 35-მდე მარშრუტი, დღიურად, 130 000-მდე მგზავრს ემსახურება“, – განაცხადა კახა კალაძემ.