“ქართული ოცნების” ლიდერი, ირაკლი კობახიძე მიიჩნევს, რომ ექსპრეზიდენტის დაცვის მხარისთვის სტრასბურგის სასამართლოდან სარჩელის გამოხმობა, შესაძლებელია, უფრო მოგებიანი იყოს, რადგან ეს, მისი შეფასებით, “საქმის წაგებას აჯობებს”:

“ფეიკკამპანიის ერთ-ერთი მთავარი ხაზი იყო ე.წ. მოწამვლა, ამასთან დაკავშირებით დაფინანსდა უამრავი სტატია საზღვარგარეთ, დაახლოებით 1 მლნ დოლარი დაიხარჯა ამისთვის, რაც იყო თავიდან ბოლომდე სიცრუე. როდესაც სარჩელი შეგაქვს სტრასბურგის სასამართლოში, გჭირდება უტყუარი მტკიცებულებები იმასთან დაკავშირებით, რომ გარკვეული ფაქტი ნამდვილად მოხდა. რა თქმა უნდა, ამის მტკიცებულებას ვერავინ წარმოადგენს, რადგან თავიდან ბოლომდე სიყალბე იყო საუბარი მოწამვლასთან დაკავშირებით, ეს იყო პიარული კამპანიის შემადგენელი ნაწილი. ასეთ პირობებში ძალიან გაუჭირდება სააკაშვილს და მის მხარეს რაიმე ფაქტის წარდგენა, სრულიად ლოგიკურია, რომ მათ ექნებათ პესიმიზმი ძალიან მაღალ ხარისხში. ბუნებრივია, მათი სარჩელი ვერ იქნება წარმატებული, გამომდინარე იქიდან, რომ ის თავიდან ბოლომდე სიყალბეზე იყო აგებული. აქედან გამომდინარე, შესაძლებელია, მათთვის უკეთესი იყოს სარჩელის უკან გამოხმობა, სარჩელის წაგებას ჯობია უკან გამოიწვიონ,” – განაცხადა კობახიძემ.

მედიასთან შალვა პაპუაშვილს ზურაბ ჯაფარიძის ტრენინგებზე და საერთაშორისო ორგანიზაციების მიერ მათ დაფინანსებაზე ესაუბრა. პარლამენტის თავმჯდომარემ აღნიშნა, რომ არასამთავრობო ორგანიზაციების მიერ დაფინანსება გამჭვირვალე უნდა იყოს. „ამაზე თავად IRI-მ უნდა ისაუბროს. ვფიქრობ, რომ ეს არის შესაძლებლობა მათთვის, რომ ჩახედონ, რამდენად სწორად მიემართება ის თანხები, რომლებითაც ისინი არიან წარმოდგენილი ამ სფეროში. აქ მნიშვნელოვანია ყველანაირი გამჭვირვალობა და სიცხადის შეტანა და მნიშვნელოვანია, რომ IRI-მ ან სხვა დამფინანსებელმა ღიად საზოგადოებას უთხრას: აფინანსებენ თუ არა პარტიას და ეს ფული შემთხვევით ხელფასების სახით ხომ არ მიდის პარტიულ ლიდერებთან. მეორე: ეს სემინარები, სადაც მიდის საუბარი რადიკალურ სცენარებზე, რევოლუციაზე და სადაც ახალგაზრდების გაშინაურება ხდება იარაღთან, არის თუ არა მათი თანხებით დაფინანსებული, ემიჯნებიან თუ არა ამ სემინარებს და აპირებენ თუ არა, შეწყვიტონ ურთიერთობა „გირჩთან“, – განმარტავს პაპუაშვილი.

პარლამენტის ვიცე სპიკერი გიორგი ვოლსკი „იმედის კვირასთან“ ინტერვიუში იმ შესაძლო საფრთხეებზე საუბრობს, რომლამდეც რადიკალური ოპოზიციური პარტიების ირიბმა დაფინანსებამ შეიძლება ქვეყანა მიიყვანოს. „საქმე გვაქვს უზნეო, პოლიტიკურ გაერთიანებასთან, რომელიც ცდილობს, რომ საქართველოში სამოქალაქო დაპირისპირების რესურსი შექმნას და რეკრუტიზაცია მოახდინოს ახალგაზრდების. სამწუხარო ის არის, რომ ასეთი ღონისძიებების დაფინანსება ხდება IRI-ის მიერ და ისეთი არასამთავრობო ორგანიზაციების გავლით, რომლებიც პირდაპირ არიან კონკრეტულ პოლიტიკურ პარტიებთან დაკავშირებული. თუ მათ მოსთხოვ გამჭვირვალეობას, ამას „რუსულ კანონს“ დაარქმევენ და შეიძლება გამოიყენონ თავისი ბინძური პროპაგანდისთვის. ვფიქრობ, ეს საკმაოდ სერიოზულ ზიანს აყენებს არა მარტო საზოგადოებას, არამედ დასავლური ფონდების იმიჯს, ვინაიდან, IRI-იც, NDI-იც საკმაოდ კარგ პროექტებს ახორციელებენ საქართველოში ბევრი მიმართულებით, მაგრამ როგორც კი ჩაერთვებიან ასეთ პროცესებში, რომელიც უპირისპირდება საქართველოს მომავალს, სტაბილურობას, იმ წუთში ჩრდილი გადაინაცვლებს ამ ორგანიზაციებისაკენ“, – განაცხადა ვოლსკიმ. რას ასწავლიან ზურაბ ჯაფარიძე და მისი პარტნიორები შაბათ-კვირის შეკრებებზე სტუდენტებსა და სკოლის მოსწავლეებს. საკითხით „იმედის კვირის“ ჟურნალისტები მას შემდეგ დაინტერესდნენ რაც ერთ ერთმა მონაწილემ „იმედს“ ტრენინგიდან ჩანაწერი მიაწოდა. ამის შემდეგ გადამღებმა ჯგუფმა შეისწავლა და მოიპოვა უამრავი ფოტო და აუდიო მასალა ღია თუ დახურული წყაროებიდან. ერთ-ერთ აუდიოჩანაწერში, რომელიც „იმედს“ ასევე წყარომ მიწოდა, ჯაფარიძის პარტიის ლიდერები დეტალურად განიხილავენ როგორ უნდა გარდაიქმნას ე.წ. თავისუფლების უიკენდები პროტესტად და რა როლი ექნება ამ პროცესში ჯაფარიძეს.

2015 წელს გავხდით ევროპის სოციალისტური პარტიის დამკვირვებელი წევრი, თუმცა 2015 წლიდან მოყოლებული არცერთი, თუნდაც მეტ-ნაკლებად ხმამაღალი მხარდამჭერი განცხადება არ გვახსოვს ევროპის სოციალისტური პარტიის მხრიდან, – ამის შესახებ ირაკლი კობახიძემ „იმედის კვირასთან“ საუბრისას განაცხადა. „ქართული ოცნების“ თავმჯდომარემ გაიხსენა ევროპარლამენტის რეზოლუციები, რომლებსაც სოციალისტების არაერთმა წევრმა დაუჭირა მხარი. საუბარია იმ რეზოლუციებზე, რომელთა ავტორებიც ბიძინა ივანიშვილის დასანქცირებას, ნიკა გვარამიასა და მიხეილ სააკაშვილის გათავისუფლებას ითხოვდნენ. „ბოლო წერტილი იყო ის რეაქცია, რომელიც მათ ჰქონდათ ბუდაპეშტში გამართულ კონფერენციაზე. კონფერენციის სახელწოდება იყო „ღმერთი, სამშობლო, ოჯახი“. როდესაც ამას აპროტესტებ, სრულიად ცხადია შეუთავსებლობა ჩვენს ღირებულებებსა და ამ ღირებულებებს შორის. ჩვენთვის მიუღებელია ეს ფსევდოლიბერალური იდეოლოგია, რომელსაც, სამწუხაროდ ძალიან აქტიურად მისდევს ბოლო წლები ევროპის სოციალისტური პარტია“, – განაცხადა კობახიძემ.

საქართველოს დანიის სამეფოს საგარეო საქმეთა მინისტრი ლარს ლოკე რასმუსენი ეწვია.­

საქართველოს საგარეო საქმეთა სამინისტროს ცნობით, თბილისის შოთა რუსთაველის სახელობის საერთაშორისო აეროპორტში დანიის პირველი დიპლომატის დახვედრის ოფიციალური ცერემონია გაიმართა, რომელშიც მონაწილეობა მიიღო საგარეო საქმეთა მინისტრის მოადგილემ, თეიმურაზ ჯანჯალიამ და დანიაში საქართველოს ელჩმა, ნატა მენაბდემ.

საგარეო უწყების ინფორმაციით, ვიზიტის ფარგლებში, დანიის საგარეო უწყების ხელმძღვანელს საქართველოს საგარეო საქმეთა მინისტრი ილია დარჩიაშვილი უმასპინძლებს. შეხვედრა გაიმართება როგორც პირისპირ, ასევე გაფართოებულ ფორმატში.

„დანიის სამეფოს საგარეო საქმეთა მინისტრთან შეხვედრას გამართავს საქართველოს პრემიერ-მინისტრი ირაკლი ღარიბაშვილი.

აღსანიშნავია, რომ ლარს ლოკე რასმუსენს თან ახლავს დანიელ ბიზნესმენთა დელეგაცია, გაიმართება მინისტრის და დელეგაციის შეხვედრა საქართველოს ვიცე-პრემიერთან, ეკონომიკისა და მდგრადი განვითარების მინისტრთან ლევან დავითაშვილთან.

ვიზიტის ფარგლებში დანიის საგარეო საქმეთა მინისტრი ქართველ კოლეგასთან, ილია დარჩიაშვილთან ერთად, ოფიციალურად გახსნის საქართველოში დანიის საელჩოს.

ამასთან, ლარს ლოკე რასმუსენი საოკუპაციო ხაზს ეწვევა და ადგილზე გაეცნობა არსებულ ვითარებას”, – აღნიშნულია საქართველოს საგარეო საქმეთა სამინისტროს ინფორმაციაში.