სპეციალური საგამოძიებო სამსახურის გამომძიებლები, საქართველოს მთელ ტერიტორიაზე, დროებითი მოთავსების იზოლატორებში დაუბრკოლებლად, ყოველგვარი ნებართვის გარეშე შესვლას და დაკავებულ პირებთან შეხვედრას შეძლებენ. ამის შესახებ ინფორმაციას სპეციალური საგამოძიებო სამსახური ავრცელებს.

მათივე ცნობით, აღნიშნულ წესთან დაკავშირებით უწყებებს შორის შეთანხმება, სპეციალური საგამოძიებო სამსახურის ინიციატივით შექმნილ სამოხელეო დანაშაულების პრევენციის საბჭოზე იქნა მიღებული, რის შემდეგაც იგი საქართველოს შინაგან საქმეთა მინისტრის ბრძანებით დროებითი მოთავსების იზოლატორებში ამოქმედდა.

„განხორციელებული ცვლილება მნიშვნელოვნად შეუწყობს ხელს, სახელმწიფოს მხრიდან არასათანადო მოპყრობის ფაქტებზე დროულ და ეფექტურ რეაგირებას, შემაფერხებელი პროცედურების გარეშე დაკავებულ პირებთან შეხვედრას, მათ მიერ მიღებული დაზიანებების დროულ ფიქსაციასა და დანაშაულის შესახებ ინფორმაციის მიღებას.

დროებითი მოთავსების იზოლატორებში შეუფერხებლად შესვლის წესის ამოქმედებას წინ უძღოდა სპეციალური საგამოძიებო სამსახურის ინიციატივით, საქართველოს პარლამენტის მიერ ,,პატიმრობის შესახებ“ კოდექსში შეტანილი ცვლილება, რამაც სპეციალური საგამოძიებო სამსახურის გამომძიებლებს უფლება მისცა პენიტენციურ დაწესებულებაში ნებართვის გარეშე შევიდნენ, შეხვდნენ პატიმრებსა და მოახდინონ მათ საჩივრებზე დროული რეაგირება.

როგორც საზოგადოებისთვის ცნობილია, ცალკეული სამოხელეო დანაშაულის პრევენციის სპეციალური საბჭო შექმნის შესახებ მემორანდუმი სპეციალურ საგამოძიებო სამსახურს, საქართველოს პროკურატურას, შინაგან საქმეთა სამინისტროს, იუსტიციის სამინისტროსა და სახელმწიფო უსაფრთხოების სამსახურს შორის 2023 წლის 26 იანვარს გაფორმდა, ხოლო საბჭოს პირველი სხდომა 2023 წლის 21 ივნისს გაიმართა“, – აღნიშნულია გავრცელებულ ინფორმაციაში.

ინფორმაციის მიხედვით, სპეციალური საგამოძიებო სამსახური სამოხელეო დანაშაულის პრევენციის საბჭოს ფორმატში, სახელმწიფო უწყებებთან კოორდინაციითა და თანამშრომლობით, არასათანადო მოპყრობის ფაქტების თავიდან აცილების და მასზე ეფექტური რეაგირებისთვის ქმედითი ღონისძიებების გატარებას განაგრძობს.

14 ოქტომბერს იტალიაში, კერძოდ ქალაქ რომში,  ქართველი მხატვრისა და დიზაინერის, – ირაკლი ბოჭორიშვილის პერსონალური გამოფენა გაიხსნება!

გამოფენა ხორციელდება  იტალიაში საქართველოს სრულუფლებიანი ელჩის, კონსტანტინე სურგულაძის, შავი ზღვისა და ბალტიის ზღვის ალიანსი საქართველოს მხარდაჭერით.

გამოფენის ორგანიზატორია კომპანია “Dec&Art Events”.

ირაკლი ბოჭორიშვილი, ფართო საზოგადოებისთვის კარგად არის ცნობილი, როგორც ფეხსაცმლის დიზაინერი. ხოლო რაც შეეხება ფერწერას, მისთვის პირველი პერსონალური გამოფენაა ამ კუთხით.

ირაკლიმ დაამთავრა თბილისის სამხატვრო აკადემია, მონუმენტური ფერწერის განხრით.

90- იან წლებში, როცა საქართველოში ძალიან მძიმე პერიოდი იდგა და ქვეყანამ სამი სამოქალაქო და ეთნიკური ომი გადაიტანა, ირაკლი მაინც არ წყვეტდა მუშაობას და გამუდმებით ხატავდა სხვადასხვა მასალში. პარალელურად დაინტერესდა ფეხსაცმლის დიზაინით და ტექნოლოგიით.

სწორედ მაშინ,  კომპანია „ქართუმ“ ისნის ფეხსაცმლის ფაბრიკაში ჩამოიყვანა იტალიელი დიზაინერები და ფეხსაცმლის მწარმოებლები, რომელთაც ქართველი სტუდენტებისთვის უნდა შეესწავლათ ფეხსაცმლის წარმოების პროცესი.

ქართველ სტუდენთა შორის ირაკლიც აღმოჩნდა, აქედან იწყება მისი როგორც, ფეხსაცმლის დიზაინერის კარიერა.

2002 წელს ირაკლიმ დააარსა საკუთარი სახელოსნო რომელსაც 2007 წელს ოფიციალურად „შუზოფრენია“ დაარქვა.

დღესდღეობით „შუზოფრენია“ საკმაოდ ცნობილი ბრენდია საქართველოში, და ამავე დროს, თანმიმდევრულად იპოვებს აღიარებას საერთაშორისო ასპარეზზეც.

„შუზოფრენიას“ მონაწილეობა აქვს მიღებული, სხვადასხვა პრესტიჟულ გამოფენებსა და ჩვენებებში, რომლებზეც ყოველთვის მოწონებას იმსახურებდა როგორც სპეციალისტების, ისე არასპეციალისტების მხრივ.

2020 წლის თებერვალში, იტალიურმა მხარემ ირაკლი მიიწვია მილანში „MICAM MILANO“ -ს საერთაშორისო გამოფენაზე, რომელშიც მსოფლიოს მოწინავე ბრენდები იღებენ მონაწილეობას.

„შუზოფრენია“ პირველი ქართული ბრენდი იყო რომელმაც მონაწილეობა მიიღო ასეთ მასშტაბურ და პრესტიჟულ გამოფენაში.

ირაკლი წარმატებით თანამშრომლობს მსოფლიოში ცნობილ ტანსაცმლის დიზაინერებთან, რომელთათვისაც ქმნის ფეხსაცმლის კოლექციას.

2020 წლიდან ირაკლი უფრო ინტენსიურად იწყებს ფერწერასა და გრაფიკაში მუშაობას.

 ამ პერიოდში შექმნა ბევრი ექსპერიმენტული ნამუშევარი.

მხატვრობა და ფეხსაცმლის დიზაინი ავსებს ერთმანეთს და  სწორედ აქედან გამომდინარე ირაკლის მიერ შექმნილ ფეხსაცმლის მოდელებს გამოარჩევს მისი მხატვრული და სკულპტურული ხედვა.

მხატვარი მუდმივად ძიების პროცესშია. იგი გვთავაზობს, თემატურად და სტილისტურად ერთმანეთისგან სრულიად განსხვავებულ ნამუშევრებს.

ფერწერაში, გარდა ტრადიციული მასალებისა, ირაკლი მისთვის ძალიან კარგად  ნაცნობ ნატურალურ ტყავს იყენებს, რითიც ქმნის სხვადასხვა კომპოზიციებს.

ირაკლი, ქანდაკებაშიც არ ერიდება ექსპერიმენტებს და ახალი მასალის შემოტანას, – ქმნის ტყავის ქანდაკებას და ბარელიეფებს. მის მიერ არის შესრულებული ნინო ჩუბინიშვილის (ჩუბიკა) ცნობილი ტყავის ქანდაკება – „ანგელოზი“ და „ელენა“.

ირაკლის აქვს სურვილი და მცდელობა, ისეთი ნამუშევრები შექმნას, რომელიც ამ დაძაბულ და კატაკლიზმებით სავსე გარემოში სიმშვიდისა და ოპტიმიზმის განცდა დაგვიტოვებს.

www.shoesofrenia.com

https://www.facebook.com/DecArtEvents

https://www.facebook.com/shoesofrenia4/

ტექნოლოგიების საუკუნეში შესაძლებელია, რომ სახლიდან გაუსვლელად დაეუფლო ახალ პროფესიებს და მისწვდე მსოფლიოს სხვადასხვა პროფესიულ მწვერვალებს. ტექნოლოგიური პროგრესის შეუქცევად გზაზე, ტექნოლოგიებში გათვითცნობიერება მცირე ასაკიდანვე მნიშვნელოვანია. სწორედ ამიტომ თიბისი ყველა მე-10 და მე-11 კლასელს აძლევს შესაძლებლობას დაეუფლოს დღეისათვის ყველაზე მოთხოვნად პროფესიებს და  ტექნოლოგიური განათლების, სრულად დაფინანსებულ კურსებს სთავაზობს 9 მიმართულებით.

ვებგვერდების აწყობა და პროგრამირება, მობილური აპლიკაციების, მოლაპარაკე პროგრამების (ჩატბოტების) და კომპიუტერული თამაშების შექმნა, ციფრული კომუნიკაცია, გრაფიკული დიზაინი, ვიზუალური კომუნიკაცია – ვიდეოგრაფია და ფოტოგრაფია და UI/UX დიზაინი. ეს იმ კურსების ჩამონათვალია, რომლებსაც დღეიდან სამი თვის განმავლობაში, მთელი საქართველოს მასშტაბით 650 უფროსკლასელი დაეუფლება.

„თიბისის ინიციატივით შექმნილი ტექნოლოგიური განათლების კურსები ახალ თაობას აძლევს შესაძლებლობას, თეორიულ ცოდნასთან ერთად, მიიღონ პრაქტიკული გამოცდილება. სამთვიანი დინამიური კურსების წარმატებით დასრულების შემდეგ კი უკვე თავად შეძლებენ დაგეგმილი პროექტების განხორციელებას. კურსები თავდაპირველად სამი მიმართულებით დავიწყეთ, თუმცა ტექნოლოგიების მიმართ ახალი თაობის მზარდი ინტერესის გათვალისწინებით, კურსების არჩევანი კიდევ უფრო მრავალრიცხოვანი და მრავალფეროვანი გავხადეთ. შედეგად, შემოდგომიდან, უფროსკლასელებს, ტექ მიმართულების უკვე 9 კურსს ვთავაზობთ,“- ალექსანდრე მაყაშვილი, თიბისის სტრატეგიული პროექტების ლიდერი.

თიბისი ყოველთვის უჭერდა მხარს განათლების ხელმისაწვდომობას, სხვადასხვა პროექტების მეშვეობით. 2023 წელს კი ახალი თაობის მხარდაჭერა და განათლების ხელშეწყობა, თიბისის კორპორაციული სოციალური პასუხისმგებლობის მთავარ მიმართულებად იქცა.

თიბისის განათლების პროექტი ხორციელდება ჯეოლაბთან და USAID-ის სამოქალაქო განათლების პროგრამასთან პარტნიორობით.

R

9 ოქტომბერს, თბილისში, გაეროს გლობალური შეთანხმებისა და  საქართველოს ქსელის ორგანიზებით, ევროპის სხვა ადგილობრივ ქსელებთან პარტნიორობით, საერთაშორისო კონფერენცია „Uniting Business Europe” გაიმართა. კონფერენციაზე, ღონისძიების ერთ-ერთი გენერალური სპონსორის, თიბისი ბანკის გენერალური დირექტორის მოადგილემ ნინო მასურაშვილმა თიბისის მდგრადი დაფინანსების პოლიტიკაზე ისაუბრა.

„Uniting Business Europe“ აერთიანებს გაეროს გლობალური შეთანხმების წევრებს და დაინტერესებულ მხარეებს: ადგილობრივ და გლობალურ ბიზნეს ლიდერებს, ხელისუფლების მაღალი რანგის წარმომადგენლებს, კორპორაციული მდგრადობის ექსპერტებს, სამოქალაქო საზოგადოებას, საერთაშორისო ორგანიზაციებს და გაეროს გლობალური შეთანხმების ადგილობრივი ქსელების წარმომადგენლებს ევროპიდან, ჩრდილოეთ ამერიკიდან და ცენტრალური აზიიდან.

„Uniting Business Europe“-ის ფარგლებში გამართულ დისკუსიაში განხილული იყო, თუ რა კრიტიკული როლი აქვს კრიზისის დროს ბიზნესის ლიდერობას, პრინციპებზე დაფუძნებულ მიდგომას, გლობალურ ტენდენციებს, მექანიზმებს და პარტნიორობას 2030 წლის დღის წესრიგის სრულად მისაღწევად.

კონფერენციაზე განსაკუთრებული ყურადღება დაეთმო ისეთ საკითხებზე მსჯელობას როგორებიცაა:  მდგრადი განვითარების მიზნების შესრულების პროგრესი, ევროკავშირში კორპორაციული მდგრადობის რეგულაციები, ქალების ეკონომიკური გაძლიერება, მდგრადი დაფინანსება, მდგრადი შესყიდვების პრაქტიკა, განახლებად ენერგიაზე გადასვლის დაჩქარება და  სხვა.

„თიბისისთვის, როგორც ქვეყნის წამყვანი ფინანსური ინსტიტუციისთვის ადამიანების მხარდაჭერა და მათ განვითარებაზე ზრუნვა ყველაზე მნიშვნელოვანი ღირებულებებია. თიბისი უკვე 10 წელია, გაეროს გლობალური შეთანხმების ქსელის წევრია და რეგიონული კონფერენციის გენერალური სპონსორობით კიდევ ერთხელ ვადასტურებთ ჩვენს გრძელვადიან მხარდაჭერას. კარგად გვესმის, რომ კერძო სექტორის წვლილი მდგრადი განვითარების მიზნების მიღწევისთვის უმნიშვნელოვანესია. თიბისის სხვადასხვა პრიორიტეტული მიმართულებები აქვს, მათ შორისაა განახლებადი ენერგიის პროექტების დაფინანსება, ფინანსური და არაფინანსური სერვისების ხელმისაწვდომობის გაზრდა, მცირე და საშუალო ბიზნესების და სტარტაპ ეკოსისტემის განვითარება, ქალების ეკონომიკური გაძლიერება, მათი ჩართულობის ზრდა ინფორმაციულ და საკომუნიკაციო ტექნოლოგიებში, განათლების პროგრამები ახალგაზრდებისთვის. სხვადასხვა გამოწვევების წინაშე ვართ, როგორიცაა კლიმატის ცვლილება და მასთან დაკავშირებული რისკები, ამიტომ მდგრადი ბიზნეს მოდელების მხარდაჭერა და მომხმარებლების, ბიზნესის, თანამშრომლების და მთლიანად საზოგადოების მდგრადობის გაზრდა ჩვენი მისიის განუყოფელი ნაწილია“ – აღნიშნავს ნინო მასურაშვილი.

„Uniting Business Europe“ კონფერენციის სპიკერები იყვნენ მაღალი რანგის ადგილობრივი და გლობალური ბიზნეს ლიდერები, ხელისუფლების, სამოქალაქო საზოგადოებისა და საერთაშორისო ორგანიზაციების წარმომადგენლები, მათ შორის:  ჰეიდი ჰაუტალა – ევროპული პარლამენტის ვიცეპრეზიდენტი (ჰიბრიდული ფორმატით), ვიტორია ფერაგამო – „ილ ბორო ტოსკანას“ მფლობელი, იმრან აჰმადზადა – NEQSOL Holding Azerbaijan ხელმძღვანელი, მელინა არაკელიანი –  ნიდერლანდების სამეფოს ელჩი საქართველოში, ნინო მასურაშვილი – თიბისი ბანკის გენერალური დირექტორის მოადგილე, ვალერი ჩეხერია – „რუმს ჰოტელსის“ აღმასრულებელი დირექტორი, ვახტანგ კაჭარავა – „თეგეტა ჰოლდინგის“  აღმასრულებელი დირექტორი,  სატიშ ბატი – „აჭარისწყალი ჯორჯიას“ აღმასრულებელი დირექტორი, იკინ ჰაჯიევი – „Sustainera Solution“-ის აღმასრულებელი დირექტორი, ჰენინგ სასე, „Norm”-ის აღმასრულებელი დირექტორი და სხვა.

კონფერენციის „Uniting Business Europe“ ორგანიზებულია შვედეთის მთავრობის მხარდაჭერით და ამერიკის შეერთებული შტატების საერთაშორისო განვითარების სააგენტოს (USAID) თანადაფინანსებით USAID-ის სამოქალაქო საზოგადოების ჩართულობის პროგრამის ფარგლებში.

ყოფილი ცოლისა და სიდედრის მკვლელობაში ბრალდებული პოლიციელი, რომელმაც დანაშაულის შემდეგ თვითმკვლელობა სცადა, გარდაიცვალა.

პოლიციელი რეანიმაციულ განყოფილებაში მკურნალობდა და მისი ჯანმრთელობის მდგომარეობა მძიმე იყო.

ცნობისთვის, 18 სექტემბერს, დოლიძის ქუჩაზე, მამაკაცმა ყოფილი ცოლი და სიდედრი მოკლა, რის შემდეგაც თვითმკვლელობა სცადა. სპეციალურმა საგამოძიებო სამსახურმა მომხდარ ფაქტთან დაკავშირებით გამოძიება სსკ-ის 11 პრიმა 109-ე მუხლით მიმდინარეობს, რაც ორი ან მეტი პირის მიმართ განზრახ მკვლელობას გულისხმობს.