პირველი გეგმა ჩაიშალა და აამუშავეს გეგმა B – გეგმა B არის, რომ სააკაშვილმა უნდა განაახლოს სათანადო კალორაჟით საკვების მიღება და დაბრუნდეს პოლიტიკაში, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

თელავში გამართულ, „ნაციონალური მოძრაობის“ პოლიტსაბჭოსთან დაკავშირებით ირაკლი კობახიძემ განაცხადა, რომ საქართველოს მესამე პრეზიდენტი უყურადღებობას უჩიოდა და როგორც ჩანს, მის მიმართ ყურადღება ასე გამოხატეს.

„სააკაშვილი უჩიოდა უყურადღებობას და როგორც ჩანს, ამით გამოხატეს ყურადღება მის მიმართ. მის სახლში ჩავიდნენ და იქ გამართეს პოლიტსაბჭოს სხდომა. ჩაიშალა პირველი გეგმა. ეს ადამიანები 500-600 დღის განმავლობაში ამტკიცებდნენ, რომ სააკაშვილი ყოველდღე კვდებოდა, მას კლავდა ქართული ხელისუფლება, სასამართლო, ის ხან იწამლებოდა, ხან აწამებდნენ, ათასი რამ მოიგონეს. სტრასბურგის სასამართლომ ამ ყველაფერს ცივი წყალი გადაასხა, აქედან გამომდინარე ამუშავეს გეგმა B. გეგმა B არის ის, რომ სააკაშვილმა უნდა განაახლოს სათანადო კალორაჟით საკვების მიღება და უნდა დაბრუნდეს პოლიტიკაში. როგორც ჩანს, ეს არის ახალი გეგმა და ამის გამოხატულება შეიძლება იყოს მის სახლში პოლიტსაბჭოს სხდომის გამართვა,“ – განაცხადა კობახიძემ.

„დღეს დილით უკრაინელებმა რამდენიმე ათეული დრონით დაბომბეს მოსკოვი, ამ ჯოჯოხეთური სახელმწიფოს დედაქალაქი. უკრაინელებს ჩვენი დახმარება არ სჭირდება, უჩვენოდაც გადაამტვრევენ ცოტა ხანში ხერხემალში და ჩვენ სად ვიქნებით მაშინ, აი ეს მაინტერესებს. ან უკრაინულებს ან დანარჩენ მსოფლიოს თვალი როგორ უნდა გავუსწოროთ”, – ამის შესახებ დეპუტატმა ალექსანდრე ელისაშვილმა პარლამენტის პლენარულ სხდომაზე განაცხადა.

მან სხდომაზე უმრავლესობის წევრს ანრი ოხანაშვილს მიმართა.

„როგორ შეწყდა ის ფრენები აბა კარგად გავიხსენოთ, ნახირივით რომ გამოყარეს ჩვენი ხალხი, საქონლის გადასატან თვითმფრინავში რომ შეყარეს, მაშინაც ვაპროტესტებდი ბატონო ანრი. მაშინაც ვაპროტესტებდი სააკაშვილმა ომიდან რამდენიმე თვეში რომ მოუხსნა სავიზო რეჟიმი. რამდენ ხანს უნდა ილაპარაკოთ სააკაშვილზე. 11 წელია ხელისუფლებაში ხართ. ახლა ამ ფონზე, თვითონ რუსებს მაინც ადევნეთ თვალი რას ლაპარაკობენ. იძირება რუსეთის საქმე, უკან-უკან მიდის. მანამდე კრემლს მოარტყეს დრონი, ახლა ორგანიზებულად დაბომბეს მოსკოვი. მარცხდება რუსეთი და ვის მხარეს ხართ თქვენ”? – განაცხადა  ალექსანდრე ელისაშვილმა.

დაუყოვნებლივ გამოცხადდეს ირაკლი ღარიბაშვილი პარლამენტში და განუმარტოს საზოგადოებას, რა პირობებით საუბრობს მტერთან ქართველი ხალხის ზურგს უკან მისი მთავრობა, – ამის შესახებ „ნაციონალური მოძრაობის” ფრაქციის თავმჯდომარე, თინა ბოკუჩავამ პარლამენტის პლენარულ სხდომაზე სიტყვით გამოსვლისას განაცხადა.

მისი თქმით, რუსეთის პრეზიდენტმა, ვლადიმერ პუტინმა პირადად დაადასტურა, რომ საქართველოს ხელისუფლება ქართველი ხალხის ზურგს უკან “მოღალატეობრივად და მალულად აწარმოებდა რუსეთის ფედერაციასთან მოლაპარაკებებს”.

„მთელი მსოფლიო ხედავს, რომ „რუსული ოცნების“ ხელით საქართველომ იცვალა საგარეო კურსი და მიმდინარეობს ქვეყნის რუსიფიკაცია. ვლადიმერ პუტინმა პირადად დაადასტურა, რომ საქართველოს ხელისუფლება ქართველი ხალხის ზურგს უკან მოღალატეობრივად, მალულად აწარმოებდა რუსეთის ფედერაციასთან მოლაპარაკებებს და რომ სწორედ ქართული მხარის დაჟინებული თხოვნის საპასუხოდ მიიღო მან ფრენების აღდგენის და სავიზო რეჟიმის გაუქმების გადაწყვეტილება. ვინ აწარმოებდა მტერთან ფარულ მოლაპარაკებებს, ვინ არის ეს პირი ან პირთა წრე, ვინც ქართველი ხალხის ზურგს უკან მტერთან მოლაპარაკებებს აწარმოებს? რა დათმო საქართველოს ხელისუფლებამ სანაცვლოდ? რა სხვა საკითხები განიხილებოდა ფარულ მოლაპარაკებებზე ოკუპანტთან? მაგალითად, განიხილებოდა თუ არა სარკინიგზო მიმოსვლის აღდგენა? ამ საკითხებზე ვითხოვთ ირაკლი ღარიბაშვილისგან პასუხს. დაუყოვნებლივ გამოცხადდეს ირაკლი ღარიბაშვილი პარლამენტში და განუმარტოს საზოგადოებას, რა პირობებით საუბრობს მტერთან ქართველი ხალხის ზურგს უკან მისი მთავრობა. ღარიბაშვილთან ერთად ქვეყნის რუსიფიკაციის, მოღალატეობრივ საქმეში წვლილი მიუძღვის პარლამენტის თითოეულ წევრსაც, რომელიც ტოტალურ პოლიტიკურ მორჩილებას ირჩევს ქვეყნის ინტერესის ნაცვლად. გუშინდელ ბიუროს სხდომაზე დავაყენე საკანონმდებლო ინიციატივა, რომელიც აკრძალავდა რუსი სანქცირებული პირების საქართველოში შემოსვლას, რომლებიც აკრძალავდა ეკონომიკურ საქმიანობას იმ მოქალაქეებისთვის, რომელსაც დარღვეული აქვთ „ოკუპაციის შესახებ კანონი“. საქართველოში ჩამოსული რუსეთის მოქალაქეებისთვის სასათბურე პირობები შექმენით, მათ შორის ეკონომიკური თვალსაზრისით. იზრდება მათი დეპოზიტები მაშინ, როცა საქართველოს მოქალაქეებისთვის ბანკებში მხოლოდ სესხები იზრდება და არა დეპოზიტები“,-განაცხადა ბოკუჩავამ.

„Говорит Москва!”- ასე ეხმაურება ევროპარლამენტარი რასა იუკნევიჩიენე ირაკლი ღარიბაშვილის ბრატისლავაში გლობალური უსაფრთხოების ფორუმზე გაკეთებულ განცხადებას. პრემიერმა ირაკლი ღარიბაშვილმა ფორუმზე უკრაინაში ომის დაწყების მიზეზებზე ისაუბრა და აღნიშნა, რომ ერთ-ერთი მიზეზი იყო ნატოს გაფართოება იყო.

„ყველამ იცის, მე მგონი, მიზეზი. ერთ-ერთი მიზეზი იყო ნატოს გაფართოება და ბევრი სხვა მიზეზი, ხომ ასეა?! არ მინდა ამაზე სპეკულირება ან ციტირება რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა გამხდარიყო ნატოს წევრი და ამიტომ ჩვენ ვხედავთ შედეგებს“, – აღნიშნა პრემიერმა.

ეს არის უკვე მეორე დემარში ბოლო სამი თვის განმავლობაში, – ამის შესახებ საპარლამენტო პოლიტიკური ჯგუფის, „ხალხის ძალის“ წევრმა, სოზარ სუბარმა პარლამენტის პლენარულ სხდომაზე, ევროკავშირის წევრი ქვეყნების ელჩების ვიცე-პრემიერ, ეკონომიკის მინისტრ ლევან დავითაშვილთან შეხვედრასთან დაკავშირებით განაცხადა.

მისი თქმით, ელჩებმა პირველად მიმდინარე წლის 27 თებერვალს გამოთქვეს შეშფოთება მიხეილ სააკაშვილის ჯანმრთელობის მდგომარეობაზე.

„ზუსტად თვენახევარში ევროპულმა სასამართლომ თქვა, რომ ეს იყო ფალსიფიკაცია და არანაირი საფუძველი შეშფოთებას არ ჰქონდა, თუმცა ამის შემდეგ ელჩებისგან არც ბოდიში მოგვისმენია ქართული საზოგადოების წინაშე და არც სინანული იმის გამო, რომ ისინი იქცნენ დეზინფორმაციული კამპანიის ნაწილად.

გუშინ ელჩებმა გამოთქვეს წუხილი, რომ  აღდგა პირდაპირი ფრენები რუსეთსა და საქართველოს შორის და პრაქტიკულად, რუსეთისთვის სანქციების დაწესებისკენ მოგვიწოდეს. ევროკავშირის ელჩის, პაველ ჰერჩინსკის თქმით, მნიშვნელოვანია არა , ვთქვათ, საქართველო რა გეოპოლიტიკურ ვითარებაში იმყოფება ან ის ფაქტი, რომ ეს ფრენები არ იქნება გამოყენებული სანქციების გვერდის ასავლელად, არამედ აბსტრაქტული და პირადად ჩემთვის გაუგებარი პოლიტიკური არსი. ცუდი ის არის, რომ მეგობარი ქვეყნების ელჩები ხშირად იმპერატიული ტონით გვკარნახობენ, როგორ მოვიქცეთ და სხვადასხვა კრიტერიუმები აქვთ თავიანთი ქვეყნებისთვის და საქართველოსთვის“, – განაცხადა სოზარ სუბარმა.

ევროკავშირის ქვეყნების ელჩები ეკონომიკისა და მდგრადი განვითარების მინისტრს, ლევან დავითაშვილს შეხვდნენ.

შეხვედრის შემდეგ საქართველოში ევროკავშირის ელჩმა, პაველ ჰერჩინსკიმ განაცხადა: „საქართველოს ვიცე-პრემიერს გადავეცი ევროკავშირის 27-ვე წევრი ქვეყნისგან, რომ ვწუხვართ საქართველოს მთავრობის გადაწყვეტილების გამო, მიიღოს პირდაპირი ფრენები რუსეთიდან“.

2022 წლის 1-ელი მარტიდან, 2023 წლის 26 აპრილამდე, ჯამურად, საქართველოში, რუსეთის მოქალაქეებზე გასხვისდა 424 ათას 449 კვ.მ. მიწა. დარეგისტრირდა 8832 ინდმეწარმე, ასევე შეიქმნა და დარეგისტრირდა 889 იურიდიული პირი, – ამის შესახებ ოპოზიციონერმა დეპუტატმა თამარ კორძაიამ პარლამენტში, სიტყვით გამოსვლისას განაცხადა.

როგორც კორძაიამ აღნიშნა, პირდაპირი ფრენების აღდგენა არაფერში გვჭირდებოდა, გარდა იმისა, რომ პოლიტიკურად დაზიანდა ქვეყანა.

„ჩემს მიერ გამოთხოვილი ინფორმაციის თანახმად, 2022 წლის 1-ელი მარტიდან, 2023 წლის 26 აპრილამდე, ჯამურად, საქართველოში, რუსეთის მოქალაქეებზე გასხვისდა 424 ათას 449 კვ.მ. მიწა, დარეგისტრირდა 8832 ინდ. მეწარმე, ასევე შეიქმნა და დარეგისტრირდა 889 იურიდიული პირი. დამერწმუნებით, ეს სტატისტიკა საკმაოდ დიდია ისეთი პატარა ქვეყნისთვის, როგორიც საქართველოა.

ეს ყველაფერი ხდებოდა მანამ, სანამ რუსეთიდან საქართველოში პირდაპირი ფრენები აღდგებოდა. რუსეთის მოქალაქეები საქართველოში შემოდიან და აწარმოებენ ბიზნესს, უძრავ ქონებას ყიდულობენ, პოლიტიკურად რაში გვჭირდებოდა პირდაპირი ფრენების აღდგენა, თუნდაც იმ ეკონომიკური გაძლიერებისთვის, თუ არა ის, რომ ევროპისთვის ჩვენი ცუდი დამოკიდებულება გვეჩვენებინა, გვეჩვენებინა, რომ არ ვართ მაინც და მაინც მათი პარტნიორები.

რატომ ვივიწყებთ, რას აკეთებს ევროპა ჩვენთვის? რა გაუკეთებია და რა მხარდაჭერას ავლენს საქართველოსთან დაკავშირებით. ის, რომ ჩვენთან მშვიდობაა, ევროპის დამსახურებაა. უკაცრავად, რომ ამის შეხსენება მიწევს. არ არის სწორი იმის შედარება, რა სარგებელს იღებს ევროკავშირი და რა სარგებელს იღებს საქართველო. ცოტა უხერხულია ამ ტიპის შედარებების გაკეთება. არ შეიძლება საკუთარი მოქალაქეების ეკონომიკური სარგებლით მოტყუება, ადამიანების სიღარიბით მანიპულაცია, მაშინ, როდესაც რუსეთის მოქალაქეები უკრაინის მოქალაქეებს კლავენ. არავინ გვეუბნება, რომ ჩვენ უნდა ამოვწყდეთ ენერგორესურსების გარეშე, ჩვენ გვეუბნებიან, რომ მინიმალური სტანდარტი მაინც დავიცვათ, ნუ გავაკეთებთ იმაზე მეტს, რაც ჩვენს ქვეყანას არ სჭირდება. პირდაპირი ფრენების აღდგენა არაფერში გვჭირდებოდა, გარდა იმისა, რომ პოლიტიკურად დაზიანდა ჩვენი ქვეყანა“,- აღნიშნა კორძაიამ.

კორძაიამ სახელმწიფო უსაფრთხოების სამსახურის უფროსს, გრიგოლ ლილუაშვილს კითხვით მიმართა, როდესაც საქართველოში რუსეთის ამდენი მოქალაქეა შემოსული, შესწავლილი აქვთ თუ არა მათი საქმიანობა.

„უსაფრთხოების სამსახურის ანგარიშში არაფერია ნათქვამი ამ რაოდენობის რუსებთან დაკავშირებით კონტროლის თვალსაზრისით. ჩვენ ველოდებით ლილუაშვილის მოსვლას პარლამენტში ანგარიშის წარმოდგენის სახით. მინდა აქედან დავუსვა შეკითხვა, ამდენი ადამიანი რომ არის რეგისტრირებული ინდ. მეწარმედ და იურიდიული პირი აქვს დაფუძნებული, შესწავლილი ჰყავს თუ არა ისინი, იღებს თუ არა პასუხისმგებლობას უსაფრთხოების სფეროში, როდესაც ამდენი რუსეთის მოქალაქეა შემოსული“, -აღნიშნა კორძაიამ.

საქართველოს პრემიერ-მინისტრის, ირაკლი ღარიბაშვილის თქმით, რეალური ოლიგარქი საქართველოს ყოფილი თავდაცვის მინისტრი, დავით კეზერაშვილია, – ამის შესახებ მთავრობის მეთაურმა ბრატისლავაში, გლობალური უსაფრთხოების ფორუმზე გამოსვლისას განაცხადა.

აღნიშნულის პასუხად, ინტერვიუერმა განაცხადა, რომ მას ეგონა ღარიბაშვილი საქართველოს ყოფილ პრემიერ-მინისტრზე საუბრობდა.

ღარიბაშვილი ჩაეკითხა, თუ რატომ ფიქრობს ინტერვიუერი, რომ ივანიშვილი ოლიგარქია.

ინტერვიუერის თქმით, „ივანიშვილს ასე მოიხსენიებენ და არ არის სწორი?!“

„თქვენც ოლიგარქი შეიძლება გამოხვიდეთ არა?!“ – განუცხადა კითხვის ავტორს ღარიბაშვილმა.

პრემიერ-მინისტრის თქმით, როგორც კი დეოლიგარქიზაციის შესახებ კანონი იქნება მიღებული, ყველაფერი გარკვეული იქნება და „მისტიკას მოვხსნით ამ საკითხს და ამ ბრალდებებს“.

„უსაფუძვლოა, არგუმენტების გარეშეა ეს ბრალდებები. ამიტომ, რადგან იკითხეთ [„ქართული ოცნების“] დამფუძნებლის, ბატონი ბიძინა ივანიშვილის საკითხი, ძალიან ბევრი საქველმოქმედო ინიციატივა აქვს მას განხორციელებული. ადამიანი, რომელმაც ეს ცვლილება მოახდინა ქვეყანაში 2012 წელს, რომელმაც შეცვალა სააკაშვილის ბრუტალური, დიქტატორული რეჟიმი. სააკაშვილის პერიოდში არ არსებობდა დემოკრატიის ნიშანი. ხალხს აწამებდნენ, აუპატიურებდნენ, ციხეში, ქუჩებში კლავდნენ, 300 000-ზე მეტი ადამიანი იქნა გასამართლებული. არ იყო არც თავისუფალი მედია, არც რეალური სამართალი, არც კანონის უზენაესობა. ჩვენ დრამატული ცვლილებები მოვახდინეთ ბოლო ათი წლის განმავლობაში“, – განაცხადა ღარიბაშვილმა.

ამასთან, ღარიბაშვილის განცხადებით, საქართველომ დეოლიგარქიზაციაზე გამოცდილება უკრაინიდან მიიღო.

„ოდესაც საქართველოს მიეცა ევროკომისიის მხრიდან 12 პრიორიტეტი, ჩვენ მყისიერად დავიწყეთ მათზე მუშაობა და ივნისისთვის ყველაფერი იქნება დასრულებული ერთი რეკომენდაციის გარდა – ის დეპოლარიზაციაა. რადგან იკითხეთ დეოლიგარქიზაციის საკითხი, ჩვენ გამოცდილება მივიღეთ უკრაინიდან. კარგად იცით, რომ მსგავსი კანონი 2 წლის წინ მიიღო უკრაინამ. ბევრ სხვა ქვეყანას არა აქვს ამ მიმართულებით გამოცდილება, ამიტომ უკრაინის მაგალითი ავიღეთ და ვენეციის კომისიაში გავაგზავნეთ კანონპროექტი, მათგან მივიღეთ მოსაზრებები. მიმაჩნია, რომ სწორი მიმართულებით მივდივართ“, – განაცხადა ღარიბაშვილმა.

გარდა ამისა, უცხოური აგენტების გაწვეულ კანონპროექტთან დაკავშირებით, ინტერვიუერის კითხვაზე – „თუ რატომ არის აუცილებელი, რომ იარლიყები მივაწებოთ ორგანიზაციებს ან ადამიანებს, რომელიც 20%-ზე მეტს უცხოეთიდან იღებენ“, ღარიბაშვილმა განაცხადა, რომ „ეს თავი დახურულია და აქცენტი უფრო სერიოზულ საკითხებზე უნდა გაკეთდეს“.

„რატომ უნდა ვისაუბროთ იმაზე, რაც უკვე გადაიჭრა, ეს კანონი გაწვეულ იქნა, დავხურეთ თავი, და ამიტომ აქცენტი გავაკეთოთ უფრო სერიოზულ საკითხებზე, ეს იყო ინიციატივა, რომელიც სხვა ბევრ ქვეყანაში არსებობს, მათ შორის ევროპარლამენტში იქნა განხილული მსგავსი კანონის მიღება. მაგრამ არ მინდა დეტალებში შევიდე, არც სპეკულაციაში. იყო ეს ინიციატივა და ჩვენ გავიწვიეთ ეს კანონპროექტი, ეს თავი დახურულია. მინდა საუბარი წარვამართო უფრო მნიშვნელოვან და სერიოზულ საკითხზე, რაც არის შემდეგი ნაბიჯები ჩვენს ევროკავშირში გაწევრიანების გზაზე. როგორც თქვენ ბრძანეთ, ჩვენ ვმუშაობთ ამ 12 პრიორიტეტის განხორციელებაზე, უკრაინა და მოლდოვა კანდიდატის სტატუსით სარგებლობენ, საქართველოს არ მიეცა ეს სტატუსი. ეს იყო ბონუსი მოლდოვისთვის და უკრაინისთვის, ძალიან გვიხარია მათი სახელით“, – განაცხადა ღარიბაშვილმა.

„ქართული ოცნების“ თავმჯდომარის, ირაკლი კობახიძის განცხადებით, თუ პრეზიდეტი სალომე ზურაბიშვილი ნიკა გვარამიას შეწყალებაზე ფიქრობს, მაშინ გამოდის, რომ ის ეთანხმება იმ მოსაზრებას, რომელსაც ნიკა გვარამია მის მიმართ გამოთქვამდა.

კობახიძის თქმით, ზურაბიშვილის გადასაწყვეტია, შეიწყალებს თუ არა გვარამიას.

„როდესაც კონკრეტული ადამიანი გეძახის რეზიდენტს და არ მინდა, კიდევ გავიმეორო რას გეძახის. ამის მერე თუ ფიქრობ მის შეწყალებაზე, მაშინ ადასტურებ, რომ ეს გამონათქვამი ყოფილა სწორი. რასაც ეძახდა გვარამია ზურაბიშვილს, ეს ყოფილა სწორი და მართალი, თუ ის დათანხმდება მის შეწყალებას. ეს არის სალომე ზურაბიშვილის გადასაწყვეტი“, – განაცხადა კობახიძემ.

პარლამენტის პირველი ვიცე-სპიკერის, გია ვოლსკის განცხადებით, დეპოლარიზაციას მნიშვნელოვნად შეუწყობს ხელს საქართველოსთვის კანდიდატის სტატუსის მიცემა.

აღნიშნული კომენტარით გია ვოლსკიმ ბრატისლავაში პრემიერ-მინისტრ ირაკლი ღარიბაშვილის განცხადებები შეაფასა, რომელიც მათ შორის პოლარიზაციას ეხება.

„რასაკვირველია, კანდიდატის სტატუსის მოცემა განიხილება ორ ასპექტში, ერთი, რომ ევროპული საზოგადოება, შესაბამისი სტრუქტურები ობიექტურად აფასებენ იმ რეფორმებს, რაც  საქართველოში გატარდა, არანაირ ყურადღებას არ აქცევენ პოლიტიკურ სპეკულაციებს. დეპოლარიზაცია არ ნიშნავს დამეგობრებას, ნიშნავს თანაბარი პირობების შექმნას ყველასათვის. რა თქმა უნდა, ამას მნიშვნელოვნად შეუწყობს ხელს კანდიდატის სტატუსის მიცემა. გულწრფელობა არის აუცილებელი, როცა ამ ტრიბუნას იყენებ. ფაქტია, პოლარიზება მსოფლიოში არის თვალსაჩინო, გრძელდება რუსეთის მიერ საქართველოს ტერიტორიების ოკუპაცია და რუსეთი თავისი სტრატეგიული ინტერესების გატარებისათვის სამხედრო ძალას მოიხმარს, ასეთი რეალობა შეიქმნა, როდესაც პატარა, მცირე რესურსების მქონე ქვეყანამ უსაფრთხოებაზე უნდა იფიქროს“, – განაცხადა გია ვოლსკიმ.

მიმაჩნია, რომ ალბათ ყველაზე გამოწვევებით აღსავსე დროა. ჩვენ ძალიან რთული დღეები გვქონდა 2008 წელს. დღეს შეიძლება ვიღაცას დაავიწყდა, რომ საქართველოს, ჩვენი ტერიტორიის 20% პროცენტი არის ოკუპირებული რუსეთის მიერ და 2008 წელს, ომის შემდეგ, რუსეთმა კი არ დატოვა ჩვენი ტერიტორია, პირიქით, დარჩა, ააშენეს 2 სამხედრო ბაზა ჩვენს მიწაზე, ჩვენს ტერიტორიაზე და ეს არის შედეგი იმ დამანგრეველი ომისა, – ამის შესახებ საქართველოს პრემიერ-მინისტრმა ირაკლი ღარიბაშვილმა ბრატისლავაში, გლობალური უსაფრთხოების ფორუმის (GLOBSEC) ფარგლებში, თემატურ დისკუსიაში მონაწილეობისას განაცხადა.

 მთავრობის მეთაურმა უპასუხა კითხვას, თუ იყო ეს აქტიური არაპროვოცირებული აგრესია.

 „არ მინდა დეტალებზე საუბარი ამ საკითხზე, იმიტომ, რომ ჩვენ გვაქვს ჩვენი მოსაზრება, საკუთარი. ჩვენ რომ მთავრობაში ვყოფილიყავით, ჩვენი მთავრობა რომ ყოფილიყო იმ დროს, მაშინ ყველაფერს გავაკეთებდით, რომ თავიდან აგვეცილებინა ის ომი. საქართველო პატარა ქვეყანაა, მხოლოდ 4 მილიონი მოსახლეობა ჰყავს, კარგად არის აღჭურვილი, ჯარიც კარგი ჰყავს, მაგრამ მაინც პატარაა ქვეყანა. ამიტომ მიმაჩნია, რომ ნებისმიერი მთავრობის ინტერესში უნდა იყოს, განსაკუთრებით მაშინ, როდესაც პატარა ქვეყანა არ არის არც ევროკავშირის, არც ნატოს წევრი, როდესაც არ გააჩნია უსაფრთხოების გარანტიები, მაგრამ ის ომი, არ მინდა დეტალებში შევიდე, მაგრამ დამანგრეველი იყო ჩვენთვის. შედეგი ის არის, რომ ჩვენი ტერიტორიის 20% არის ოკუპირებული რუსეთის მიერ. კიდევ ერთხელ მინდა შევახსენო ყველას, რომ იმ დროს ომს არ მიექცა საკმარისი ყურადღება. იმ აგრესიას, რუსეთის აგრესიას არ მიექცა საკმარისი ყურადღება. არავინ არ დაუწესა რუსეთს სანქციები”, –  აღნიშნა ირაკლი ღარიბაშვილმა.

 პრემიერმა უპასუხა კითხვას, უნდა დაეწესებინათ თუ არა 2008 წელს სანქციები.  

 „ასე ვფიქრობ, ასე მწამს. ჩვენთვის რა განსხვავება აქვს ხომ. ჩვენი ომი იყო ჩვენი ომი. ახლა რასაც ვხედავთ უკრაინაში, ეს კატასტროფულია, რა თქმა უნდა. ათასობით ადამიანი კვდება ყოველდღიურად და ვერ ვხედავთ ნიშანს, რომ ეს ომი მალე დასრულდება”, –  განაცხადა მთავრობის მეთაურმა.