ისრაელში მიმდინარე მოვლენებს საქართველოს საგარეო საქმეთა სამინისტრო სოციალურ ქსელ X-ზე ეხმაურება.

ამის შესახებ ინფორმაციას საგარეო საქმეთა სამინისტროს პრესსამსახური ავრცელებს.

„ჩვენ ვგმობთ საშინელ ტერორისტულ თავდასხმას ისრაელის სახელმწიფოზე, რომელსაც მსხვერპლი მოჰყვა და გამოვხატავთ სოლიდარობას ისრაელის მთავრობისა და ხალხის მიმართ. თანავუგრძნობთ ამ საზარელი თავდასხმის მსხვერპლთა ოჯახებსა და ახლობლებს. ყველა დაშავებულს ვუსურვებთ სწრაფ გამოჯანმრთელებას”, – აღნიშნულია სამინისტროს გვერდზე გამოქვეყნებულ მიმართვაში.

ვგმობ ისრაელის სახელმწიფოზე და ისრაელის მოქალაქეებზე განხორციელებულ ტერორისტულ თავდასხმას – ამის შესახებ საქართველოს პრემიერ-მინისტრი ირაკლი ღარიბაშვილი სოციალურ ქსელ „ტვიტერში” წერს.

მთავრობის მეთაური თანაგრძნობას უცხადებს ისრაელის სახელმწიფოს მთავრობასა და ხალხს, დაშავებულებს კი სწრაფ გამოჯანმრთელებას უსურვებს.

„ვგმობ ისრაელის სახელმწიფოზე და ისრაელის მოქალაქეებზე განხორციელებულ ტერორისტულ თავდასხმას, სიცოცხლის ხელყოფასა და უამრავი ადამიანისთვის სერიოზული დაზიანებების მიყენებას. გულითადად თანავუგრძნობ ისრაელის სახელმწიფოს მთავრობასა და ხალხს, ხოლო ყველა დაშავებულს სწრაფ გამოჯანმრთელებას ვუსურვებ”, – აღნიშნულია ირაკლი ღარიბაშვილის სოციალურ ქსელ „ტვიტერის“ განცხადებაში.

ღრმად ვარ შეშფოთებული ისრაელში ვითარების უკანასკნელი ესკალაციითა და უდანაშაულო ადამიანების სიცოცხლის დანაკარგით, – ამის შესახებ განცხადება საქართველოს პრეზიდენტმა სალომე ზურაბიშვილმა სოციალურ ქსელ „ტვიტერში“ გაავრცელა, რითაც ისრაელში განვითარებულ მოვლენებს გამოეხმაურა.

სალომე ზურაბიშვილის თქმით, ტერორსა და არაადამიანობას თანამედროვე სამყაროში ადგილი არ უნდა ჰქონდეს.

„ღრმად ვარ შეშფოთებული ისრაელში ვითარების უკანასკნელი ესკალაციითა და უდანაშაულო ადამიანების სიცოცხლის დანაკარგით. საქართველო სრულად სოლიდარულია ისრაელის მიმართ ამ რთულ მომენტში. ტერორსა და არაადამიანობას არ უნდა ჰქონდეს ადგილი თანამედროვე სამყაროში“,- განაცხადა სალომე ზურაბიშვილმა.

ვიღაცამ, თუ იხუმრა არ ვიცი, ჩვენ ვაჭრობაში არასდროს ვმონაწილეობთ და ჩვენთან დაკავშირებით ეს თემა უნდა დაიხუროს, ერთხელ და სამუდამოდ. ათასჯერ ვთქვით, არ ვაპირებთ შესვლას [პარლამენტის სხდომათა დარბაზში,თუ სალომე ზურაბიშვილის იმპიჩმენტის საკითხი დადგება დღის წესრიგში] იმიტომ, რომ სხვის მიჭერილი პულტის გამო მე არ მომიწიოს თავის მართლება, – ამის შესახებ „სტრატეგია აღმაშენებლის“ წევრმა პაატა მანჯგალაძემ ჟურნალისტებს განუცხადა, როდესაც უპასუხა შეკითხვას შესაძლოა თუ არა სალომე ზურაბიშვილის იმპიჩმენტზე ოპოზიციასა და უმრავლესობას შორის ე.წ. ვაჭრობა შედგეს.

ამასთან, მისი თქმით, დიდი შანსი არსებობს იმისა, რომ სალომე ზურაბიშვილის საიმპიჩმენტო საქმემ საკონსტიტუციო სასამართლოს შემდეგ პარლამენტში გადაინაცვლოს.

დეპუტატის თქმით, არსებობს მოსაზრება იმის, რომ პლენუმის 9 წევრიდან 6 წევრი სალომე ზურაბიშვილის მხრიდან კონსტიტუციის დარღვევის საქმეს „ხელს აუწევს“.

„ეს თემა არის სამარცხვინო. როცა პოლიტიკურ გადაწყვეტილებებზეა საუბარი, აქ ფინანსური ვაჭრობა ჩვეულებრივ პოლიტიკური კორუფციაა. ვიღაცამ თუ იხუმრა არ ვიცი, ჩვენ ვაჭრობაში არასდროს ვმონაწილეობთ და ჩვენთან დაკავშირებით ეს თემა უნდა დაიხუროს, ერთხელ და სამუდამოდ. ათასჯერ ვთქვით, არ ვაპირებთ შესვლას [პარლამენტის სხდომათა დარბაზში,თუ სალომე ზურაბიშვილის იმპიჩმენტის საკითხი დადგება დღის წესრიგში] იმიტომ, რომ სხვის მიჭერილი პულტის გამო მე არ მომიწიოს თავის მართლება. რაც შეეხება გიორგი გახარიას გუნდს თავისი პოლიტიკური იდენტობის გამოკვეთისთვის სჭირდება ასეთ თემებზე საუბარი, ის არის პოლიტიკური ღამურას მდგომარეობაში, „ქოცები“ არ ენდობიან, არსებული ოპოზიცია არ ენდობა და რა უნდა გააკეთოს? ერთიც და მეორეც უნდა გალანძღოს, მესამე ნიშანი რომ გამოკვეთოს. ეს სჭირდება პოლიტიკისთვის, მესმის“, – განაცხადა პაატა მანჯგალაძემ.

მისი თქმით, სხდომათა დარბაზში „ვიღაც თუ შევა, საკუთარ თავზე აგოს პასუხი, თითი არ დაეჭიროს შემთხვევით [ღილაკზე].

„ეჭვი არავისზე მაქვს, რადგანაც ოპოზიციაში ეჭვზე, დაძაბულობაზე და სისუსტეზე ლაპარაკი „ქართულ ოცნებას“ ეხმარება“, – განაცხადა მანჯგალაძემ.

მან ასევე ისაუბრა „შეკრებისა და მანიფესტაციების შესახებ“ კანონზე, რომლის მიღებასაც პარლამენტი აპირებს, პაატა მანჯგალაძის თქმით, ეს კანონი, ბუნებრივია, ზღუდავს გამოხატვის თავისუფლებას, არ ეხმარება დემოკრატიას და პირიქით, აძლიერებს ავტოკრატიას.

„აქციაზე კარვის დანიშნულება არის ის, რომ მუდმივი პროტესტის პირობებში ადამიანი ზამთარში ქუჩაში არ გაიყინოს, სხვა ამოცანა და დანიშნულება კარავს არ აქვს. „ქართულ ოცნებას“ უნდა, რომ სხვა შინაარსი მისცეს, ეს არ ეხმარება ევროპაში ჩვენი ინტეგრაციის პროცესს, მეტიც, ეს რომ ვენეციის კომისაში გაგვეგზავნა არაპროპორციულ, არათანაზომად შეზღუდვად შეაფასებდა ვენეციის კომისია, დარწმუნებული ვარ. რაც შეეხება ვეტოს, მას „ქართული ოცნება“ დაძლევს, მნიშვნელობა არ აქვს არგუმენტს, ერთი იქნება გადაწყვეტილება, დანარჩენები პულტზე ხელის დამჭერები არიან, უბრალოდ, იქ, საღი აზრის ლოგიკას არანაირი მნიშვნელობა არ აქვს”, – განაცხადა მანჯგალაძემ.

პარლამენტის სპიკერატში ვიცე-სპიკერების რაოდენობა იზრდება – ნაცვლად ხუთისა, პარლამენტს შესაძლოა შვიდი ვიცე-სპიკერი ჰყავდეს.

რეგლამენტში დაგეგმილი ცვლილებების პროექტის თანახმად, რომელიც „ქართული ოცნების” დეპუტატებმა მოამზადეს, პარლამენტის თავმჯდომარის მოადგილედ შესაძლებელია აირჩეს სამი მოადგილე საპარლამენტო უმრავლესობიდან და სამი მოადგილე საპარლამენტო ოპოზიციაში შემავალი ფრაქციებიდან.

მოქმედი რეგლამენტით, პარლამენტის სპიკერატში უმრავლესობისა და ოპოზიციისთვის ორ-ორი კვოტაა განსაზღვრული, თუმცა საპარლამენტო ოპოზიციისთვის განკუთვნილი ორი ვიცე-სპიკერის თანამდებობიდან ერთი ვიცე-სპიკერის კვოტა ვაკანტურად რჩება.

ვიცე-სპიკერებთან დაკავშირებით მოქმედ პარლამენტში ამჟამად ასეთი სურათია – პარლამენტს ჰყავს პირველი ვიცე-სპიკერი, რა თანამდებობასაც გია ვოლსკი იკავებს.

საპარლამენტო უმრავლესობის კვოტით ვიცე-სპიკერის პოსტზე არჩილ თალაკვაძე და დავით სერგეენკო არიან არჩეული.

რაც შეეხება ოპოზიციისთვის განსაზღვრულ კვოტას, ამ სტატუსით პარლამენტის ვიცე-სპიკერია პოლიტიკური ჯგუფის „ევროპელი სოციალისტების“ დეპუტატი ავთანდილ ენუქიძე.

ოპოზიციისთვის განკუთვნილი ვიცე-სპიკერის კიდევ ერთ პოსტზე ფრაქცია „ნაციონალურმა მოძრაობამ“ პარლამენტს ლევან ბეჟაშვილის კანდიდატურა წარუდგინა, თუმცა უმრავლესობამ მიიღო პოლიტიკური გადაწყვეტილება, რომ ბეჟაშვილი ვიცე-სპიკერად არ აერჩიათ.

ვიცე-სპიკერების რაოდენობის ზრდა პარლამენტის ხარჯებს ზრდის. ცნობისთვის, პარლამენტის თავმჯდომარის მოადგილის გასამრჯელოს ოდენობა 6 340 ლარია. მას ჰყავს სამდივნო და ემსახურება ავტომობილი.