ყულევში ერთი კვირის წინ შემოსული 600 რუსული ვაგონია სანქცირებული მაზუთით დატვირთული, 35 ათას ტონაზეა საუბარი. მესაკუთრე არის „გაზპრომ ნეფტი“, დაიტვირთა მახაჩკალაში. დაღესტანი – აზერბაიჯანის გავლით შემოვიდა საქართველოს ტერიტორიაზე, – ამის შესახებ პარლამენტის პლენარულ სხდომაზე პარტია „ნაციონალური მოძრაობის“ თავმჯდომარე ლევან ხაბეიშვილმა განაცხადა.
ამასთან, ხაბეიშვილმა გააკრიტიკა ხელისუფლების წარმომადგენელთა განცხადებები რუსეთთან პირდაპირი ფრენების აღდგენასთან დაკავშირებით.
„პუტინის გადაწყვეტილებებთან დაკავშირებით, იმ პუტინის, ბავშვების მოკვლით რომ არის დაკავებული, ჩვენი ქვეყნის ოკუპაციით, უკრაინაში ტერორიზმით ფაქტობრივად, ასეთი განცხადებები მოვისმინე: კეთილი ნება, სამართლიანი, სასიკეთოდ წაადგება და თქვენ ხომ არ გგონიათ, რომ ამას მარგარიტა სიმონიანი ან სალავიოვი საუბრობდა, ამას საუბრობდა თეა წულუკიანი, რუსული პარტიის, რუსული მთავრობის წარმომადგენელი, ასე ლაპარაკობდა პუტინზე, ამ ტერორისტზე, 123 ქვეყანაში რომ ძებნილად არის გამოცხადებული, ლაპარაკობდა რომ სასიკეთო, სამართლიანი გადაწყვეტილებააო და არც შერცხვათ უმრავლესობის ბევრმა წევრმა გაიმეორა მერე იგივე.
სანქციებზე როცა საუბრობთ, ჩვენ ვითხოვთ სანქცირებას ბიძინა ივანიშვილის, უჩა მამაცაშვილის, ლილუაშვილის და მისი გარემოცვის და არა ჩვენი ქვეყნის სანქცირებას. მინდა ერთი ახალი ინფორმაცია მოგაწოდოთ, საგამოძიებო მოქმედებები რომ დაიწყოს სწრაფად: ყულევში ერთი კვირის წინ შემოსული 600 რუსული ვაგონია სანქცირებული მაზუთით დატვირთული, 35 ათას ტონაზეა საუბარი. მესაკუთრე არის „გაზპრომ ნეფტი“, დაიტვირთა მახაჩკალაში. დაღესტანი – აზერბაიჯანის გავლით შემოვიდა საქართველოს ტერიტორიაზე და ეს გადაზიდვა განახორციელა კომპანია „მადოფსმა“.
ტვირთის წარმოშობის სერთიფიკატი არის გაყალბებული და ნათქვამია, რომ თითქოს „რუსთავ ოილი“ არის ასეთი და იქ მოიპოვეს თურმე თუ გადაამუშავეს მაზუთი. არადა „რუსთავ ოილს“ ლიცენზია მხოლოდ ბიტუმის გადამუშავებაზე აქვს. ანუ ეგეთი ლიცენზია არ არსებობს, მაგრამ უცვლიან საქართველოში სერთიფიკატს, რომ მერე ეს ტვირთი მოხვდეს ევროკავშირის ქვეყნებში. სხვათაშორის, ბიზნესმენი, რომელიც ამას აკეთებს არის რუსი ბიზნესმენი ბატონი გოგელია“, – განაცხადა ხაბეიშვილმა.
მისივე თქმით, აქვს დოკუმენტები, რომელიც მოიცავს საჯარო რეესტრის ინფორმაციას. ამასთან, ხაბეიშვილი ამბობს, რომ საქართველოში სანქცირებულ ტვირთი შემოაქვს ივანიშვილის ძმას.
„ამასობაში ყველამ კარგად ვიცით, რომ სანქცირებულ ტვირთს საქართველოში ეზიდება ივანიშვილის ძმა. ყველაფერს რომ თავი დავანებოთ, აგერ არის ექსპერტიზის დასკვნა, რომ ეს დიზელი არის მკვლელი დიზელი, ადამიანის ჯანმრთელობის და სიცოცხლისთვის არის უმძიმესი, მაგრამ ივანიშვილის ძმა არის. კი ამბობდა მე რა შუაში ვარო, მაგრამ ივანიშვილის ძმა და კაპანაძე ბიზნესპარტნიორები არიან. ამასობაში ოლიგარქიული მაფიოზური კლანი გაქვთ ჩამოყალიბებული და არაფერს ლაპარაკობთ ადამიანების გაჭირვებაზე, ტარიფებზე დაისვა საკითხი და ფეხებზე გკიდიათ, არც განიხილავთ ამას,“- განაცხადა ხაბეიშვილმა.
მისივე თქმით, საქართველოში გაიზარდა ფასები, ბანკების მოგება, თუმცა, არ გაზრდილა ადამიანების შემოსავალი, რაც არ აინტერესებს ხელისუფლებას და კანონი შემოაქვთ თალაკვაძის ავტომობილისთვის.
„პროექტში წერთ 40 წელიწადზე ხნიერი რომელიც არისო, თალაკვაძის ავტომობილი არის 50 წლის და კანონი შემოგაქვთ, რომ იაფად განაბაჟოს, აჩიკოს რომ ნაკლები ფული გაუვიდეს, კანონპროექტი დაწერეთ, ამას განიხილავთ, თითქოს მეტი საქმე არ იყოს ამ ქვეყანაში,“- განაცხადა ხაბეიშვილმა.
