საქართველოს ხელისუფლება არ უერთდება სანქციებს, არაერთხელ გაგვიკეთებია განცხადება, არ მივიღებთ გადაწყვეტილებას, რომელიც დამაზიანებელი იქნება ჩვენი ქვეყნისთვის და დამაზიანებელი იქნება ამ ქვეყანაში მცხოვრები ადამიანებისთვის, – ამის შესახებ დედაქალაქის მერმა, კახა კალაძემ ჟურნალისტებთან საუბრისას განაცხადა.

მისი თქმით, რუსეთის მხრიდან შეზღუდვები დაწესებული იყო ცალმხრივად.

„თქვენ იცით, რომ ეს შეზღუდვა ცალმხრივად იყო დაწესებული. მივესალმები აღნიშნულ გადაწყვეტილებას. ის, რომ უვიზოდ მიმოსვლა და ფრენებიც შესაძლებელია, ცუდი ამაში არაფერია. თქვენ იცით, რომ საქართველოს ხელისუფლება არ უერთდება სანქციებს, აღნიშნულზე არაერთხელ გავაკეთეთ განცხადება. ჩვენ არ გავაკეთებთ ისეთ გადაწყვეტილებას, რომელიც ჩვენი ქვეყნისთვის დამაზიანებელი იქნება. სანქციებს არ ვუერთდებით”.

პირდაპირი ფრენები მარტო საქართველოშია? არ გაქვთ ინფორმაცია, რომელ ქვეყნებში დაფრინავს რუსეთიდან თვითმფრინავები? მარტო საქართველოშია ანალოგიური ფრენები?!” – აღნიშნა კალაძემ.

ჟურნალისტების კითხვაზე, კეთდება  განცხადებები, რომ სარკინიგზო მიმოსვლა შეიძლება აღდგეს, წავა თუ არა ხელისუფლება ამ დათმობაზე?  – „პირველად მესმის ამის შესახებ. რა დათმობაზე და საქართველოს ნაბიჯებზეა ზოგადად საუბარი, ეს იყო ცალმხრივი სანქცია, რომელიც იყო რუსეთის მხრიდან დაწესებული, მათ მიიღეს გადაწყვეტილება ამ სანქციის გაუქმებაზე. საქართველოს ხელისუფლება არ უერთდება სანქციებს. ამასთან დაკავშირებით არაერთხელ გაგვიკეთებია განცხადება, ჩვენ არ მივიღებთ გადაწყვეტილებას, რომელიც დამაზიანებელი იქნება ჩვენი ქვეყნისთვის და დამაზიანებელი იქნება ამ ქვეყანაში მცხოვრები ადამიანებისთვის“, – განაცხადა კახა კალაძემ.

გვეშინია, რომ პრეზიდენტის ვიზიტი და მისი განცხადებები დააზიანებს ჩვენს სწრაფვას კანდიდატის სტატუსის მიღებისკენ – უმჯობესია, პრეზიდენტს არ ჰქონდეს ფართო ასპარეზი ასეთი დამაზიანებელი განცხადებების გაკეთების დროს, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა, რითაც გამოეხმაურა პრეზიდენტის ადმინისტრაციის განცხადებას, რომ „15 მაისს ძალში შევიდა პუტინის განკარგულება ფრენების აღდგენაზე და 15 მაისსვე საქართველოს მთავრობამ გასცა თანხმობა, პრეზიდენტის ბრიუსელში ვიზიტზე თანხმობა კი ამ დრომდე არ გაუცია“.

კობახიძე აღნიშნულ განცხადებას სპეკულაციას უწოდებს და ამბობს, რომ თუ მთავრობას მიაჩნია, რომ პრეზიდენტის ვიზიტი არ წაადგება საქართველოს მიერ კანდიდატის სტატუსის მიღებას, კონსტიტუციით მინიჭებული სრული უფლება აქვს, ვიზიტზე თანხმობა არ გასცეს.

„პრეზიდენტი არ უნდა სპეკულირებდეს. რა შუაშია რუსეთის მიერ ფრენების ცალმხრივად აღდგენა და რა შუაშია პრეზიდენტის ვიზიტი უცხო ქვეყანაში? ეს აბსოლუტურად გაუგებარი შედარებაა. ეს ჩვეულებრივი სპეკულაციაა. სამწუხაროა, რომ პრეზიდენტის თანამდებობაზე მყოფი პირი სპეკულირებს. ეს ყველაფერი დასანანია. რაც შეეხება ვიზიტზე თანხმობის გაცემას, ეს საქართველოს მთავრობის ექსკლუზიური უფლებაა. თუ მთავრობას მიაჩნია, რომ პრეზიდენტის ვიზიტი არ წაადგება საქართველოს მიერ კანდიდატის სტატუსის მიღებას, მთავრობას კონსტიტუციით მინიჭებული სრული უფლება აქვს, პრეზიდენტს არ მისცეს ვიზიტზე თანხმობა. ჩვენ გვეშინია, რომ პრეზიდენტის ვიზიტი და მისი განცხადებები დააზიანებს ჩვენს სწრაფვას კანდიდატის სტატუსის მიღებისკენ. მოისმინეთ პრეზიდენტის განცხადებები საქართველოს პარლამენტის შენობაში, როდესაც მოხსენება ჰქონდა და დამეთანხმებით, ეს განცხადებები პირდაპირ ეწინააღმდეგება საქართველოს სურვილს, მიიღოს კანდიდატის სტატუსი დეკემბერში. მთავრობას დღემდე შეიძლება არ გაუცია ნებართვა, შეიძლება მოგვიანებით გასცეს – ეს მთავრობის პრეროგატივაა, მაგრამ ჩემთვის ლოგიკური იქნება, თუ მთავრობას ეშინია (ეშინია პირობითი სიტყვაა) პრეზიდენტის არასწორი განცხადებების. ჩვენ მოვისმინეთ პრეზიდენტის განცხადებები, რომელიც დამაზიანებელია კანდიდატის სტატუსის მიღებისთვის. როდესაც პრეზიდენტი აცხადებს, რომ პარლამენტი მხოლოდ ფორმალურად ასრულებს რეკომენდაციებს და სინამდვილეში ნაბიჯები არ იდგმება, ეს დამაზიანებელია. უმჯობესია, პრეზიდენტს არ ჰქონდეს ფართო ასპარეზი ასეთი დამაზიანებელი განცხადებების გაკეთების დროს იმისთვის, რომ არ დაზიანდეს კანდიდატის მიღების პროცესი“, – განაცხადა ირაკლი კობახიძემ.

ცნობისთვის, პრეზიდენტი ბრიუსელში ვიზიტს გეგმავს, რასთან დაკავშირებითაც საქართველოს მთავრობისგან თანხმობას ელოდება.

„15 მაისს ძალში შევიდა პუტინის განკარგულება პირდაპირი ფრენების აღდგენის შესახებ. 15 მაისსვე საქართველოს მთავრობამ დაუყოვნებლივ გასცა თანხმობა.

27 აპრილს მთავრობამ მიიღო მიმართვა 31 მაისს პრეზიდენტის ბრიუსელში ვიზიტთან დაკავშირებით. საქართველოს მთავრობას ამ დრომდე თანხმობა არ გაუცია“, – აცხადებენ პრეზიდენტის ადმინისტრაციაში.

კეზერაშვილი არის ცნობილი ოლიგარქი, ცნობილი ყაჩაღი, შარაგზის ყაჩაღი, რომელიც ძარცვავდა ჯერ ბიზნესმენებს, შემდეგ ჯარს და შემდეგ ევროპელ პენსიონერებს. ახლა გაკადნიერდა და „ბიბისის“ უჩივლა, როცა ის ამხილეს, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, კეზერაშვილს იმედი აქვს, რომ ფულით იყიდის იმ სასამართლოს, რომელიც „ბიბისის“ საქმეს განიხილავს.

„კეზერაშვილი თავს დაესხა თავისუფალ მედიას. ადრესატი მისი კუთვნილი ტელევიზია რომ ყოფილიყო, აუცილებლად ასეთ სიტყვებს გამოიყენებდა, რამდენჯერაც სარჩელი შევიტანეთ კონკრეტული მედიასაშუალების მიმართ, როცა საქმე ეხებოდა სიცრუის გავრცელებას და ა.შ., იმდენჯერ კეზერაშვილის ტელევიზიამ ამას უწოდა თავისუფალ მედიაზე თავდასხმა. ამ შემთხვევაში გამოდის, რომ კეზერაშვილი თავს ესხმის თავისუფალ მედიას და ეს არის „ბიბისი“.

კეზერაშვილი არის ცნობილი ოლიგარქი, ცნობილი ყაჩაღი, შარაგზის ყაჩაღი, რომელიც ძარცვავდა ჯერ ბიზნესმენებს, შემდეგ ჯარს და შემდეგ ევროპელ პენსიონერებს. ახლა გაკადნიერდა და „ბიბისის“ უჩივლა, როცა ის ამხილეს. მას იმედი აქვს, რომ ფულით იყიდის იმ სასამართლოს, რომელიც „ბიბისის“ საქმეს განიხილავს. ფული საკმაოდ ბევრი აქვს, მას შეიძლება ჰქონდეს საკუთარი პატრონების იმედი, რომლებიც მას ეხმარებიან თავისუფალ მიმოსვლაში ევროპაში. თუ პატრონებიც დაეხმარებიან და დიდი ფულიც იმოქმედებს, შეიძლება, კეზერაშვილმა „ბიბისიც“ დაამარცხოს, როგორც თავის დროზე ამარცხებდა ბიზნესმენებს, ჯარს ძარცვავდა და ამარცხებდა ევროპელ პენსიონერებს. ვნახოთ, დაამარცხებს თუ არა „ბიბისის“, თავისუფალ მედიას“, – განაცხადა კობახიძემ.

არცერთი „ნაცი“ არცერთ ორგანოში, ეს არის ჩვენი მარტივი პრინციპი და ამ პრინციპით ვიმოქმედებთ მომავალშიც, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, ამ პრინციპს ადრე კომპრომისებით ეკიდებოდნენ, მაგალითად, როცა ნინო ლომჯარია სახალხო დამცველად აირჩიეს.

„როცა საუბარია 3-2-ზე, 4-1-ზე და ა.შ., ერთი პრინციპია ჩვენთვის ძალიან მნიშვნელოვანი, რასაც ადრე შეიძლება, ცოტა კომპრომისებით ვეკიდებოდით, მაგალითად, როდესაც ნინო ლომჯარია ავირჩიეთ სახალხო დამცველად და ა.შ. აღარ გავყვები. ჩვენი პრინციპი მარტივია – არცერთი „ნაცი“ არცერთ ორგანოში, ეს არის ჩვენი მარტივი პრინციპი და ამ პრინციპით ვიმოქმედებთ მომავალშიც“, – განაცხადა ირაკლი კობახიძემ.

ირაკლი კობახიძემ ისაუბრა, რა ვითარებაში მოხდა სახალხო დამცველად ლევან იოსელიანის არჩევა. ამასთან, აღნიშნა, რომ ოპოზიციისთვის ლიბერალურ-ფაშისტურ კამპანიაში ჩართული და არაკომპეტენტური კანდიდატები იყვნენ მისაღები.

„კანდიდატები კონკრეტული კრიტერიუმების მიხედვით უნდა აირჩნენ. ეს არის კომპეტენცია, კეთილსინდისიერება, მიუკერძოებლობა და თითქმის ერთი წელი ჩვენ გთავაზობდით კონსულტაციებს სწორედ ამ კრიტერიუმების გარშემო. ამის სანაცვლოდ ვიღებდით მიდგომას, რომ არჩეული უნდა იყვნენ ის კანდიდატები, რომლებიც ვიღაცისთვისაა მისაღები.

კონსულტაციები უნდა გამართულიყო კომპეტენციის, კეთილსინდისიერების, მიუკერძოებლობის საკითხის გარშემო, მაგრამ თქვენ არ ისურვეთ ასეთ კონსულტაციებში მონაწილეობა. კარგია, რომ გაიხსენეთ სახალხო დამცველის არჩევა. კიდევ ერთხელ აქაც შეგახსენებთ, რა მოხდა, არავითარი კონსულტაციები კრიტერიუმების გარშემო. თქვენ დააყენეთ ულტიმატუმი. თავიდან სამი კანდიდატი, შემდეგ ორი კანდიდატი. არსებითად, სამ კანდიდატთან დაკავშირებით ითხოვდით მაინც და მაინც ამ სამი კანდიდატის მხარდაჭერას. შეგახსენებთ, ვინ იყვნენ ეს ადამიანები, გვარების დასახელების გარეშე – აქედან, ამ სამიდან, სულ მცირე, ორი პირდაპირ იყო ჩართული ლიბერალურ-ფაშისტურ კამპანიაში უმძიმესი ფორმებით, ერთ-ერთი კანდიდატი საერთოდ იმდენად არაკომპეტენტური იყო, რომ ვერც კი გაბედა გასაუბრებაზე მოსვლა. თქვენი განცხადებით, ესენი იყვნენ საუკეთესო კანდიდატები. მიუთითებთ იმ კომისიაზე, რომელიც როგორ დაკომპლექტდა, თქვენც კარგად მოგეხსენებათ. ანუ ლიბერალურ-ფაშისტურ კამპანიაში ჩართული კანდიდატები და არაკომპეტენტური კანდიდატი იყვნენ თქვენთვის მისაღები, ეს არის თქვენი მიდგომა, დამოკიდებულება. კიდევ ერთხელ მინდა, გკითხოთ, რა დაუწუნეთ ლევან იოსელიანს? კომპეტენცია, კეთილსინდისიერება თუ რა დაუწუნეთ? ბუნებრივია, არაფერი დაგიწუნებიათ, გარდა ერთია, ის არ იყო მართული თქვენი მხრიდან. ეს იყო ერთადერთი, რაც დაუწუნეთ სახალხო დამცველს, რომელიც იმის შემდეგაც გახდა დაწუნების ობიექტი. გამოიყვანეთ თქვენი მხარდამჭერი „ენჯეოები“ და პირდაპირ უარყოფითად შეაფასებინეთ მათ მისი არჩევა სახალხო დამცველის თანამდებობაზე. ეს არის თქვენი მიდგომა, თქვენი დამოკიდებულება, როცა ხინჯი არ აქვს კანდიდატს, მაშინაც არ უჭერთ მას მხარს. რატომ? იმიტომ, რომ ეს კანდიდატი უნდა იყოს მაინც და მაინც თქვენთან მიკუთვნებული. ეს არის თქვენი ერთადერთი მიდგომა.

რაც შეეხება ბულინგს, ამაზე უკვე ითქვა. მართლა ყველაფერს რომ თავი დავანებოთ, პირდაპირ ხმები გამოდიოდა კონკრეტული ოთახებიდან, არ იყო მაინც და მაინც სასიამოვნო ხმები, რომლებიც იქიდან გამოდიოდა. ამაზე თქვენ მიერ მართული ტელევიზიები საუბრობდნენ, სხვას რომ თავი დავანებოთ“, – განაცხადა ირაკლი კობახიძემ.

თბილისის მერის, კახა კალაძის განცხადებით, მისასალმებელი იქნება, საქართველოს სტრატეგიულმა პარტნიორმა ქვეყანამ ქართველებს მისცეს შესაძლებლობა, ამერიკაში ვიზების გარეშე, ან  გამარტივებული პროცესის გავლით ჩავიდნენ.

მისი თქით, სტატისტიკის მიხედვით, მეზობელ ქვეყნებთან შედარებით, საქართველოში აშშ-ს საელჩოში გაცემული ვიზების რაოდენობა მცირეა.

„მივესალმები იმას, რომ ჩვენს სტრატეგიულ პარტნიორ ქვეყანასთან საქართველოს მოქალაქეების გადაადგილება უვიზოდ იყოს შესაძლებელი. შეიძლება, ეს დღეს რთულად გასაკეთებელი იყოს, მაგრამ  გაცემული ვიზების რაოდენობის სტატისტიკა რომ ვნახოთ,  საქართველო ამ მხრივ მეზობელ ქვეყნებს ძალიან ჩამორჩება. გამიხარდებოდა ჩვენს სტრატეგიულ პარტნიორს ჰქონდეს იმის შესაძლებლობა, რომ საქართველოს მოსახლეობას მოუხსნას სავიზო რეჟიმი ან კიდევ უფრო გამარტივდეს ეს პროცესი,”- აღნიშნა კახა კალაძემ.

ქართული საზოგადოება უსმენს ამ ორმაგ სტანდარტს, ახლა ქალბატონი სალომე სამადაშვილი ჰყვებოდა თურმე შეშფოთებული და დაბნეული ვარო, აღმოჩნდა ე.ი. ამ მოსამართლეებს კლანის წევრებს ეძახიან, მაგრამ თვითონ თურმე გარიგება სდომებიათ, ორი გვარი დაუსახელებიათ, ხუთიდან ორს თუ დავუთმობდით, ის დანარჩენი სამი კლანის წევრი აღარ იქნებოდა?, – ამის შესახებ „ქართული ოცნების“ წევრმა, ირაკლი ზარქუამ განაცხადა.

ზარქუას თქმით, ოპოზიცია ორმაგი სტანდარტებით მოქმედებს.

„ეს არის მიდგომა, რომ ისევ გინდათ დაიბრუნოთ ის სადავეები და გავლენები სასამართლოსი. გამოწვევები არის დღეს სასამართლოში, მაგრამ ამავე დროს ის პირველი, მეორე, მესამე, მეოთხე ტალღის შედეგად არის რომ სტრასბურგმა „რუსთავი- 2“-ის თემაზე თქვა, რომ დიახ, ყველა ინსტანციაზე სამართლიანი სასამართლოს უფლება დაცული იყო. ბოლოს კიდევ გაგაწნათ პოლიტიკური სილა, როცა სააკაშვილის თემაზე სტრასბურგმა ისევ ის გადაწყვეტილება მიიღო და არ გადაიყვანა. მერამდენედ უნდა შეეჩეხოთ ამ პრობლემას. თქვენი მხრიდან გამოჩნდა ისე, როგორც სახალხო დამცველის თემაზე გეუბნებოდით. თქვენი ამოცანაა, ჩავარდეს იუსტიციის უმაღლესი საბჭოს წევრთა არჩევები და საქართველომ ხელმეორედ არ მიიღოს კანდიდატის სტატუსი. მე ხომ ვიცი ქალბატონი სალომე სამადაშვილი ამაზე დადის. გამხილათ თქვენმა ლიდერმა ხაზარაძემ, რომ რადიკალურ ოპოზიციაში არის გუნდი, ვინც დადის და ამბობს, რომ „ქართული ოცნების“ პირობებში საქართველომ არ უნდა მიიღოს სტატუსი, ეს არის თქვენი ხელწერა, ეს არის თქვენი მიდგომა. ამიტომ, ის ხალხი, ვინც გუშინ მხარი დაუჭირა, დადგა ვიწროპარტიული ინტერესების მაღლა და ეს ვერ აპატიეთ. ბულინგის მსხვერპლი გახადეთ“, – განაცხადა ზარქუამ.

პარლამენტის დღევანდელ პლენარულ სხდომაზე იუსტიციის უმაღლესი საბჭოს არამოსამართლე წევრის ორ ვაკანტურ თანამდებობაზე ასარჩევად ოთხ კანდიდატს ხელახლა ეყარა კენჭი.

კერძოდ, მეორე ტურში კენჭი უყარეს რუსუდან კვინიკაძის, გოგა კიკალაშვილის, ლევან ნემსაძისა და ნინო ნიშნიანიძის კანდიდატურებს, რომლებმაც გუშინდელი კენჭისყრის დროს სხვებთან შედარებით მეტი ხმა მიიღეს.

ვერცერთმა კანდიდატმა ასარჩევად საჭირო 90 ხმა ვერ მიიღო, რის გამოც მესამე ტური გაიმართება. კერძოდ, დღევანდელი კენჭისყრის შედეგად ხუთი ხმა მიიღო რუსუდან კვინიკაძემ, გოგა კიკალაშვილს მხარი დაუჭირა ექვსმა დეპუტატმა, ლევან ნემსაძეს ხმა მისცა პარლამენტის ათმა წევრმა, ხოლო ნინო ნიშნიანიძემ მიიღო 11 ხმა.

აღსანიშნავია, რომ კენჭისყრების დაწყებამდე პარტია „ქართული ოცნების“ თავმჯდომარემ, ირაკლი კობახიძემ უმრავლესობის დეპუტატებს მიმართა, იუსტიციის საბჭოს წევრობის კანდიდატებთან დაკავშირებით დღეს ფორმალური კენჭისყრა ჩატარებულიყო და ოთხ კანდიდატზე კონსულტაციები გამართულიყო.

„რეგლამენტის თანახმად, ორ კვირაში უნდა ჩატარდეს შემდეგი კენჭისყრა, ე.წ. მესამე ტური, მანამდე გავიაროთ კონსულტაციები ოთხი კანდიდატის გარშემო, რომლებიც დღესაც წარმოდგენილია, დღეს ჩავატაროთ ფორმალური კენჭისყრა“, – განაცხადა კენჭისყრის დაწყებამდე ირაკლი კობახიძემ.

საპარლამენტო უმრავლესობის წევრი, ირაკლი ზარქუა პარლამენტში გუშინდელი კენჭისყრის შემდეგ ფრაქცია „ნაციონალურ მოძრაობაში“ განვითარებულ მოვლენებს გამოეხმაურა.

“კიდევ ერთი ლუსტრაცია მოხდა გუშინდელი სესიის შემდეგ, რომ რადიკალურ ოპოზიციას არაფრად აინტერესებს ქვეყნის ევროინტეგრაცია. გვერდიგვერდ სხედან რამდენი ხანია და განსხვავებული აზრის გამო ჯვარს აცვეს ოპოზიციონერი დეპუტატები, რომლებმაც კენჭისყრაში მიიღეს მონაწილეობა. დღეს ვეძებ. მაჭუტა როგორ არის, პირველი ეგ ვიკითხე“, – განაცხადა ზარქუამ.

შეგახსენებთ, პარლამენტის პლენარულ სხდომაზე გამართული კენჭისყრის შედეგად, იუსტიციის უმაღლესი საბჭოში არსებული 5 არამოსამართლე წევრის ვაკანსიიდან სამი ვაკანსია შეივსო. 90 ხმაზე მეტი ხმა ტრისტან ბენაშვილმა (93 ხმა), გიორგი გზობავამ (91 ხმა) და ზურაბ გურასპაშვილმა (93 ხმა) მიიღეს და შესაბამისად, იუსტიციის უმაღლესი საბჭოს არამოსამართლე წევრები გახდნენ. კენჭისყრაში ხუთმა ოპოზიციონერმა დეპუტატმა მიიღო მონაწილეობა. აქედან 4 – ნიკა მაჭუტაძე, ნატო და როსტომ ჩხეიძეები და ბაჩუკი ქარდავაა, რომლებიც ფრაქცია „ნაციონალური მოძრაობის” წევრები იყვნენ. მათ ფრაქცია გუშინ დატოვეს.